أول تجربة لي للمحمول كانت مع جهاز الجيم بوي كولر مع بوكيمون يلو سنة 98 او 99 ما أذكر متى شريته لكن أذكر اشلون شريته كان عمري 11 سنة، كنت قاعد العب البلاي ستيشن 1 واخوي الي توه متوظف وراي وقاعد يتغدا، لفيت عليه وقلت له ماودك تشتري لي هدية؟!؟ وهو فرط من الضحك لاني فاجأته وقال لي وشنو الهدية الي تبيها؟ قلت جيم بوي كولر مع بوكيمون يلو، قال على خير ان شاء الله.
من بكرا قعدني من النوم الصبح قبل قعدتنا للمدارس بنص ساعة قال شوف يا فيصل هذه هديتك.
انا صارت عيوني جذي 0_0 وفزييت فزة قمت بسرعة لبست ملابسي للمدرسة ورحت السيارة قبلهم بساعة كاملة بالدبه منسدح والعب مع آش وبيكاتشو وأغامر وأصيد بوكيمونات
.
ومن اهني بدت علاقتي مع الاجهزة المحمولة وكنت مستمتع معاهم لان كل العاب الجيم بوي كولر كانت العاب تنفع للمحمول ثم شريت الجيم بوي أدفانسد اس بي وكملت على مسيرة الجيم بوي كولر جهاز العاب محموله ولايقة عليه ثم الدي اس مع شاشة اللمس الي كانت ثورية حزتها ولازلنا في طور العاب المحمول المناسبة له مع كم لعبة مني مناك كونسولية.
ثم جانا الوحش الـPSP الي مسخ الالعاب المحمولة وخلاها العاب كونسول عالمحمول من اهني انا بديت أفج عن الاجهزة المحمولة لاني أفضل العاب هالنوعية من الالعاب على التلفزيون مو المحمول ووراه الثري دي اس الي كان أخر جهاز محمول أشتريه كجهاز محمول فقط وأنهيت علاقتي معاهم لاني خلاص أكتفيت وماصرت أستمتع بالمحمول أبداً.
السويتش شريته في 2017 لي يومي هذا مالعبت بوضعية المحمول الا أقل من عدد أصابع الايد الواحدة لو أبي أبالغ حبتين لكن الحقيقة يمكن اقل من عشر مرات أكيد!
والسويتش 2 ماجربت المحمول ابدا.
جربت الستيم ديك عند أحد أصدقائي وكنت عند رأيي ما يصلح لي ألعب هالالعاب الا على تلفزيون وكنترولر حتى لو العاب اندي لاني صرت ما أجد المتعة في اللعب عالمحمول مع ان مرات اقول ودي أخذ والعب بدوامي بما اني اقضي فترة من الزمن اهناك لكن مع هذا ما أفضل.
اتمنى بس ماخرجت عن الموضوع بكبره لول.
