مستحيل الي قاعد اشوفه!؟ ممكن تفسير؟

[pacino]

السلام عليكم ورحمة الله وبركاتة

من زمان وانا اشوف فيديوات عاليوتيوب تسمى "هجولة" وكل فيديو اشوفه يخليني اتعجب ويدور ببالي مليون سؤال..بالاول اترككم مع هذا الفيديو ثم عندي اساله وارجو الاجابة عليها
[video]www.youtube.com/watch?v=Dv1G6fNNdto[/video]

1-في البداية لا يشك احد ..حتى غير المسلم.. ان ما يقوم به هالشباب هو انتحار..لكن مايفكرون ان وراهم اهل ينطرونهم ويخافون عليهم وراح يتأذون اذا صار لهم شي؟
2-وين تربية الاهل؟ شباب يتجمع بالعدد الهائل هذا ..لا حسيب ولا رغيب واعمارهم ما تتعدى 18 سنه؟
3-وين دور الحكومة والسلطات الامنية..فيديو مدته نص ساعه ما شفت ولا دوريه امن؟ اصلا مفروض استعمال القوه والرصاص الحي على هالتجمعات..لانهم خطر مو بس على نفسهم على غيرهم
4-بالنسبة للجمهور:مو حرام طاااااقات بشريه وشباب يروح وقتهم وتفكيرهم عالفاضي؟مافي اماكن ثانية يقضون اوقاتهم فيها؟عالاقل ما اقول يقضون اوقاتهم يحفضون القرآن او ينمون مواهبهم الدراسية..لا لا..عالاقل يقضون وقتهم في امكان ترفيهيه مثل باقي البشر بالعالم!!؟
5-بالنسبة للمفحطين:يرحم والديك شنو المتعه الي فيها؟آخرتها اذا ما ممت بتتكسر السيارة..انا اذا خرب ليت سيارتي يضيق خلقي مالي خلق اروح الصناعيات ابدل وافك واركب..الحياة اكبر!!
6-المارة الي مالهم شغل وتضرووا من هالحوادث..شنو ذنبهم؟بعضهم سواقين تكاسي وعيشتهم على سيارتهم فاذا تضررت فلا حول لهم ولا قوة..
واسألة كثيييرة...

 

[Al Pacino]

والله ما أكذب أني أستانست لما كم واحد ببداية المقطع صدم "طبعًا تأثرت سيارته بس" خله ينقرص ويتعلم.


للامانه قبل سنتين انصدمت أن هالظاهرة لازالت موجودة! توقعت الناس عقلت وبطلت هالامور من 2005 ..


عموما هي مالها حل، مهما نصحت فيهم ماراح يفيد، مايتعلم الين مايروح فيها بكسور واعاقات ولا خويه "المعزز" يموت بجمبه.

 

[DONY]

الله يموت هالفئة من زبالة المجتمع قبل ما يموتونا احنا !!! لسة يوم الخميس اتضريت انا و معايا اختي الصغيرة واحنا عند ابحر راجعين البيت انه ننتظر ونكون على اعصابنا لمدة ساعتين بس بسبب انه في ناس زبالة زي اللي بالفيديو مقفلين الطريق وعن يستهبلو ... حسبي الله عليهم وانشالله نرتاح منهم باسرع وقت .. هذول خلاص ما منهم حل !.

 

[Axels]

الله يهداهم ان شاء الله .. و المفروض الحكومه لها دور جدي مع هذا الأمر و أن لا تتركه يأخذ مساحة أوسع + سكوت الحكومات راح يوسع من مساحة هالشي و راح يكبر .. لذلك نقول الله يهداهم و يبعد عنهم هالتصرفات 🙂 .

 

[Old Snake]

إيش الله يموت وما يموت, شباب تراهم إخوة مسلمين والواجب الدعاء بالهداية.

 

[Bushido]

قبل شتم وسب هؤلاء الشباب، هل سألتم أنفسكم أين يمارسون هذه الهواية؟ المفروض أن رعاية الشباب تتبنى هذه الموهبة وتقدم الحلول.
أما سب وشتم وانتقاد، لن يأتي بشيء. الحل لدى المسؤولين، وعلى فكرة أنا أنتقد هذه الممارسات.

عن نفسي أحب رياضة السيارات والسباقات لكن بشكل مقنن ونظامي.

 

[SAUD~F-16]

ايـــه بس, الشيء هذا موجود من زمان ولو بيسون شيء يوقفه كان سوه من مبطي, والمشكلة الشيء هذا بدا يكبر وتطلع له فروع, عندك الدرفته والتفجير والرفع والخ..

