فيه ناس ماتقرأ الموضوع بالكامل, أو مايعلق شيء من الموضوع إلا آخر شي انكتب؟ 😀 عموما خلينا ايجابيين شوي رجاءاً
سنة 2011 أقدر أقول أكثر السنوات نجاحاً في حياتي, والسبب يعود إلى اسلوبي في التفكير اللي تغيّر مع الغُربة أكثر وأكثر عن السنة اللي فاتت. السنة اللي فاتت خسرت شخص عزيز عليّ, وتوقعت انها نهاية العالم, لكن السنة هذي اتضح لي أن هالخسارة هذي ماكانت سوى بداية لنجاح شخصي عارم! الجميل بالموضوع هو التطوّر اللي قدرت أوصل له في تفكيري/اسلوب كتابتي/حياتي وقراراتي الخاصة اللي اتخذتها هالسنة. أحد أعظم الإكتشافات/الإنجازات اللي حققتها في حياتي بالكامل صارت لي السنة هذي :] واقدر الخص شوية منها كونها الخطوط العريضة اللي أثرت على الغالب:
1- التأثير اللغوي: في حياتي, كثير حسيت أن مالي هدف معيشي واضح. دائما أخلي أمواج حياتي هي اللي تحرّكني وتقرر مصيري, لكن هالسنة أحدثت تغيير ضخم وصرت صانع القرار بدال أني أكون الجمهور. بالتالي, جتني ثقة في نفسي عالية جداً مقارنة بالسابق. بمعنى أصحّ, أكتشفت أني أقدر أأثر في ناس كثيرة بلساني, وهالتأثير أيجابي, والناس فعلا صارت تعتمد على تأثيري عليهم. أخيراً أكتشفت الجانب القيادي فيني :]
2- التأثير العاطفي: رضا الوالدة كان أكبر شيء صار لي هالسنة, وأكبر شي صار لي في حياتي كـ كُلّ! موقف ضار في العائلة, وبسببه الوالدة, قالت لي جُملة أبكتني. قالت "انا راضية عليك ليوم الدين," وبهالجُملة هذي أجبرت كسور أجزاء كبيرة من حياتي, وحقيقية حسستني أني أسعد إنسان على وجه الأرض :] ومن جهة ثانية, أنا استطعت التأثير عاطفيا في ناس كثيرة برضوا, وصارت علاقاتي مع بعض الناس مبنية على روابط قوية, خصوصاً مع كم شخص من العائلة ماتوقعت أني راح اكون قريب منهم بهالشكل.
3- التأثير الأكاديمي: وأخيرا خلصنا من رهبة أول سنة في الجامعة واللحين أكاديميا ماصرت خايف من المواد وصعوبتها واسلوب الدراسة الجامعي الأمريكي المُختلف. اللحين صرت أقل رهبة تجاه القادم وصعوبته وبدأت اتكيّف وأكوّن إستقرار نفسي أفضل وعلاقة "مُحترمة" مع الكُتب الأكاديمية, بدال الهباب اللي صار لي قبل كم ترم (شلة تويتر تعرف وش مريت فيه -,-)
4- التأثير النفسي: هالسنة أكثر سنة قدرت أنظر فيها لنفسي بعُمق, وسألت نفسي أنواع الأسئلة وأكتشفت أمور كثيرة ماعمري توقعتها أو شفتها في نفسي قبل كذا. وبسبب تعرّفي أكثر لنفسي, تطوّرت ثقتي فيها بشكل أكبر وهالشيء انعكس على حياتي الإجتماعية بشكل إيجابي جدا! الثقة هذي خلتني إستقلالي بشكل كبير جداً, وبالتالي الناس صارت تلاحظ إستقلاليتي الشخصية ويمدحوني عليها :] هالإعجاب أصبح بمثابة مقياس لي علشان أشوف نسبة تطوّر ثقتي وإختلافي عن السنوات الماضية.
5- التأثير الإجتماعي: هالسنة هي سنتي 😀 تعرّفت على كمية هائلة من الشخصيات المُختلفة. وأفضل مافي الموضوع, صرت أقدر ألاحظ من أبغى اصير حوله ومن أبغى أتجنّبه. صارت عندي رؤية واضحة للناس اللي أحب ادخلهم في حياتي. بالتالي, كل هذي العلاقات زادت مهارات التواصل عندي. ولا أنسى تويتر وأفضاله عليّ P: تعرفت على كمية أوادم قمة بالرهابة, وبعضهم أثبت فعلا أنه صديق حقيقي أكثر من كونه صديق رقمي. شُكرا تويتر *قلب*
مُلخص التأثيرات هذي كلها هو: سنة 2011 هي سنة نُضج بالنسبة لي :]
