"الإمارات تحارب ألعاب Xbox360 المقرصنة بمصادرة 29 ألف قرص"

[Al Pacino]

اذكر قبل 3 شهور او اربعه رحت لمحل وكنت احتاجة مره والشريط الي ابيه عنده بس والقاه مسكر .. واروح للمحلات الي بعده وكلها مسكره !! ياولد حنا بعز العصر سلامات ! .. وارجع مره ثانيه للمحل واشوف الهندي موقف عن الباب قلت اكيد الحين بيفتح واجي عنده واقوله يله افتح .. قالي لا جت البلدية واخذت كل اشرطة الاكس الكوبي الي عندي وسكرت المحل لمده يوم كامل ! قلت طيب بس افتح المحل هات الشريط الي ابيه وسلاام .. قالي لا ماقدر ومدري ايش ! بنفس الفترة فيه كم محل صارو يزبنون العاب الاكس الكوبي بينما العاب الـps2 مرزوزه بالوجه ! وفيه محلات معروفة بالقرصنة ( حتى من اسمها ) قلبت محلات اصلي فقط ! فـ هذي واضح انها خطوة من مايكروسفت ومو من الامانه ولا مكافحة الكوبي بشكل عام !

 

[Zoda]

إذا الشيء مو متوفر "رسميا" ولا هو مسجل في منقطتك وبأي شكل كان فما تقدر تعتبرها قرصنة في الحالات الطبيعية، لأنه في كلتا الحالتين الشركة المنتجة\المقدمة للخدمة ما بتقدر تستفيد منك شيء سواء قرصنت (طبعا ما بتستفيد) أو ما قرصنت (لأن المنتج ما وفرته الشركة لك علشان تشتريه)، وما يصير من حقها تقاضيك إلا لو وفرت منتجتها في منطقتك ووضعت شروط أو حتى وضعت شروط من دون ما تقدمه (وهذه حالة استثنائية ومو طبيعية).

بتقول لي نفس الشيء اللي يسرق شيء (سيارة مثلا) لأنه ما يقدر يشتريه؟ لا طبعا، لأن السرقة هنا غير عينية وما لها أثر مباشر.

أنا مو جاي هنا أدافع عن القرصنة طبعا، بس القرصنة (وإن كانت غلط في كل الأحوال) لها حالاتها.

أما بالنسبة للموضوع، شيء جيد أن الإمارات قامت بحركة مثل هذه، يعني بصراحة في الإمارات الواحد ما له عذر يشتري كوبي، ألعاب جديدة ومتوفرة أول بأول وتنزل بأسعار مناسبة (لدرجة أنها توصل 170 أحيانا) والشعب الحمد لله عنده قدرة شرائية وكل شيء، وشخصيا ما أشوف الكوبي منتشر أو له أثر بين الجيمرز الإماراتيين اللي أعرفهم.

كلامك سليم الحين نينتندو عندها وكيل بالخليج اذا كان لا بقلب جهازي كوبي ( امزح)

 

[Rare Games]

الي يتكلمون عن الانمي والمسلسلات متوافر البعض منها بشكل رسمي

ون بيس وناروتو يعرض بشكل رسمي مدبلج على سبيس باور : /

ولوست يعرض مع توقيت مقارب لعرضه الرسمي في الشوتايم ومعاه كم مسلسل امريكي

وطبعا في مسلسلات على ديفيديات اصلية تنباع بالاسواق

 

[Jonas]

ون بيس وناروتو يعرض بشكل رسمي مدبلج على سبيس باور : /

مقطّع و متأخر

 

[Rare Games]

^^^^

لووول ترا هالمثال امزح فيه يكفي التحريف هههههه

 

[Super Shadow]

بصراحة شي حلو أنهم قاموا يتحركون أخيرا و بدوا بمنع الكوبي بس الحين خوفك أنهم يفتشون و يمنعون الألعاب الممنوعة دوليا مثل دارك سايدرز و ماس ايفكت و غيرها

 

[Zero]

كلامك سليم الحين نينتندو عندها وكيل بالخليج اذا كان لا بقلب جهازي كوبي ( امزح)

لول أنت ذكرتني بخبر قريته قبل فترة سوني قالت أن القرصنة هي اللي تأثر على مبيعات الـPSP لووول يعني البي إس بي نفسه يتقرصن ويتحمل تورنت؟

 

[FARES_]