الله يهديهم

 

[persona]

انا صكرت الفيديو ليما واحد فيهم صدم سيارته بسياره ثانية بقوة .. والا واحد من الجمهور يقول ..خفايف خفايف ..

هالاشكال ماينفع معاهم الا الترهيب ، لا نقاش ولا نصيحة..

 

[Bushido]

توني كمّلت الفيديو. بصراحة آخر الدقايق = أقوى الحوادث. شيء يعور القلب.

 

[Eye]

احنا مجتمع تتوافر فيه عدة عناصر تولد هالشئ
اولا : مال .. اغلب هذولا اهلهم موفرين لهم سبل عيش جيدة وما يضطرون يشتغلون عشان يجيبون لقمة العيش ناهيك عن السيارة
ثانيا: فراغ.. الناس اذا ما عندها شئ يشغلها رح تشغل نفسها باشياء
ثالثا: عدم وعي .. يعني هذولا تلاقيهم يسوون الأشياء هذي ومو حاطين ببالهم غيرهم
رابعا: عدم وجود وسائل ترفيه ملائمة لهم .. كل شخص له اهتمام معين .. يعني مو تقولي يروحون يلعبون كورة وهم ناس ما يحبون الكورة وقس على ذلك..
خامسا : مافيه رقابة .. لو كان فيه رقابة على الشوارع كان خف الشئ هذا
سادسا : عدم توفر ادوات السلامة .. ما اقصد طفاية حريق .. بس هالمجانين اللي يراقبون المفروض ياخذون مسافة كافية .. والسواقيين المفروض ما يفحطون في شوارع فيها عوائق
او صبيات او طعوس او سيارات !!
سابعا : رغبة في لفت الانتباه وتشجيع.. لو ما كان فيه ناس تشجعهم وتعزز لهم كان القصة هذي منتهي من زمان

بعدين يا شباب الله يهديكم ايش اللي الله يموتهم وزبالة مجتمع وما ينفع وياهم الا الترهيب..
المفروض على المجتمع ككل - واحنا من ضمنهم- نقدم النصيحة بالحكمة والموعظة الحسنة ..
ما ندعي عليهم ونستحقرهم @@ .. الله اللي عطانا العقل وكرمنا باستخدامه حرمهم .. يعني ماله داعي نتكبر عليهم قبل ما نعرف نواياهم

عندي حل جيد .. يرفع خطاب لوزارة الداخلية والمرور ويتم انشاء شوارع بعيدة عن السكن مخصصة للتفحيط
تكون مزفلتة صح وفيه اماكن بعيدة للجماهير .. بعدين الشرهة على الأهل اللي ولدهم يكسر سيارته ويشترون له ثانية ><
وبرضوا المفروض المرور يزيدون الرقابة على الشوارع.. بحيث تمر دورية كل ساعة على الشارع بنظام معين يحد من هالظواهر
لأن احنا اول دولة فالعالم من ناحية الموت بسبب الحوادث المرورية .. واظن 99% منهم بسبب الحوادث @@ مجازا

 

[Old Snake]

اولا : مال .. اغلب هذولا اهلهم موفرين لهم سبل عيش جيدة وما يضطرون يشتغلون عشان يجيبون لقمة العيش ناهيك عن السيارة

مو شرط ترى, كثير منهم على قد حاله والسيارة الي يفحط فيها تكون مسروقة أو إيجار.

 

[Assassin'o]

ناس ماتدري شتبي من الحياة :laugh::

 

[DONY]

بعدين يا شباب الله يهديكم ايش اللي الله يموتهم وزبالة مجتمع وما ينفع وياهم الا الترهيب..
المفروض على المجتمع ككل - واحنا من ضمنهم- نقدم النصيحة بالحكمة والموعظة الحسنة ..
ما ندعي عليهم ونستحقرهم @@ .. الله اللي عطانا العقل وكرمنا باستخدامه حرمهم .. يعني ماله داعي نتكبر عليهم قبل ما نعرف نواياهم

ما اتوقع النصح راح ينفع مع ناس مثل هالنوعية , والله لولا المرور جو كنا جلسنا للصباح حتى منظرهم المقرف طالع زي الصراصير وهم بيجرو من شرطة المرور ... مستحيل النصح ينفع معاهم , كمان بالله ايش ممكن تكون نية واحد رايح ياَذي العالم ويصارخ ويعلي مسجل السيارة وهو بيفحط ؟

