التعليق مو دقيق 100% بس مو خاطئ 100% ايضا
قصص ماريو نفسها، بس مو مشكلة هي في النهاية ماريو.
حتى ألعاب زيلدا،، كلها تتركز في الأخير على إنقاذ زيلدا وحماية المملكة من الشر والظلام والخ، حتى في الاجزاء " اللي انا لعبتها شخصيا" بتلقى نفسك تمر على نفس القرى في مغامرتك، وأن اختلفت في بعض التفاصيل.. مثلا اوكارينا الزمن.. ماجورا.. الساعة الرملية،،
بوكيمون لم تتغير قصتها الأساسية من عشرات السنين،، دونكي كونق - كيربي... كلها تستخدم " صيغة ثابتة" مع تغيير طفيف في التفاصيل.
طبيعي ، هذا معنى كونها سلاسل
بعدين مين قالك حبيبي!!! بوكيمون ما تغيرت قصتها؟ كل جزء قصة بس انت ما عمرك لعبت بوكيمون وتسمع عنها بس
الجيل الاول قصته انك ولد عادي وتروح تحاول تصير مغامر زي ابوك لانك خلاص صرت رجال بالغ عاقل حر مستوطن عمرك ١٠ سنين ، وتروح تقدم على وظيفة عند البروفيسور عشان تأمن مستقبلك ويعطيك مهمة لانه جالس يدرس مخلوقات تدعى البوكيمون ، يقول لك جمع لي بيانات هذا قبل الai بعد! وفيه واحد بثر حفيد البروفيسور كذا ناشب الا بيصير احسن منك ، عقدة نقص ، الزبدة وتروح تشد الرحال وتكتشف ان اول قرية مقفلها شايب تكمل تدخل الغابة ويطبون عليك الحشرات وتفقع
تروح اول مدينة وتدخل إبتدائية المجد ، وتسمع دروس عن الحياة وان فيه واحد شديد اسمه بروك هجد البوكيمونات الحجرية من قوته ، تقبل التحدي وتروح تلفعه ، ويقول لك ديم بوي انت تقدر تصير بطل الابطال خذ بعطيك وسام يخلي البوكيمونات الى لفل ٣٠ يطيعونك! العووننن اوم القوة يا شييييخ
وتطلع وانت فرحان ويجيك بثر قافل الطريق يقول محد يمشي هنا الا الابطال ، وتطلع الوسام اللي يشق وجهه يقول سم طال عمرك اسفين ما درينا ، وتكمل تكمل وتدخل كهف القمر حيث البوكيمونات الحجرية اللي هجدها بروك ، وتشوف عصابة يبتزون الرجاجيل اللي عمرهم ١٠ ويجون يتحرشون فيك بس هيهات طاحو في طحطوح وتخضعهم وتكمل
تلقى عالم اثار يدرس البوكيمونات المنقرضة ويتحداك على وحدة من اكتشافين اذا فزت عليه فهي لك ، مدري وش فلة العلماء ذي ، الزبدة تلفعه كما ينبغي للواحد ان يفعل بالعلماء ويخيرك بين اكتشافين تاخذهم وكأن الوضع طبيعي وتكمل طريقك
توصل مدينة ويجيك بثير ماغيره ولد البروفيسور الا تحدي ، يبن الحلال ، مافيه الا تحدي ، تلفعه كما يفعل الواحد مع البثرين ، ويقولك مقولته الشهيرة " قد تتغلب علي في القتال ولكنك لن تتغلب علي في النحشة ، ترا فيه واحد عالم عنده جهاز يخليك تنقل بوكيمونات واي فاي ، كذا اسهل في جمع البيانات ، اشمك لاحقا " وتعدي وراه وش قلة الادب ذي اشمك لاحقا
