التجنيس و الى متى سوف يستمر؟!!

[Lone Wolf]

السلام عليكم

والله شي يضايق وحاب اتناقش معاكم في الموضوع

على كلام اخونا زينو:

إذا بيجيب نتائج أتمنى ما ينتهي.😎:

وليش عيال الديرة مايشتغلون صح ويتعبون على روحهم

شوفهم المجنسين في الأولمبيات فيهم الي يسوي وفيهم الي مايسوي شي

ليش ما يحطون جهد اكثر ترى مافي فرق بين المواطنين و الأفريقيين

يمكن الأفريقيين مايتعبون ما شاء الله لكن اذا اشتغلوا على روحهم

عيال الديرة والله يسوونها، وانا مادري شلون ترضى واحد مب قطري

او بحريني يمثل ديرتك، شوف الكويت قبل من زمااااااان كانوا كله يجنسون

الحين شوفهم صج في كرة القدم مايطلع منهم شي البحرين دائما تغلبهم لول

لكن شوفهم يشتغلون على لاعبينهم وهذا شي زين والله لكن احنى و انتوا الله يفكنا من هالتجنيس.

 

[NiGhTMaRe]

انا مع وضد التجنيس...
يعني لو لاعب من اصول افريقيه او من اي بلد ولكن <<"حط تحتها خطين" ولكن انولد ف الديره واهله عاشوا فيها هنا مو مشكله يتجنس .. أما تجيبلي من نص افريقيا واحد هوقا بوقا لا يعرف شي عن الديره ولا يتكلم اللغه ولاشي
وتقوله تعال بعطيك الجنسيه وألعب مع المنتخب هذي قمة المهزله ...

الدول الاجنبيه تجنس صحيح لكن شوف المتجنسين شو هم بالاصل ,, هم عايشين ومولودين فيها ودرسوا فيها..
يعني لعيبة منتخب فرنسا لكرة القدم كلهم ( اللي من اصول افريقيه) مولودين وعايشين في فرنسا..
هني الفرق ..

انا ضحكني العداء القطري صامويل فرانسيس مادري شسمه والله شي يضحك ويبكي فنفس الوقت..

الزبده = أنا مع تجنيس الموهبه التي تقطن الدوله وولدت وعاشت وأكلت من خيراتها ,
ولست مع التجنيس المزيف لشخص لا يمد الدوله بـ صله (لا لغه ولا ثقافه ولا تقاليد او في الاحيان دين!)..

وعلى طاري المواطنين .. للأسف مافي تشجيع والاتحادات الرياضيه ليست بتلك المستوى .. انا اتمنى انا نشوف تركيز في جميع الرياضات الأولومبيه خصوصا الفرديه والله نقدر نحقق الذهبيه لو كثفنا الجهود بس شو نسوي ماشي اهتمام.. الأمل في أولمبياد 2020 في الدوحه ان شاءالله هنا العرب بيتحركون وبيشدون اكثر..

 

[persona]

اعطيك مثال بسيط

اطلع بالشارع تمشى\سو هروله عشان تخفف وزنك او عشان لياقة..
شوف الناس شبتقول عنك

يااما:..
خبل..
مجنون..
مشرد..
مضحكة..
فيه وش..

الاحباط رقم 1..

قلنا تعدينا هالمرحلة وماهمك كلام الناس

المحيطين حولك بيقولون انك تضييع وقتك على رياضة مامنها فايدة
اترك عنك هالرياضة.. واشتغل\كمل دراستك
واذا كنت تشتغل بتلقى مايعطونه تفرغ يتارس رياضتك عشان لعانه بس..
واذا كانت تدرس بتروح عليك مواده اللي يدرسها وتسقط (سمير سعيد حارس منتخب الكويت ايام التسعينات قبل قعد 8 سنين بسبب هالسالفه)..