 

[Burdegation]

عقد مامنهم فايده

مال يدشوّن بطوفه قبل لا اي واحد منهم يدعم او يدهس واحد ماله ذنب كان فقط مار بهالمكان

 

[Old Snake]

يا إخوان الهداية بيد الله مو بأيديكم, وش الكلام الفاضي هذا...\:
أعرف شخصياً أكثر من شخص أهتدى من المفحطين, ولا مو كلهم عشان ماتوا ولا أحترقوا ومن ذا الكلام وإنما من نصيحة.
ترى الفلسفة هذي خطيرة شباب وكلنا عارفين حديث الرسول صلى الله عليه وسلم (قال رجل : والله لا يغفر الله لفلان ، فقال الله عز وجل : من ذا الذي يتألى علي أني لا أغفر لفلان ؟ قد غفرت له وأحبطت عملك )

 

[Eye]

ما اتوقع النصح راح ينفع مع ناس مثل هالنوعية , والله لولا المرور جو كنا جلسنا للصباح حتى منظرهم المقرف طالع زي الصراصير وهم بيجرو من شرطة المرور ... مستحيل النصح ينفع معاهم , كمان بالله ايش ممكن تكون نية واحد رايح ياَذي العالم ويصارخ ويعلي مسجل السيارة وهو بيفحط ؟

انا مقدر اللي حصل لك وحاس فيك والله.. ومعاك حق صراحة باللي تحسه كون احد اعتدى عليك بهالشكل وانت مع اهلك.. حسبي الله ونعم الوكيل ..
فعلا اللي يسونه غلط كبييييير ..لكن النصح عشان تقيم عليهم الحجة وتعلمهم بفداحة اللي يسونه وتوعيهم وبكذا تنتفي عنهم الموانع ويحق لك فيما بعد عقابهم وانتقاصهم
اذا ما استمعوا للحق ..

حمدي@

يا إخوان الهداية بيد الله مو بأيديكم, وش الكلام الفاضي هذا...\:
أعرف شخصياً أكثر من شخص أهتدى من المفحطين, ولا مو كلهم عشان ماتوا ولا أحترقوا ومن ذا الكلام وإنما من نصيحة.
ترى الفلسفة هذي خطيرة شباب وكلنا عارفين حديث الرسول صلى الله عليه وسلم (قال رجل : والله لا يغفر الله لفلان ، فقال الله عز وجل : من ذا الذي يتألى علي أني لا أغفر لفلان ؟ قد غفرت له وأحبطت عملك )

والله كلام كبير .. الإله يجزيك خير ..
الله يهدينا ويهديهم إلى سواء السبيل

 

[Uzumaki Naruto]

أستغرب من الي يستغرب من الي يقول ليش العالم تفحط ووين المتعه فيها؟ (أنواع الأغلاط القواعديه بالجمله أحس @@) بس معروف انو في ناس يتللذوا بمتعة الخطر وحالاة قرب الموت وبلا بلا بلا, يعني الي أنتم تشوفونه سبب بعدم تصديقكم ليش الناس تسوي هالشي هو أصلاً السبب الي يسوونه عشانه! صحيح انو الدين ما يسمح بهالشي بس الي أقصده انو شي منطقي تماماً عندي في اني أشوف ناس كذا, بيسبب مشكله له مع نفسه أنا وش دخلني فيه؟ أغلب الي يفحطون يفحطون بأماكن بعيده برا المدينه, بس ناس زي الي قال عنهم دوني ولا بوسط الشارع عام فجأه تلقى واحد شاطح يذب الموتر يمين ويسار بين السيارات هنا الي لأ وألف لا, مهما كان يحسب نفسه قياده استهتار بأرواح غيرك هو الي أشوفه اللاين الي مفروض ما يتعدا.

وأكيد أهم الأسباب انهم يسوون هالخرابيط هي الكبت الاجتماعي. كثير أشياء يقدرون يضيعون وقتهم فيها بس مدري ليش التفحيط بالذات؟ ودي أعرف كيف انتشر عندنا من الأساس؟ =\

 

[Al Pacino]

والله لا يغفر الله لفلان

حمدي محّد قال كذا :\ أني اقول صعب هالأشكال تتقبل النصيحة وتبتعد عن هالعادة فأنا أتكلم عن المنطق من خلال معرفتي بتفكيرهم.

