اوكي بحاول اكون حليم مع اللعبة واقول رأيي بالطف شكل ممكن: هالجزء سيء.
الجزء هذا دخلت عليه وانا ما اعرف اي حاجة عنه بالمناسبة غير انهم في قرية طبعا والحرمة الطويلة، يوم بديت العب كنت اتسائل وش نوع الاعداء بيكون هالمره؟ معقولة نفس الهلاميين اللي بالسابع؟ يب ماكنت اعرف ان فيه مستذئبين حتى!
اللحظة اللي وصلت فيها للقرية وبديت استوعب ان اللعبة فعلا ابتدت ومش مجرد مكان اعبر منه وبس كانت لحظة اسطورية، منطقة القرية فعلا ممتازة وممتعة للاستكشاف .. بس المنطقة اللي تتفوق عليها هي القلعة، جدا خرافية وقاعدة تعطيني تخيل لريميك ريزيدينت ايفل 1 كيف ممكن يكون، بس الاحباط يبدأ هنا..
الحرمة الطويلة تطلع تابعه وفوقها اول زعيم اهزمه باللعبة! احباط شديد .. المشكلة ان قتالها جدا خرافي ويعطي فايب نهاية لعبة! المشكلة الثانية ان كل الزعماء بما فيهم الزعيم الاخير داونقريد عن قتالها! بس طعم الاحباط ماطول لما وصلت منزل الدمى .. جرعة رعب رائعة و..بس؟ خلاص كذا...مافي ولا حاجة ثانية تنمدح! للحق.. منطقة مورو كانت عادية وقتاله عادي، مش حاجة اعتبرها سيئة، بس منطقة المصنع يالللهه كريهه غثيثه بغيضه! يعني انا ماودي ابالغ واقول انها اسوأ منطقة بتاريخ السلسلة كون شعور الغثاثه منها باقي يحرقني بس انا جد ما اذكر وش فيه منطقة اسوأ منها من الاجزاء اللي لعبتها! انا جد مره انغثيت من اللعبة هنا.. لا شكل يفتح النفس ولا تصميم ممتع.. مملة وبايخة مره وقتال هايزينبيرغ عطبها اودا .. انا ما امانع باكشنة العاب الرعب في اخر لحظاتها زي جزئية اللعب بكريس كذا.. بس هبل الهنود لما ايثان كان يطير ويركب المركبة عشان يطلق منها صاروخ كان فعلا اهبل، الصدق الوضع من هنا الين نهاية اللعبة كان جدا ممل وكنت ابي انهي اللعبة وبس
بصراحة... wasted potential
قاعد اتخيل لو التركيز كان على القلعة وجزئيات بسيطة من القرية، كانت بتكون خيالية
فيه حاجات ثانية عندي ملاحظات عليها ..
- اول ساعة من اللعبة سينيمائية/سكربتية بشكل مزعج، كل خطوتين فيه مشهد..
ايثان مع عائلته بالبيت وكريس لما يدخل عليهم، وصوله للقرية ودخوله لمنزل العائلة هذيك اللي يحترق بيتهم، حتى لما ادخل القلعة ويجي هايزينبيرغ ويسحبني عند القادة ويخلي المستذئبين يطاردوني، كلها حاجات سكربتية مملة ومبالغ فيها هنا .. ما احسني بديت العب فعلا الا لما دخلت القلعة
يمكن اكثر لحظة مزعجة في بداية اللعبة هي هجوم المستذئبين والهروب منهم لفترة معينة الين يفرجها الله.. محاولة لنسخ هذيك اللحظة من ريزيدينت ايفل 4 بشكل بايخ ومزعج
- فيه مشكلة اخراجية بالجزء هذا.. مخليته يطلع بشكل رخيص، المشاهد اللي ماتكون من منظور ايثان .. بالسابع ماكانت موجودة تقريبا، كل حاجة تشوفها من منظوره بس هنا فجأة يصير كت وتتحول الكاميرا لزاوية ثانية.. مدري بس مو فان لهالشيء، ولما الدوك جلس يتكلم عن القادة لأول مره واللعبة جلست تعرض لنا مشاهد قديمة منهم قد شفناها وبعدين جلست تورينا مناطقهم كانت ارخص حركة! ليه كذا؟ حتى افتتاحية اللعبة بالقصة بالطابع الكرتوني هذاك ماكان موفق ابدا برأيي
- كريس الجزء هذا يمكن اسوأ بطل بالسلسلة.. اسوأ من ايثان المسكين، طول الوقت قاعد يدف ايثان ويخرب عليه ويسوي اشياء مجنونه بدون توضيح، والله دمروا الشخصية لدرجة اني معد ابغى اشوفها ثاني
- ماكانت عندي مشكلة بالكاميرا والتحكم الين ماوصلت الجزئية الاخيرة من اللعبة، حرق:
جزئية كريس تحديدا.. كثرة الفامبايرز طلعت عيب بالحركة والكاميرا، وقتال العملاق بعد.. ماتدري هو يهجم ولا ينقز ولا وش يسوي بالضبط.. انت اطلق واهرب وبس وكرر العملية الين يموت، ملل
عندي كلام زيادة بس ما احس له مكان .. ودي اعرف وش الرأي العام عنه الحين؟ هل فيه فانز يحطونه مع احسن اجزاء السلسلة ولا يعتبروه ريزيدينت ايفل ممتازة وبس؟
عن نفسي.. بعتبره لعبة احسن من الخامس والسادس وبس.. ما يتعداها
اذكر رأيي يوم خلصت السابع وكنت جدا مبسوط منه بس الثامن العكس تماما.. واسمحوا لي اقولها لمرة اخيرة عشان يطيب خاطري: الجزء هذا غبي.