ترى لاعب الكره يكون مسنود(اذا انصاب رئيس النادي يتكفل فيه على حسابه الخاص اذا كان يحبه) ، بس الالعاب الاخرى مافيها اهتمام وكلها أجتهادات شخصية من أصحابها (الرماية)

فتبي مثلاً البعثه في الاولمبياد 3 او 4؟ اثنين رماية واثنين فروسية مثلاً ..وهالاربعه داشين على حسابهم الخاص؟ ؟؟
تدري انه بأولمبياد سابقة ماكان هناك تمثيل لبعض الدول العربيه\الخليجية؟

وهذا الاحباط رقم 2


ولو قلنا الرجال واصل الاولمبياد وخسر
الناس تتكلم عنه انه ضيع وقته على الفاضي وماجابلنا شي..

وهذا الاحباط رقم 3

يرد المسكين من الاولمبياد وهو مستلم كلام من جميع الاطراف ومايكون له هناك أمل بدافع أنه يكمل مشواره

وهني يقرر الاعتزال وبجذي تنتهي دورة مسيرة لاعب رياضي خليجي :laugh::

فالحل انك ..

تجنس جم واحد ويمكن يطلع واحد فيهم ميدالية ذهبيه او برونزيه بالغلط..
الفرق بين المجنس والمواطن ..المجنس مستذبح على الرفاهية فتلقاه يقدم كل جهده عشان يبرز و"يرفهونه زياده"..
فالمجنس ماهمه كلام الناس حتى لو قبيلة لحوم البشر اللي هو منها طلبت راسه عشان غير مكان سكنه بينكر انه يعرفهم ..

لو كانت فيه مسابقة بالاولمبياد في الاغاني و الشعر والفلسفه الزايدة ..جان احنى احتكرنها من زمان :laugh::

شوف الكويت قبل من زمااااااان كانوا كله يجنسون

لول الخليج كان كله يجنس قبل.. لانه ماكانت فيه ثبوتات..
بس مو تجنيس عشوائي ..اللي عايش بالكويت يستحق يقدم على الجنسيه وقتها ..بشرط انه هل هو يدل جبله؟ شرق؟ المطبه؟ يعرف حكام الكويت؟ اسواق الكويت؟
صعبه الكويت تجنس الحين لو حتى يخيس 30 سنة ..لأمور سياسيه والسياسه ممنوعة بترو قمنج

 

[Solid Snake]

^ بيرسونا اعتقد انك تبالغ بزيادة .. او انك تتكلم عن واقع الكويت وهذا شي ما عندي علم فيه بصراحة ..


السعودية واهلها كانوا يمتلكون نفس النظرة سابقا .. لكن اعتقد ان النظرة هذي انقرضت منذ مبطي .. الحين مئات، او يمكن الآلاف يمارسون الرياضة في الشوارع والاندية وكل مكان .. ابتداء من كرة القدم والهرولة والمشي الى باقي انواع الرياضات .. لكن تظل مجتمعات العرب بشكل عام والخليج بشكل خاص تعتمد على كرة القدم بشكل مرعب وتخصص ميزانيات بالملايين والمليارات لها، وباقي الرياضات سيفون أليم (الحمد لله هذا الشي بدأ يقل شوي في الفترة هذي، عقبال ما نشوف انفسنا بارزين في عدة رياضات في المستقبل)


على فكرة، اعتقد الموضوع يصنف سياسي ..

 

[G7Ga7]

^ بالضبط ..
لكن الموضوع أقرب من كونه رياضي أتوقع :/

 

[Lone Wolf]

ماقصد السياسية انا اعتقد في بداية الموضوع اتكلم عن الرياضة 🙂

وانا ابي اعرف اراء الشباب عن التجنيس الرياضي و تمثيل المجنسين دولنا🙂.

 

[JOKER MASK]

الموضوع رياضي بس انتم الي شطحتو خارج اطار الرياضة

 

[Bounty]

^ بيرسونا اعتقد انك تبالغ بزيادة .. او انك تتكلم عن واقع الكويت وهذا شي ما عندي علم فيه بصراحة ..


