جيمز...........انمي.......... الى متى؟

[UN3]

اليوم شباب حاب اطرح موضوع هو الأساس الي خلاني أسجل بهذا المنتدى

الا وهو الأنمي والجيمز بشكل عام

انا واحد ما كنت اعرف انه في شي اسمه انمي اله من فتره قصيره

ولمن عرفت انه في انمي وانه في ناس يلعبون ويهتمون بالقيمز عندنا بشكل خيالي ما كنت اتوقع اني اشوف ناس باعمار كبيره

انا بنظرتي لهذي الشغله انها خطيره تلهي كل واحد مننا عن واجبات دينيه و اجتماعيه و اسريه......وغيرها من الواجبات

في منكم بيقول انا مو امقصر من هذول النواحي واني احافظ على صلاتي ومهتم لديني واني ما اقصر شي على اهلي
وراح يقول بعضكم انه شنو فيه شي ثاني انسويه حتى الانمي والعاب الفيديو بتكلمون عليها تحرمونا منها

بس ما تحس انها غريبه اني ادفع مبالغ شهريه كبيره على القيمز( خلنا لا نذكر الانمي لأن الأنمي ماراح يكلفك أي مبلغ مالي)

ما تعتقدون انها غريبه انه في ناس كبار بمجتمعنا يطالعون انمي. مو بس كذا المشكله الاكبر انه الواحد يكون عارف رقم الحلقة الفلانيه اللي صار فيه الحدث الفلاني.

مو غريبه اني اعرف صانع العبه الفلانيه وتاريخ نزولها و احداث القصه واعرف انه الانمي هذا حائز على اكثر من جا ئزة.

وفيه اشياء غريبه وايد ما اقدر احصره لكم الحين

بودي لو تجاوبون على هذي الاسئله وراح اكون شاكر لكم:

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

2- برأيك الشخصي كم جهاز ممكن يكون عند الفرد ونقول عنه ان هذا الرقم طبيعي؟ وارجو انك تذكر كم جهاز انت عندك.

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

5- برأيك الأنمي هي موظة هاليومين , فترة وتعدي؟

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

ارجو يا شباب انكم تاخذون الموضوع بجديه و بروح رياضيه ابي يكون النقاش حلو وابي اقرا ارائكم لاني جدا مستغرب من الوضع .



​

 

[Bounty]

- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

الاينمي هممم ما احب اشوفه كثير كثر ما اشوف المسلسلات يعني فــPass

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.
لول شكو الطبيعي بالسالفه .. تقدر تقول واحد متولع بشغله فيبدع فيها واحنا امبدعين بالجيمز لأنه انحبه أ مهتمين له اكثر (مثل الي متولعين بالسيارات .إلخ)

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

ما تمهني نظرة المجتمع .. هي حياتي ولا حياتهم ؟

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

ماكو تخصيص مصروف للجيمز الي يعجبني اشتريه .. و الي اسويه اكيد صح لأني مو قاعد اشرب خمر ولا قاعد اعصي ربي بشي ..

5- برأيك الأنمي هي موظة هاليومين , فترة وتعدي؟

عمره ما صار موضه ولا بيصير لول

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

بما اني ادرس برى .. فأكثر شي ماخذ وقتي النت + الجامعه + النوم ..

 

[Gon freeces]

الى متى ؟ الى ما اطفش منها (قدامي مشوااااااااار لول) , وبنسبة لنظرة المجتمع : كلام الناس لا له بداية ولا نهاية , وانا قد اصرف 250 او اقل كل شهر (حط ببالك انامن النوع اللي قد يقعد عاللعبة شهر او اكثر عشان اخلصها (مسترة -تلعب اللعبة وتوصل كل مكان \كون عندك كل شي), انا قاعد ممكن ساعتين اقرا مانجا (Graphic Novels يابانية) , وألعب ممكن 3 ساعات باليوم لو شي قريب من كذا (يعني حالات),,,,

 

[Agent47]

ابودي لو تجاوبون على هذي الاسئله وراح اكون شاكر لكم:

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

5- برأيك الأنمي هي موظة هاليومين , فترة وتعدي؟

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

​

أولا انا بجاوب عن أسالت الجيمز لأني مو من متابعين الأنمي.

2- ماتفرق بالنسبة لي عندك واحد ولا عشرة ولا مليون, بالنسبة لي اهم شي يكون الشخص محترم ورجل, جيمر ولا لأ مااهتم. وبالنسبة لي ماعندي ولا جهاز, انا العب على الكومبيوتر.

3- تهم وماتهم بنفس الوقت, تهم نظرة اللي يكون له عندي تقدير واحترام من القريب والبعيد, اما عامة الناس ماتفرق معي ابدا لأسباب خارجة عن نظاق الموضوع.

4- ماعندي ميزانية مخصصة شهريا, بالنسبة لي على حسب اللعبة, الأن مر علي تقريبا 3 شهور وماشريت ولا لعبة, ولا ابشتري الى اذا نزلت لعبة مثيرة للأهتمام. فيه حالات اني اشتري ثلاث العاب مرة وحدة. على حسب الألعاب الموجودة بالسوق.

5-الله اعلم ماعندي علم عنه.

6- تمر علي بعض المرات اسبوعين ماالعب شي, و لكن في الأيام العادية ساعة بالكثير, بالعطل من ساعة الى تقريبا 3 او 4 ساعات.

 

[Colorization]

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

طبعا ً لا، آنا ما أطالع أنمي لكن بكل الأحوال الأنمي ماهو للأطفال أو محصور لفئة معينة فقط، إذا عندك الوقت وإنت تحب هالشي ما أعتقد في مانع.

