كيف تستمتع في اللعبه بشكل كامل !

[Painkiller Q8]

بسم الله الحمن الرحين

كيف تستمتع في اللعبه بشكل كامل !

موضوع من تأليفي .. طرى في بالي قبل انام وقلت اكتبه اليوم ونتناقش فيه عن كيفية الإستمتاع في الالعاب بشكل صحيح وكامل , سبب كتابتي للموضوع ان امس والي قبله عانيت جدا في اللعب وكان من الصعب اني اركز في الالعاب , مع اني اعرف كيف استمتع وأهيء جو مناسب للعب .. لكن هل يومين كانوا مجرد FAIL !

يوجد انواع من الناس ماعندهم مشكله مع فعل اشياء او نشاطات اثناء اللعب .. وطبعا هذا الشيء ينعكس سلبا على الاندماج في اللعبه , ومستحيل ان انسان يلعب لعبه ويفعل اشياء ثانيه في نفس الوقت ويندمج في اللعبه بمعدل 80% ومافوق ! (طبعا نسبه مئويه من راسي)

عن نفسي: فيني عاده بايخه وهي ان الـLaptop مفتوه امامي 24 ساعه او طوول وقت اللعب .. والآيفون كذلك :\ يعني وانا اللعب انتظر اي مقطع كات سين علشان اشوف الـ WhatsApp او الـ Facebook .. يخرب بيتهم 24 ساعهNotification

طبعا هذي الاشياء ماهي بالضروره ابدا اثناء اللعب .. بل مجرد وسائل تخرييب جو اللعبه :annoyed:

وطبعا فيه اشياء تقطع عليك جو اللعب بس اشياء اهم من اللعبه مثل الصلاه او مناداة الأهل لك او الطوارئ لاسمح الله .. وطبعا الدوام !


بذكر لكم بعض النصائح الي تفيدك في تجهيز جو اللعب المناسب للإنسجام مع اللعب ويكون التركيز كامل !

لتجنب المقاطعه اثناء اللعب !
لاتلعب والابتوب مفتوح امامك (بدون فائده) لان الـMSN والـYouTube والمنتديات تستدرجك وتطلعك من جو اللعب , لكن اذا كنت تلعب واماك Guide مافيه مشكله.
لاتتلتفت لأي تنبيهات من الــ WhatsApp او الـFacebook او Twitter...الخ لان هذي الوسائل تجذبك وتستدرجك إلى ماله نهايه لان من الممكن انك توقف اللعبه وتكتشف انك وقفتها لمده تزيد عن ال20 دقيقه.
لا تأكل وانت تلعب , او لا تبدأ اللعب وانت عارف ان بعد اقل من نص ساعه فيه وجبه غداء/عشاء مع الاهل .. خصوصا لعب Online لان احتمال كبير تكون في Rank match ومبدع في القيم ويدخل عليك اخوك او الخدامه ويبدأ spamming الأليم .. يالله غدااااااااااااا...الخ ويالتالي راح يتشتت تفكيرك وتتمصخر في القيم !
لاتلعب اونلاين Ranked وانت عارف ان بعد أقل من نص ساعه فيه (( صلاة )) خصوصا صلاة المغرب لان الإقامه سريعه .. وماهي حلوه انك في بداية الRanked Match والمسجد برا يقيم الصلاة,
لاتلعب اونلاين في ساعه متأخره وانت وراك دوام .. لان عقلك بيكون فيه نسبه انشغال ومحاتاه للساعه لانك ماتبي تسهر وتروح الدوام تعبان بسبب اللعب... لان الاونلاين يسحبك تدريجيا (صارت معاي أمس في Gears) -_-

لتجنب تشتت الافكار اثناء اللعب !

• لاتلعب اكثر من لعبه من نفس النوع genre .. لان من الممكن انك تواجه المشاكل الآتيه.

1. أختلاط افكار القصه. (صارت معاي كثير) يعني مره لعبت لعبه ونمت وانا من الاساس اللعب لعبه ثانيه من نفس النوع .. وصحيت اليوم الثاني وتلخبطت شوي في الاحداث >.<
2. اختلاط في اسماء الشخصيات.
3. اللخبطه في التحكم بين اللعبتين.