السعودية واهلها كانوا يمتلكون نفس النظرة سابقا .. لكن اعتقد ان النظرة هذي انقرضت منذ مبطي .. الحين مئات، او يمكن الآلاف يمارسون الرياضة في الشوارع والاندية وكل مكان .. ابتداء من كرة القدم والهرولة والمشي الى باقي انواع الرياضات .. لكن تظل مجتمعات العرب بشكل عام والخليج بشكل خاص تعتمد على كرة القدم بشكل مرعب وتخصص ميزانيات بالملايين والمليارات لها، وباقي الرياضات سيفون أليم (الحمد لله هذا الشي بدأ يقل شوي في الفترة هذي، عقبال ما نشوف انفسنا بارزين في عدة رياضات في المستقبل)


على فكرة، اعتقد الموضوع يصنف سياسي ..

لول ترى حتى الكويت فيها ناس يسوون رياضه ..إلخ

بس مادري شنو يقصد بيرسونا ..

 

[persona]

شبالغ فيه؟هالشي عايشته تقريبا نص مراهقتى؟؟
عايشته في النادي زمان وانا صغير
دشيت العاب قوى ركض من عمرى 11 سنه ، وانتهيت كلاعب بكرة اليد تحت ال16 سنه ونصيحة الوالدة خلتني اترك النادي عشان اركز على الدراسة اكثر ..
اقنعوني انه لاعب العاب القوى ماله مستقبل وماله دعم عكس الالعاب الجماعية ..

ماكنت اتكلم عن الممشى في الكويت أو الحدائق..في ناس تمارس رياضات جماعية.. كرة طائرة\قدم\سلة و..ملعب الصابون <.<..وهالاشياء ماتشوف فيها جديه..كلها للوناسة وتغيير الجو..

عندك.. التكواندو ..واحد اعرفه حاشته أصابه رباط صليبي وهو عنده حزام اسود وينافس على بطولات خليجيه ويجي منه انه ينافس اقليمي ..شسوى النادى عالجوه على حسابهم؟ على حساب هيئة الشباب والرياضة؟ سألوه تقدر تلعب قالهم لا الا اذا عالجت اصابتي قالوله اسفين مانقدر نعالجك ياتعالج نفسك بحسابك الخاص أو اقعد ببيتكم؟؟!؟!؟!؟
شفت التشجيع شلون..وهذا وهو ولد النادي شلون لو واحد عادى قعد عندهم بو جم شهر وطلع؟..

اذا جيت تتكلم عن رياضة فردية مثل المشي او الهرولة أو حتى نقدر نقول قيادة الدراجات الهوائية (قاري)..
.يعني ..مثلاً..
قبل اسبوع شفت عجوز امريكي يهرول بلبس رياضة وشورت على حرنا هذا؟ الساعه 11 الظهر..
يمكن بتقول عادي ، بس اول ماتشوفه بتستغرب مثل مااستغربت ..
لانه هالمنظر غريب هذا واحنى متقلبينه فكيف لو على غيرنا؟ ..
هو.. أجنبي ومتوقعين منه يسوي هالشيء بديرته ، كيف لو واحد مننا يسوي جذي؟..
شبيقولون الناس عنه؟شوف الناس عندنا شراح تنظر لهالشخص؟

مجتمعنا تفكيره تعبان ،العيب مو بالشخص لكن اكيد بيتأثر اذا مالقى الدعم\الحافز..

هذا هو الواقع ..الرياضيين عايشين بأحباط من كل الجهات ..(عن الرياضة الفردية اتكلم)..
ماالومهم بعض الدول اذا جنسوا ..على الاقل مشاركة واثبات وجود احسن من لا شيء.

