محتاج شوركم بخصوص العملية ...

[Final Fantasy]

السلام عليكم ^.^


بكل اختصار .. نظري ضعيف و أنا ألبس نظارات .. و عندي موعد باجر المغرب باذن الله علشان أعمل فحوصات لعملية "ليزك" علشان أعدل البصر .

طبعا الحمدالله مصاريف العملية موجودة .. و مجهزين حتى موعد العملية الي راح يكون بيوم الأربعه .. طبعا كنت مستعد للعملية و متحمس لها الى أن اكتشفت شي .. أشياء لازم أضحي فيها لمدة "شهر" كامل حتى تنجح العملية .

شهر كامل بدون كمبيوتر (( يعني باي باي TG و ماسنجر )) .. و البدأ بمشاهدة التلفزيون و اللعب بالفيديو جيمز من مسافة طويلة مع تخفيف ساعات المشاهده و اللعب .. و طبعا اللعب بوجود انارة و بدون اطفاء الأضواء ---> :_:

فالحين فعلا فعلا فعلا محتار .. شلون راح أقدر أعيش لمدة شهر كامل بدون هالأشياء الي مدمن عليها و أعشقها عشق غير طبيعي لدرجة أن لو يوم واحد مر علي بدونهم تنقلب حالتي فوق تحت و الكآبة تبدأ تتآكلني .

شلون راح أقدر أتماسك نفسي ؟؟

أسوي العملية و أحرم نفسي من كل الأشياء الي أحبها و تعتبر محور حياتي اليومية ... أو خلاص أظل على النظارة على طول .

و سؤال لأصحاب الخبرة ... بعد مرور هالشهر أقدر أمارس يومياتي بشكل طبيعي و مثل الأول ... و لا لازم أظل أحافظ على النظام اليديد الي راح أمشي عليه خلال هالشهر من العملية ؟؟




محتار و محتاج شوركم .. أتمنى ما تبخلون فيه علي 😉

 

[persona]

اعتقد راح تتعود على النظام الجديد

كملها بعد شهرين زيادة عشان الامتحانات النهائية وارجع بالصيف

 

[The Last Fantasy]

هلا محمود ..

نصيحة لك .. توكّل على الله .. وسو العملية .. سلامة النظر عندك أهم من أي شي جانبي ..
ولا تنسى .. بعد مرور الشهر هذا بيرجع نظرك زي الفل ، وبدون نظارات .. يعني بترجع أحسن وأفضـل ..

وبعدين ساعة ، ساعتين في اليوم لعب تكفي .. لوول .. خفف إدمان شوي 😛 ..

توكّل على الله محمود ^^ .. وإن شاء الله نشوفك بعدين سليم ومعافى .. مـا تشوف شـر 🙂 ..

 

[rubso]

هلا محمود 🙂
انا البس نظارات، واول سنة احس اني طفشت منها، وقلت بجرب عملية الليزك "سمعتها بدعاية بالراديو" رحت للطبيب، وقلت بشوف شلون صايرة العملية إلخ من هذا القبيل، والمفاجأة اني لقيت اللي يسوي لك عملية لابس نظارات، فضحكت في داخلي وسحبت عليهم للأبد، رحت لمحل نظارات وطلب منه عدسات للنظارة مفلترة، تقلل من نسبة اشعاعات الشاشة بنسبة ضخمة.. ههه وهذا انا الحين تقريباً 4 سنوات لابس النظارة والحمدلله ما دخلت في بالي الليزك..
لكن اذا انت متملل وما تحب النظارات .. سوها وبالتوفيق 😉

 

[Ash]

محمود توكل على الله اذا مصر , اللعب و التلفزيون لاحق عليه و كل شيئ و احنا جميعا بانتظارك بس أهم شيئ ترجع سليم و متعافي بدون النظارات .

 

[Golden_Sun]

روبسو ..

الدكتور اللي يسوي شفط >>> سمين!
الدكتور اللي يزرع لك شعر >>> مصلع!
الدكتور اللي يعالج الجلدية >>> جلده متشقق!
الدكتور اللي يسوي الليزك >>> يلبس نظارة!

هممممممممممم .. ترى عادي! .. وايد انا شايف مثل اللي فوق = ) ..

 

[Ginko]

والله ما عندي خبره..

لكن التقنيه جديده وما تدري ايش اعراضها بعد 10 سنوات لان محد عاش بعدها 10 سنوات او فتره طويله..ما انصح فيها..

 

[King Wario]

والله ما عندي خبره..

لكن التقنيه جديده وما تدري ايش اعراضها بعد 10 سنوات لان محد عاش بعدها 10 سنوات او فتره طويله..ما انصح فيها..