• لاتعلب وانت مشغول البال في مشكله اجتماعيه لان مستحيل انك تندمج في اللعبه وبالتالي راح تفقد جوهر المتعه في اللعبه ولاتفهم شيء
• لاتلعب لعبه قصه عميقه في ايام الإختبارات (لان راح تضيع بعض الافكار من الجهتين .. اللعبه والدراسه) بسبب الضغط على العقل.
• لاتلعب لعبه قصه عميقه ومعاق شباب في البارتي خصوصا الـXbox360 لان كل واحد بيبدأ يسولف عن موضوع خاص او دردشه ونصف اندماجك العقلي بيروح على كلام الشباب.
• وطبعا النقاط الي فوق بعضها تنطبق على تشتيت الافكار في اللعب

بعض الاشياء الي يستحسن تجنبها في اللعب !

• لا تاكل "حب" , "فصفص" , المكسرات .. لان هذي الاشياء تحتاج انك تحرك يدك بشكل مستمر وتوقف اللعبه احيانا لان حبه معينه عصلقت معاك ولازم تتفرغ لها , وطبعا راح يتوسخ الكنترول سواء من اللعاب او المواد الي تطلع من المكسرات
• لا تجلس في مكان غير مريح ,,, لان راح تتضايق بعد فتره بسيطه وتحاول تغير المكان وتوقف اللعبه او تصاب بمشاكل في المفاصل .. خوصصا القعده الارضيه الغير صحيه.
• لاتلعب لعبه (تحتاج اندماج كبير) اذا كان عندك اصدقائك لان من الممكن انهم يملون لان انت الوحيد الي مركز في اللعبه وبالتالي بتبدأ سوالفهم وراح تنزعج ولا تقدر تندمج .. حاول تلعب العاب بديله جماعيه او Arcades
• في اشياء أخرى لكن ماجت على بالي او ماني عارف اشرحها ^^

اشياء ممكن تسويها ولا راح تأثر على اللعب !

• شرب السوائل .. العصير - القهوه - الشاي ......الخ لان هذي الاشياء تقدر تشربها ببطىء ولا تحتاج انك تركز في الشرب او تحط عينك على الكوب .. يعني اشرب وانت تشوف مشهد.
• الدردشه مع الاصدقاء في البارتي ماتمنع من لعب الالعاب الي ماتحتاج تركيز و Arcades
• تشغيل الاغاني من جهازك شيء حلو وممتع مع العاب السيارات و Arcades
• اشياء كثيره ماتحظرني حاليا

* برأيي افضل وقت للعب هو بعد صلاة الظهر إلى العصر .. تقريبا 3 ساعات ونص يعتبر وقت ممتاز للعب بدون مقاطعه لان الناس في قيلوله ومافيه صلاه إلا بعد ساعات !
وطبعا مابعد صلاة العشاء لانه وقت مفتوح ومافيه ازعاج ابدا 🙂
والمحضوض الي يقدر يلعب فترة الصباح لان هذي الفتره الــPerfect للقيمز .. الي عنده دوام او جامعه ماتمر عليه هذي الفتره 🙁


احب اسمع رأي كل واحد واتمنى انه يضيف بعض النقاط سواء الاشياء الي مايستحب تسويها في اللعب او الاشياء الي ممكن تسويها وما تأثر على اللعب ...​

 

[Raziel]

أكثر شيء يزعجني لو بغيت ألعب، هو المقاطعة أحياناً أضطر أسهر علشان يكون الكل نايم وألعب بهدوء وراحة (+ نت يصير وقتها صاروخ :laugh:🙂

 

[Painkiller Q8]

^
ههههههه قديمه هذي تشبك بليل علشان النت يصير صاروخ , شكلك تستخدم خدمه من شركات الإتصال !
وعلى فكره .. شنو انواع المقاطعه الي تتعرض لها ,, طبعا اذا مافيه احراج اذكرها🙂

 

[Sora Diersly]

لكن اذا كنت تلعب واماك Guide مافيه مشكله.