 

[53]

بيرسونا بصراحه قاعد يقول الواقع 100%.
هذا حال الرياضيين عندنا, بس ما تقدر تحط اللوم على احد, اغلب الرياضيين بالعالم (اذا ما كان الكل!) يلعب ويمارس هوايته عشان الفلوس بالدرجه الأولى وبعد ما يشتهر يكمل عشان الجمهور وغيره.
عندنا بالكويت, الواحد ما يحتاج يلعب الوضع المعيشي عموما بالخليج جيد جداً(مو ميزه انه ما يحتاج, للأسف اشوفها نقطه سلبيه ويبيلها حل جذري), غير سالفة الناس ونظرتهم الي انذكرت, فبرايي المتواضع هذا سبب كبير وأساسي للتجنيس. طبعاً فيه امور ثانيه كثيره تحصل.
والله اعلم. لول!

 

[G7Ga7]

معليش بيرسونا .. نظرتك "شخصية" جدا .. ولا يمكن تعممها بالشكل هذا !!

كثير ناس اعرفهم يمارسون رياضاتهم كـ هوايات , وكل الي حولهم يشجعهم ..

 

[Lone Wolf]

بس ترى كلام بيرسونا صحيح انا شفت متين يمشي فالشارع

كنا انا و الشباب نسوي رياضة بعد والله واحد حقير مر بالسيارة

تدرون شقال حق المتين قاله: "من صجك انت ولا تتغشمر ترى مامنك فايدة"

صحيح انه الكلام مو موجه لي لكن انا تضايقت عيل الرجال المتين شنو حس؟

الشعب لازم يتطور شوي 🙂.

 

[G7Ga7]

^ حادثة وحدة بس ...
حتى ما تعتبر !

 

[Lone Wolf]

لا والله يا عبدالرحمن شفت كثييير كذا

مب بس هالحادثة مين الفنان الي بيحكم على حادثة وحدة

لا من جد هالشي لا يطاق أو يمكن فالمكان الي انت فيه

مافي ناس زي كذا لكن والله يبو داحم شفت الكثير من كذا

ولا على ايام النادي يالله كانوا يجيبوا الإحباط او يقطوا تلميحات!

 

[persona]

معليش بيرسونا .. نظرتك "شخصية" جدا .. ولا يمكن تعممها بالشكل هذا !!

كثير ناس اعرفهم يمارسون رياضاتهم كـ هوايات , وكل الي حولهم يشجعهم ..

كل اللي حولهم؟ ..قليل اللي يشجعهم وتلقى التشجيع\الدعم من العايله او من أجتهاده الشخصي..
وكمثال .. الشيخ الاماراتي اللي خذى ذهبيه بالرماية في اثنينا 2004 ..
ولو كل اللي حولهم يشجعهم جان شفنا الدوله فيها مرافق لكل الرياضات على مستوى جيد وشفنا نظره المجتمع لهم غير ..

لنتكلم على مستوى الهواه ..
الرياضات الفردية اذا تعمق فيها الفرد بيقولون عنه هذي مضيعه وقت على الفاضي..
وحتى على مستوى الرياضات الجماعية اذا انصاب اللاعب ..ابد مايعرفونك..
زين..عمرك سمعت عن اولمبياد خليجيه؟حتى لو كانت على مستوى الهواة؟
أو عمرك سمعت عن دراجيين خليجيين؟الجمباز؟ القفز بالزانه؟..لاعب مارثون خليجي؟
تسأئلت ليش هالرياضات عندنا معدومه..
مع انه مثلاً القفز بالزانه.. رياضة مايحتاج لها الا شغلتين ..
المرونة والثبات الجسماني..
ماانكر انه فيه لاوعيب في الخليج عندهم طموح وعندهم امكانيات
لكن المحيط اللي حولهم يقتل طموحهم بدرجة كبيرة..

مثلاً ..تفكير المجتمع غلط وسطحي..مثلاً يجي واحد يقولك كل شي متوفر لك؟مادياً ومعيشياً؟ ليش تروح تضيع وقتك على شي ماامنه فايده ولا راح تربح منه شي؟ يعني بتمثل دولتك؟ الدولة ماراح تدري عنك اصلاً..