توصل لبيت العالم وتدور ما تلقاه ، تلقى بوكيمون ناطق! يطلع العالم وهو يسوي ابحاث حول نقل البوكيمونات دخل في الآلة "بالغلط" واندمج مع البوكيمون ، يقولك ساعدني تكفى انا بوجهك بعطيك اصعب مهمة بس تكفى اضغط الزر الاحمر الكبير ، وبكل توتر تضغط الزر ويعود الى طبيعته البشرية ويعم السلام والوئام ويقولك كمبيوترات الارض ذي كلها ترا سبيل ، شغل اي واحد وسوي تسجيل دخول وارسل بوكيموناتك لاي بروفيسور تبي
تطلع من بيته تبي تكمل طريقة تلقى نادي سباحة ، تقول رويشة سريعية عن الصنة وذا الكلام ، الا يباغتونك سباحين اولمبيين يتدربون بمساعدة بوكيمونات مائية ، تلفعهم لين توصل لقائدتهم وتمسح فيها بلاط المسبح وتقول والله انتا نفر كويس شيل هذا وسام موية بوكيمون لفل ٤٠ اسمع كلام انتا
تطلع تكمل طريقك تكتشف بيت مسروق ساطيه واحد من العصابة ماغيرهم ، تتحرى الجريمة وتكتشف ان فيه باب وفيه خطوات همممم *اغنية كونان* اذاً الحرامي مشى من الباب! وراه! وتروح تدور الحرامي وتلفعه وترد المسروقات بشهامة ويعطيك تذكرة كروز اس اس ان يقولك رح فل وتكمل طريقك
وكما جرت العادة الظاهر بكل العالم .. حفريات وتحويلة ، تخش النفق وتلقى مخلوقات الديقليت ، تكمل وتطلع تبي تفل بالسفينة طهبلة يلد ، شالسالفة موقفين الرحلة ، تخش تلفع الموجودين سريع سريع توصل للكبتن شالعلم ، يجيك بثير الا انا احسن منك ، يا الهي القم بس ، وتخش على الكبتن يقول لك فيني دوار البحر ، عز الله فلحت يا كبتن ، ويطرش عليك وكاعتذار يعطيك سي دي فيه طريقة تعلم البوكيمونات كيف يقصون الشجر اللي بس كذا واقف لحاله حبة وحدة تقفل الطريق ، تطلع وتهج السفينة! ايا ابن الذين الغدرة
ترجع مكتئب من السفينة تلقى نادي عسكري ، وتلقاه مقفل بشجرة وحدة ، حان وقت؟ يب استعمال السي دي ، وتخش وتلقى ملازم يدرب بوكيمونات كهربائية تهزمه كما يفعل الرجال اللي عمرهم ١٠ سنين ويعطيك وسام يهجد لين لفل ٥٠
تهجول بالديرة تلقى مدينة طارفة فيها مولات وحركتات تخش تلقى نادي محبين الورود ، تقول يلا طبة بطيحة وتجلدهم وتاخذ وسام يهجد لفلات ٦٠! شعور ادماني كل ما تجلد احد فلوس وسمعة وتهجد بوكيمونات اقوى نعم انت الان ادمنت الرابعة ثابتة
تكمل طريقك تلقى برج المقابر ، بووو قلبنا رعب ، تخش ويلعبون الاشباح بشكلك وتهج كمل يفعل الرجال اللي عمرهم ١٠ سنين وتحاول تكمل طريقك وتلقى الدبان النائم مقفل الطريق ، ياذا الوهقة شلون تحركه ذا؟ هل تخلي بوكيمون ناري مثلا يشويه؟ اخس واعقب! مب حركات رجال تهاجم حيوان نايم ، لازم يصحى اول بعدين تشويه ايه كذا عدل