هذي بحد ذاتها اكثر طريقة تخليني مااستمتع بأي لعبة. الجايد أعتبر الرجوع له لما اخلص اللعبة وانوي على ولكثرو ثاني. طبعا الألعاب من هالفئة اللي اعيدها هي تكون توب وحاجات اسطورية, لذا احاول اني افصفصها قدر الإمكان لحالي وبدون اي مُساعدات زي ماانا متعوّد بالعادة, وفي الولكثرو الثاني ابدأ ارجع للجايد علشان الأمور اللي مااكتشفتها علشان ماافوتها للمرة الثانية

 

[zlatanovic]

الاختبارات, ولا شي مثل الاختبارات .. اذا عرفت ان عندي اختبار لاسبوع قدام( حتى لو كويز ) إما العب فيفا طول الاسبوع او لعبة على المحمول ( يوغي ). مستحيل العب لعبة بقصة عميقة ونظام عميق, لأني ببساطة اكون شايل هم طول الوقت. ( لا هم مثل هم الاختبارات ولا وجع مثل وجع الضرس < بتصرّف)
اما عن الاستمتاع الكامل فلازم يكون هدوء نوعا ما, ولازم معي بطانية ( حتى لو حرررر )! واحسن وقت من العصر الى المغرب ( والنور طافي ) او الفجر الى الظهر ايام الاجازات.

 

[Aleix]

هذي بحد ذاتها اكثر طريقة تخليني مااستمتع بأي لعبة. الجايد أعتبر الرجوع له لما اخلص اللعبة وانوي على ولكثرو ثاني. طبعا الألعاب من هالفئة اللي اعيدها هي تكون توب وحاجات اسطورية, لذا احاول اني افصفصها قدر الإمكان لحالي وبدون اي مُساعدات زي ماانا متعوّد بالعادة, وفي الولكثرو الثاني ابدأ ارجع للجايد علشان الأمور اللي مااكتشفتها علشان ماافوتها للمرة الثانية

نفس تفكيري ، الألعاب اللي أنهيها أكثر من مرة تكون شي أسطوري وتوب ، ولكن العادة إني أختم اللعبة مرة وحدة وأرميها بالدرج ،



موضوع Painkiller Q8 رهيب وفكرته جديدة بالنسبة لي ،

عشان أستمتع باللعبة أكثر إني ألعبها مع أخوي أو صديقي ، دائما اللعب التعاوني له متعته الخاصة ،
إني ما أشوف فيديوهات أو صور كثيرة عن اللعبة ، كذا بيكون فيه عنصر المفاجأة وبالتالي متعة أكثر ،(أنا حاليا ما أشوف أي خبر عن سكايرم أو باتمان الجديدة )
ما أقرأ أي guide أو walkthrough إلا لو كنت مضطر (أنا حاليا قاعد ألعب witcher 2 مع قايد لإن فيها أشياء مخفية كثيرة جدا )

أنا فيني مشكلة لكن أحاول أعدلها ، اللي هي التدقيق الشديد على عناصر اللعبة من جميع النواحي ، على سبيل المثال لعبة Mass Effect 2 قصتها رائعة وعميقة والجيم بلاي ممتاز ،
ولكن بسبب تعابير الوجه السيئة مع تحركات الأنيميشن العبيطة ومشاكل الفريمات توقفت عن لعبها فترة معينة 🙁 بعدين رجعت لها وأنهيتها ،
أو لو كانت اللعبة ممتازة من جميع النواحي ولكن التمثيل الصوتي تعيس ممكن أترك اللعبة ،
أنا بحاول أستمتع باللعبة وأتغاضى عن العيوب البسيطة مستقبلا.

