اختلف معكم في نقطتين
الاولى من الناحية البدنية هي مو بالصعوبة زي ما انت ذكرتها .! تدريبات لياقية وبدنية كل 4 مرات بالاسبوع بالكثير لمدة 6 شهور كفيلة لبناء جسم رياضي ورفع معدل لياقة اللاعبين لمستوى ممتاز وهذا الشيء مجرب من ناس اعرفهم شخصيا
هذا غير ان الجهاز الاداري للمنتخب ماله اي علاقة بالشيء هذا, هذي شغلة الاندية لأن 90% من اوقات اللاعبين تكون في انديتهم مو منتخبهم
اذكر جيريتس مدرب الهلال اول ماجاء للهلال شد على اللاعبين وخلاهم يسوون تمارين صباحية ومسائية وكان فيه تحسن واضح في لياقة اللاعبين
المشكلة في الناحية البدنية مسؤولية الاندية و ما اشوف ان ثقافة المجتمع لها اي علاقة بالموضوع لو هي على مفاطيح يقدرون يلزمون اللعيبة على منعهم من اكل بعض انواع الطعام الي يمكن ياثر عليهم والزامهم بتطبيق نظام غذائي معين
ثانيا طرد بوسيرو كان قرار صائب جدا
السبب ان بوسيرو اخذ اكثر من وقته بكثير جدا لاعداد المنتخب من 2009 وهو ماسك المنتخب ومع هذا مافي اي تقدم ملحوظ بالعكس مع كل مباراة قاعد يثبت انه مدرب فاشل ومفلس تكتيكيا وصار بدال ما هو اعداد اصبح اعدام
ولا من متى المنتخب السعودي يلعب دفاع قدام سوريا .!! آخر شيء ممكن يجي في بالي اننا نخسر من سوريا بالمستوى الهزيل هذا,(مع احترامي الكبير للمنتخب السوري المتطور بشكل واضح) واعتقد جلب ناصر الجوهر في هذا الوقت قرار ممتاز زي ماصار في كأس آسيا 2000 يوم يجيبونه بدال ماتشلا وغير تكتيك المنتخب الدفاعي لهجومي وتحسن المنتخب 180درجة
مع ان الامر الآن اصعب خاصتا ان اختيارات المدرب للاعبين غير موفقة ابدا + امام المنتخب مبارايات صعبة جدا امام الاردن واليابان عكس 2000 الي حضر فيها الجوهر وكان امامة فرق عادية
بالنسبه للنقطه الاولى .. هي مو بالصعوبه الكبيره هذا شي صحيح .. لكن هي مو بالصعوبه اذا كان عندك ثقافة مجتمع تساعدك على انها تكون مو صعبه ..
انت من الممكن انك تمنع اللاعب انه ياكل شي معين وتمنعه من السهر وتفرض عليه اوقات معينه للحضور للتمارين .. وهذا الشي راح يكون في النادي فقط .. لكن لما يطلع اللاعب برا النادي فـ اللاعب يكون مسؤول عن جميع الاشياء اللي يسويها .. وهنا تصير الاخطاء الكبيره من اللاعب .. لانه متعود على انه يسوي هالاشياء من يوم هو صغير .. من عزايم ومن سهر مع اصدقاه في الاستراحات ومن نوم وما الى ذلك ..
فـ لذلك هالشي انت ماتقدر تعالجه بـ مجرد انك تمنعه او ترفض عنه شي معين .. اللاعب بالنهايه هو اللي راح يكون مسؤول عن نفسه وهو اللي راح يطور نفسه بـ نفسه .. فـ لذلك لابد انك تاسس الاحترافيه صح عشان يطبقها هو بالشكل الصحيح .. وهذا اللي من المفترض من الاتحاد السعودي انه يسويه للاعبين الصغار والناشئين عشان يكونون لاعبين محترفين بمعنى الكلمه .. وهالشي زي ماقلت سابقا نتايجه ماراح تطلع الا بعد 15 سنه او اكثر ..
المشكله الحاليه ان اللاعب يسوي اخطاء في النادي + خارج النادي .. وهذا اللي يسبب مشاكل كبيره للاعبين من مشاكل باللياقه ومشاكل بالاصابات الخطيره وما الى ذلك .. واحنا نشوف العدد الهائل من اصابات الرباط الصليبي اللي عندنا .. كل هذي الاصابات من ضمن اسبابها عدم التقيد بالاحترافيه اللازمه ..
وبخصوص بوسيرو .. احنا قلنا هالكلام مسبقا وذكرنا انه من المفترض ان طردته تكون من زمان وماتكون بالوقت الحالي .. اذا انت يالاتحاد السعودي عارف ان المدرب مطلعك من تصفيات كاس العالم وعارف انه ماحصل على بطولة كاس الخليج .. ليش تخليه .؟ .. خصوصا ان عندك وقت كافي لايجاد مدرب بمستوى ممتاز ووقت كافي لـ فهم اللاعبين لـ التكتيك المطلوب للمدرب ومعرفة اللاعبين السعوديين بشكل كافي والتفاهم بين اللاعبين وما الى ذلك ..
ولو انت مخطط انك تبقي المدرب للبطوله الاسيويه فـ هذا خطا اخر يحصل منك .. لان من المفترض ان المدرب مايطلع بنص بطوله .. خصوصا انك انت مخليه ومسوي معه معسكرات وما الى ذلك عشان يتفاهمون اللاعبين ويسوون جميع الاشياء اللي يطلبها المدرب .. فـ طردة المدرب في هذا الوقت الحساس خاطئه جدا .. هذي من ناحيه طردة المدرب ..
لو جيناها من ناحيه المدرب القادم .. اللي راح يستلم التدريب حاليا هو ناصر الجوهر اللي هو مستشار بالاتحاد السعودي واللي ملم بجوانب الدوري السعودي وبجوانب اللاعبين .. فـ هذي نقطه ايجابيه تحسب للاتحاد السعودي ..
انا من ناحيتي اشوف ان طردة المدرب خاطئه وبنفس الوقت ايجاد مدرب كبير مثل ناصر الجوهر في هذا الوقت الحساس نقطه ايجابيه .. لكن نتايجها الايجابيه هي الاهم .. وان شاء الله نتايجها تكون ايجابيه ..
