محاسبة وإلا إدارة مالية؟!

[Solay]

السلام عليكم,كل عام وأنت بخير ومن العايدين..

خلاص العطله بتخلص وبتبدأ الكآبه من جديد والواحد رجع يفكر بالدراسه من جديد 🙁

الزبدة موجود بالعنوان وهو أني توني ابدخل إدارة أعمال وفيه سنه ماادري ترم تحضيري(أحد يأكد لي كم بجامعة الملك سعود بالله) فعندي فترة لا بأس بها أقرر فيها وش أبي,بداية كنت أبغى محاسبة وأصلا دخلت إدارة أعمال عشان المحاسبة بس بعد شوية تفكير وقراية سريعة خشت بمخي الإدارة الماليه وصرت محتار وش أبغى مع ان الثنتين معلوماتي عنهم سطحية جدا والبركة بالتعليم عندنا..

فياليت تقولون وش الأفضل وتجاربكم لو كنت من رواد أحد القسمين والأهم هو ان قسم المحاسبه تتخرج منه كمحاسب بشركات وبس على حد علمي,بس وش المستقبل الوظيفي للإدارة المالية وش أشتغل بالضبط؟! وكيف الإقبال الوظيفي لمن عنده أي معلومه؟!

وسؤال أخير بماان الموضوع مفتوح مفتوح:هل فيه مواد رياضيات مكثفة بالقسمين أو أحدهما؟! مستواي بالرياضيات كويس بس المكثفه والمتعمقه جدا ترفع ضغطي مثل الموجودة بالتحضيريه وقبلها بثالث ثانوي..

وشكر مقدم لكل من بيساعدني :happy:

 

[m-oo-7md]

والله الاغلب يمدحون المحاسبه انها لها مستقبل

بس ما اقولك روحها الامر راجع لك

 

[iNakedSnake]

بالنسبه للإداره فهم يدرسون ترم عام بس .. وأسأل سعود " أل باتشينو " يدرس إداره ماليه راح يفيدك كثير 😀

 

[ALONE]

انا درست ادارة مالية

ترم واحد وغيرت التخصص

قسم صعب شوي وممل للغاية

لأنه يبيلة انسان هارديسك يحفظ كل شئ

المحاسبة تخصص له مستقبل رائع جدا

وخاصة السعودية مقبلة على نهضة كبيرة جدا في هل المجال

بعد كم سنة راح ينتهون من مشروع مركز الملك عبدالله المالي في الرياض والي راح يوفر مئات الأف من الوظائف في هل المجالات

لذلك انصحك بالمحاسبة

 

[T i d u s]

والأهم هو ان قسم المحاسبه تتخرج منه كمحاسب بشركات وبس على حد علمي

لا طبعاً، مستقبلاً إذا طوّرت نفسك (شهادات، خبرات) ما راح تستمر كـ محاسب ممكن تصير مراجع قانوني، مراقب/مستشار مالي، أخصائي مشتريات، رئيس قسم المحاسبة، مدير بنكي .. تخصص له مستقبل للي يبي يجتهد

 

[Al Pacino]

سليمان بدري تبدأ تفكر بتخصصات الادارة .. الان انت بتدرس فصل كامل فيه مقررات عامة ومنها مقرر محاسبة وتقدر تحكم من خلاله اذا هي تناسبك أو لا. لأن المحاسبة شي جديد تمامًا عليك وماقد درست أي شي منه بالمراحل السابقة.

لكن للأسف مافيه مقرر مالية بهذا الفصل، لكن اذا انت ماتبغى غير هالتخصصين شوف وضع المحاسبة بهالفصل واذا ماحسيت انها مناسبة لك روح مالية أو اي تخصص ثاني. ولا تستهين بالمحاسبة، ماودي أخوفك أو أنفّرك منها بس ممكن المقرر الي تدرسه بالفصل الجاي مايعطيك الصورة الحقيقية لـ "ثُقل" هالتخصص. أنا صحيح مالية لكني أدرس حاليًا مقررات محاسبة وكلمالها تصير أعمق وأغث .. نفس وضع الرياضيات بالثانوي -.-.


وبالنسبة للرياضيات، لأ مافيه شي من الي ذكرته. مافيه مادة "ريض" نهائيًا .. فيه كمّي بس أمرها هيّن ومن أتفه المقررات الي بتمر عليك.

 

[m5050]

انا درست مع الشيخ سعود ترم وحولت علوم حاسب ، مثل ما قالك سعود لا تفكر الحين لما تدرس الترم التحضيري حق الاداره بتعرف كلش بتلقى كل الناس متحيرين زيك ويسالون ويلقون اجوبه
عموما اللي اعرفه انا ان الاداره الماليه ياخذون نسبه اعلى من المحاسبه والاداره الماليه قسم اجدد من المحاسبه فانا اقول مستقبل الاداره الماليه احسن بس هو كله يعتمد عليك لازم تعرف هذا وش فيه وهذا وش فيه وتشوف اللي يناسبك
موفق

 

[Game Time]

صلي صلاة استخارة والله يوفقك ان شاء الله

 

[Raziel]

أنا خريج محاسبة جامعة الملك سعود، وأفضل الناس تتخرج بشهادة إدارة مالية (أو) تاخذ محاسبة الآن على أساس يكون هدفك ماستر في الفاينانس (مالية).
للأسف جامعاتنا متأخرة كثير عن البقية، ويفترض يكون قسم مزدوج محاسبة/مالية بدل قسمين منفصلين.

المحاسبة أشبة بقاعدة أساسية لخريج مالية، والمالية هي الأرجل لخريج المحاسبة. كل التخصصين يحتاجون بعض لكن الفرق بالتوجه، إذا تبغى تكون مُراجع/Auditor (محاسب قانوني) تاخذ مقررات محاسبة أكثر وإذا كنت تبغى في مجالات التمويل والاستثمار والمحافظ المالية تاخذ مقررات مالية.

ونصيحة! طوّر مهاراتك الأخرى: لغة عربية/إنجليزية - استخدام الكمبيوتر والتطبيقات المعروفة - أساسيات الرياضيات المعروفة (تفاضل - تكامل .. إلخ) وأي مهارة تجيدها راح تحتاجها لاحقاً سواء في الجامعة أو مستقبلاً بعد التخرج.