نفس الشي مع فعل الاسباب اذا همّيت بـعمل ما، ماتقدر تقول الله يرزقني وتجلس بالبيت واذا واحد قالك "رح أشتغل ولا ترا ماراح يجيك رزق" ترد عليه "لا الرزق بيد الله مو بيدك" :\

 

[Eye]

وأكيد أهم الأسباب انهم يسوون هالخرابيط هي الكبت الاجتماعي. كثير أشياء يقدرون يضيعون وقتهم فيها بس مدري ليش التفحيط بالذات؟ ودي أعرف كيف انتشر عندنا من الأساس؟ =\

لأنهم يحبون السيارات + 24\7 برا البيت => تفحيط
متوفر الوقت والاداة ><

 

[Old Snake]

نفس الشي مع فعل الاسباب اذا همّيت بـعمل ما، ماتقدر تقول الله يرزقني وتجلس بالبيت واذا واحد قالك "رح أشتغل ولا ترا ماراح يجيك رزق" ترد عليه "لا الرزق بيد الله مو بيدك" :\

أيوه ولكن الواحد ما يقول ما تفيد معاهم النصيحة والأفضلية يموتوا...إلخ
الكلام هذا مو صحيح وما يجوز أصلاً, إذا الرسول صلى الله عليه وسلم وهو الرسول دعا على أئمة الكفر بمكة فعاتبه الله سبحانه وتعالى وعلمه بأنه لا يهدي من يشاء, تجي أنت على شوية مفحطين بزورة تقول الله يحرقهم هذول ما ينفع معهم النصح وما يهتدوا, عسى ما شر, مين أنت...!!
*ما أقصدك سعود بـ"مين أنت" لول ولكنه أسلوب خطابي لا أكثر*.

 

[Raheem]

يدورون الموت اعتقد وش الفضاوة هذه

 

[Primal]

الي يقهر الناس الي تتجمع ذي على علم مسبق بالي يصير ولا تشوفه بالطريق وتوقف على جنب وتقعد تتفرج؟

 

[alakafi]

اصحابي الي حاين من الرياض طول الوقت هجولة وتفحيط ويعتبروها قمة المتعة خصوصا بالتلج مع الزحلقة

اتوقع لها خص بالرياض بالتحديد دا الشي لول

 

[Al Pacino]

أيوه ولكن الواحد ما يقول ما تفيد معاهم النصيحة والأفضلية يموتوا...إلخ
الكلام هذا مو صحيح وما يجوز أصلاً, إذا الرسول صلى الله عليه وسلم وهو الرسول دعا على أئمة الكفر بمكة فعاتبه الله سبحانه وتعالى وعلمه بأنه لا يهدي من يشاء, تجي أنت على شوية مفحطين بزورة تقول الله يحرقهم هذول ما ينفع معهم النصح وما يهتدوا, عسى ما شر, مين أنت...!!
*ما أقصدك سعود بـ"مين أنت" لول ولكنه أسلوب خطابي لا أكثر*.

حمدي لاتخلط الأمور، انا كلامي يخص "أن هالفئة ماينفع معها النصح" الدعاء عليهم شي آخر تمامًا.

الدعاء عليهم صحيح مايجوز، لكن بالنسبة للأخ دوني فـ دعاءه يجوز ومافيه شي، الرجال وصل له آذاهم وبهالشكل تشمله الدعوة على الظالم والمؤذي.

 

[قناص]

بصراحة ما ألوم الشباب لو فحطوا , ملل و بطالة و قلة وسائل ترفيه , هذا ما يعني أنه مبرر لكن الطيش في الشباب شيء طبيعي جداً

أعتراضي بالحقيقة هو على اللي يرفعون هالفيديوات , أغلبهم يرفعها باللغة الإنجليزية أو يضع عنوان مكس "عربي و أنجليزي" و بعض

هالمقاطع فعلاً وجدت إقبال من الأجانب و للأسف فيه تعلقيات غاية في السوء عن العرب و الخليجيين , على الأقل لو بتفحطوا و ترفعوا

فيديوات خلوا سمننا في دقيقنا ولا تفشلونا قدم العالم

 

[Old Snake]

دعاء المظلوم على من ظلمه مش عالعامة + يا أخي نفس الشيء, ما يجوز تقول ما يصلح معاهم النصح, الي أعتى وأظلم بل وأكفر منهم أهتدوا بالنصيحة.
بالمختصر لا يوجد إنسان في الدنيا لا يفيد معه النصح, كل شخص فيه مفتاح لقلبه وقد يوفقه الله بإظهار من يجد هذا المفتاح وقد يكتب عليه الله غير ذلك.

