هو مو اقدم شي لكنه شي جميل.
رحت مع اخويا واشتريت معاه ps2، الشي هو اني اتذكر بالتفصيل ايش اخذ معاه.
وقتها اخذ ميتل غير 2، GTA Vice City، و Crash wrath of cortex، و Tekken 4 وغيرهم.
واخذ معاه الميموري كارد الازرق السبيشل.
اتذكر بنفس اليوم مسكت سلك الAV وفكفكته عن بعضه... شفته ثلاثة اسلاك مرتبطة ببعضها قلت اكيد المقصد اني افكهم وبالفعل فكيتهم...
ثم اختفيت عن الانظار... صحيت شفته زعلان عليه بس ما كلمني عنه، طبعا وقتها استوعبت ايش سويت لانه امي سمعتني كلمتين
بس يعني رجعنا نلعب بعدين
الاخ ذا:
اتذكر بوحدة من الاعياد صحيت ولقيته مشتري God of war الظاهر ولعبة لسلاحف النينجا، طبعا لعبت سلاحف النينجا لول
--
- ذكرى لطيفة اخرى لكن ما تعتبر قديمة اتوقع.. اذكر لما رحت اشتريت psp go، كان عندي اولريدي psp عادي، مع ذلك رحت جبت غو لسبب ما، فطلعت انا واخوية وخالي واولاد خالاتي عشان نروح نجيب الجهاز من عالم سوني في جدة البلد اتوقع، كنت لابس قميص لاكوست اصفر واشترينا عصير وانا اخذت شي فيه رمان الظاهر وانكب على القميص... وما طلع ابدا.
وقتها تعلمت انه عشان تكسب شي من الطبيعي ان تخسر شيئا بالمقابل
طبعا الpsp go مع انه عزيز على قلبي الا انه اقل محمول لعبت فيه، قلبته جهاز عرض افلام وتشغيل اغاني
--
- هذه ذكرى قديمة حقيقية، يمكن كان عمري 4 سنوات او 5، طلعنا مرة لابها وتعرفت على توأم هناك، كنت كل يوم اروح العب معاهم، مدري فين اهلي عني بس اتذكر كنت اروح لوحدي ومحد يدري، ما اتذكر اشكالهم غير انهم توأم وكان معاهم بنت تنتبه عليهم.
- بنفس ذيك الرحلة خالي جاب"برشومي" ومن حماسي مسكت حبة بدون ما تتقشر بكامل يدي... طبعا دخل شوك كثير بيدي ذيك وامي جلست تطلع الشوك.
الحقيقة هي، مع انه عندي ذكريات كثيرة عزيزة علي، لكن كثير منها مسك معي بسبب حاجة هبلة حصلت معي لول.
اتوقع اني شخص يرتكب اخطاء كثير، لدرجة انه اتوقع صرت انسى كثير ويمكن سنين كثيرة من حياتي ما اتذكر منها شي يا اما بسبب عدم مبالاة او انه ما صار معايا شي مهم او ببساطة حصل شي يستحق النسيان. ومدري اذا الشي ذا طبيعي او لا.