هممممممم .. والله سمعت انها لها اعراض جانبية بعد 10 او 15 سنة

 

[ASWD]

حاول اول شي تتسأل مني مناك عن هذي العملية ايجابياتها وسلبياتها*ان وجدت* ودور اطباء مضمونين موحي الله اي واحد حتى لو اضطريت تسافر الى بلد قريب الك عشان تسوي العملية وانت مرتاح

عندك السفارات الاجنبية الخاصة بالدول المتقدمة في مجال طب العيون تقدر تتسأل من خلالها وتاخذ معلومات كافية ووافية انصحك بالسفارة الألمانية طب العيون عندهم متقدم مرة..

لأن خبرك هني الطب متقدم ونقدر نثق فيه اطبائنا😛

 

[King Wario]

لأن خبرك هني الطب متقدم ونقدر نثق فيه اطبائنا

لا تستعبد يروح يقلهم ابي اسوي عملية ليزك ، يعطونه حبتين بندول

 

[ASWD]

لا تستعبد يروح يقلهم ابي اسوي عملية ليزك ، يعطونه حبتين بندول

هههههههههههههههههههههههههههههههههه

خبرك البندول صار دوا لكل مرض😛

 

[DREAM]

هلا محمود
توكل على الله لأنه في كثير ناس من أصحابي ألحين مرتاحين بعد ما سووا العمليه وأقولك محمود
لا تسوي العمليه ألا بعد معرض e3 لأنه أحتمال يعرضون فاينل 13 ويجيك خلل فني ولا ريميك للسابع
ولا يمكن الريفو يعرض وحشيته والبي أس 3 يعرض كل ألي عنده فنصيحتي لك سو العمليه لو بغيت
تسويها بعد المعرض وتراك بترتاح كثير بعد العمليه مثل الشباب ألي عندي والله يوفقك أنشاء الله
ومع السلامه

 

[Khalid-S]

اخوي مسوي عملية ليزك ,, قالة الطبيب لمدة اسبوع ما يتفرج ووالخ مو شهر ,, ما ادري مين الي قالك شهر.

انتظر رده ,, هو بيفيدك ,, اسئل مجرب ولا تسئل طبيب.

 

[Final Fantasy]

مشكورين شباب على التفاعل :

اعتقد راح تتعود على النظام الجديد

كملها بعد شهرين زيادة عشان الامتحانات النهائية وارجع بالصيف

أتمنى أني أقدر أتعود على النظام اليديد ... بالنسبة للشهرين انسى شكلي أول ما يخلص الشهر راح أجلس 48 ساعه متواصلة على النت من طول الغياب 😛

والمفاجأة اني لقيت اللي يسوي لك عملية لابس نظارات

ايه فهد لأن مافي فايده اذا سوى عملية ليزك فراح يرجع يضعف نظره مع الوقت بسبب شغله على الأجهزة !

لكن اذا انت متملل وما تحب النظارات .. سوها وبالتوفيق

متملل و بس ... الا طول اليوم راميها و مالي خلق ألبسها أبد :_:

اللعب و التلفزيون لاحق عليه و كل شيئ و احنا جميعا بانتظارك بس أهم شيئ ترجع سليم و متعافي بدون النظارات .

شكرا فيصل 🙂

لكن التقنيه جديده وما تدري ايش اعراضها بعد 10 سنوات لان محد عاش بعدها 10 سنوات او فتره طويله..ما انصح فيها..

الله يستر و يسهل

حاول اول شي تتسأل مني مناك عن هذي العملية ايجابياتها وسلبياتها*ان وجدت* ودور اطباء مضمونين موحي الله اي واحد حتى لو اضطريت تسافر الى بلد قريب الك عشان تسوي العملية وانت مرتاح

الطبيب الي راح أعمل عنده العملية كثير موهوب و شاطر كل معارفي و أهلي الي عملو العملية عنده ماشين تمام الحين في حياتهم

لا تستعبد يروح يقلهم ابي اسوي عملية ليزك ، يعطونه حبتين بندول

لوووووووووووووول XD

توكل على الله لأنه في كثير ناس من أصحابي ألحين مرتاحين بعد ما سووا العمليه وأقولك محمود
لا تسوي العمليه ألا بعد معرض e3 لأنه أحتمال يعرضون فاينل 13 ويجيك خلل فني ولا ريميك للسابع
ولا يمكن الريفو يعرض وحشيته والبي أس 3 يعرض كل ألي عنده فنصيحتي لك سو العمليه لو بغيت
تسويها بعد المعرض وتراك بترتاح كثير بعد العمليه مثل الشباب ألي عندي والله يوفقك أنشاء الله
ومع السلامه

تدري ... ردك هو الي ذكرني بالسبب و الحماس الي كنت متحمسه علشان أعمل العملية قبل لا أكتشف هالتضحيات الي لازم أعملها و طريقة العملية المرعبة (( قطع القرنية و تسليط أشعة الليزر على الأجزاء الداخليه للقرنية .. الخ )) .

