جالس ألعب الثالث حاليا اخر جزء بثلاثية ال PS1، لعبت الأول والثاني ورا بعض وكانت تجارب رائعة، تكلمت عن الأول بالذات باستفاضة هنا:
RE1
أظن ذي ثاني لعبة رعب بهذا الأسلوب ألعبه أي الكاميرا الثابتة وتحكم الدبابة بعد ساينلت هل الأولى، وثالث لعبة رزي ألعبها، خبرتي مع ألعاب الرعب بسيطة وكلها محصورة مع رزي4 -لو تعتبر لعبة رعب- و سايلنت هل الأولى وكذلك ريميك رزي 2 الي ما خلصته لأنه ما سلك معي، ولعبت هذا الجزء على أساس أبدا السلسلة من أولها لأني من زمان ناوي أختمها كلها وحدث هذا تحت رغبة العقل الفذ والصديق الحق
@خشبة الي كان يريد نلعب ريميك الأول ونبثه بديسكورد، لكني بديت مع النسخة الأمريكية من الجزء الأول على البس1 على أساس أشوف تطور السلسلة.
فيه ثلاث نسخ أمريكية على البس1 للعبة، النسخ الأولى اسمها رزي1 ونسخة...
وما يصدق على الأول يصدق على الثاني بشكل أفضل بنظري، وكذلك الثالث مع تغيير بعض الأمور، الشاهد كلهم ألعاب تعتمد على إدارة الموارد والاستكشاف والمشاوير اللذيذة بألعاب المترويدفينيا.
الحين الثالث وصلت فيه لبرج الساعة، وبأمانة أشوفه أضعف جزء لين الحين، لأن أجواء المدينة حلوة بس أقل من أجواء القصر أو مركز الشرطة عندي، اللعبة صايرة خطية وسريعة وهذا ما شي سلبي بس بذي الحالة أفضّل تشّعب الأول والثاني، والأكشنية الزايدة الي فيها شي لطيف، يعطوك رصاص أكثر من الثاني تقريبا.
نمسيس ما أشوفه إضافة قوية بأمانة شوية كريه بشكل ممل نوعا ما، بس يمكن كان بيكون تأثره خرافي لو لعبتها بزمانها.
برجع لما بخلصها، ما أظن رايي بيتغير عن كونها أضعف جزء، لكن مافي جزء ضعيف بين الثلاث أجزاء كلها ألعاب حلوة وتستاهل.
خلصتها وطوّلت فيها واجد، وصلت 9 ساعات لسبب ما وخذيت F الظاهر لعبي صار سيئ جدا.
فيه كم نقطة تحسب لهذا الجزء، إضافات لطيفة بتصميم المراحل مثل البراميل المتفجرة، كرتون تقدر تطلع فوقه والأعداء ما يلموسك، صندوق تضربه ويطيح ومرات TNT بالجدار، يعني أشياء بسيطة ولطيفة، وقليلة بالمراحل.
سالفة الخيارات وتأثيرها على أحداث القصة لطيفة بأمانة، ومرات أعيد عشان أشوف نتيجة الخيار الاخر الآنية، مرة طلع نمسيس ببرج الساعة وكان خيار استعمل الضوء أو الكهرب، الأخيرة نتيجتها ألقى loot منه بينما الضوء يطيحه من البرج، وشفت مقطع باليوتيوب لمكان معين كان كارلوس موجود بينما لما لعبت ما كان موجود، فشكل الخيارات تفرق بشكل طيب باللعبة، ومن الي فهمته الظاهر حتى النهاية تتغير؟؟
النمسس ما كنت عارف أنه يطيّح loot لو هزمته وهذا يخليه إضافة حلوة، بعده بنظري ما يخوف وشوية مزعج أكثر من كونه مهيب ولو أن تصميمه رهيب، بس سالفة أنه يلاحقك وتريد تفتك منه أو تهزمه وتلقى أغراض ممتازة منه شي جميل، كذلك نجحوا عبر اللعبة أنهم يخلوه موجهاته ممتازة، يطلع بتوقيت شبه مباغت وقتاله ببرج الساعة ممتاز وكذاك الي بعده.