ترجع مكتئب للمدينة تخش المول تبي ترفه عن نفسك تعطش ، تطلع اعلى دور الدور السابع تلقى فندنق مشين تبيع موية ، مافي الا ٣ بالعالم ، تاخذ موية تفرفر تلقى حارس عطشان ، طبيعي ماعندكم بعالمكم الا ٣ فندنق مشينز بالدور السابع بمول بآخر الدنيا ، تعطيه موية لأن في كل كبد رطبة أجر ، يقول لك انت ارجل واحد خش اي مدينة تبي مافي حارس بيوقفك بوجهي
تمر من جنبه تقول شالمريض ذا تكتشف انك دخلت مدينة ويالها من مدينة ، كل اجرام وعصابات جتا تقول ما ينفع هالكلام ، وتهج وتلقى نادي النينجا ، فرصة تتعلم كيف تزبن من العصابة ، تخش تجلد النينجا اللي يتدربون وتمسح بقائدهم ارضية النادي وبس كذا طناخة ما تتعلم ولا شي
ترجع لمدينة المجرمين وتقرر تقدم على وظيفة باكبر شركة ، تكتشف الشركة ساطين عليها العصابة تحت تهديد السلاح طيب كيف ابي اقدم؟ لازم تروح العصابة بس فيه مشكلة ، الباب مقفل ببطاقة ، مشكلة ، هل تكسر الباب ببوكيمون مثلا؟ لا ما ينفع عيب
*تشتغل اغنية كونان* اكيد العصابة عندهم المفتاح ولا كيف دخلوا؟ فتروح تبي تنسى الهموم خلاص قفلت الدنيا بوجهك تبي تشرب تبي قمار تبي ميسر ، فتدخل الكازينو ، خلاص خراب ، ولكن! تكتشف واحد من العصابة يدخل ويصدم بالجدار ويخش من باب سري! اذاً هذا الكازينو مجرد فرونت للعصابة! اكيد هو دخل مخبأهم
تدخل المخبأ تجلد الموجودين وسبحان الله واحد بالغلط تطيح منه البطاقة قدامك يالله شف كيف الحظ! تاخذ البطاقة وترجع الشركة هناك امل! ما ضاقت الا فرجت ، تخش وتلسع كل افراد العصابة مدري ليش كنت تفكر تتعلم نينجتسو وتتسلل اصلا ، توصل قدام باب المدير الا تسمع واحد يصرخ وقف!
تلفت وتجد بثير! شتبي انت مب وقتك! الا انا احسن منك وتلسعه كالمعتاد وتدخل وتلقى المدير مع زعيم العصابة ، عطني لا عطني لا عطني لا ، وش الهرجة؟ الزعيم تقفل معه ويقرر يبرد حرته فيك ولكن لانك رجال صنديد تجلده ، يدخل يده بجيبه ، تفكر انه بيطلع مسدس؟ يطلع منديل ويمسح خشمه ويقول خلاص اصلا مابي ويمشي
يجيك المدير يقول انت انقذتني انقذت اختراعنا اللي مافي منه الا ١ بالعالم من الاحتكار ، خذ كل تقنيات شركتنا ، خذ سم جهاز ضد الاشباح ، وهذا الماستربول اللي يبيها زعيم العصابة مافي منها الا ١ بالعالم ولا نقدر نصنع زيها معجزة تقنية ، تدري خذها بعد وش وش تبي بعد ، ويت وت؟ تقول طيب انا ابي اتوظف ، يقول والله ما عندنا وظايف تقلع يلا
نفسيات.