المثال اللي حطه سولد سنيك بدون شخطه.. هو مثال يتكرر عندنا..بس بتفاوت مستوى النظره..واحد يكون جرىء ، الثاني بس يطالعلك نظره..وجذي..

 

[Super Mario]

مجتمعنا تفكيره تعبان ،العيب مو بالشخص لكن اكيد بيتأثر اذا مالقى الدعم\الحافز..

مثلاً ..تفكير المجتمع غلط وسطحي..مثلاً يجي واحد يقولك كل شي متوفر لك؟مادياً ومعيشياً؟ ليش تروح تضيع وقتك على شي ماامنه فايده ولا راح تربح منه شي؟ يعني بتمثل دولتك؟ الدولة ماراح تدري عنك اصلاً..

في تناقض كبير اخوي بين كلامك

وأنا مع الاقتباس الثاني قلبا وقالبا , والتفكير هذا مو غلط
شنو الأفضل اني استقر في حياتي بين اسرتي و وظيفتي ولا أروح ألعب في كأس الخليج وتروح علي وظيفتي أو يخصمون من راتبي
من تجيك اصابة ما دروا عنك تحس انك مثل السلعة إذا تعطلت رموها
الرياضة في الأندية عندنا = مضيعه للوقت
انا من مؤيدي ممارسة الرياضة خارج أسوار النادي

وبصراحة أنا أول مرة أسمع ان اللي يسوي رياضة المشي أو الجري مثلا يتطنزون عليه ! وبالكويت بعد !

بس مرة استغربت من كلمت شخص شافني ألعب تنس وقالي : أول مرة أشوف مطوع يلعب تنس والله ما خلوا شي المطاوعة
بس هذا الشخص يمثل نفسه , ما أروح وأعمم على الناس ان تفكيرهم غلط عندنا

 

[Futrus]

التجنيس الرياضي فضيحه ويقتل حماس المواطنين لما يشوفون اي نشاط رياضي لبلدهم ، من جد فضيحه رئيس البعثه الالمبيه البحرينيه في بكين يفتخر قدام الصحافه انه البحرين دورت في افريقيا عن موهوبين مغمورين وجنستهم ودربتهم وخلت رياضيين على مستوى عالي ، انزين ليش بدال ما يتعبون نفسهم خلهم قاعدين في البحرين يدورون شباب مغمورين موهوبين ويا كثرهم وبدال صرف فلوس على تدريب ناس من برا البلد وتجنيسهم يدربون ابناء هالبلد ويخلونهم رياضيين على مستوى عالي.

لما جنسوا لاعبين لمنتخب كرة القدم صار عزوف للجماهير وما تتابع المنتخب نفس قبل ،واعتزالات وانسحاب للاعبين ومع هذا مافي فايده ، اللاعبين اللي راحوا الالمبيات مافيهم بحريني مو مجنس إلا اثنين من بينهم رقية الغسره وتسعه مجنسين ، الواحد يقولها بحسره.

 

[s3rorh]

:w00t: بو خالد ...أنت مطوع ؟؟؟؟
<< ركض لموضوع صور ايفنت الكويت
P:

 

[Super Mario]

بو خالد ...أنت مطوع ؟؟؟؟
<< ركض لموضوع صور ايفنت الكويت
P:

..........:what:
ما أدري شتقصد من السؤال؟

 

[Lone Wolf]

والله انا غسلت يدي من هالسالفة وان شاء الله رقية الغسرة

تفوز اليوم في السباق حتى لو طلعت الثالث او الثاني بس عشان

اثبت لكم انه عيال ديرتنا منهم فايدة، لكن حتى اوروبا فيهم مجنسين

يعني وانا اطالع كورة طائرة نساء قبل شوي اشوف منتخب ايطاليا

معاهم وحدة سمرة الا يقولي ابوي شفت حتى اوروبا يجنسون وانت

معارض على تجنيس البحرين وقطر لكن محد راضي يفهم شقصد انا .