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

ليش، في شي "مو طبيعي"؟ بمكتبة البيت عندي بروحي أكثر من 300 كتاب، معناته أحب أقرا مو معناته إنه حالتي مو طبيعية. الفيديوجيمز هواية حالها حال اي شي ثاني -برأيي-. عندي كل الأجهزة اللي نزلت بالسوق ما عدا الويي والـPS3،ا do the math

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

الـsocial sensation فقدته من زمان، لأنه بكل صراحة رأي الناس ما يودي ولا يجيب. في ناس تلعب عادي، لكن لما تشوف واحد يلعب تقول عنه ياهل (how ironic is that)، وفي ناس تشوف كونان على سبيس توون لكن لما يدري إنك تطالع ون بيس يقول عنك ياهل، and the list goes on. بالنسبة لي، مجموعة من ربعي تعتبر الفيديوجيمز بحياتي هواية عادية، البعض الآخر يظن إني مهووس فيها حيل (نظرا ً للمبالغ اللي تنصرف عليها).

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

أصرف من 60 إلى 90 دينار بالشهر، أدري إنها مبالغة لكن بما إنه عندي مصروف غيره للبانزين ورصيد التلفون والمكتبة والأشياء الثانوية، أشوفه عادي.
شنو المبلغ المعقول اللي المفروض ينصرف عليها؟ يختلف من شخص لآخر على حسب معاشه الشهري.

5- برأيك الأنمي هي موظة هاليومين , فترة وتعدي؟

الأنمي ماهو ستايل ينلبس وتحذفه اليوم الثاني، الأنمي -او حتى متابعة المسلسلات- هواية عادية.

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

طبعا ً كل كلامي إستثني منه الأنمي لأني مثل ما ذكرت قبل؛ ما أتابع. هممم، ما عندي ساعات محددة ألعب فيها، على حسب المزاج. الفترة اللي طافت كنت أقعد قدام الشاشة 9 ساعات عالراحة ألعب، الفترة هذي ممكن 9 إلى 6 ساعات بس ما تكون متواصلة، ألعب ساعة بعدها أروح للكمبيوتر، ألعب نص ساعة وأرجع...الخ.. اللي أقضيه ممكن يكون كثير لو آنا بفترة دراسة، لكني معطّل، وفرصتي إني أستمتع بهواياتي مهما كانت قدر المستطاع، حتى لما يجي الكورس الجاي أكون متشبع من هواياتي وجاهز للدراسة.

 

[Mr.3B]

...

1- لا
2- كل الأجهزة .. وأنا أمتلكها كلها
3- المجتمع الي حولي حاليًا .. طبيعي جدًا والي يطالع أنمي زي الي ما يطالع أنمي .. وبالعكس .. في أنميات هنا موجهه خصيصًا لكبار السن 20+
4- من 500 الى 1000 ريال .. ونعم صحيح
5- لول .. لا حبيبي الآنمي من أيام الـ80 وماشي الي يوم الدين ان شاء الله 🙂
6- 3 ساعات وانت طالع

 

[Huda]

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

5- برأيك الأنمي هي موظة هاليومين , فترة وتعدي؟

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

ارجو يا شباب انكم تاخذون الموضوع بجديه و بروح رياضيه ابي يكون النقاش حلو وابي اقرا ارائكم لاني جدا مستغرب من الوضع .



​

اممممم اول مره بعلق على كلامك بعدين بجاوب
الأنمي والجيمز مالهم سن معين
بالعكس في انميات كثير وقيمز تصنيفاتها العمريه لفوق 18 سنة !
يوم مااقول لصديقاتي اشوف انمي يقولوا ياطفلة ومتى تكبرين لأن يرتبط براسهم الأنمي للأطفال
يوم جبت لوحده منهم ديث نوت قالت ماجا على بالي ابداً ان في انميات كذا !
ونفس الكلام للجيمز
وبالعكس حلو ان الشباب يلعبون جيمز لأن يصرف طاقتهم بشيء مو مضر
شيء حلو يوم مااشوف شاب عمره بالعشرين همه بلعبه او جهاز احسن من يكون همه بشيء ثاني
وصدقني ماله شغل بالألتزام يعني في مثل يقول ساعه لدينك وساعه لدنيتك

جواب اسألتك
1- طبعاً لا وهالأشياء مالها شغل بالعمر كنك تشوف مسلسل او فلم بس برسم كارتوني
2- على حسب هو فان لأي شركة وبالنسبه لي احس ان يكون عنده جهازين من كل جيل هو الطبيعي
اناعندي ياطويل العمر بلاي ستيشن وبلاي ستيشن تو ودريم كاست جيم كيوب بي اس بي و sp
وقريباً wii
3- نظرة المجتمع للي يلعبون جيمز انهم موهوبين والي يطالعون انمي انهم اطفال خخخخ
نظرتهم لي اني طفلة وان الأنمي للأطفال بس الي شاف الي شفته غير كلامه
طبعاً مايهمني كل واحد عنده هواية شكل
ترى في دراسات اثبتت ان القيمز ينمي اشياء كثيره منها الذكاء والتركيز وبرضو اللغة
4- انا اصرف قليل جدا لأن القيمز الي العبه قليل اللعبه بـ250 ريال تقريبا بالسنه ماصرف اكثر من 1000

5- لا ماراح تعدي موضة الأنمي من ايام الثمانيات كبامارو وسالي وليدي وسنشيرو ... الخ

6- على حسب المتوفر اذا جت عندي لعبه احبها مارتاح لين ماخلصها وبالنسبه للأنمي حسب المزاج وحسب المتوفر احيانا 6 ساعات واحياناً ولاشيء​

 

[Final Fantasy]

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

أكيد لأ

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

سواء جهاز أو جميع الأجهزة .. ما أظن أن هالشي يحكم لنا اذا كان هالشخص طبيعي أم لأ .

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

النظرات تختلف من مجتمع الى آخر .. و بالنسبة لي ما تهمني نظرة المجتمع لي اذا كنت ألعب أم لأ .

5- برأيك الأنمي هي موظة هاليومين , فترة وتعدي؟

الأنيمي شي عادي و موجود من سنوات و راح يستمر حاله حال الأفلام و المسلسلات .

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

على حسب أوقات الفراغ و المزاج .

 

[Magical Dreamer]

السلام عليكم ^^

يعطيك العافية على الموضوع

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

الإنيمي مثل الفيديو جيمز مقسم إلى فئات ، مب كل انيمي يصلح للصغار ولا يخصه بالوضع الاجتماعي للشخص ، إن كان أي احد بيوقف متابعة الإنيمي راح يوقفه لاسباب شخصية فيه لكن تقدر تعامل الانيمي مثل المسلسلات اللي تنحط بالتلفزيون

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

إذا بقول إنه مب طبيعي فهو للشخص اللي يشتري الاجهزة كلها وما يحلل قيمتها .. بالنسبة للأجهزة اللي عندي :

Atari ,, Nintendo ,, SNES , Sega , GB , GBC , GBA , GBSP , DS , PS1 , PS2 , Dream cast , GC , PC, Xbox360

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

أكيد نظرتهم بتكون إني ياهل ، بس نظرة المجتمع ما تهمني ^^

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

أنا منقطعة من فترة طويلة عن الألعاب فما اصرف شهريا بس لما يكون فيه لعبة يديدة عجبتني اشتريها لكن مو من النوع اللي يشتري كل شي جديد

5- برأيك الأنمي هي موظة هاليومين , فترة وتعدي؟

اللي اعرفه موضة هاليومين المسلسلات الكورية (على الأقل عندنا هني)

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

جيمز 3 إلى 4 ساعات أحيانا 6 لكن مب يوميا ، اما الإنيمي فهو يوميا تقريبا بمعدل حلقة حلقتين ، أوقات الجيمز والانيمي تقل بالنسبة لي وراح تقل اكثر بالسنة اليايه سنة التخرج ان شاء الله.

 

[BioMario]

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

ما اشوف له عمر افتراضي و على حسب نوع الأنمي إلي تشوفه

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

والله مادري .. لكن انا عندي كل الأجهزة الحالية و لله الحمد ..

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

الصراحة عندي شيء عادي لكن احس انهم اقل ثقافة و تطور لكن الصراحة يختلف في اشخاص غير
الصراحة ما اقدر اجاوبك جواب نهائي لأن المسألة معقدة في هذا الشي..

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

ما اقدر احدد بالضبط .. على حسب اللألعاب القوية مثلاُ في 3 العاب في الشهر تنزل مع بعض قوية و اشتريها
وفي اكثر و اقل على حسب

5- برأيك الأنمي هي موظة هاليومين , فترة وتعدي؟

لا طبعاً ما اعتقد انه بينتهي لأن الأنمي كل مرة قصة كل مرة فكرة كل مرة شي جديد
مثل المسلسلات و الأفلام .. وكل مرة يتطور ..

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

من 3 إلى 5 ساعت تقريباً .. اوشوف انه معتدل و في ايام ما العاب على حسب طبعاً ..
مافي اسباب يمكن ماريد اني انهي اللعبة او للتسلية اعتبرة سليم اكيد ..

واشكرك اخوي ..

 

[Futrus]

برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

بكل ظروف حياتي للحين اتابعه ولا اعتقد بوقف لازال يقدم الكثير

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.
لا عادي واحد يكون عنده 3 او جهاز واحد على طبيعة ذوقه واستخدام

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟
صرت ما اهتم فقدت الامل في ان يتقبلون او على الاقل يتركون الواحد في حاله طنش تعش تنتعش

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

ما اخصص لكن المبلغ يتحدد على قيمة الشي اللي بشتريه ولما اشتريه عموماً يمكن اصرف 30 دينار كل 3 اشهر وصرفت 260 دينار الشهر اللي طاف على البي اس بي واكسسواراته والعابه وشحنه
5- برأيك الأنمي هي موظة هاليومين , فترة وتعدي؟

أبدي

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

يعتمد على الموجود عندي مرات طول اليوم بس شغلي اتابع انمي او العب حالياً اقضي ساعتين تقريبا او اكثر يومياً على البي اس بي وساعه انمي

 

[الــخــــارق]

صراحة ما ادري وش الناس مستغربين منه في الانمي والألعاب ..
يعني الان كل أسئلتك لو طبقتها على الأفلام مثلا بتكون نفس الشيء ..
وإلا لأن الأفلام كل الناس يشوفونها صارت شيء عادي وغيرها لا ..

اسف جدا على ردي هذا لكن دائما تستفزني الآراء هذي خاصة من ناس يدفعون ويقضون أوقاتهم في أشياء ما تقل عنها في الأسباب اللي يذكرونها (قنوات فضائية - أفلام - الخ ) ما اقصدك طبعا ..

عموما شكرا على طرح الموضوع 🙂

 

[persona]

ممممممممم يقول المثل

دوام الحال من المحال 🙂

 

[Captain Jack Sparrow]

بودي لو تجاوبون على هذي الاسئله وراح اكون شاكر لكم:

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

5- برأيك الأنمي هي موظة هاليومين , فترة وتعدي؟

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

ارجو يا شباب انكم تاخذون الموضوع بجديه و بروح رياضيه ابي يكون النقاش حلو وابي اقرا ارائكم لاني جدا مستغرب من الوضع .



​

1- ما اعتقد ان للانمي وقت وعمر محدد
2-مو شرط ان يكون عنده جهاز واحد عشان يكون طبيعي - انا عندي اكس بوكس 360 و بلاي ستشن 2 و جيم كيوب
3-يحسبون اننا بزران لكن انا ما يهمني رايهم طالما انا عاجبني الوضع وما قاعد ازعجهم
4-لعبه وحدة شهريا انا اشوفها مناسبة تكون بقيمة 270 ريال تقريبا
5-لا ما اتوقع انها موضة
6-اشوف اكثر من 6 حلقات انمي قابله للزيادة في بعض الاحيان
بالنسبة لي و بما ان ما عندي صيفي زي حالتك يا بسام ( سو دروب احسن لك :: :: )
فان وقتي فاضي 24 ساعة معناته ما عندي مشكلة اني اقعد اتفرج طول اليوم

 

[Dark Link]

you became a member in this forum because of THIS thread??:normal:

anyway... my answers for the questions..

1
do you think that you will stop practicing your hobby one day??... i don`t think so

2
6abii3i? having many consoles does not make a person (mo 6abii3i) i have ... i think 4 or 5

3
i don`t care about what people think... WHY do you care anyway?!! just do what YOU think is right..

4
umm... it depends on what`s new every month...and even if i spent millions every month.... it`s ok... i`m just spending money on my hobby.... like people who buy books...cuz they like books...... and reading.... and maybe paper:normal:

5
what Mr.3B said

6
i don`t watch anime lately... but i play games A LOT!!! almost 24 hours


i have a question for you.. what`s your hobby? and why do you practice it? do you think it`s weird?

and why "mista'3reb"??l

 

[Solay]

برأيي اشوفه موضوع ماله داعي بس ابجاوب على الأسئله

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

الأنمي ماله عمر محدد مثل ماكنا نشوفه وحنا صغار حنا نتفرج عليه وحنا كبار والعمر ماله دخل

2- برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

هههههههههه أكثر سؤال ضحكني يعني اللي عنده اجهزه كثيرة مو طبيعي!!

وبالنسبه للأجهزه اللي عندي هي: الوي-الــ360-الكيوب-الدي اس-كان عندي البلاي1و2 بس بعتهن قبل فترة وكان عندي الأكس بوكس العادي وبعته ايضا

3- برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

ماهمني رأي الناس اذا انا فرحان بحالي يمكن يهمني رأي الوالد والوالدة بس والحمدلله ماراح يقولون شي عن هذه الأشياء اذا انا متواصل معهم ومحافظ على ديني ودراستي

4- انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

مااشتري العاب كثير يعني عادي لو مر شهرين بدون مااخذ لعبه ان كان عندي العاب ماانهيتها او طفشت منها

5- برأيك الأنمي هي موظة هاليومين , فترة وتعدي؟

هي مو لبس عشان تكون موظه مثل ماقلت لك نشوفه من يوم حنا صغار

6- كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

كل اليوم نوم عبادة دراسه والباقي للنت والجيمز والأنيمي

 

[UN3]

طيب شباب مو غريبه اني ما الاقي ولا رد يقولي اني راح ابطل انمي مثلاً اذا تزوجت لأنه راح يكون عندي أهتمامات اكبر من الأنمي

او واحد يقولي اذا صار عمري 40 او 50....إلخ

انا كان ودي اعرف متى تعتقد انك راح اتبطل الانمي

انا عارف ان الأنمي في منها موجهه للكبار بس يظل فيه فتره من عمرك يفرض عليك تغير اهتماماتك (هذا بوجهت نظري....)

اذا كان كلام الناس ما يهمكم طيب اهلك ما يقولون لك شي عن الأنمي والقيمز....مثل متى راح تغير اهتماماتك .....يعني من هذا القبيل

وذا على سؤال الجيمز من وجهت نظري انه الواحد يكون عنده جهاز او جهازين بالكثير من كل جيل يكون شي عادي بس اذا زاد شنو السبب في الزياده تبي تقولي انه في العاب حلوه تنزل على جهاز ثاني ......طيب انا اشوف انه مو من الظروري اني العب كل الألعاب الي ودي العبها حتى لو كان عندي انا هوايه ف مو يعني انه كل شي في هذي الهوايه لازم يكون عندي ولمن قلت (نعتبر هذا طبيعي...اقصد فيه الرقم مو الشخص

وعلى طاري الجيمز مو معقول ابداً(هم في وجهت نظري...) انه اعرف اغلب مصممي العبه و اسماء الشخصيات الي تلعب ومتى بتنزل و و و....احس هذا شي غريب جداً

Bounty

شكراً على الرد ويعطيك العافيه


Gon freeces

مشكور وما قصرت

Colorization

بس لمن يكون عندك 300 كتاب غير لمن يكون عندك 300 لعبه

بين لعبه و كتاب مافي اي وجه مقارنه

60 و 90 ديناز:sealed:

Mr.3B

المجتمع الي حولك يسوي اشيء واجد ما يسويه المجتمع الي انت منه

1000 ريال ..... عادي؟:slant:

Huda

هلا بيج

طيب انتي قبل شوي تقولين جهاوين طبيعي وبعدين ذكرتيلي 7 اجهزه من جيلين يعني المفروض يكون عنج بس اربعه .... الثلاث شلون طلعوا::

Final Fantasy


وجهت نظرك احترمها وجزاك الله خير على الرد

Magical Dreamer

من افضل الردود وجزاك الله خير

مشالله ما خليت جهاز بالسوق اله وشريته....

BioMario

كل الأجهزه ولله الحمد.....خخخخخخخخخخخ

Futrus

طيب ليه تحس انه الشي الي قاعد تسويه صح وكل او اغلب المجتمع الي حولك يشوف انها غلط؟ مو ممكن انت الي تكون الغلط بس عاجبك ؟

وشكراً

الــخــــارق

الى الان مافي رد احسن من ردك وانا من بديت اكتب الرد كنت انتظر اوصلك

شكراً على السلوبك الحلو::

بس الأنمي غير عن الأفلام الفلم بتشوفه مره وخلاص بس الي قاعد يصير الحين انه فيه جدول لمواعيد نزول الانمي على النت
والشباب مشالله ينتظر متى يجي الموعد علشان يشوفنه بفارغ الصبر<<<متعوب عليها :laugh:
وغير هذا انه يعرف ارقام الحلقات وشنو صار في الحلقه الفلانيه ... :sealed:

persona

يعني انت تقصد انه من الصعب انك تدوم على القيمز والانمي الى اجل غير مسمى؟؟؟

Captain Jack Sparrow

طيب اذا تزوجت عزيز بتظل طالع انمي؟؟؟

Dark Link

طبعا لأنه انا مو من متابعي الأنمي ولا انا من الموهوبين بالقيمز....

اذا كانت راح ابطل هوايتي فانا بطلت علشان الدرسه لأنه مافي وقت علشان اتابع هوايتي
طيب انت تعتبر القيمز هوايه؟؟؟؟؟؟

وانا علقت فوق ايش اقصد بكلمت (هذا طبيعي..)

طيب تدري انه تعليقك ما استفدت منه شي

لأنه ردودك استهزائيه
شنو يعني تلعب 24 ساعه <<<<شلون ؟؟:slant:

انك تصرف مليون ريال شي عادي على القيمز <<<<لا تعليق:sealed:

وذا كنت تبي تقارن الكتاب بالقيمز<<<<شي غريب جداً:gasp:

انا كان عندي هوايه الي هي الصيد وكنت امارسه تقريباً يومين بالأيام الدراسه وبالأجازه 4الى 5 ايام وانا امارسه لأنه هوايه تنمي عندي كل شي(رياضه وفيها تعرف متى يكون موسم الصيد تعرف انواع السمك تعرف مكامن السمك...إلخ) ما تصرف مني وايد(مع انه هذا شي مو مهم بنسبه لي...)
وعلى الأقل مافي احد ينقد عليها

وانا مستغرب لأني ما اعرف احد بهذي الطريقه اله بسنوات الأخيره...يعني شي جديد
كلنا شفنا افلام كرتون (انمي) بس هذي كان لها فترته الحين ما اقدر اشوف نفسي اطالع انمي على التلفزيون واتابعه واصير متحمس معاه واعرف كل شخصيه......مستحيل

واتمنا ان الكل يشارك في الموضوع

 

[persona]

يعني انت تقصد انه من الصعب انك تدوم على القيمز والانمي الى اجل غير مسمى؟؟؟

الله العالم..كل مايكبر الانسان تكثر ارتباطاته\التزاماته ومايحصل وقت فراغ لنفسه مثل ماكان بمراحل عمره اللي طافت 🙂

 

[Huda]

طيب شباب مو غريبه اني ما الاقي ولا رد يقولي اني راح ابطل انمي مثلاً اذا تزوجت لأنه راح يكون عندي أهتمامات اكبر من الأنمي

او واحد يقولي اذا صار عمري 40 او 50....إلخ

انا كان ودي اعرف متى تعتقد انك راح اتبطل الانمي

انا عارف ان الأنمي في منها موجهه للكبار بس يظل فيه فتره من عمرك يفرض عليك تغير اهتماماتك (هذا بوجهت نظري....)

اذا كان كلام الناس ما يهمكم طيب اهلك ما يقولون لك شي عن الأنمي والقيمز....مثل متى راح تغير اهتماماتك .....يعني من هذا القبيل

وذا على سؤال الجيمز من وجهت نظري انه الواحد يكون عنده جهاز او جهازين بالكثير من كل جيل يكون شي عادي بس اذا زاد شنو السبب في الزياده تبي تقولي انه في العاب حلوه تنزل على جهاز ثاني ......طيب انا اشوف انه مو من الظروري اني العب كل الألعاب الي ودي العبها حتى لو كان عندي انا هوايه ف مو يعني انه كل شي في هذي الهوايه لازم يكون عندي ولمن قلت (نعتبر هذا طبيعي...اقصد فيه الرقم مو الشخص

وعلى طاري الجيمز مو معقول ابداً(هم في وجهت نظري...) انه اعرف اغلب مصممي العبه و اسماء الشخصيات الي تلعب ومتى بتنزل و و و....احس هذا شي غريب جداً

[Huda

هلا بيج

طيب انتي قبل شوي تقولين جهاوين طبيعي وبعدين ذكرتيلي 7 اجهزه من جيلين يعني المفروض يكون عنج بس اربعه .... الثلاث شلون طلعوا::

انا قلت الطبيعي مو انا :roll:
وانا اعتبر متوسطة بعالم الألعاب يعني قليل الالعاب الي تخش مزاجي اما المحترفين مثل اغلب الأخوة بترو فشيء طبيعي يشتروا كل الاجهزه
وفي ناس فان لشركة معينه مستحيل جهاز من غير هالشركة اما بالنسبة لي سوني بالمرتبة الأولى واي جهاز ناجح بعدها اشتريه :roll:
وصدقني ماعمري تحسفت على فلوس حطيتها بجهاز :roll:


وبالنسبة لتساؤلاتك عن متى نترك الأنمي او الفيديو قيمز فهو شيء بالمستقبل البعيد الله يحيينا ان شاء الله

خلاصة الموضوع الناس اطباع ياخوي في ناس يعجبهم وفي ناس لا الموضوع مو غصب لكل الطرفين :roll:

 

[Dark soul]

لول ..... احب هالمواضيع

1- برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

ما في عمر افتراضي بالضبط .... بس مع الزمن او اذا وصل الشخص الى سن معين ... المفروض الواحد يحترم المقام الى اهو فيه .

يعني مو معقولة ان الواحد يطالع انيمي جنب عياله او و عمره 32 :slant: ....

برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

اممممم ... لول ... يمكن اقدر اقول جهاز واحد في العادة يكفي حق التسلية ... اذا كنت تبي تاخذ الغرض الرئيس من الجيمز ... بس ما في مشكلة ان الواحد ياخذ اكثر من جهاز ... بشرط انها ما تستعبده ( اي يكون الانسان عبد حق شهوته )

برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

لول .... في العادة العالم يشوفهم جنهم فضائين :yuck:

..... اكيد تهمني نظرة المجتمع .... انا مو عايش بكوكب بروحي ... انا جزء من المجتمع ... يعني لازم يهمني الكلام الي فيه ( طبعا مب في كل شي ) ... علشان هذا السبب ( طبعا مو هذا السبب الرئيسي ) قل اهتمامي بالجيمز بنسبة 90%

... و الحمد لله ... انا مو مجنون العاب ... ولا انيمي ( يمكن بس في انيمي واحد بس تابعته ) ... علشان هالشي ... اُعتبر طبيعي

انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

اممممم ... يمكن مرت سنتين ما دفعت شي حق الجيمز لول .... لكن لو بحسب .... امممم يمكن على الاكثر 600 ريال اذا كنت ما بشتري اي جهاز

- برأيك الأنمي هي موظة هاليومين , فترة وتعدي؟

ما اتوقع :slant: .... البعض الله يهديه يصر يشوف انمي حتى لو طق الـ 50 ......

كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

3 ساعات ... في العطل ....( اما انيمي .... او جيمز ) ... و احيانا اطول .... بس على فترات متقطعة ( اقصد في بعض الايام عادي ما العب ... حسب المزاج )



عموما .... ما احب الي يحب الشي بلا عقلانيه ..سواء الفديو جيمز او اي هوايه ثانية من الهوايات القليلة الفائدة نسبيا ...

في رواية عن الرسول الاكرم عليه و على آله و صحبه الصلاة و السلام بما معناها تقول :

(اذا كان صار الانسان عبدا لشهواته ... صار ادنى مقام من الحيوان )

اتمنى ان الجميع يتفكر فيها

شكرا اخوي UN3 على الموضوع و الطرح الجميل

*تعديل : احس الرد مليان اغلاط املائية .... المعذرة .

 

[The Doctor]

بكل اختصار...
إلى الأبد

 

[The Last Fantasy]

لول ، موضوع ممتع .. أكلوك الشباب 😛

برأيك الشخصي هل للأنمي عمر افتراضي , او وضع اجتماعي (متزوج او موظف..)عندها الشخص لازم يوقف مشاهدة الأنمي؟وذا كان جوابك ب نعم حدد؟

طبعاً لا ، بما أنه شي من ضمن اهتماماتك او هواياتك فما راح يوقفه شي إلا إذا أجبرتك الظروف أو مليت ، لكن ما عمري ربطت نهاية شي بأمر معين (مثلاً : أترك الجيمز لما أتزوج) .

برأيك الشخصي كم جهاز ممكن يكون عند الفرد ونقول عنه ان هذا طبيعي؟ وارجو انك تذكر كم جهاز انت عندك.

ما له دخل كون هالشي طبيعي ولا لا ، بحسب اهتمامك وقدرتك المادية ، وما فرقت إذا عندك جهاز أو 3 ، بالأخير "بتلعب" .

برأيك الشخصي وبنظرتك للمجتمع شنو تفكير المجتمع(غير الي يطالعون الأنمي او يلعبون بالعاب الفيديو ) عن الي يطالعون انمي ويلعبون العاب الفيديو بكثره؟ شنو نظرت ربعك الي ما يتابعون انمي عنك لمن يعرفون انك اتطالعها؟ هل تهمك نظرة المجتمع لك ؟

النظرة تختلف من شخص لآخر ، وشخصياً ما اهتم في هذي النظرة إذا كانت ضدها ، لأنها وببساطة شي راجع لي أنا شخصياً ، ألعب/أتابع لنفسي ، مو ألعب/أتابع لهم . لول

انت كفرد ارجو انك تذكر كم تصرف المتوسط شهرياً على العاب الفيديو؟وهل تعتبر انه الي قاعد تسوي صح؟وشنهو المبلغ المعقول الي مفروض ينصرف على العاب الفيديو شهريا؟ً

بحسب السوق واللي يهمني فيه ، مرات أعدّي الـ300 ريال في الشهر ، ومرات ما أدفع شي ، خصوصاً لو كان عندي ألعاب ما لعبتها .

برأيك الأنمي هي موظة هاليومين , فترة وتعدي؟

ما عمره الأنمي كان موضة ، الموضة شي يجي لفترة وبعدها يتغير ، بس الأنمي من زمان موجود ، وراح يستمر بإذن الله.

كم ساعه تقظيها يوميا في مشاهدة الأنمي والعاب الفيديو؟تشوف انه الي تقظيه واجد؟ الأسباب الي تخليك تقظي كل هالفتره قدام التلفزيون ؟ هل تعتبره تصرف سليم؟

طبعاً فترات الدراسة يختلف الوضع ، لكن لو كان سؤالك عن الأيام الحالية ؛ فـ أقضي بحدود ساعتين للأنمي ، و4 ساعات للجيمز ، لكن مرات لا .. ومرات ما أجيهم لول ، الفترة هذي عندي فيها مشاغل شوي .

لى طاري الجيمز مو معقول ابداً(هم في وجهت نظري...) انه اعرف اغلب مصممي العبه و اسماء الشخصيات الي تلعب ومتى بتنزل و و و....احس هذا شي غريب جداً

لول غريب ؟ وجداً !؟ مادري وين الغريب في المسألة . مثلا: متابع الكورة تلقاه يعرف إدارة الفريق من أولها لآخرها مع اللاعبين بأعمارهم وأرقامهم ، نفس الشي الجيمز .. كل واحد واهتمامه .

شكراً على الموضوع .

 

[Colorization]

لول غريب ؟ وجداً !؟ مادري وين الغريب في المسألة . مثلا: متابع الكورة تلقاه يعرف إدارة الفريق من أولها لآخرها مع اللاعبين بأعمارهم وأرقامهم ، نفس الشي الجيمز .. كل واحد واهتمامه .

بالصمييييييييم، عندي ربعي يسولفون بالكرة ويتكلمون عن تاريخ النادي الفلاني بالتاريخ الفلاني مع ذكر اللعيبة القدامى كلهم ومعلومات تعجيزية، ولما أتكلم قدامهم عن لعبة ودوبي ما ذكرت إلا مطور اللعبة والشركة، يعطوني نظرات غريبة 😛eeved:

 

[Death match]

..... اكيد تهمني نظرة المجتمع .... انا مو عايش بكوكب بروحي ... انا جزء من المجتمع ... يعني لازم يهمني الكلام الي فيه ( طبعا مب في كل شي ) ... علشان هذا السبب ( طبعا مو هذا السبب الرئيسي ) قل اهتمامي بالجيمز بنسبة 90%

... و الحمد لله ... انا مو مجنون العاب ... ولا انيمي ( يمكن بس في انيمي واحد بس تابعته ) ... علشان هالشي ... اُعتبر طبيعي

كلامك صح البعض يقول انا ما اهتم بالمجتمع او مالي شغل بالجمتع وينسى انه فرد من المجتمع نقدر نسميه متخلف عنهم او شاذ

وانا نفس حالتك اخي دارك سول لما كنت صغير كنت مو مقصر مع نفسي ابداً بالجيمز يمكن العطلة كلها جيمز لدرجة ان ايام المدراس كان الوالد يشيل اجهزة اللعب كلها ويطلعها يوم الأربعاء و الخميس كان عندي سيجا و ps1 يمكن هذا الشئ قلل اهتمامي بالجيمز + عدم شراء اي اجهزة اخرى مثل الدريم كاست او ننتيندو 64 .. تدريجي صرت اهتم بالكمبيوتر بعد ما كبرت لأن جأ دور اخواني الصغار لول .. ولما اخذت ps2 شفت نفسي ادمن على بعض الالعاب لدرجة اني صرت اشتري العاب البلايستيشن1 الي فاتتني والعبها مثل FF9 😛 اخر مرة انهيتها كان شهر 8 2006

بعد فترة اكتشفت العاب اقدر العبها مع ناس نفسي فأدمنت على العاب PC ONLINE بشكل والان ابحث على اجهزة الجيل الجديد

(مرة حصل معاي موقف مضحك اتذكر قبل المدرسة بيوم يمكن عام 1999 كان وقتها نازل RE3 بالاسواق وفجأة اشوف محل جيمز يعرض اللعبة انا ضليت اتابع العرض كان نفسي اخذ اللعبة لكن خفت من الوالد + ما عندي فلوس , فجأة اخطرت فكرة رهيبة ببالي أني اخلي اخوي الصغير يطلب من الوالد فلوس علشان يشتريها وفعلاً دخلت الفكرة براس اخوي الصغير لين ما اخذناها قبل ما نطلع من السوق , لول بعد اول يوم مدرسة رجعت ابي العبها بعد ما الوالد ينام فجأه لقيت اخوي مطلعها وقاعد يلعب!!! خخخخخخخ) على فكرة 1999 شهدت ثورة بتاريخ العاب الرعب SILENT HILL RESIDENT EVIL 3 PARASITE EVE 2


اما الأنمي مادري شنو فيه من ايام الابتدائية وحنا نتابع كابتن ماجد والانميات المدبلجة الاخرى وكنت اجيب من محلات الفديو واتابع مافيها شئ حتى كونان كانت القناة الاولى بالكويت تعرضه والناس انهبلت عليه فجأه انقطع عن التلفزيون وكنت اجيبه مدبلج من محلات الفيديو اعتقد بالشريط كان فيه 3 حلقات بعدين صاروا حلقتين .. الى ان اتت ثورة الP2P و فرق الترجمة بعدها الانمي رجع بالمنطقة العربية نفس اول لا اكثر ولا اقل ..

 

[Colorization]

على فكرة 1999 شهدت ثورة بتاريخ العاب الرعب SILENT HILL RESIDENT EVIL 3 PARASITE EVE 2

سايلنت هل الأولى جابوها لي هدية عيد ميلادي، لي الحين موجود عندي
good days :cryy:

 

[Kratos]

رأي الغير لا قيمة له مادام الشخص مؤدي حقوقه و اجباته الي فرضها الدين عليه . الشخص المفروض يعيش حياته زي ما يحب هو في داخل الحدود الشرعية مو مثل ما يحب المجتمع الي ممكن يكون مجتمع متخلف و منافق و منتهيه صلاحيته

 

[High Lander]

الموضوع استفزني جدا ....ما ادري هل الهدف من الموضوع هو من اجل الأستبانه , ام انه فعلا اعتقادك ان الترفيه للطفال !! ....اذا كان الاخير ..ما اقدر اقول الا نظرتك قاصره في الموضوع . اعتقد انك (محدث) فيديوقميز , وهذي مشكلة المجتمع اللى تفكيره كيف يصب القهوه وكيف يمسك الدلله زي الناس ...وغيرها من (المراجل)....يتكلمون عن الدين وهم ابعد الناس في التطبيق. سبحان الله تسلط عجيب على كل شيء يطراء في المجتمع , لكن اللى يفضح
ضعف المنطق عند مثل هؤلاء انهم يسمون كل شي ما يعجبهم (ظاهره)::confused ...عجبي والله..
تفحيط ..ظاهره , مغازل ..ظاهره, .............والفديوقيمز ..ظاهره:roll: الخ الخ الخ
حتى استخدام الكلمات ماهي في محلها !!! ...الظاهره عاده اجتماعيه دخيله تظهر في المجتمع ثم تختفي بعد فتره ....بالعربي شي معشعش من سنين مايسمى ظاهره ...واحسب من ايام الاتاري ............................................انتهى

 

[Mr.3B]

Mr.3B

المجتمع الي حولك يسوي اشيء واجد ما يسويه المجتمع الي انت منه

1000 ريال ..... عادي؟:slant:

بالنسبة لسالفة المجتمع الي انت منه .. فأتوقع انت قلت نظرة المجتمع صح ولا لأ ؟؟
بما انك قلت نظرة المجتمع أي المجتمعين الحين الي ينظر لي كفرد ؟؟ مجتمعي الي أصلي منه (الي مني موجود فيه) ولا المجتمع الي أحتك معاه يوميًا ولي علاقات وصداقات فيه ؟؟

كيف مجتمعي الي أنا أصلي منه ينظر الي وأنا مني فيه .. خلنا عقلانيين شوي .. وهذا بعيدًا عن ان رايهم ما رح يغير شي .. أكيد يهمني تكون الناس متفتحة .. بس أيضًا لو شفتها منغلقة ما رح يغير شي بتصرفاتي .. أنا هو أنا .. الجبان الي يروح ويغير من نفسه ومن هواياته عشان انتقدوه الناس بمنظور خاطئ .. ومهو مقر داخل نفسه ان الشي الي جالس يسويه سليم .. ولا يمس الشريعة ولا الأخلاق بأي شي .. ويغيرها .. ليه ؟!

يعني بالنهاية نظرة المحتمع لي طبيعية .. ولا أواجه أي مشاكل في ممارسة هواياتي .. سواء كان هذا المجتمع يسوي أشياء محتمعي ما يسويها أو غير هذا .. بالنهاية أنا أقع حكم تحت أنظارهم هم .. لأنهم هم الي ينظرون الي .. مو مجتمعي الأصلي عشان أخاف ولا أتردد .. مع ان عمري لا خفت ولا ترددت لما كنت بالسعودية .. كنت أمارس هواياتي بشكل أكبر من الآن عشان أكون معك صريح .. ولا كان يعيقني عائق الحمد لله

أما عن ألف ريال ومسألة انها عادي ولا لأ .. بصراحة ما أخفي عليك بعض الأشهر تكون الألعاب فيها مكدوسة .. وبالراحة أصرف أكثر من 1000 ريال .. ولا أتردد مرتين في هذا التصرف .. هواية .. ويحق لي زي ما يحق لأي شخص آخر انه يصرف وينفق على هواياته كل الي متوفر لديه من قدرة مادية .. وأحيانًا فيه أشهر يكون عدد الاصدارات الي تستاهل انك تشتريها ما يتعدى الواحد أو الاثنين .. في هذاك الشهر تخف صرفيتي أكيد

 

[ShinShadi]

طرحك للموضوع مستفز ( نوعا ما ) ..
و بعدين سؤال .. إش رح تستفيد من هذا الموضوع ؟ باحث أو عندك دراسة مثلا ؟

 

[Dark Link]

Dark Link

طبعا لأنه انا مو من متابعي الأنمي ولا انا من الموهوبين بالقيمز....

اذا كانت راح ابطل هوايتي فانا بطلت علشان الدرسه لأنه مافي وقت علشان اتابع هوايتي
طيب انت تعتبر القيمز هوايه؟؟؟؟؟؟

وانا علقت فوق ايش اقصد بكلمت (هذا طبيعي..)

طيب تدري انه تعليقك ما استفدت منه شي

لأنه ردودك استهزائيه ????
شنو يعني تلعب 24 ساعه <<<<شلون ؟؟:slant:

انك تصرف مليون ريال شي عادي على القيمز <<<<لا تعليق:sealed:

وذا كنت تبي تقارن الكتاب بالقيمز<<<<شي غريب جداً:gasp:

انا كان عندي هوايه الي هي الصيد وكنت امارسه تقريباً يومين بالأيام الدراسه وبالأجازه 4الى 5 ايام وانا امارسه لأنه هوايه تنمي عندي كل شي(رياضه وفيها تعرف متى يكون موسم الصيد تعرف انواع السمك تعرف مكامن السمك...إلخ) ما تصرف مني وايد(مع انه هذا شي مو مهم بنسبه لي...)
وعلى الأقل مافي احد ينقد عليها

وانا مستغرب لأني ما اعرف احد بهذي الطريقه اله بسنوات الأخيره...يعني شي جديد
كلنا شفنا افلام كرتون (انمي) بس هذي كان لها فترته الحين ما اقدر اشوف نفسي اطالع انمي على التلفزيون واتابعه واصير متحمس معاه واعرف كل شخصيه......مستحيل

واتمنا ان الكل يشارك في الموضوع

of course playing video games is a hobby..

yea.. sometimes i play 24 hours!!... i don`t sleep and i continue playing with my friends in saudi (cuz i`m not in saudi) for 24 hours or even more.... it`s fun

ok... now for the good part.. some games are even better than books (i like books too.. and i read)... some games... with a brilliant story can provide a better experience than a book.... IN FACT some games get their story line from a novel!!!! for example.. Splinter Cell... look it up.. google it or wiki it

oh your hobby is fishing... nice... i used to fish with my father... but i don`t know kinds of fish and where they stay ... etc
.. so.... if i were "closed-minded" i would probably think that you`re weird... mo 6abii3i... why?? you tell me

listen man.... the biggest market after oil (petrol)... is video gaming market... that`s a fact


and about studying.... almost all of my "video gamers" friends have EXCELLENT grades.. almost perfect...hmm... that`s weird

you became a member in this forum because of THIS thread??:normal:

you forgot this question..

الموضوع استفزني جدا ....ما ادري هل الهدف من الموضوع هو من اجل الأستبانه , ام انه فعلا اعتقادك ان الترفيه للطفال !! ....اذا كان الاخير ..ما اقدر اقول الا نظرتك قاصره في الموضوع . اعتقد انك (محدث) فيديوقميز , وهذي مشكلة المجتمع اللى تفكيره كيف يصب القهوه وكيف يمسك الدله زي الناس ...وغيرها من (المراجل)....يتكلمون عن الدين وهم ابعد الناس في التطبيق. سبحان الله تسلط عجيب على كل شيء يطراء في المجتمع , لكن اللى يفضح
ضعف المنطق عند مثل هؤلاء انهم يسمون كل شي ما يعجبهم (ظاهره)::confused ...عجبي والله..
تفحيط ..ظاهره , مغازل ..ظاهره, .............والفديوقيمز ..ظاهره:roll: الخ الخ الخ
حتى استخدام الكلمات ماهي في محلها !!! ...الظاهره عاده اجتماعيه دخيله تظهر في المجتمع ثم تختفي بعد فتره ....بالعربي شي معشعش من سنين مايسمى ظاهره ...واحسب من ايام الاتاري ............................................انتهى

exactly what i wanted to say... and more