لا تخاف الشهر راح ينتهي قبل بدأ E3 😉





هممممممم .. مشكورين شباب على التفاعل ردودكم رجعت لي الشجاعة من جديد .. ان شاءلله باجر تستمر عندي هالشجاعه و أسوي الفحص و يوم الأربعه هو موعد الوداع بيني و بينكم :_:

 

[ahmed_cube]

بسيطة اصير الى ما بعد ال E3 بعدين سويها ... و اتوقع اذا كانت شاشة الكومبيوتر عندك LCD تقدر بعد اسبوع انك تجلس على الكومبيوتر لكن باوقات قليلة و متفرقة . لي قريب سوها و الحين ما شاء الله عنه و هو عمل هيك لانو بحب لبس النظارات الشمسية و كما تعلم صعب الي يلبس طبية يخلعها على شان الشمسية .

توكل على الله و ان شاء الله بالسلامه .

 

[Final Fantasy]

اخوي مسوي عملية ليزك ,, قالة الطبيب لمدة اسبوع ما يتفرج ووالخ مو شهر ,, ما ادري مين الي قالك شهر.

انتظر رده ,, هو بيفيدك ,, اسئل مجرب ولا تسئل طبيب.

... أسبوع فقط !

مادري بس أحس أن أهلي متفقين مع بعض أنهم يخرعوني لأنهم قالوا لي أشياء ثانية تضيق الخلق غير عن سالفة الشهر -_-" !!

بليز خالد أول ما تعرف كل شي من أخوك خلني أعرف ... مشكور و ما قصرت 🙂

لي قريب سوها و الحين ما شاء الله عنه و هو عمل هيك لانو بحب لبس النظارات الشمسية و كما تعلم صعب الي يلبس طبية يخلعها على شان الشمسية .

و جلوسه على الكمبيوتر و التلفزيون كم ساعه باليوم ؟

بعد العملية طبعا .

 

[mubark]

صدقني تستاهل انك تسوي العمليه انا ما اشوف انها تضحيه زي ما تطلق عليها !

لأنك بترجع وقت معرض اي ثري بالضبط

يعني وناسه رجعتك راح توافق وقت خرافي
<<<كله تفكيره المعرض >_<

المهم شكلك معزم وبإذن الله تنجح ويرجع بصرك سته على سته
ولد عمي سوها قبل شهرين والحين زي العسل ويسب بالنظاره !

انا بعد افكر اسويها بالعطله الصيفيه :razz:

مع اني متأكد انك بتدخل المنتدى بعد يوم من العملية ولكن نبي تبشرنا وتطمنا 😀
وما تشوف إلا كل خير

 

[ABUALI]

صديقي مسوي عملية ليزك، حتى أهله مصورين العملية كانت تعرض على تلفزيون في غرفة الانتظار...
اول اسبوعين ممنوع من الخروج في الشمس والتلفزيون والكمبيوتر، كللا قاعد في غرفة مظلمة وبعدها شهرين كان ما يطلع اللا لمن يلبس نظارات شمسية واللحين اشوفه نسر :razz: وما يلبس نظارات شمسية ولا طبية. وما اشوفه يشكي من عيونه اللا اول الايام كانت تحرقه بعض الاحيان اذا يكثر من طلعاته ومشاهدة التلفزيون.

قارنها انتا 6 على 6 وتستغنى عن شهرين لعب وكمبيوتر وبعدها ما تحتاج نظارة أو تظل طول عمرك لابس نظارة وكاسر نظارة ومفصل نظارة، لو يخيروني اختار الليزك

 

[Zeyad]

13 سنه وانا استخدم النظارات ، وموضوعك شجعني على العملية شكلي راح اتصل على مركز الحبيب حق عمليات الليزك واستفسر اكثر عن العملية ،

حسب ماسمعت ان عملية الليزك يتم اجرائها اللي اعمارهم على 18 سنه الى 22 سنه تقريباً ..

عموماً حصلت موضوع يتطرق لعملية الليزك ،
http://alsaha.fares.net/[email protected]@.2cc0cb81

 

[Mada Mada Dane]

مدري انا عاجبني حالي البس نظاره, احس تخلي الواحد مثقف @_@

 

[Suzuki Yu]

أنا بس حابب أسأل هنا

أيش نسبة نجاح مثل هذي العمليات ؟ و يعني فيها مجازفة وخطر على العين ولا لا ؟

 

[Soliden]

أخويا سوى هذه العملية, و صراحة ما لاحظت عليه من تقليل مشاهدة أو أي شيء.. بس كان يستخدم "قطرة" للعين ..