 

[Xeno]

ياليت نستغل ربع الوقت اللي نتفلسف فيه في المواضيع في دراسة الأسباب والفوائد والمضار, احنا دائما لنا رأي فكل شي :/ في مجالات بأمانة ما يقبل الواحد يسمع أي رأي فيها لمجرد إبداء الرأي لا أكثر... ومنها التجنيس الرياضي أو السياسي أو الفني (لول) الخ.

غالب الآراء فهذا الموضوع تكون مزاجية لا أكثر ولا أقل.

مثل بعض ربعي اللي أتابع معهم الأولمبياد, سبحان الله فيوم وليلة كلهم صاروا خبراء جمباز وغطس ورماية الخ. :laugh::

 

[JOKER MASK]

ياليت نستغل ربع الوقت اللي نتفلسف فيه في المواضيع في دراسة الأسباب والفوائد والمضار, احنا دائما لنا رأي فكل شي :/ في مجالات بأمانة ما يقبل الواحد يسمع أي رأي فيها لمجرد إبداء الرأي لا أكثر... ومنها التجنيس الرياضي أو السياسي أو الفني (لول) الخ.

غالب الآراء فهذا الموضوع تكون مزاجية لا أكثر ولا أقل.

مثل بعض ربعي اللي أتابع معهم الأولمبياد, سبحان الله فيوم وليلة كلهم صاروا خبراء جمباز وغطس ورماية الخ. :laugh::

ههههههههههههههههههههههههههههه

بس على فكره التجنيس له مضار على المدى البعيد زي ماله نوافع في المدى القصير 🙂

 

[inthe_grave]

Xeno

مع احتراامي لك ولأهل قطر جميعاا

ماأدري كيف ترضون ان لااعب اجنبي لاحتى يعرف عربي يمثل دولتكم ...!!

ليه عشاان ايش ؟ عشاان ميدالية ولا كأس ولا ألخ .......
ليه ماتنتجون انتوا بنفسكم رياضيين ؟
ولا اجيب لاعب اجنبي مايعرف يتكلم عربي حتى يمكن مو مسلــم ...!!!
يمثل دولتي الصراحة مأدري كيف



يعني تخيل منتخب كامل مجنس بجميع انواع الاشكال كيف تسموه منتخب قطر ماأدري
شوف التجنيس مانعينه مانعينه الاتحااد الدولي
لأن اذا مامنعوه راح تصير مصخرة بتصير المنتخباات ( اندية )
وكل منتخب بيدفع عشان يجيب خدمات الاعب الفلاااني (( يتعااقد معه لووول ))

زي ماقلت لك مع احتراامي لك ولأهل قطر
ويليت محد يزعل من كلااامي

ليه انت من مناصري التجنيس
المفروض القطريين كلهم يتجمعون ويسوون مظااهراات ....!!
(( لانريد اجانب لا نريد اجانب قطر للفوز قطر للفوز ))

مو تقولون مافي مشكلة اهم شيء نجيب انجازات حتى لو اللاعبين مو قطريين

 

[Xeno]

أنا ماكان ودي أشارك برأيي لأن السالفة قديمة و "مملة", وناقشتها كثير, ومثل ماقلت لك يفتي فيها اللي يفهم واللي مايفهم... لكن احتراما لك برد عليك باختصار وبردود مباشرة على أسئلتك بدون فلسفة. (رغم أن ردك سطحي جدا للأمانة, يعني كلام منتديات)

ماأدري كيف ترضون ان لااعب اجنبي لاحتى يعرف عربي يمثل دولتكم ...!!

يعني مشكلتك فقط اللغة العربية؟ مش مشكلة نعلمهم... (كثير منهم تعلموا)

ليه عشاان ايش ؟ عشاان ميدالية ولا كأس ولا ألخ .......

