بدأت الرحلة مع انترو من أفخم ما يكون:
مااتوقع احد ممكن يتخيل بداية افضل من كذا للعمل، بداية كافية لتصنع التساؤلات والغموض عندك الى اخر حلقة.
بعد كذا علاطول بدأت أول الحلقات واللي كانت غير مشجعة اطلاقا صراحة بالنسبة لي ولولا سمعة المنتج كان وقفت من الحلقة الثانية بعكس المانجا اللي بدأ علاطول بجزئية فلاش باك شانكس واللي هي من أفضل حلقات المسلسل وماادري ليه غيروا ذا الشي بالأنمي مع أنها كانت بتكون بداية مرحبة جدا.
والا فيه أنمي يبدأ بشخصية غثيثة مثل كذا ويكون مرحب؟
عموما مع ذلك كملت متفائلا(على خفيف) بالمنتج الى ان وصلت لجزئية شانكس. رواقة الشخصية وسعة باله وكرهه للمشاكل واللي وصلت بشكل رائع بهذا المشهد:
نادر تلقى شخصية واقعية مثل كذا حتى بالمسلسلات الحقيقية، شخصية تقدر المشاكل وتكره الدخول فيها لأنها عارفه ان المشاكل بيكون فيها تضحيات بالنهاية حتى لو كنت منتصر. ولكن مع ذلك شانكس شخصية غير جبانة وما تردد بالدخول بمشكلة مع نفس الطاقم لما تعرضوا لصديقه(لوفي) لدرجة انه ما كان عنده مشكلة يفقد أحد أطرافه دفاعا عن صديقه باللحظة الايقونية هاذي:
انتهت الجزئية الرهيبة هاذي بوداع شانكس للوفي بتشجيعه على طموحه بأنه يكون ملك القراصنه باعطائه قبعته المفضله كتشجيع له وثقة فيه بأنه راح يكون قرصان عظيم بالمستقبل وبيرجعها له.
بعد كذا بدأت القصة تتجه لتجميع الطاقم الأولي للسفينة بداية مع زورو، ارك زورو كان عادي جدا وممل، السايدكيك المعتاد اللي يكون ذو مزاج متقلب وبقوة خارقة *احم ساسكي* بس احقاقا للحق اول ظهور له كان مهيب وسالفة استعماله لثلاث سيوف رهيبة وشي غريب ومميز. مسكة الفم اكثر شي ممكن يعلق ببالك عن الشخصية وتبقى بذاكرتك حتى لو ماكملت القصة.
بعدها جت وحدة من اسوأ الجزئيات بالقصة كلها واللي هي جزئية باغي، الشخصية قوتها وتصميمها وعموما كتابتها حلوين خاصة مع الفلاشباك حقه وكيف انه كان ذو ماضي ممتاز لكن عاب الشخصية قصة الارك نفسه. أتذكر أنه هذا الكلب اللطيف كان من الأشياء القليلة جدا الكويسه بهذا الارك:
ارك يوسوب هو الثاني كان فيه الكثير من اللحظات الممله وفيه عدو كريه وقتاله سئ جدا بس كان فيه ثلاث حاجات رهيبة أعجبت فيها بذا الارك، اولهم هي فلاشباك يوسوب وسبب تعوده على الكذب وكيف انه ابوه هو قرصان مهم بطاقم شانكس وكأني كنت محتاج سبب أكثر لأتشوق لهذا اللقاء.
الحاجه الثانية كانت سالفة كوراهيدول(أتوقع اسمه كذا) وكيف ضحى بجزء كبير من حياته عشان ينفذ خطته ويوصل لمبتغاه، تفاني يحترم صراحة ومع أنه شخصية غثيثه بس يحسب له هالشي وتحسب له حركة اليد حقته لتعديل نظاراته ههههههه ماادري ليه تعلق بالمخ واتذكرها كل فترة.