 

[يمكازي]

هذا الحل؛

[video=youtube;lxaiGWP_cZE]http://www.youtube.com/watch?v=lxaiGWP_cZE[/video]

يوم الأربعاء كان في معرض سيارات معدلة في الشارقة، أكسبو؛ بجانب مبنى المعرض في حلبات درفتنج و أسعراض حر، في حياتي ما رحت لهذه الحلبات، و ما عندي أي أهتمام أروح مستقبلا، لكن ربعي أجبروني أروح معاهم و قلت يلا من منطلق تجارب جديدة؛ نروح و نشوف. اللي لفت أنتباهي الجمهور اللي على يساري و يميني و قدامي و وراي و فوقي ! كمية الحماس و الانفعال مع الاستعراض تخليك تقول صدق الناس أهتماماتهم مختلفة، و دقايق حتى أنا قمت أتحمس معاهم و أتناقش مع صديقي عن قوة صوت التوربو في ذاك النيسان فتك أقوى عن الفتك الحالي ! على أي حال، لا يمكن أوقف ثواني لو الحلبات مش مغطاية بالسياج و جدار الإطارات أو ما شابه دور ما داير.

أنا مستغرب فقط، كيف هذا الشيء مش مستغل في السعودية من منظور تجاري ! تقريباً فوق الألف شخص تواجد معاي في أقل من نص ساعة و تذكرت الدخول 30 درهم، المعرض يبدا من الساعة 4 حتى 11، عليك بالحسبة.

هذه الحلبات تدير ربح مش هين في ثلاث أيام، غير ما هي أصلا تدير ربح للمستعرضين. أنصحكم لو شفت أحد ذولي المستعرضين و الله فاتح عليه، أنصحة أن يتكاتف مع خويانه و يسون حلبة على قدهم، منها يمارس شيء يحبه، و يترزق من جهة و الأهم آمان على روحة و روح أخوانة.

نسأل الله أن يهديهم و ينورهم، شيء يقهر كيف طاقة شبابية تهدر على هذه الأشياء التي ممكن تكون مفيدة لهم و لاقتصاد دولتهم لو تم توجيههم بالشكل الصحيح و تشجيعهم.

 

[Al Pacino]

دعاء المظلوم على من ظلمه مش عالعامة + يا أخي نفس الشيء, ما يجوز تقول ما يصلح معاهم النصح, الي أعتى وأظلم بل وأكفر منهم أهتدوا بالنصيحة.
بالمختصر لا يوجد إنسان في الدنيا لا يفيد معه النصح, كل شخص فيه مفتاح لقلبه وقد يوفقه الله بإظهار من يجد هذا المفتاح وقد يكتب عليه الله غير ذلك.

صحيح مو على العامة.


ترا كلمة "مايجوز" كبيرة ياحمدي! ماتقدر ترميها كذا كأنها حُكم شرعي .. ولا ليش ماجا بالقران أو السنة تحريم الاثبات أو النفي لأن الله فوقها كلها؟ بالضبط. لأن فيه أسباب ومنطق لازم نعمل فيه.

وأنت عارف أن كل كلام شباب مو قصدهم أن هالشخص ماتنفع معه النصيحة = الله مستحيل يهديه. كل شي بالمنطق ياحمدي لا تصير من قوم:

اذا قلت لو بوسط كلامك* ينقز عليك "لو تفتح عمل الشيطان!!"

اذا قلت اليوم الجو ماش اليوم* ينقز عليك "لاتسبوا الدهر!!!"

اذا قلت قهر ياخي ماقدرت أسوي هالشي* ينقز عليك "لا تعترض على قضاء الله!!!!"


أرجوك ياحمدي لاتكن منهم -.-"

 

[I-NERO-I]

لا حول ولا قوة الا بالله من جد عاهات الله يكفينا شرهم بس ويصلح حالهم .

 

[Old Snake]

أرجوك ياحمدي لاتكن منهم -.-"

سعود وش دخل...!؟
بالعكس المدققين مثل هذول هم الي يطلع منهم كلمة مثل "ما ينفع معهم النصح" ويدعون عليهم.
وأكيد كلمة ما يجوز كبيرة, ولكن الله لمى ينهى نبيه عن شيء معين نعرف بكل تأكيد إنه لا يجوز.
أما لو قصدك بأنك قلتها كسقط كلام بدون ما تعنيها حرفياً فأنا ما أقراء الي في القلوب سعود وأخذت كلامك على ظاهره.