يس بالضبط عشان يساعدونا فتحقيق إنجازات تصعب على دولة مثل قطر بتعدادها السكاني البسيط. (مليون ونص 80% منهم أجانب)

ليه ماتنتجون انتوا بنفسكم رياضيين ؟

قطر رغم امكانياتها المحدودة أنتجت رياضيين وأبرزهم البطل الأولمبي ابراهيم سليمان. (برونزية برشلونة 1500 متر 1992)
أيضا قطر مهتمة بالرياضة بشكل كبير وتحاول تنتج رياضيين بشتى الطرق منها إنشاء أكاديميات رياضية متخصصة مثل أكاديمية أسباير حديثة العهد.

ولا اجيب لاعب اجنبي مايعرف يتكلم عربي حتى يمكن مو مسلــم ...!!!
يمثل دولتي الصراحة مأدري كيف

بتحقيق الشروط الدولية المطلوبة, سواء للفيفا أو أي اتحاد رياضي آخر.

شوف التجنيس مانعينه مانعينه الاتحااد الدولي
لأن اذا مامنعوه راح تصير مصخرة بتصير المنتخباات ( اندية )
وكل منتخب بيدفع عشان يجيب خدمات الاعب الفلاااني (( يتعااقد معه لووول ))

إذا قصدك الفيفا, فهم اشترطوا إقامة اللاعب في البلد المعني 5 سنوات لتجنيسه. (فآخر اجتماع كونجرس)

ليه انت من مناصري التجنيس
المفروض القطريين كلهم يتجمعون ويسوون مظااهراات ....!!
(( لانريد اجانب لا نريد اجانب قطر للفوز قطر للفوز ))

:laugh::

أخ inthe_grave ياليت ردك القادم يكون دال على أنك أكثر اطلاعا حتى ماحس أني قاعد أضيع وقتي. :happy:

 

[Tomb raider]

انا امارس رياضة المشي او الجري في فريجنا... هالفتره متكاسل بشكل مرعب .

 

[KOTSHY]

الزبده = أنا مع تجنيس الموهبه التي تقطن الدوله وولدت وعاشت وأكلت من خيراتها ,
ولست مع التجنيس المزيف لشخص لا يمد الدوله بـ صله (لا لغه ولا ثقافه ولا تقاليد او في الاحيان دين!)..

انا معك
لانه والله يا شباب مهي شطارة يجيبوا لكم فريق كامل من البرازيل ويجنس عشان يرفع علم البلد هنكون اضحوكة بين العالم

فيه مشكلة قريبة حصلت بين دولتين عربية بكرة القدم والسبب ان دولة جنست لاعب برازيلي وبدع بهذيك المباراة وتشوف الفريق الثاني يشتكي للفيفا ومشاكل لا اول ولا آخر

 

[inthe_grave]

--------------------------------------------------------------------------------

أنا ماكان ودي أشارك برأيي لأن السالفة قديمة و "مملة", وناقشتها كثير, ومثل ماقلت لك يفتي فيها اللي يفهم واللي مايفهم... لكن احتراما لك برد عليك باختصار وبردود مباشرة على أسئلتك بدون فلسفة. (رغم أن ردك سطحي جدا للأمانة, يعني كلام منتديات)

معليش
مافهمت كلام منتديات ( يعني ؟ )

________________________________

السالفة لو نقعد نتكلم فيهاا الى بكرة ماراح نخلص لأنهاا معقدة

لكــــن
اغلب الناس هذاا رأيهم ( لااعب اجنبي يمثل دولتي ياللعار ..!! )
وين الوطنيـة ؟ ولا مافي وطنيـة ؟ مع احتراامي
أبقى بدون انجازات ولا اجيب لاعب احنبي يحقق لي انجاازااتي !!


شكراا لك ....

اتمنى ان ردي ماايكون زعلك

 

[Xeno]

مافهمت كلام منتديات ( يعني ؟ )

يعني أخ inthe_grave كلام مايودي ولا يجيب, وتجد صعوبة في الرد عليه لبعده عن أسلوب الحوار المنطقي.

السالفة لو نقعد نتكلم فيهاا الى بكرة ماراح نخلص لأنهاا معقدة

ياليت نسمع كلام معقد فعلا بدلا من الكلام المتداول في المقاهي والمأخوذ خيره مثل:

اغلب الناس هذاا رأيهم ( لااعب اجنبي يمثل دولتي ياللعار ..!! )

وأغلب الناس مش مسلمين...