سالفة التفادي ما عرفت أتقنها بس باين تضيف للعبة الكثير، وهي مع خطية المراحل وتبسيط الألغاز تعطي طابع أكشني أكثر لهذا الجزء، الأول والثاني أدوات من بداية اللعبة استعملها بالنص، هنا تلقى الغرض تستعمله عشان تحل اللغز على طول.
حلوة اللعبة، ذوقيا أميل للثاني والأول أكثر، الثالث الأضعف ثم الأول والثاني الأفضل، أجواء رزي بسخافة التمثيل ومبالغات المشاهد، بينما زوايا الكاميرا الغريبة وجودة الخلفيات تدخلك بعالم اللعبة وتييسّر حفظه وتخليك شوي غير مرتاح، وأحب أشيد بجودة الأوراق وحكاياها أجود نصوص اللعبة وبفرق، بهذا الجزء لقيت مذكرات طبيب يبدأ يشوف بوادر تحول الناس لزومبي ويحاول يفهم الموضوع وزعلان من نفسه أنه يفشل بعلاجهم، الأجمل أن فيه تسلسل للموضوع عبر عدة صفحات قصيرة ما تشوفه دفعة وحدة، وعلى النقيض لقيت ورقة من فريق Umbrella يقول لو بشري دخل هذا المكان اقتله، والي ما يعيش وديه للمختبر عشان نخليه فار تجارب ههههه
أحب جيمبلي الثلاثية التنوع بين الاستكشاف وتجميع الموارد وإدارتها والقرارات الناتجة من هذا، مرّة خلّص الرصاص فأعدت كمية معتبرة عشان أوفّر رصاص، الوحوش عددهم وأنواعهم واجد زينين لطبيعة اللعبة، كريهين أحيانا بشكل إيجابي لأنها لعبة رعب.
الكومبات على أنه بسيط بس كل القرارات بمخك، تفكر هل تقتل الوحوش أو تتفادهم وتوفر الرصاص لشي أهم؟ هل تفجّر راسه بالشوتجن وتستلذ بأنميشن الدماء وصوت الشوتجن؟ ولا تستعمل المسدّس وتوفّر الشوتجن لوقت لاحق؟ وترانسة الأسلحة منوّعة مرضية.
إضافة صنع الرصاص بهذا الحزء بالبداية استثقلتها وشفتها غبية، بعدين أدركت أنها تضيف لهذا العنصر وأنك تقدر تخلط بينها، عرفت هذا متأخر كثير مع الأسف.
عجبتني مرحلة برج الساعة وبأمانة مستوى اللعبة ما يطيح من البداية لين النهاية شي مثل الثاني يعني، بس المراحل خطية أكثر ومش بالضرورة بشكل سلبي، أتصور بعد الثاني التغيير شي حلو.
أتصور الإعادة بتخليها أحلى لأن ذي لعبة أركيدية أكشنية أكثر من الأجزاء الماضية، قرارات تغيّر مسار القصة على دوج على رصاص تخلطه، وفوقها خطية وفوق هذا المراحل فيها قنابل تقدر تفجرها عشان تقتل الوحوش، وزعيم يطاردك ممكن تهزمه وتحصل منه loot خارق، كلها أشياء تحثك تعيدها وتحترفها، كل التغييرات هذه بنظري موفقة وصنعت شي جديد عن الي قبله، الأول الأساس الثاني الصقل وإضافة سناريو B عشان تعيدها، والثالث التغيير بنفس الإطار العام.
مستقبلا ممكن أجرب أجمع الشباب ونخلّص الألعاب ذيلا دفعة وحدة، نكون متجمعين بمزرعة أو شي، رزي جدا حلوة حال الجمعات، ويمكن ساعتها بيكون عندي حكم جديد لأحسن وحدة من الثلاث، لو باستعمل tier list بقول الثلاث أجزاء هذيلا كلهم A، وشي عجيب أن بعدها جاء الرابع الي كان S الأجزاء الأساسية قدمت عقد قوي جدا بأمانة.
