قيمة إنستاجرام تفوق الـ 35 مليار << على إيش يا حسره؟ O.o

[Arashi]

قبل سنوات، إستحوذت فيسبوك على إنستاجرام بقيمة تصل لمليار دولار أمريكي، و خلال الوقت الذي إحتاجته الصفقة لتتم، فقيمة الصفقة إنخفضت بنسبة بسيطة، و مع ذلك فالمحللين حينها قالوا بأن مارك بالغ في دفع المليار دولار للإستحواذ على إنستاجرام، لكن منذ ذلك الحين و قيمة إسنتاجرام السوقية ترتفقع بشكل ملحوظ. فمع وصول عدد المستخدمين النشطين على الشبكة لأكثر من 300 مليون مستخدم، فقيمة إنسنتاجرام السوقية أصبحت تفوق الـ 35 مليار دولار أمريكي حسب ما أوردته Citigroup. الشركة أكدت على أن إنستاجرام و بفضل العدد الضخم من المستخدمين و الإعلانات المضافة للتطبيق، فبإمكانه أن يزيد من أرباح فيسبوك بواقع ملياري دولار أمريكي نهاية كل عام.

^^^^^^^^
قرأته للتو في الموقع الرئيسي...باختصار...الانتسجرام أكثره روبوتات..هذيله اللي يسمونهم الحسابات الوهميه او الاشباح او الاصنام....والباقي أطفال مب فاهمين شسالفه بس سرق صور من الناس وجوجل...أو ناس مهووسين بالارقام "تابعني واتابعك..ممكن لايكات الله يجزيك الجنه؟...ممكن فولو...طموحي أوصل 1000 متابع...الخ" وناس تشتري متابعين ولايكات والكثير الكثير من الامثله المتخلفه...300 مليون مستخدم لكنه أكثر تطبيق غثيث >_>




عن نفسي مسويه حساب للرسم في الانستجرام وفي تطبيق جديد نوعا ما اسمه Paigeeworld...صحيح في الاول اللايكات تعدي 100 مقارنة بالثاني اللي تتراوح بين 20-70....لكن الثاني عارفه ان اللي فيه ناس جاده وما تجامل ومنها أقدر أقيس درجة تطور شغلي...قالوا 300 مليون! ::

 

[Saudi Fighter]

هل التطبيق طلع لنا عاهات حياتهم هي اني اوري شخص اخر حياتي
خصوصا بل السفر ياكرهي اذا سفرت مع احد يصور 500 صورة بل اليوم وكل غداء او عشاء

 

[CODE-X]

اخبار صاحبه الاصلي ال***** اللي باعه لفيسبوك بأقل من مليار بفترة وجيزة فقط؟
طبعا من يوم ما زاكربرج مسك انستجرام خربه تخريب و حوله ميني فيسبوك.

 

[Blue Blood]

الانستاقرام اهون، المخيس اللي اسمه سنابشات هذا المخيس فعلا.

 

[CODE-X]

الانستاقرام اهون، المخيس اللي اسمه سنابشات هذا المخيس فعلا.

ليش؟

 

[Random]

ميه... 80% من الي في هالبرنامج مراهقين.. للحين اشوف تويتر افضل موقع اجتماعي حتى الان.

 

[The Doctor]

طبيعي بما إن الكل عليه...

بالنسبة لنوعية الناس... فلاحظت اللي يتحلطم من جودة خدمة العادة يتابع ناس مملة أو بايخة بكل بساطة... إنستجرام، تويتر، فيسبوك، واتساب... كلهم إنت اللي تحدد من اللي تابع و إنت اللي تحدد تجربتك. إذا عندكم ناس بايخة في أي خدمة، أنفولو و بلوك و خلاص.

 

[Veeto]

:joy: انا اشوفه برنامج عجيب ورهيب .. ذكريات وصور .. وتتابع اخبار الناس اللي ما تشوفهم .. مو كل شي بالحياة سوداوي :stuck_out_tongue_wi
مع ان حسابي بالغالب صور لبناتي اكثر من صوري :joy:

 

[Century Wizard]

طبيعي بما إن الكل عليه...

بالنسبة لنوعية الناس... فلاحظت اللي يتحلطم من جودة خدمة العادة يتابع ناس مملة أو بايخة بكل بساطة... إنستجرام، تويتر، فيسبوك، واتساب... كلهم إنت اللي تحدد من اللي تابع و إنت اللي تحدد تجربتك. إذا عندكم ناس بايخة في أي خدمة، أنفولو و بلوك و خلاص.

حتى مع البلوك والانفولو مافي فايدة، النوعيات البايخة هذي صارت منتشرة حتى في الكومنتس والهاشتاقات وهنا المشكلة

اوقات كثير ابغى اقرا تعليق مفيد على صورة او هاشتاق واتفاجأ بكمية المراهقين والمرضى اللي يكتبون كلام يخليك تنفر من الخدمات هذي

 

[Raulioo]

هم نفسهم جماعة الفيسبوك حولوا لانستجرام والتقنيتين مبلكهم من حساباتي @@ ..من بدايتي مع التواصل الاجتماعي بتويتر الى يومنا هذا، صحيح انه صار أسوأ من قبل (طبيعي مع كثرة اللي انتقلوا له) لكن يظل أرحم بكثير من غيره أهم شي ما يزيدوا عدد الحروف..@@

 

[Rare Games]

بالعكس انستغرام برنامج ممتاز وفيه يوميات وتواصل ومناسبات اجتماعية ومتابعة اخبار مشاهير وجيمز وسينما ...الخ

اما عن النوعيات الي ما تحب تشوفها كل ما عليك تسوي حسابك برايفت وخلاص ولا تقبل اي اشخاص غير مرغوب فيهم

 

[ASWD]

هالتطبيق عندنا هني في البحرين صار*حرفيا* وسيلة دخل ورزق لكثييييييير من الناس.ولد بنت عمتي اولهم سوى له صفحة لعرض السيارات حق البيع وما شاء الله عليه اللهم لا حسد ماشية اموره أحسن مايكون وكل اللي عليك ترسل له الصور وقسيمة شحن لأحد شركات الاتصالات اللي عندنا فيفا او زين او بتلكو والسلام وتبعوه ناس كثييير وعملو نفس الفكرة.وفيه ناس سوو حسابات لبيع الخواتم والاحجار الكريمة واللي حق بيع عطور وثياب وشنط واللي حق عمل اكلات وكيك وبيعها على المحلات والافراد وهذي بالذات نفعت ربات البيوت اللي تحب وتتفنن فالطبخ منها مدخل رزق ومنها ممارسة هوايتها المحببه

هو يعتمد على الشخص نفسه كيف يستخدم هالامور.انا شخصيا ما احب حتى اشوف اسمه لكني استفدت منه في شراء الخواتم والالعاب بعد!!!

 

[ibrahimJ]

ميه... 80% من الي في هالبرنامج مراهقين.. للحين اشوف تويتر افضل موقع اجتماعي حتى الان.

التويتر هو الأسؤا
إدارة التويتر سيئ بشكل ما تتخيل السيرفرات سيئ امس فاعد استنى رسالة التفعيل تجي بجوالي وما جت إلا متاخر
متعجزين انهم يعربوا التويتر بأنفسهم بطال ما يطلبوا مساعدة
140 حرف تسبب في مشاكل , التويتر هو اسؤا مكان تتناقش فيه , التويتر يخلي الكل عبارة عن متطرف بسبب 140 حرف لا تتناقش في التويتر خاصة للامور الحساسة
الـbot و spam مزعج بشكل كبير جدا تلقاهم في كل مكان والادارة ماهي راضية تسوي شئ
التويتر ما يأخذ التهديدات الشخصية بشكل جدي , كثير من الحسابات الي تهدد الناس موجودة الحسابات الي يقفلها التويتر عادة بسبب ضغط جزئية من الناس الي عندهم اجندة على التويتر علشان يحذفوها يعني السالفة سالفة سبام بس ماهي سالفة هو سوا شئ صح ولا غلط

 

[squall leonhart]

:joy: انا اشوفه برنامج عجيب ورهيب .. ذكريات وصور .. وتتابع اخبار الناس اللي ما تشوفهم .. مو كل شي بالحياة سوداوي :stuck_out_tongue_wi
مع ان حسابي بالغالب صور لبناتي اكثر من صوري :joy:

صراحة عندي فضول اشوف حسابك ههههه .. ايش ال ID ?

 

[Veeto]

صراحة عندي فضول اشوف حسابك ههههه .. ايش ال ID ?

خخخخخ i love being the mystry guy in TG
ما بعطيه احد :joy:

 

[juma]

اعتقد ان قيمة برنامج انستغرام انحسبت عن طريق احصائيات للمشاهير و منشوراتهم فيه و كثرة الدعايات و عدد المشاهدات لها تحدد قيمة انستغرام


و من جهة اخرى هذا طعم لبيع ملكية البرنامج بقيمة خيالية عشان صاحبه يروح يشتري جزيرة بعيدة ويعيش فيها للأبد و مايرجع يشتغل لوولز

 

[DINO CRISIS]

بالعكس فيه صور وفيديوز مضحكة ما نشوفها في النت هههههههههههههههههههه

 

[Arashi]

الانستاقرام اهون، المخيس اللي اسمه سنابشات هذا المخيس فعلا.

هذا قصه ثانيه بعد >_>
البنات الله يهديهم كل يوم يطرشون في صورهم وفيديو ما يخافون يمكن أضيّع جوالي او أشغله جدام ريال بالغلط
ولما تقول لهم هالكلام يقولون لك ان الله يعلم ان مب في نيتهم أحد يجوف صورهم غيري...خوش والله 😵

ميه... 80% من الي في هالبرنامج مراهقين.. للحين اشوف تويتر افضل موقع اجتماعي حتى الان.

تويتر نسميه تطبيق الفتن...واكثر مشعلي الفتن فيه ناس كبار اعمارهم فوق الثلاثين وكثير منهم اعلاميين ورجال دين وناس عندها مناصب مهمه...والمراهقين وراهم في اللي يلخبطونه...اجوفه الاسوأ لحد الحين وبسببه العالم تهبدل...عالاقل انستجرام تمنع اشعال الفتن وتقدر انت تبلغ عن الحساب اللي يسبب هالمشاكل ):

طبيعي بما إن الكل عليه...

بالنسبة لنوعية الناس... فلاحظت اللي يتحلطم من جودة خدمة العادة يتابع ناس مملة أو بايخة بكل بساطة... إنستجرام، تويتر، فيسبوك، واتساب... كلهم إنت اللي تحدد من اللي تابع و إنت اللي تحدد تجربتك. إذا عندكم ناس بايخة في أي خدمة، أنفولو و بلوك و خلاص.

المشكله في الناس المزعجه اللي تدحل حسابك (وهم اللي علقت عليهم في اول مشاركه)
مزعجين بشكل لا يطاق واخس شي حسابات الروبوتات اللي مهما تسوي لها بلوك ما تخلص >_<

مع ان حسابي بالغالب صور لبناتي اكثر من صوري

الله يحفظهم...الافضل ما تروي صورهم لأي حد لو ما كان حسابك خاص ^^

واتفاجأ بكمية المراهقين والمرضى اللي يكتبون كلام يخليك تنفر من الخدمات هذي

معظمهم أطفال...أخس بعد (":

هالتطبيق عندنا هني في البحرين صار*حرفيا* وسيلة دخل ورزق لكثييييييير من الناس

هذي أحسن مميزاته...لكن اللي يخرب هي الحسابات التافهه الله يفكنا منها ):<

140 حرف تسبب في مشاكل , التويتر هو اسؤا مكان تتناقش فيه , التويتر يخلي الكل عبارة عن متطرف بسبب 140 حرف لا تتناقش في التويتر خاصة للامور الحساسة

كل اللي قلته صحيح خاصة موضوع عدم الاكتراث للصح والخطأ U_U

 

[The Wierd Kid !]

على آيش يـ حسره ؟ من جدك ؟ .. البرنامج اشهر من نار على علم ولايكاد سمارت فون في هالعالم يخلون من الانستقرام

ميه... 80% من الي في هالبرنامج مراهقين.. للحين اشوف تويتر افضل موقع اجتماعي حتى الان.

من جدك ؟ تويتر عاد أبو الحسابات الوهميه المزعجه جداً تدخل هاشتاقات تبي تشوف الناس وش كاتبه وتشوف ارائهم وتشارك وذا
تلقى اعلانات ام علي واعلانات أبو جاسم وطقتهم ماليه الهاشتاقات قسم سياسة الحمايه والتصدي للبقز والحسابات الفيك والريتويت الاوتوماتيك وذا بتويتر معفننه لابعد درجه ماكانه موقع عالمي على مستووى .. ع الاقل الانستقرام شاف ظاهرة بيع المتابعين والحسابات الوهمية كثرت وتحرك قبل اسبوع نزلو قرار بحذف جميع الحسابات الوهميه واتوقع بيطبقون سياسة تفعيل حسابك برقم جوالك او شيء زي كذا

المشكله عندنا تويتر + الانستقرام = العرب مستخدمينها اسوء استخدام .. يجمعون فيها لايكات وريتويت وفولورز والفايده مدري وش يعني تحدي الموضوع ؟

بس الانستقرام ع الاقل حافظ خصوصيتك والانستقرام مسلي وفيه ذكريات وصور ويجذبك انك تطالع وتتصفح فيه .. فوق هذا تطيح لك بحسابات ناس تعرفهم وتطيح لك بحسابات ناس توك متعرف عليهم تدري من حسابهم اهتماماتهم وإلخ وغيره

أفضل من تويتر الي نص العرب فاتحين حساب عشان يكتبون شعر ولا يسوون اعلانات ..

بالنسبه لي افضل برامج حاليا للتواصل كـ عموم " بي بي ام + انستقرام + سناب شات "

تويتر مازلت اشوفه 70% اعلانات .. 30% ناس جديه .. والاغلبيه الي ماخذه عليه اهل الاعلانات بالهشتاقات .. وليس هادف لاي شيء مامنه ايه فايده ماعدى اخبار مشاهير فقط

 

[عاشق 360]

مستغرب ليش فيه "بعض" الناس تنتقد البرنامج ؟ بالأساس مافيه برنامج ينافس الانستقرام بالكوميونتي والسلاسه وسهولة الاستخدام !!!

بذمتك اذكر شي ينافسه او يقرب منه ؟

السناب جات أيضا جدا ممتاز وخصوصا لو تستخدمه بينك وبين ربعك وتصورلهم الفديوهات او تخاطب مجموعه ...

ولا .. الانستغرام ليس للمراهقين بسكم عقد . البرنامج كبير مسجليه فيه امراء ومدراء وعلماء وكتاب ومطورين ويستعرضون حياتهم اليوميه بشكل صور وفيديوهات .

 

[Veeto]

الله يحفظهم...الافضل ما تروي صورهم لأي حد لو ما كان حسابك خاص

الله يسلمكِ .. حسابي خاص .. اللي مو فاهمه .. اذا انتي متضايقة من التعليقات وغيرها ليش ما تخلي حسابك خاص ؟!

انا مثلا .. مو حاس باللي تقولينه .. انا ما اتذكر اني سويت بحث عن اي هاشتاج في الانستجرام
اغلب المتابعين ليي هم اناس اعرفهم (( شخوصا )) .. يعني اهل اصدقاء معارف .. وبالعكس البرنامج كأنه ارشيف للذكريات وتشوف اخبار الناس وتطوراتهم وجذي

هذا غير مثل ما ذكر الاخ ASWD .. عندنا بالبحرين صار فاتح ابواب رزق لناس كثيرين .. أخويي صار تاجر طيور منه معروف خليجيا
بالنهاية مثل هالبرامج .. هي مثل (( الكأس الفارغ )) .. يا تمليه ماي وتشرب وترتوي منه .. او تشرب فيه خمر والعياذ بالله
العلة مو في (( الكأس )) نفسه .. العلة في اختيار الشخص

 

[MAX9009]

زي ما قالوا الشباب بالنسبه للبرامج هذي انت تحدد كيف يكون مسارها معاك , بالنسبه لي الانستقرام استخدمه كل ساعه وبشكل يومي والحمدلله مصدر رزق بالنسبه لي , وغير كذا كله متعلق بالجيمنج نفس الشي تويتر مجرد ما ادخل احصل كل التغريدات عن الجيمنج واخر اخبارها يعني انت تحدد وضع التطبيقات هذي , واي مصدر ازعاج او سبامنج على طول بلوك

 

[Arashi]

على آيش يـ حسره ؟ من جدك ؟ .. البرنامج اشهر من نار على علم ولايكاد سمارت فون في هالعالم يخلون من الانستقرام

ما اتغشمر P:
هذا انا توني أنزل صور ومتضايقه من الحسابات الوهميه والناس المزعجه...شهرته بسبب كثرة عدد المستخدمين لكن ايش الفايده؟ أكثرهم أطفال وروبوتات يسببون للواحد الازعاج
أفضّل تطبق بناس عددهم قليل بس أوادم ولا واحد مزحوم بالمزعجين وما منه فايده

من جدك ؟ تويتر عاد أبو الحسابات الوهميه المزعجه جداً تدخل هاشتاقات تبي تشوف الناس وش كاتبه وتشوف ارائهم وتشارك وذا
تلقى اعلانات ام علي واعلانات أبو جاسم وطقتهم ماليه الهاشتاقات

في تويتر هالشي موجود صحيح لكن بنسبه أقل من الانستقرام...تعال اكتب هاشتاق جديد لمسابقه ولما يكون عليها اقبال كبير بتحتلها الحسابات المريضه والاعلانات ):

ع الاقل الانستقرام شاف ظاهرة بيع المتابعين والحسابات الوهمية كثرت وتحرك قبل اسبوع نزلو قرار بحذف جميع الحسابات الوهميه واتوقع بيطبقون سياسة تفعيل حسابك برقم جوالك او شيء زي كذا

من يومين الانستقرام خلصني من 130 متابع وهمي لكن لازلت أعاني منهم...أتمنى ينجحون بهالشي ويطبقون نظام التفعيل برقم الجوال -_-
على فكره...انا ماقاعده أنتقد التطبيق نفسه...أنا أنتقد المستخدمين...نفس الحال مع تويتر :stuck_out_tongue_cl
والمستخدمين هم اللي يخلون التطبيق مزعج او مسلي >_>

المشكله عندنا تويتر + الانستقرام = العرب مستخدمينها اسوء استخدام .. يجمعون فيها لايكات وريتويت وفولورز والفايده مدري وش يعني تحدي الموضوع ؟

اشباع الحاجه للفت النظر :satisfied:

وليس هادف لاي شيء مامنه ايه فايده ماعدى اخبار مشاهير فقط

كل هذا يهون ولا الفتن اللي قايمه فيه ):

ولا .. الانستغرام ليس للمراهقين بسكم عقد

أتمنى تفهم قصدنا من ردودنا ولا تسميها عقد
احنا ننتقد المستخدمين وليست التطبيقات نفسها...والسناب تشان والانستقرام والتويتر كلها فيها عدد ضخم من المستخدمين المزعجين وراعيين اعلانات ومشاكل حتى زر البلوك والانفولو ما يسوون شي يفكنا منهم

اذا انتي متضايقة من التعليقات وغيرها ليش ما تخلي حسابك خاص ؟!

المشكله احنا كرسامين نحتاج تكون حساباتنا مفتوحه لأننا نشارك في معارض وامور مهمه فمانقدر نخفي شغلنا عن العالم...وياما جاتنا فرص لأن مؤسسات ومجموعات جافت أعمالنا عالانستغرام واستفدنا لما جينا نبي نبيع Artbook او اي منتج...فوين نقدر نخصص حساباتنا؟ ):

يازين المنتديات بس...المكان الوحيد اللي لا تأذينا فيه من الاعلانات والناس المريضه...كل شي يجي بالطرد XD

وغير كذا كله متعلق بالجيمنج نفس الشي تويتر مجرد ما ادخل احصل كل التغريدات عن الجيمنج واخر اخبارها يعني انت تحدد وضع التطبيقات هذي , واي مصدر ازعاج او سبامنج على طول بلوك

مع اني أكره التويتر بس للأمانه التحكم بهالامور أسهل...لحد اليوم ما جاتني تويتات دعايات (reply) مزعجه ولا اضافات من روبوتات او ناس تدور متابعين...أتمنى الانستغرام يصير نفس الشي...مثل ما قلت العيب من المستخدمين وهم اللي يأثرون على مستوى التطبيق\الموقع -_-

 

[Veeto]

المشكله احنا كرسامين نحتاج تكون حساباتنا مفتوحه لأننا نشارك في معارض وامور مهمه فمانقدر نخفي شغلنا عن العالم

الله يوفقكِ .. وتذكري دائما .. الشجرة المثمرة دائما هي اللي تنرمى بالحجارة .. لا تشيلي هم :v: أعظم انسان عرفته البشرية ما سلم من الاذى .. مو احنا

 

[Saudi Fighter]

تويتر صار اسوء برنامج بينهم كلهم صار منبع للفتن وللحسبات الوهمية والاعلانات كثرت بشكل مقرف جدا
ادخل هاشتاق عادي القى تغريدة شغالة تغتصب عائلة ! او اشياء جنسية الوضع صار جدا مقرف .
صراحة اشوف غلط البنات يحطون صورهم الشخصية او حتى اطفالهم لان ماتضمن ان الصور تنسرق او يصير شي يوديك في داهية
دائما صورك الشخصية احتفظ فيها

 

[L.O.R.D]

يا كرهي للي يستخدم السلفي بكل مكان
مرة كنت عند هارديز..وكنت ابغى ادخل المغسلة بعد الأكل..ولقيت واحد أخذ المكان..فاعتذرت منه..لكني لاحظته ياخذ سلفي

بعد دقيقة قلت اكيد طلع..فتحت الباب وضرب الباب فيه..طلع واقف وراء الباب عشان يأخذ صورة سلفي كبيرة
WTH ؟

يأخذ سلفي...وبهذا المكان ؟ وجنب الحمام ؟ ايش مكشلة الناس ؟ صار له 3 دقائق يأخذ سلفي لنفسه

 

[Arashi]

الله يوفقكِ .. وتذكري دائما .. الشجرة المثمرة دائما هي اللي تنرمى بالحجارة .. لا تشيلي هم أعظم انسان عرفته البشرية ما سلم من الاذى .. مو احنا

ويوفقك ^^
الله يعين بس...ما علينا الا نصبر (":

صراحة اشوف غلط البنات يحطون صورهم الشخصية او حتى اطفالهم لان ماتضمن ان الصور تنسرق او يصير شي يوديك في داهية

ماقول الا انهم غبيات...اساسا المفروض ما يصورون عمرهم بالجوالات...ايش دراها متى جوالها يضيع او التطبيقات اللي تستخدمها ما تسحب صورها؟ (صارت وايد) >_>

وتعال جوفهم عالانستغرام...تصور لك يدها مع نص الذراع عشان ترويك ساعة الروليكس اللي شاريتها او تطلع سيقانها عشان تصور نعال (اكرمكم الله)....تخلف 😵

يأخذ سلفي...وبهذا المكان ؟ وجنب الحمام ؟ ايش مكشلة الناس ؟ صار له 3 دقائق يأخذ سلفي لنفسه

عاد هاذي على راس هرم التقليعات التافهه XD

 

[MAX9009]

يا كرهي للي يستخدم السلفي بكل مكان
مرة كنت عند هارديز..وكنت ابغى ادخل المغسلة بعد الأكل..ولقيت واحد أخذ المكان..فاعتذرت منه..لكني لاحظته ياخذ سلفي

بعد دقيقة قلت اكيد طلع..فتحت الباب وضرب الباب فيه..طلع واقف وراء الباب عشان يأخذ صورة سلفي كبيرة
WTH ؟

يأخذ سلفي...وبهذا المكان ؟ وجنب الحمام ؟ ايش مكشلة الناس ؟ صار له 3 دقائق يأخذ سلفي لنفسه

صدقت !! والله فعلا من الامور المزعجه جدا جدا هذي الظاهره الغبيه , لدرجة متابع بعض اصحابي وشغلهم كله سلفي والله لدرجه ودي اعطيهم انفلو رغم انهم اصحابي , والحساب متروس سلفي سيريسلي ؟!!؟

 

[NOBLE]

صدقت !! والله فعلا من الامور المزعجه جدا جدا هذي الظاهره الغبيه , لدرجة متابع بعض اصحابي وشغلهم كله سلفي والله لدرجه ودي اعطيهم انفلو رغم انهم اصحابي , والحساب متروس سلفي سيريسلي ؟!!؟

معليش بس فيه ناس هنا نفسية شوي 😀.
وش المشكلة اذا كان حاط ف حسابه صورة وجهه ؟ هو اصلاً وشهو له الانستقرام ؟ صورة قيفتك و ربعك و كم من صورة احترافية ممكن تحطها بحسابك 😀.
اما ذا اللي بالحمام اكرمك الله وضعه ثاني -.-

 

[The Wierd Kid !]

ما اتغشمر P:
هذا انا توني أنزل صور ومتضايقه من الحسابات الوهميه والناس المزعجه...شهرته بسبب كثرة عدد المستخدمين لكن ايش الفايده؟ أكثرهم أطفال وروبوتات يسببون للواحد الازعاج
أفضّل تطبق بناس عددهم قليل بس أوادم ولا واحد مزحوم بالمزعجين وما منه فايده

عطيهم بلوك وخلصنا .. بعدين ياليت حسابك حق الرسم خل نشوف الازعاج الي تقولينه ؟ لان ماشوف بالحسابات العاديه باي مكان ازعاجات الكومنتات اغلبها نقاش او ناس تقول سولي فولو وهذولي مش روبوتات هذولي ناس فعليين يبون فولورز .. !

في تويتر هالشي موجود صحيح لكن بنسبه أقل من الانستقرام...تعال اكتب هاشتاق جديد لمسابقه ولما يكون عليها اقبال كبير بتحتلها الحسابات المريضه والاعلانات ):

من سابع المستحيلات هاشتاقات الانستقرام فيها اعلانات اكثر من هاشتاقات تويتر !! تويتر 80% من المشاركين بالهاشتاقات روبوت ! :joy: