بكل صراحة لعبت اللعبة مرة وحدة قبل مدة طويلة وكان ودي أرجع لها بس كنت خايف،شريت الفيتا قبل فترة وبمان اللعبة مناسبة له جدا قلت ابلعبها من جديد خاصة اني مشتاق لأجواء السلسلة.
اكتشفت انه عندي فكرة خاطئة عن اللعبة،أول مرة لعبت فيها اللعبة عشقت اتموسفيرها ومناطقها وجرعة الأكشن الأكبر اللي موجودة فيها بس كان مضايقني شي واحد باللعبة وكنت أستغرب كيف الناس يحبونه ويعتبرونه أفضل شي باللعبة واللي هو طبعا: النيمسس. أول بلايثرو لي كنت اقتله كل مااقابله وكنت أقول أنه مجرد عدو حطوه لك عشان يشفطون الهيلث والذخيرة منك وتعذبت ومت كثيير. شغلت اللعبة وأنا داري أنه المفروض مااقتله والهدف الهرب منه ولعبتها بهالأساس واوووف ياهي تجربة.
الاحساس بأنك مطارد باللعبة شي أبدا ماشفته بلعبة ولا أعتقد أني راح أشوفه،اللعبة تخليك على أعصابك بعد كل باب تفتحه وتخليك تحاسب لكل خطوة الين تجي ذيك اللحظة اللي تسمع فيها: STAAARS مع موسيقى مخيفة تخرب لك كل موازينك،وأفضل شي أنه بيلاحقك حتى لو فتحت لك باب وانتقلت لمنطقة ثانية،فإحساس الأمان التام غير موجود الا بغرف الحفظ. التعامل مع النيمسس بالبداية صعب ومربك جدا بس بعد شوية تدريب وتعود يطلع أسهل وتصير تقدر تتعامل معه باحترافية أكثر من مجرد الهلع اللي بالبداية. التعامل مع النيمسس ومرافقته لك من البداية وقتالاته المختلفه والتركيز عليه بالقصة والأحداث خلاه العنصر الأساسي باللعبة والمحور اللي تدور عليه اللعبة وأعجبت جدا بهالتوجه.
خاصية الدودج خورافية بكل ماتعنيه الكلمة من معنى،اللعبة طلعت أمتع x100 فيها وخلت الرجوع للأجزاء الثانية شوي أصعب قبولا،توقيتك لكل عدو والقدرة على مرواغة الهنترز والكلاب وغيرهم كانت شي ممتاز وأعطت طابع أكشني أكثر وتحسسك بالإحتراف والذكاء باللعبة وتعطيك ثقة ومتعه أكبر بالتعامل مع الأعداء بعكس الأجزاء الأخرى اللي بعض اللحظات تلقى نفسك تتخبط مع العدو بموقف غبي عشان تقتله أو تنحاش منه. تمنيت أني أشوف ذي الخاصية بالريميك وأتمنى من كل قلبي أني أشوفها بريميك الثاني مع خاصية الالتفاف ١٨٠ درجة واللي بدونهم أعتقد بتكون اللعبة أقل متعة وسلاسة.
مدينة راكون سيتي وأجواءها شي لايوصف وتنقل احساس الأبوكاليبس بشكل جدا ممتاز،استمتعت بكل مبنى وزقاق بالمدينة وعشت بأجواءها،حبيت مناطق اللعبة كلها وهذا شي ماكان يصير لي مع الأجزاء الثانية لأني كنت أكره مناطق المختبرات وسعيد جدا أنه ريزدنت ايفل ٣ ماحطتني فيها. صنع وتوصيل الأتموسفير الكلي للمناطق والموسيقى شي مايحتاج أعلق عليه لأنها ريزدنت ايفل،وتحية من القلب للي لحن ثيم الكريديت شي جبار ومكافأة غير متوقعة في نهاية اللعبة بجانب مكافأة طور المرشينريز المفضل لي شخصيا بالسلسلة بسبب أسلوبه ومشترياته وطريقة الحصول عليهم.
بديت اللعبة قبل أسبوع وخلصتها عالايزي وبعدها علاطول لا شعوريا بديتها عالهارد ولاوقفت الين انهيتها عالهارد مع كم ساعة من المرشنيريز عشان أشتري الذخيرة اللانهائية وابدا اللعبة فيها على روقان بالبلاي ثرو الجاي، اللعبة عالهارد هي التجربة الأساسية والمتكاملة للعبة واللي هي تقريبا بصعوبة النورمال بالنسبة للأجزاء الثانية. الايزي كان سهل جدا وكان معطي تجربة أكشنية أكثر وأكبر ونوعا ما تجربة حلوة بس مختلفة.
صعب دايم أني أقول وش أفضل جزء من الثلاثية لأنه كل جزء مميز بمجال معين، بس الأكيد أن ريزدنت ايفل ٣ هي
أمتع الثلاثية و تحمل العدو الأفضل بالسلسلة كلها.