 

[Zoda]

اكثر شي يخرب علي باللعب اني ما اقرى الكتيب الي يجي باللعبة بالعاب مثل فول اوت و Deus Ex : Human Revolution اقعد اخسر النقاط اجرب المهرات و غالبا اترك المهرات المهمه لانها واضحه وبالنهايه اتوهق بمهرات ما استفيد منها وازيد من صعوبة اللعبة على نفسي واتمنى اني اعيد اللعبة واختر المهرات من جديد :/ الشي الثاني اهمال ترتيبي لقعدة اللعب بعد ما اخلص لعب ما ارتب اللجلسه والخدامه تتولى الترتيب مرات اتوهق اذا مرة فتره طويله ما لعبة ورجعت العب اسال الخدامه عن واير معين او شنطة الالعاب ماتفهم عن ايش اتكلم وتنسى وين حطة الاغراض واذا وصل المخزن عليهم السلام لان كل فتره يصيرلهم تصفيه يعني الحل الوحيد اشتر من جديد :sadwalk:

 

[G4mer]

أنا أكره ألعب والجو أزعااج والغرفة وسخه (( عصير ورق أكياس جبس بقايا أكل ))
وأكره واليهال عندي في الغرفة أو في البيت أمنع عن نفسي اللعب في هذا الوقت لأنه ما ودك تندمج في القصة واييك مشهد ويخربها عليك ولد أخوك ولا بيصير شي

أنا دوامي مسائي فأحب أقضي وقت الليل في اللعب من الساعه 10 لين وحده (( اذا ما كان علي دراسة ونادرا ما أدرس <..< ))
طبعا لا زم الهيدسيت

في الوقت الحالي انامبتعد عن اللعب بس أحاول في الفترة الحالية أني أرجع للعب على الخفيف

 

[Super Shadow]

* برأيي افضل وقت للعب هو بعد صلاة الظهر إلى العصر .. تقريبا 3 ساعات ونص يعتبر وقت ممتاز للعب بدون مقاطعه لان الناس في قيلوله ومافيه صلاه إلا بعد ساعات !

الي متوظف و يشتغل شو يسوي 🙁 ؟ في ناس ترجع من الدوام ساعة 2 الظهر أو 3 العصر

بالنسبة للمتوظف أحسن وقت يلعب فيه بعد صلاة العشاء

لاتعلب وانت مشغول البال في مشكله اجتماعيه لان مستحيل انك تندمج في اللعبه وبالتالي راح تفقد جوهر المتعه في اللعبه ولاتفهم شي

هذي شوي صعبة بالنسبة لي

لأني يوم أكون متضايق لازم ألعب عشان أروح عن نفسي و أنسى الهموم

لاتلعب اونلاين في ساعه متأخره وانت وراك دوام .. لان عقلك بيكون فيه نسبه انشغال ومحاتاه للساعه لانك ماتبي تسهر وتروح الدوام تعبان بسبب اللعب... لان الاونلاين يسحبك تدريجيا (صارت معاي أمس في Gears) -_-

أنا صارت وياي كثير في لعبة زينو بلايد :laugh::

قاعد ألعبها ها الأيام و دايما مواصل عليها في نص الليل

 

[SAM]

كل ماحتاجه للدخول في جو اللعبه ,

كود رد في كاس ثلج , اي نواع من الحلاو , " مايكون احد شابك على الانترنت " , ولعبه تجذبنني فقط

 

[F.JUBRAN]

انا اي لعبة العبها استمتع فيها باكبر شكل ممكن

طبعا وقت اللعب ما تفرق عندي في اي وقت و مستحيل العب بجايد في اول ولكثرو، و انا من عادتي الملاحظات الزايدة عن اللزوم مالها مكان في قاموسي اللعبة الي تقدملي افكار و جيمبلاي ممتع العبها و استمتع في باكبر شكل ممكن و طبعا هذا الشيء احصله في اغلب العاب ننتيندو

طبعا وقت اللعب ما تفرق الغرفة وصخة والا نظيفة ما تفرق :laugh:: و اكيد ما العب اكثر من لعبة في نفس الوقت مهما كانت الجنرا حقها ما ادري بس احب اذا لعبت لعبة كل تركيزي يكون فيها ... و بس :happy:

 

[DEMON]

استمتع لابعد حد ؟؟
1- اطفي النور
2- اجهز كم قارورة كوكا كولا
3-عدم المقاطعة *احد اهم الاشياء* والحمد لله ما اعاني ابدا
4- العب باليل ،على الساعة 11 وما بعد ، الى الفجر ، زي ما يقولون *Allnighter*
ويا سلام ، هذا الشيء بيصير معاي اليوم *رايح اشتريgears of war 3 واتكي عليها طول الليل*

 

[عاشق 360]

استمتع واندمج مع اي لعبه بشرط اسكر الليتات ويكون المكان مظلم وبارد , كوب ثلج مع ريد بول او كولا زيرو . الاكل ممنوع لان اهم شي عندي نظافة الكونترولر , ماعرف العب والكنترولر مدهن يع .