 

[Lone Wolf]

ياخي انا ابي اعرف شلون ترضون واحد مب مسلم يمثل ديرتكم

هذا بس الي مب داخل مخي، جد والله على الأقل يكون مسلم

هذا اذا بيجنسون ولو انه ماله داعي لكن كل الناس و ارائها

وانا ماشوف له لزم يعني، الحين بيجيني واحد وبيشقح لي

بيقولي لو ماجنستوا رشيد رمزي كان ماجبتوا ذهبية و اذا جا واحد وقالي هالكلام

ان شاء الله باجر العدائة البحرينية تثبت انه غلط لو واحد قال كذا لكن ماعرف شاقول

كل واحد وكيفه كل الي ابي اوصله شلون ترضون واحد غير مسلم مجنس يمثل ديرتكم

و السلام عليكم🙂.

 

[inthe_grave]

المشكلة انك زعلاان وقاعد ترد وبس ....

يعني أخ inthe_grave كلام مايودي ولا يجيب, وتجد صعوبة في الرد عليه لبعده عن أسلوب الحوار المنطقي

شكراا .... كلامي مايودي ولايجيب ماتقصر والله

ياليت نسمع كلام معقد فعلا بدلا من الكلام المتداول في المقاهي والمأخوذ خيره مثل:

تبي سالفة معقدة ابشر

مشكلة التجنيس تنقسم الى قسمين

1-الاعب نفسه :يبيع شرفه وكرامته لبلد آخر بس عشاان الفلوس
2-الاتحاد القطري: يبيع وطنه وبلاده لشخص اخر عشان الانجازات ..

الاعب نفسه ممكن يكون مولود في قطر وعايش لفترة طويلة
يعرف عربي مسلم فهناا التجنيس عادي جداا لأنه في الاساس هو الي متجنس من نفسه .....

الاعب نفسه ممكن يكون مولود في قطر وعايش لفتره طويلة لكن منحرف كاافر
مايبي يتجنس لكن يجي الاتحاد القطري يقوله تعاال بنعطيك $$$$ هناا خطأ

الاعب نفسه ممكن يكون من برى خارج دولة قطر مش مولود فيهاا
لكن يعرف عربي ومسلم مثلااا مصري ....
ماعتقد ان في عربي راح يبيع نفسه لبلد غير بلده ....
الى القليل

الاعب نفسه يكون من برى خارج قطر لكن لا يعرف عربي ولاهو مسلم ولايدري وين الله قااطه فيه
اهم مااعنده الفلوس يلاا ياالتحاد القطري اصرفوا علي وانا احاول احااول احقق لكم انجازات ....!
وهذا الي نشوفه مع قطر ........

يعني تخيل يصير هذا الشيء

بطل كأس آسيا لأول مرة المنتخب العربي القطري ...
المكون من ..... - .....-.....-......
يكون انتوا مااحققتوا انجازكم بنفسكم لكن الاجانب الي تدفعون لهم هم الي حققوا لكم انجازكم

صدقني اقدر اكمل الصفحة كلهااا ..... الساالفة معقدة وراح تضيع وقتي على الفااضي

للمرة الثالثة اتمنى انك ماااتزعل ..... لان واضح انك زعلان...
هذا نقاش ولازم يكون في احتكاك بسيط بين الطرفين لكن مايؤدي الى انك تزعل وترد علي وتقولي
ردك غير منطقي و مايودي ولايجيب


اكبر دليل على انك زعلان وقاعد تكتب وترد وبس :

شوف

ردي

اغلب الناس هذاا رأيهم ( لااعب اجنبي يمثل دولتي ياللعار ..!! )

انا على محور الحديث في التجنيس لكن انت ...

ردك

وأغلب الناس مش مسلمين....

لاا والله ؟ توني ادري ...