تقول تدري يا ولد حان وقت فيتل فريم خلنا نجرب الاختراع مب خسرانين شي ، خلنا نشوف جهاز كشف الاشباح ذا ، ترجع البرج المقبرة تكتشف ان الاشباح ذولي مجرد ارواح بوكيمونات ياه وانت كنت خايف ودنيا ، حتى تقدر تصيدهم بعد ، تكمل تطلع فوق كذا بثارة الا بشوف ، تشوف الناسك عجوز حليل يهتم بالبوكمونات الضعيفة والمشردة والعصابة يبتزونه ،" والله بنخرب القبور" يبون منه مزمار ، انت تاخذك الحمية وتفزع للشويب الضعيف وتهزمهم ويهجون ، ويقول لك تدري الشي اللي يبونه وش ذا المزمار خذه فهو لك ، ذا المزمار يصحي اي بوكيمون نايم .. الحييييين نرجع للدبان اهاااااا
وتطلع طوالي على الدبان وتقومه من النوم عشان تجلده وهو صاحي عشان يحس بالالم وتكمل طريقك وتوصل الى مدينة فيها محمية ، ب ٥٠٠ ريال خش صيد اللي تبغى وخذه معه بيتكم ، تتذكر ان وظيفتك جمع بيانات وان انت اولريدي موظف ويمر عليك فلاشباك حياتك وتقول يلا ٥٠٠ مع انها غويلية بس يلا معليه
تخش تستكشف الحياة الفطرية وتصيد اللي تبي وتلقى ضرس ذهب ، تمشي تلقى بيت ، تخش يسألك راعي البيت انا والله ضرسي الذهب طاح علي ، تطلعه من جيبك تقول هذا؟ يقول ضرسي حبيبي ، انا كيف اكافئك؟ بعطيك يا شيخ سي دي تعلم بوكيموناتك يسبحون ، ومالو نسبح يلا
وتطلع وتسبح في البحار وتوصل الى جزيرة بركانية فيها مختبر ، تتذكر ان عندك حفريات مزبنها وتعطيهم ويقولون اوف هذا اللي ندوره من زمان شف يمدينا نطلع منها بوكيمون ويطلعونه لك وخذ تفضل لك ، يا سبحانك يا رزاق ، عاد يقولون لك فيه واحد عالم هاج من عصابة مسيكين مقفل على روحه بالنادي العلمي
وتأخذك اللقافة وتروح بيته ، تلقى بيته محروق وفيه مذكرات عن ابحاث ممنوعة لصناعة اقوى بوكيمون من حفريات! هل يمكن؟ لا .. لا يمكن. تكمل قراية انهم صنعوا اقوى بوكيمون وما قدروا يسيطرون عليه وهرب ويحتاجون اقوى كورة بالعالم عشان يصيدونه ، وتحط يدك بجيبك وتتحسس ان عندك اقوى كورة
وتكمل قراية وتكتشف ان الداعم لهذه الابحاث هو زعيم العصابة وهدد العالم انه بيذبحه والعالم هج وزبن بالنادي ومقفل على نفسه وهذا مفتاح النادي
تاخذ المفتاح وتحمد ربك على العافية وتروح النادي ، ويخاف العالم ولا والله ما تاخذني يا الورع ، قصدي يا الرجال اللي عمره ١٠ سنين ، ويحذف عليك بوكيمونات نارية وتقوم هوشة وتجلده ويقول والله انك قوي خذ وسام يهجد البوكيمونات ، انت تبي الدوري صح؟ تقوله وش دوري ، يقولك اما ما تدري وش له تجمع ذا الاوسمة اجل ، تقول له مدري جات كذا ، ويشرح لك يقولك فيه دوري ولازم ٨ اوسمة وانت ترا ما باقي لك الا واحد ويمديك تخش
تقول طيب وين الوسام الاخير؟ يقول لك جنب بيتكم اول قرية ، ترجع لقريتك وتسحب على اهلك وتروح للشايب اللي كان مقفل الباب مب راضي لك تدخل وتقول له ليش ما علمتني ، يقول لك عشان مصلحتك انا كنت خايف عليك تتورط مع العصابة ويبكي وحالة وتقول له انا جالدهم كلهم ، يقول لك حلو ، ترا الوسام الاخير عند زعيم العصابة تفضل كمل عليه
وتدخل وتجلده ويعطيك وسام ويقول الله يلعن ابوها من اهانة ورع عمره ١٠ سنين جلدني وجلد عصابتي وانا كنت مزعج السلطات ومسبب انفلات امني ، ويتوب ويتندم ويقول لك ترا ذا الوسام يخلي .. تقاطعه وتقوله ادري اخلص بس ورانا دوري
وتروح الدوري وتجلد الجميع وتكتشف ان انت في حوستك بثير صار بطل الدوري وهو داخل قبلك بخمس دقايق كيف ما ادري الزبدة تجلده للمرة الاخيرة وتصير البطل وتوتة توتة خلصت الحتوتة
عندك احساس انك ناسي شي؟ كأن فيه وظيفة وبروفيسور طالب منك تجمع بيانات وانك بديت الرحلة ذي كلها عشان خشته .. ميه خلاص انت بطل طز فيه
