من قرن ما فيه مواضيع الواحد يستفيد وهو يناقش فيها !
الحمدلله الدنيا بخير
الان توقعهم انه الجهاز راح يبيع 15 مليون بنهاية السنة المالية ، توقع متحفظ جدا
امممم متحفظ وجدا والارقام جالسة تنزل كلها ما تركب على بعضها
لو تاخذ لفة صغيرة على ارقام المبيعات بكل سوق تقريبا نسبة الانخفاض بين ٢٠ الى ٣٠٪ .. انا اشوف الرقم ما بين انه متفائل او منطقي يعني مو كلش متحفظ ولا كلش حالم
وبرضو عشان كذا نينتندو لابد يكون عندها مصادر أخرى في تعويض الخسائر (
مبيعات السوفتوير مثلاً اللي للتو تعدت مليار وحدة) وما تعتمد بشكل كامل على أرباح الجهاز، وش بتسوي نينتندو لو فرضاً سقطت مبيعات الجهاز بشكل حاد ومفاجئ تحت أي ظرف؟ كيف بتعوض الخسائر الفادحة وفي وقت قياسي؟
فيه مجموعة امور لازم ما نخلطها مع بعض
احنا نتكلم عن سعر الهاردوير .. وربحيته العامة على الشركة
الحين نبدء الرد على نقاطك .. نينتندو لا بد عندها مصادر لتعويض الخسائر .. المفترض انت تبدل كلمتك الى (( تنويع الموارد )) لان مرة ثانية ما فيه شركة بتقبل انها تدخل في خسائر مباشرة بدون اشياء قسرية مؤثرة على (( حياة الشركة ))
يعني لما نينتندو قررت تخفض سعر العدس اول ما نزل
شنو كان السبب ان حياة الشركة فعليا كانت على المحك
كانوا مضطرين ينزلون السعر والا نموذج عملهم كله بيتضعضع وفعليا تضعضع
حاليا هم في وضع مختلف ومع هذا هم فعليا يحاولوا ينوعوا مصادر الدخل .. الافلام .. كمثال رافد جديد للموارد المالية
نقطتك الثانية الهبوط الحاد .. شوف توزيع الاصدارات
حاليا احنا نمشي بالسنة المالية الجديدة هذي زيلدا بتنزل
وبعدها ميترويد وللحين ما نعرف عن مخططهم القادم
يعني على الاقل هذي الاصدارات بتظل محافظة نسبيا ان الجهاز ما تصيده نزلة الوي
للتو نزل تصريح من
رئيس نينتندو إن مبيعات الجهاز في موسم الأعياد الماضي كانت أقل من التوقعات وما حقق النتائج المرجوة ورتم المبيعات يتباطئ بشكل سريع، ليش؟ وش الأسباب؟ موسم الأعياد المفروض يكون أكثر وقت في السنة تستغله نينتندو في زيادة الربحية وعدد الوحدات المباعة لكن لسبب ما صار العكس. كيف تحل نينتندو المشكلة هذي وترجع تزيد الربحية ووتيرة المبيعات بسعر الجهاز الحالي وتتجنب حدوث نفس المشكلة في نفس الوقت مستقبلاً؟
ايوا هني يجي عروض تخفيض السعر لموسم الاعياد او البنادل فاهم ليي انت بموسم الاعياد بتسوي عروض يختلف عن تخفيض دائم للسعر
وكيف صدور جهاز بسعر مخفض له تأثير عكسي للمستهلكين؟ أنا كمستهلك من مصلحتي دائماً وأبداً يكون الجهاز بسعر مناسب وفي متناول اليد وما راح أتردد لحظة واحدة في اقتناء الجهاز بالسعر اللي يناسبني.
فيه شي اسمه انطباع المستهلك
تخيل انت مثلا رايح لبقالة في وسط حي شعبي وتسمع انهم بيفتتحون مطعم .. يفتتحوه والا اسعاره باسعار فندق خمس نجوم
ويقولون لك ان الطاقم كله كانوا شيف وكادره فصلوهم من احد الفنادق المشهورة
اول شي يتبادر لذهنك .. هؤلاء كلهم فقدوا عقلهم يفتتحوا مطعم بهالاسعار في هالمكان .. مع ان نفس المطعم وبنفس الديكور لو افتتحوه في احد الاماكن الراقية بنفس مستوى المطاعم يمكن يكونوا افضل وانجح منهم كامل
يمكن المثال طويل شوي بس ضروري علشان نفهم لما ترسم له هذه الشركات خصوصا اذا كانت عندها خطة واستراتيجية حتى لو ما نعرف تفاصيلها بس على الاقل نقدر نحكم انها واضحة المعالم
نينتندو ما تفكر في سنة 2023 لحالها .. غالبية الشركات عندهم خطط للسنة نفسها وعلى الاقل لخمس سنوات وثانية لعشر سنوات
يعني انت تتكلم عن صناعه الالعاب اللي اللعبه الوحدة تاخذ بين ٤ الى ٥ سنوات تطوير اذا مو اكثر
الحين خطط جهاز نينتندو القادم جاهزة واكيد التخطيط لزخم الاصدار وغيره ترسم او انرسمت
نبدء من الصفر سعره .. الانطباع عند المستهلك الحالي بهالزمن مختلف خصوصا بالامور التقنية لاحظ انت اي تلفونات تبيع ؟
تلفونات الفئة العليا البريميرم او التلفونات الرخيصة !
تخيل انت لو سويتش ٢ نزل بسعر ٤٠٠$ مثلا
اغلى سعر لجهاز نينتندو .. والسويتش ما زال ب ٣٠٠
او حتى بوقت اصدار سويتش ٢ نزلوا سعر السويتش الى ٢٥٠ $
هل الزبون بيتقبل السعر الجديد .. بيعتبره مغري وهو بياخذ جهاز جديد المفترض افضل من شركة حافظت على سعر القديم ٧ سنوات
يعني حتى لو بيتردد عنده ثقة ان السعر ما بيقل
لكن لو خفضوا سعر السويتش الى ٢٠٠ واقل
والجهاز الجديد الضعف او خلنا نقول سعره ٣٠٠$
انت تتوقع المستهلك الجديد اولا بيعامل السويتش الجديد انها جهاز تقني على قولتهم صيحة وصرعه جديدة وهو بهالسعر ؟
وانت تشوف البلاي ٥ بسعر ٥٠٠$ !!!
احنا ما نتكلم عنك انت وتفكيرك ومنطقيتك احنا نتكلم عن انطباع الناس بالعموم عن الجهاز
هذي امور تاخذها نينتندو بحسبانها .. لهذا انا ما اعتقد انهم بيخفضوا السعر بشكل دائم يمكن مؤقت للاعياد فقط او بنادل
لازم من الحين تبني استراتيجية تسعير السويتش الجديد
تبني انطباع الناس وتبني ثقتهم
ما اظن نينتندو مفتكرة بزبون يبي السويتش ب ٩٩$ !