واستمتع اكثر اذا كان اخوي او اي احد متابع معاي ويعطيني تعليمات وانا العب .

 

[DEMON]

واستمتع اكثر اذا كان اخوي او اي احد متابع معاي ويعطيني تعليمات وانا العب .

انا عكسك تماما ، اذا كنت العب ومعاي احد بالغرفة اقفل اللعبة وما اكمل ، واذا احد عطاني تعليمات ارمي الكنترولر بوجهه ، الحمد لله عموما ما اعاني من هذا الشي .

 

[Jonas]

انا ابغى افهم بس كيف الناس يلعبون لعبة طور القصة و هم قاعدين يسوولفون في البارتي :confuse:

و كمان احب العب اللعبه على جلسات متقطعه ما احب اختم اللعبه من جلسة وحده او جلستين و اكره ما عندي يجيني احد يقولي " يووووه!!! لين اللحين ما خلصت اللعبه الفلانيه ؟ " معليش يالاخو بس عندي حياه 😉

 

[Painkiller Q8]

^
انا مثلك ... احب امدد فتره اللعب كثر ما اقدر = متعه اطول ..

بعكس صاحبي المجنون اذا بدأ لعبه يخلصها بجلسه او ثنتين بالكثير .... ( ترا اسمها لعبه مو فلم ) :sarcastic:

 

[Al Pacino]

فعلا المقاطعة شي مزعج! اخوي قطع لعبي مرة لشيء تافه ومشيتها له المرة الثانية كنت بالعرض الاخير باللعبة وأنواع الدراما والحماس والتركيز ويطلع صوت الباب قمت لاشعوريا صرخت عليه وسكرت الباب وقفلته ..

ايضًا من زمان كنت العب الستوري مود وانا جالس بالبارتي مع الشباب عالاكس أو بالسكايب واكتشفت انها تقتل الكثير من المتعة والتركيز بالقصة ..

شيء أخير .. لاتعلب اكثر من لعبتين بنفس الوقت لان هالشي بيشتتك من ناحية القصة والتحكم وغيرها ..

 

[Mute City]

أكثر مسبب لي في قطعا للعبه تويتر يا إلاهي أرد عليه ويرجع يرد عليا وننخرط في نقاش ويدخل واحد وأنخرط معاه وفجأه لما اجي بأقفل يسألني واحد =_(
لما ألعب العاب سينجل أجلس لحالي معزول ألعب على رواق وقت ما طفشت أقفل ولا أجبر نفسي على شي
أحب ألعب فترة الصباح أكثر , أحب ألعب بعض الالعاب مع واحد يتحمس معايا ونضحك سوا طبعا هذي في الالعاب الي قدنا مخلصينها قبل ونعيد التجربه فيها

 

[T u R k I]

اهم شي الهدوووء

غالباً احب العب لحالي مااحب العب وفيه ازعاج

 

[Painkiller Q8]

في نوع من انواع الإزعاج فعلا مزززززززززززززعج ... جربه قله قليله في المنتدى !!!!!