أيش نسبة نجاح مثل هذي العمليات ؟ و يعني فيها مجازفة وخطر على العين ولا لا ؟

نسبة النجاح عالية جدا .. بس في هذه الأمور أحسن لك ما تسأل في النت, لا يروح يفتي لك و يخرب بيتك 😀 ..

FF, توكل على الله و سويها

..

 

[m7tram]

محمود بالتوفيق 🙂
روح سوها وتوكل على الله .. وصل صلاه استخاره

 

[Ginko]

على طاري اخوي وقريبي ومدري ايش..

توني كلمت ولد عمي (لاحظ من امريكا) وسألته عن عمليته الليزك (شفتك كيف انا حبيب 😛 ) وقال لي انه من ثاني يوم رجع يلعب ويننج الفن (لاحظ ماقال بلاي سيتشن لول) بس الطبيب قال له لا يدخل عينك ماء لمده 3 شهور ..ولا تلعب حديد..ويعني هالاشياء السهله..

برأيي..اضغط على الطبيب وقلوه ما اقدر ووالخ..اكيد بيقلل الحظر الى اسبوع او من هالاقبيل..لان اضن شهر مبالغ فيها مره..

 

[Uchiha Basem]

سنه وانا استخدم النظارات ، وموضوعك شجعني على العملية شكلي راح اتصل على مركز الحبيب حق عمليات الليزك واستفسر اكثر عن العملية ،

حسب ماسمعت ان عملية الليزك يتم اجرائها اللي اعمارهم على 18 سنه الى 22 سنه تقريباً ..

لما كنت صف أول ثانوي حكالنا استاذ التاريخ عن العملية وقال لنا انو هو سواها وانها جيدة (عمره 49+ سنة أكيد)

محمود مافي داعي للتردد يعني هذا إبصارك وهو أهم شي بعد دماغك ، ليش لتلبس نضارات كل حياتك أما بالنسبة لألعاب الفيديو فأنا رأيي حاول تخلي فترة العلاج في مكان سياحي يعني روحوا مثلا دبي اتفسحوا وانبسطوا انت والعائلة شوي وابعد عن ألعاب الفيديو (إذا في قدرة مالية)

 

[Futrus]

نصيحه شديده جداً إتمسك فيها .. صديقة أمي عملت العمليه لكنها سوَّت خطأ عظيم وراحت تحت الشمس من غير نظاره شمسيه وصار عندها عين ما تشوف منها خير شر وعيون ضعيفه جداً شبه عميه .. لذا نصيحه إلتزم بهالشهر وإذا طلعت خلك لابس نظاره شمسيه .. وعيونك أغلى وأهم من أي لعبه وتلفزيون 🙂

 

[Levithian]

موفق محمود
صحيح رح نشتألك لما تغيب شهر كامل بس نصيحة التزم بالتعليمات و ريح عيونك

و ان شاء الله منشوفك بعد شهر
(نحنا بانتظارك )

 

[NESTA]

هلا اخوي....Final Fantasy

بالنسبة للعملية.... لاتسويها اذا كنت اقل من 18 سنة.... يعني 18 وطالع

ونصيحة اخوية لاتسويها الا برا ... امريكا بريطانيا ... هنا لا

انا صديقي سواها عندنا بالرياض في مستشفى الحبيب... طلع فرحان يقول العملية

بسيطة وانه ماتعب... لكن الحين يواجه مشكلة كبيرة... وهي ان عيونه 24 ساعة تدمع!!!!

والله ماابالغ اذا قلت لك انها كل شوي تدمع ...

يعني تخيل اذا جينا نلعب ... يوقف ويمسح عيونه.... وكذلك في الاكل والمذاكرة....الخ


لاكن انا اخوي ((الحمد لله)) سواها في لندن.... ماشاءالله الحين له حوالي 5 سنين مايعاني من اي

مشكلة ((اثار جانبية)) ولله الحمد ... ومدة العملية كانت حوالي ساعة... وراحة لمدة اسبوع واحد فقط.... مب شهر

فنصيحتي لك خلك في السليم.... وسوها برا

اتمنى اني اكون افدتك.... وبالتوفيق ان شاء الله

 

[Tomb raider]

اخوي مسوي عملية ليزك ,, قالة الطبيب لمدة اسبوع ما يتفرج ووالخ مو شهر

فعلا قالولي اسبوع مو شهر !

 

[Nintendo]

محمود نصيحه مني ...

صلي صلاة الاستخاره 🙂

وبعدها ان شاء الله ربنا راح يوفقك في اختيارك .. عموما اذا نويت تسويها راح ندعيلك بالتوفيق وترجع لنا سالم معافى واذا قررت تاجلها لبعد E3 😉 يكون افضل ..