نقاش فيجوال نوفل الموضوع الرسمي لألعاب الـVisual Novel ( حان الوقت لنعطي هذا الـGenre حقه )

[تيجاوي أتكيت]

بعض bgm تخليك مرغم تهتم بالميديم ذا

 

[تيجاوي أتكيت]

وأنا جالس أشتغل على مشروع جانبي، شفت بالصدفة إن آتري محصلة ترجمة عربية... شغل فانز! فريق جديد (شخص واحد) صنعها بكل شغف (ماسك كل شيء لحاله)... يوم تدخل لموقعه وتشوف جوه، تحس إنك رجعت 17 سنة للماضي يوم بدأوا العرب يتحمسوا على الترجمات، وفي كم فريق طلعوا هنا وهناك ماسكين أعمال مستحيل اليوم تشوف فرق تترجمها. آتري نفسها عمل ممتاز للترجمة، بس محزني كيف حرفيًا محد داري إنها حصلت ترجمة!... أظن للأسف اختياره لذي اللعبة وفي كذا توقيت متأخر ومع 0 استغلال لجمهور التيكتوك كان غلطة. صحيح عمله رح يتخلد في التاريخ، ومستقبلًا أي شخص يتمنى يلعبها وللفضول قال داخل نفسه إنه وده يشيك المحتوى العربي الي يخصها... ممكن يلاقيها بالغلط. هي رح تضل موجودة وفائدتها رح تعم على الناس الي جد يحتاجوها، بس لسه أشوف نسبة كبيرة ما رح حتى تقدر تلاقيها ولا رح تحسب إن في لها ترجمة إلا لو عرفوا كيف يدوروا صح...

عارف إنه ما يصير تطلب من مشاريع الشغف ذي تروح في شيء ثاني، بس لازم أقول إنه ما كان رح يكون أحسن له لو أول لعبة ينشرها تكون شيء مطلوب جماهيريًا؟... داري حلبتها، بس مانوسابا في لها جمهور عربي متوزع في النت وهم ما لعبوا اللعبة وبس ماشين على طاقة التيكتوك. نعم، هذا مو جمهور الروايات المرئية اليوم، لو فزت في التيكتوك أنت فزت في الحياة. مش الأحسن البداية تكون مشروع يخلي الناس تعرفك؟... آتري مش هي ذيك اللعبة الي تقدر تعمل ذا. خصوصًا وأنت مضيع نافذة قوتها على وقت الإطلاق أو مع عرض الأنمي. اليوم؟ محد متذكر اللعبة ذي.

المهم. بخصوص الترجمة نفسها، شفت المقدمة وكم جزئية تجي بعدين. قارنتها برضو بالترجمة الإنجليزية. أقدر أأكد إنه مترجم من النص الياباني... وترجمته أكثر دقة من الترجمة الإنجليزية وتعطيك نظرة على النص الحقيقي بشكل أكثر وفاء. ما أقدر أفتي بهل هي ركيكة كلغة عربية. وكونها أحسن من الترجمة الإنجليزية، الصدق مش أكبر معيار، خل نقول الشغل هنا ترجمة بينما النسخة الإنجليزية كانت توطين؟... توطين تعيس بالمناسبة، كمية التغييرات الحاصلة فيه شيء قمة في القرف، خصوصًا في بعض الجزئيات الي أبد ما لها داعي.

بس ودي أقول شيء واحد... هل الشخص هذا ترجمته مبنية على الـAI أو لا؟... سؤال راودني. مش سوء ظن مني فيه، ولكن هذا السؤال اليوم يراود حرفيًا أي شخص يشوف قدامه ترجمة فانز، وبعض الأوقات حتى الترجمات الرسمية. طيب كيف رح نقدر ناخذ الجواب القاطع؟... حرفيًا ما في ولا طريقة لول. ترجمات الـAI اليوم وصلت مرحلة ما تعطيك أي دليل على كينونتها الحقيقية لو الشخص الي صنعها عارف كيف يخفي حقيقتها.

مرت على كثير درامات بخصوص هذا الموضوع. تعرفون كيف الواحد يكتشف باتش الترجمة AI ولا لا؟ عن طريق تفتيش كامل في الـfootprints لصناع الباتش. نعم، لازم تروح تشوف تاريخه كامل وهل يوحي إنه يعرف ياباني؟ هل يوحي إنه داعم للـAI؟ هل العبارات المستخدمة في الباتش قد استخدمها في حياته الإلكترونية؟ هل سرعة ترجمته بشرية؟ كيف قدر يحصل وقت الفراغ عشان يترجم، إيش هي وظيفته؟... بعيني شفت صانع باتش مانوسابا الإنجليزي يمر بكل ذا، وباتشه كان لفترة من الفترات يعتبر شغل AI بسبب سرعته، وبرضو له منشور في ريديت يناقش فيه الكتابة باستخدام واحد من موديلات الـAI أو شيء زي كذا؟... برضو أتذكر واحد عمل له doxing قوي لحد ما طلع لنا الـCV حقه وطلع صانع الباتش مصري الجنسية. أدري الوضع جنون، بس ذي هي الطريقة الوحيدة عشان تقدر توصل للحقيقة، وحتى مع كل هذا في احتمالية كبيرة للغلط...

طبعًا آخر همي أعرف حقيقة باتش آتري هذا ولو كان شغل AI؟ كفو على راعيه، روح قدام! طالما يستخدم موديلات حديثة ويعمل تدقيق كامل عليها، سواء بشكل يدوي أو برضو مع الـAI، أنا سعيد إن في فرصة أكبر للناس تلعب بعض الألعاب الممتازة في ذي الصناعة. يا شيخ حتى لو استخدم موديل AI قديم، مستعد أجزم رح تطلع النتيجة لسه أحسن من الشغل الرسمي الإنجليزي... ولو الباتش كان ترجمة يدوية فمبروك عليه، أكيد التجربة كانت مميزة.

ناوي قريب أترجم لعبة يابانية قصيرة من مطور حبيت لعبته السابقة ومحد صنع لها باتش إنجليزي. ناوي أستخدم كثير وسائل (مش AI) وأنا أشتغل عليها، ومساعدة منتدى تعلم ياباني قد رحت له كم مرة مع كم استفسار عندي بخصوص بعض ترجمات الألعاب الي شككتني بنفسي، وهناك حصلت جواب كويس من عندهم.

 

[abdullah-kh]

STEINS;GATE الفيجوال تستاهل اذا واحد شاف الانمي؟

 

[''']

يوم تدخل لموقعه وتشوف جوه،

ممكن ترسل لي موقعه بعدين.

ناوي قريب أترجم لعبة يابانية قصيرة من مطور حبيت لعبته السابقة ومحد صنع لها باتش إنجليزي. ناوي أستخدم كثير وسائل (مش AI) وأنا أشتغل عليها، ومساعدة منتدى تعلم ياباني قد رحت له كم مرة مع كم استفسار عندي بخصوص بعض ترجمات الألعاب الي شككتني بنفسي، وهناك حصلت جواب كويس من عندهم.

بالتوفيق.