وانت تلعب يجي ولدك ويطمر على ظهرك .. او يحاول يسحب الكنترولر من يدك .. او يوقف امام الشاشه ويعطيك Trolling face

يرتفع ضغطي بسرعه فضيعه واصير fuuuuuuuuuuuuuuuuuuuuuuuuuuuuuuu

 

[Mute City]

^
موضوعك كمان مسبب لتخريب المتعه لول وانا ارد عليك موقف لعبه لا أر بي جي وتحتاج تركيز فف9

 

[MAX9009]

ااااااااااااااااااهم شي عندي وانا العب ما يكون في ولا طفل بالغرفه لاني اتوووتر

 

[Painkiller Q8]

الظاهر ما مر عليكم واحد يشوف مباراة كرة قدم ويلعب Heavy Rain في نفس الوقت وانفس الشاشه .. لول

 

[MadPhantom]

ناااااااادر ما استمتع باللعب واستانس لمن العب واهلي نايمين لانهم لو قايمين .. اخوي : عبدالعزيز شلون اسوي هالشي ، شلون احمل هالشي شلون شلون شلون ...
اهلي كلهم ..... *نغمة جوال* ..
انا : الو هلا
اي شخص من العيله : تعال تحت شوي
انا : انزين *بدون نفس*

وع طفش طفش طلعت عيوني لو اخفف اكل شوي كان لصق بطني بظهري من زود الرقية والنزله بهالدرج !!!!!


بالنسبة لي برضه اشياء تخرب العب بين صلاة المغرب والعشاء ما امدى اندمج الا يلا الصلاة
او العب بعد المدرسه لانه شوي وعبدالعزيز يلا غدااااااااااااااااااااااااااااااااااا
او اي وقت باليوم يكونون اهلي صاحيين فيه !!!!!!!

وافضل شي العب واهلي بسابع نومه *فيس ينتظرهم ينامون*

 

[Naserano]

كيف استمتع بالألعاب ؟! هممممم صراحة ما عاد استمتع أصلاً ):

 

[awadnin]

أتذكر فترة أنقطع النت بسبب وجود حفريات بالشارع القريب من البيت يمكن تقريباً لمدة أسبوعين، بصراحة كانت أفضل فترة جربتها بحياتي من فترة طويلة من ناحية اللعب، مشاهدة التلفزيون، الجلوس مع الأهل.

 

[SCREAMING_RAGE]

الاختبارات, ولا شي مثل الاختبارات .. اذا عرفت ان عندي اختبار لاسبوع قدام( حتى لو كويز ) إما العب فيفا طول الاسبوع او لعبة على المحمول ( يوغي ).

مثلي...... ايام الاختبارات تشوفني ما العب غير فيفا فقط !! لأنها [مدري ليش ] تقلل من الرهبه و الstress اللي يجي دائماً في ايام الاختبارات.

بالنسبة لي, اول شئ ما احب العب اكثر من لعبتين, وهذه اللعبتين لازم تكون دائماً على كونسلز مختلفين (( علشان اللخبطه و الحوسه ! )), وفي ايام الدراسه و الضغط, تشوفني مركز على لعبه وحده فقط !! و احب دائماً العب بعد صلاة العشاء, و يوم تكون الدنيا هدوء و الانوار مطفيه علشان اعيش الاجواء صح (( أمس كنت العب السنجل بلير حق جيرز 2, وكنت العب الاكت الثالث حق المجمع المجهور و يوم تنزل عاصفة الريزرز..... ياخي الاجواء كانت خرافيه و تدخلك في جو رعب و خوف !! )).

 

[Raulioo]

الفجر مع كوب شاي ويوم اجازة...ولاستكمال الوضعية المثالية يفضل انها تكون لعبة الغاز ، توقف اللعبة وترتشف لك من الشاي الساخن وسط الهدوء العاصف بالغرفة وتتأمل المكان للي قدامك بحثا عن مفتاح حل اللغز..

 

[JIN KAZAMA]

احسن وقت بعد صلاه الفجر والناس نيام ! في الغرفه لحالي والصوت عالي ! وطبعا عشان الاستمتاع يكون كامل مااقعد اتصيد اخطاء اللعبه ولا مايحزنون ، استمتع باللعبه كما هي 🙂

 

[m5050]

احلا وقت للعب بالنسبه لي وانا توني صاحي من النوم مدري ودي كذا امسك اليد والعب اي شي .. وسط اليوم او اخره ماش ما اعرف اصير دايخ وما اعطي اللعب جوه
احلا وقت لما اصحى الصبح لحالي واحلى فطور واحلى تكيه بالغرفه :inlove: