سعيد إن جزئية التدريب طلعت قصيرة و خيبت توقعات البعض بإن هايبقى فى آرك تدريبى
، فى الآخر الأساس فى العمل يبقى الإستكشاف مش التدريب و طريقة التعامل مع النقطة دى فى الحلقة كانت جيدة فعلا و مناسبة لطبيعة العمل و الفكرة إن الجزئية فى حد ذاتها كانت مهمة لأنها بتوضح نقط قوة و ضعف الشخصيات و الإختلافات بينهم
فلاشباك أوزين مع لايزا كان رائع و بيوضح حاجات كثيرة
، العلاقة بين أوزين و لايزا كانت قوية و أظن إن أوزين كانت بتعتبر لايزا زى بنتها (حبيت فعلا مشهد صدمتها لما اكتشفت إن لايزا تزوجت
)
فى البداية أوزين كرهت توركا و ريكو بسبب كم الحزن اللى اتسببوا فيه للايزا بس بعد كده نظرتها اتغيرت و بقت معقدة نسبيا ، من جهة أوزين اعتبرت إن ريكو عبئ على لايزا لأكثر من سبب زى المشاكل المصاحبة لولادتها و موضوع تعلقها بالهاوية و احتمال موتها أو خطفها فى أى وقت و من جهة تانية ريكو تعتبر أهم شئ بالنسبة لايزا و الأمانة اللى سابتها ليها ده غير إنها بتفكرها بلايزا ، فى الآخر أوزين اعتبرت إن حماية ريكو يبقى واجبها تجاه لايزا و مشهد مراقبتها لرحيل ريكو و رغبتها فى بقاءها لمدة أطول بيوضح مدى تغير مشاعرها تجاهها
تصميم لايزا كان جميل فعلا و الفلاشباك وضح مدى حبها لريكو بس المفاجأة إن هى اللى طلبت من أوزين إنها تبلغها بالحقيقة
، الموضوع صادم بس لايزا كان ليها نظرة مختلفة تماما و على العكس اعتبرت إن اللى حصل بيدل على إن وجود ريكو يبقى معجزة و إنه هايزود حس المغامرة عندها ، طريقة التفكير دى بتوضح حاجات كثيرة بخصوص لايزا و بتخلى كل التصرفات اللى شفناها منها حتى الآن منطقية
أوزين فجرت مفاجأة فى الحلقة بخصوص موضوع الوقت فى الهاوية
،بداية من الطبقة الخامسة الوقت بيمر فى الهاوية بشكل مختلف و أبطأ من السطح و على ما يبدو التأثير ده بيزيد مع النزول فى الطبقات ، بما إن هدف ريكو يبقى النزول للقاع فممكن الفرق فى مرور الوقت يبقى كبير جدا و إذا ريكو لقت طريقة ترجع بيها فممكن الأطفال اللى شفناهم فى العمل يبقوا كبار فى السن وقتها
الكلام اللى ذكرته أوزين بخصوص الطبقات السفلى كان مثير للإهتمام ، واضح إن الطبقة الخامسة تبقى بحر حقيقى و ليها طريقة صعبة فى تجاوزها بس موضوع الحلقة الغريبة فى الطبقة السابعة لفت انتباهى فعلا
تحذير أوزين من من باقى الصفارات البيضاء بيدل على مدى اختلاف تفكيرهم عن العادى بس تحذيرها من بوندورد تحديدا مع ظهوره فى الأوبيننج بيأكد إن على الأغلب هاتحصل مواجهة بينه و بين ريكو وريج
أظن إن الشخصية الثالثة فى الفريق (ناناشى) هاتظهر أخيرا فى الحلقة الجاية و على الأقل فى نهايتها ، ماحبيتش فكرة إن الشخصية تبقى فى الأوبيننج و الإيندنج من البداية لما ظهورها هايبقى متأخر كده ، للأمانة شفت بعض الشباتر فى المانجا عشان أعرف شخصيتها و كل اللى اقدر اقوله يبقى استعدوا للى جاى