الحاجة الثالثه هي افضل علاقة عاطفية(رومانسية؟) لأي شخصيتين بالمسلسل وهي قصة يوسوب مع صديقته. قصتهم لطيفة وجميل وعده لها واهدائها للطاقم اول سفينة لهم ميري.
لحد يفهمني غلط شخصية يوسوب عظيمة جدا ويكفي انه وقتها هو اللي رسم علم قراصنة قبعة القش وكان لفترة طويلة شخصيتي المفضلة بس ما خدمته قصة الارك نفسها والعدو الرئيسي.
جزئية سانجي ايضا كان فيها الكثير من البرود خاصة من ناحية العدو الرئيس وقتاله واعذروني على السلبية بس صدق بداية المسلسل باردة وممله بأغلبها لكن جزئية سانجي مع نسبة البرود الطاغية لكن فيها جزئيات خورافية تبدأ من سالفة ليه سانجي ما يحب الجوع لدرجة انه جالس يؤكل قراصنة خطرين وعارف أنهم ممكن يكونون أعدائه وماحاول حتى يستغل ذا الشي كنقطة ضعف لهم؟ وش سره بالضبط مع الأكل ككل وتقديره لذا الشي؟
وياالهي على جمال الجواب!!!
الاوريجين ستوري لسانجي لا زالت هي المفضلة عندي بالراحه، كيف شي بسيط مثل الجوع ممكن يوصل البشر لقمة اليأس وفقدان الأمل وأقصى قمم الضعف فقط بمدة كم يوم. وكيف تجربة مريرة مثل كذا خلت سانجي وزيف يسخرون حياتهم لإطعام الناس حتى لو ماكانوا يملكون مال هذا الطعام. صدقا "الجوع كافر".
تضحية زيف هنا من أجل سانجي رائعه وكانت من اللحظات اللي دمعت فيها، وقطعه لرجله وأكلها يوصل لك كمية اليأس العظيمة بهذه الجزئية ويوصل لك احساسها بأفضل شكل ممكن. شكرا لاياد اللي علمني وقتها انه زيف قطع رجله بالمانجا لأنه ما صار ذا الشي بالأنمي.
ومع أنه قتال العدو الرئيسي هنا لك عليه بس ظهر بنفس الارك عدو جديد بتصميم أعتقد أقل ما يقال عنه أنه أفضل تصميم بون بيس ككل، قمة في الفخامة والابداع في التصميم.
قتاله مع زورو مع انه كان قصير جدا بس افضل من القتال الأساسي للآرك نفسه وكان قتال شريف بين السيافين ووضح جمالية شخصية زورو. أعجبني كيف انهم جابوا شخصية قوية جدا مثل كذا من البداية وحطوها كهدف مستقبلي لوحدة من الشخصيات وبنفس الوقت الشخصية متفاهمة وغير متغطرسة لدرجة أنه أعجبته عزيمة زورو وطموحه وحاول أنه يرفع من قدره بأي شكل من الأشكال وبالعكس أعطاه فرصة بالأخير وشجعه.
وبعد القتال الأخير انتهى الارك نهاية جميلة توضح العلاقة الأبوية الرهيبة اللي وصلوا لها سانجي ومعلمه، علاقة الشخصيتين أتعب وأنا أقول جميلة.
فيه على فكرة شخصية جين اللي ساعده سانجي كانت ممتازة بعد ومستغرب انه ما عاد شفناه بعد كذا.
بعد كذا جاء الارك اللي أعتقد أنه هو النقلة الحقيقية لون بيس من أنمي حليو ببعض اللحظات ممتازة الى أنمي خورافي ينحط برادار اي شخص مهتم بالمجال. وهو الارك اللي يحمل معه اول فيلين حقيقي وواحد من أفضل الفيلينز بون بيس الى يومك هذا.
السويت سبوت حقتي هي الحيوانات الهيومنويد فظهور البرمائيين كان شي رهيب بالنسبة لي وحبيتهم من اول لحظة، خاصة ان زعيمهم ارلونج تصميمه جبار.
ارلونج عثى بالأرض فسادا بكل ماتعنيه الكلمة من معنى، ومارس على سكانها جميع أنواع القمع والعبودية وكأنه له تجربة سابقة وحقد دفين مع الجنس البشري وصبه كله على سكان القرية المساكين، منهم فتاة لطيفة حاولت أن تعيل فتاتين معها وتربيهم وكانوا هم سببها تعلقها في الحياة على الرغم من صعوبة ظروفها.
بعد قصة بيرميري الحزينة مع ارلونج واللي تسببت بمقتلها نامي المسكينة ضحت بعمرها وحب أهل القرية لها عشان تنقذ القرية كاملة من بطش ارلونج حتى لو كانت التضحية كبير عليها. هذا الشي يفسر تعلقها بالمال وايضا جميل كيف انه مهارتها برسم الخرائط انقذتها وخلتها أصل مفيد بالنسبة لارلونج الى ان تفاجئت الضعيفه بالأخير أنه هذا كله كان نصبة كبيرة وارلونج ما كان مخطط انه يتركها من البداية.
مع ذلك نامي حافظت على تفاؤلها وكانت تقول انه اعادة الكرة من جديد بتكون أسهل بماانها تدربت على ذا الشي، بس ما اعتقد فيه بشري عاقل بيحافظ على ذا الهدوء والتفاؤل بلحظة مثل كذا واللي نتج طبعا هو انهيار نامي واستنجادها بأصدقائها واللي طلع لنا بوحدة من لحظاتي المفضلة بون بيس.
والله ياانا دمعت هنا بعد*يروح يجيب منديل* لقطة أتعب وأنا أقول جبارة.
القتالات هنا هي أول قتالات رئيسية أقدر أقول عليها قتالات حقيقية بون بيس، كل اللي قبل كذا كانوا شغل اي كلام بس هنا مستوى اخر كليا. استمتعت بقتالات كل الشخصيات بداية بقتال يوسوب ومع انه شخصية ضعيفة لكنه قدر يستغل كل موارده عشان يقاتل وصولا لقتال لوفي وارلونج العظيم. قمة في المتعة صراحة.
من أجمل اللحظات بقتال لوفي وارلونج هي تحطيم الغرفة اللي استعبد فيها ارلونج نامي، وبارك خورافي مثل كذا شخصية اخت نامي ورئيس القرية كانوا هم الكرزة اللي انحطت على الكيكة وكملة جماليتها. خاصة مع تفسير سبب المروحة بقبعة الرئيس واللي تفاصيل صغيرة جدا مثل كذا خلتني أقدر ون بيس أكثر.
ومع نهاية الارك، لوفي وأخيرا وصل صيته لجزء كبير من الناس ووصل للبحرية بأنفسهم وطلع له أول Wanted Poster له.
بدأ الارك اللي بعد كذا بداية لطيفة مع ظهور قصير جدا لشانكس واللي لا زال اي ظهور له حتى لو كان ثواني هو لحظة عظيمة بالنسبة لي لرهابة الشخصية وعدم العشوائية بظهورها. ارك لوجتاون ارك خفيف جدا ما عندي تفاصيل كثيرة أتكلم فيها عنه. ما حبيت سالفة محاولة قتل لوفي وحسيتها مالها داعي صراحة وغير منطقية.
مع ذلك الارك كان ممتع ككل وكان فيه لقطات وتفاصيل حلوة زي سالفة انها هي المدينة اللي قتل فيها روجر وشوفتهم وزيارتهم لمكان قتله، وشراء زورو لسيفه وعودة القرصانة اللي بأول الحلقات بس بشكل مختلف وتعاونها مع باجي، وأهم حاجة بالارك كانت ظهور شخصية سموكر وكل الأحداث اللي كانت تخصه.
خاصة حدث ملاحقته للوفي واللي كان بيقضي عليه لولا تدخل شخصية مريبة جديدة.