انا الي يقهرني التفكير الخليجي بالنسبة للأكس
يعني تشوف ناس تشتري اصلي للبلاي 3 والأكس يقولك خله للكوبي..... سيريوسلي ؟ :sarcastic:
ياخي دامك تساند شركة ..ساند الثانية.. ولا الشركات الي تنزل العاب عال360 منظمات خيرية تتعب على العابها عشان تلعبونها بلاش !
ما أستبعد الأكس 720.. اذا صار بلوراي ماراح يمشي سوقه بالخليج لأنه بيحولون بشكل اعمى للبلاي 3 او 4 في وقتها... بسبب هذا المنطق الي مدري وش يبي " البلاي يستاهل العاب اصلية والأكس ما يستاهل العاب اصليه "

 

[AAH3:16]

لمن ينزلون ألعابهم بشكل رسمي لمنطقتنا وب subtitle عربي ساعتها أقول لا للقرصنة

بس ماينزلون لنا ألعاب ويبونا نشتريها أصلي وبسعر نصبة فهذا حيونه

 

[G7Ga7]

أنا متأكد انه الموضوع -زي الـ10 مواضيع الي قبله- راح تنقلب لناس يبرروا شراءهم للكوبي بأي طريقة. ما راح اناقش أحد لأني تعبت, وتعلمت انه ما فيه فائدة تقنع احد ان الي يسويه خطأ.
عموماً, أنا اشتري اصلي عشان أدعم الصناعة الي أحبها. حتى لو هذا يعني اني ما راح اشتري كل الالعاب الممتازة في السوق. حتى لو هذا يعني انه في اوقات, ما راح اقدر اشتري الا لعبة وحدة في الشهر. والحمد لله بدأنا نشوف استجابة الشركات للناس الي مثلي ومثل اعضاء تي جي. شفنا دعم قوي من سوني ومايكروسوفت لمنطقتنا.

بالنسبة للخبر, شيء ممتاز جداً. ولو انها للأمانة ما راح تسوي شيء, لكن على الاقل تبين ان الحكومة مهتمة.

 

[N2N2]

29 الف قليلة مقارنة با المصايب الي عندنا وخاصة اني سمعت ان فيه مصانع فاتحه هنا

اشوف الي ممشي سوق القرصنة الي عندنا الاسعار مبالغ فيها مقارنه بالعاب ال PS3 كاس العالم 2010 شاريه ب 170

ثاني شي ان اكثر اللعابين من اعمار صغيره ما يقدرون على تكاليف الالعاب خاصه انهم يلعبون واجد ويلعبون اي شي والاهل بعد يدورون الرخيص

اذا حلو هذي المشاكل وقتها يمكن تختفي القرصنه غير كذا الله يعينهم

 

[X-SRI-X]

جحجاح .. انا من زمان كنت من الناس الي يتعاملون مع الكوبي
لكن موقع تروجمنج غير نظرتي لهالشي والحمد لله
حاليا تعاملي مع الاصلي ( ما انكر اني اتعامل مع المستعمل بكثرة .. )
اتذكر مشروع قديم للتروجمنج للحد من القرصة احد يذكرني فيه بس

 

[Mista Koo]

لا مو قرصنه , هي تنعرض بلاش في التلفزيون

ممكن الي يبيعها يعتبر شخص خارق للقانون لأنه ما له الحق يبيع شي مجاني.. مثلاً انا أحمل حلقات المصارعه اسبوعياً , عادي.. لأنه تنعرض على SyFy و US network و هذي القنوات مو عندي

مو عندك لا يعني إنه عذر، على كذا محد رح يشترك بقنواتهم وينزلونها. بعدين هم ما يبيعون DVDs و boxsets؟ طبعا لأنك إنت مقرصنه ما رح تروح تشتريهم لكن قانونيا هي الطريقة الوحيدة اللي تقدر تشوفها فيها.
أقل الشر إنك تشوفها مرة وحدة وتمسحها، ولا المفروض تشوفها بوقت عرضها الأصلي وبدون ما تعيد فيها أو تفوت الدعايات :sarcastic: (ولو إنه يظل غير قانوني 100%).

الشخصين اللي أعرفهم يحترمون حقوق النسخ في عيلتنا واحد ينزل المسلسلات ويشتريها لما تنزل البوكستس والثاني ما ينزلها حتى يستنى البوكستس عشان يتابعها! (لا وهو يتابع أنمي فبالتالي يستنى النسخة الإنجليزية كمان).

مقطّع و متأخر

إذا نبي نطلع أعذار ما رح نخلص، الأنمي أبيه بدبلجة يابانية مو إنجليزية، الألعاب يبيعونها غالية عندنا، الخ..

 

[AAH3:16]

وعلى فكرة ياشباب إذا أنتوا كنتم جالسين على بنك وتشترون ألعاب أصلي للي يسوى وللي مايسوى فغيركم تذكرو حسره عليهم 100

فإحمدوا ربكم أحسن وكل واحد ينام على الجنب اللي تريحه

 

[TIAMAT]

رد جحجاح + 1

الغلاف أحد الأسباب بالاضافة إلى الأتموسفير إلي أوصفه بالـ EPIC لحظة وضع لعبة في يدي وكنت منتظرها من فترة هو سبب شرائي لألعاب أصلية + السعر المرتفع يخليني أحافظ عليها أكثر و أشعر بسعادة يوم واحد يبي يتسلف مني لعبة 😀

 

[السليل الأخير]

^
ما اعتقد ان واحد فينا جالس على بنك أو فلوسه زايدة .. القضية قضية مبدأ و احترام لحقوق الآخرين
ياما غضيت الطرف عن ألعاب مهمة بسبب الفلوس و أنا متأكد ان فيه كثير مثلي .. الحل الأسهل مو دايما هو الحل الصح

 

[squall leonhart]

"الإمارات تحارب ألعاب Xbox360 المقرصنة بمصادرة 29 ألف قرص"

يا انه الكوبي مو مره منتشر في الامارات او انه اخوينا في وزارة التجاره يبغالون في اخبار مكافحة الكوبي .. اقل مداهمة اقرى عنها في الجرايد تطلع ب 50 الف شريط كوبي و الخبر ذا يتكرر بشكل شبه اسبوعي

 

[Id]

لول ما أدري هل هذا إنجاز يعتبر أمر كبير .. أخر مداهمة كبرى للبطحاء في الرياض أيام الـPS2 تم مصادرة فوق 300 ألف DVD منسوخ و أذكر ياما محلات عندنا تتصدر من عندهم بضائع لا تقل عن 1000 ولا 2000 لعبة .. الي صاير في الإمارات صاير في الخليج كله بس عندنا الإعلام طفش من كثر ما يسولف في هالسالفة

 

[Painkiller Q8]

المشكله لما تكون العاب مقرصنه على HDD مثل اخونا جهاز الــWii
لي الحين عايش صدمه لما شفت جهاز للبيع معاه HHD 500GB وفيه العاب والــWii لي ماريو جالكسي 2 -_- هذا وين تصادر الــdata الي عنده !!؟!؟!؟!؟!؟#$^%$^*@#$%؟

 

[AAH3:16]

ماأدري ياشباب لايكون عندكم أسهم في الشركات

علشان تحاتون الخسارة ترى الرزق على الله

الأمر أشوفه عادي عندك قدرة إشتر أصلي وبالأخص الألعاب اللي تحبها إذا ماعندك الله يعينك على الكوبي

 

[X-SRI-X]

لما تصير معك شركة وتخسر منها ... بوقتها تعال كلمنا :sarcastic:

 

[سِراج]

تعليقاً عن الانمي فالمسألة بسيطة، اذا كان الانمي مرخص من شركة مثل Funimation او Bandai او حتى Square Enix فقانونياً راح تعاقب إذا قرصنته، لكن بنفس الوقت يجب ان يشمل الترخيص منطقتك وهذي الشركات دائماً يستهدفوا شمال امريكا (كندا احياناً) وبريطانيا ويعملوا على دبلجتها وقتها معظم جروبات الترجمة (او الفانسبرز) تتوقف عن الترجمة.
فنحن (الشرق الأوسط وشمال أفريقيا) ما ينزل عندنا اي شيء بشكل رسمي من أحد شركات النشر المعروفة فمعناها ما في علينا اي عقوبات قانونية لكن أخلاقية؟ شيء أخر كلياً :laugh::

 

[AAH3:16]

لما تصير معك شركة وتخسر منها ... بوقتها تعال كلمنا :sarcastic:

طيب ممكن سؤال ألحين لو شركة تنزل لعبة لأروبا وأسيا وأمريكا وتتجاهل العالم العربي

فأضطر أنسخ لعبة هل أكون حرامي ؟؟؟؟ خلك عقلاني

ممكن لمن تنزل رسميا بسوقنا وتعترف بنا كلاعبين عرب لنا لغتنا (أطالب بsubtitle على الاقل)

فحزتها أقول لا وألف لا للكوبي

 

[MALDINI]

الالعاب الاصلية > المنسوخة
انتهى.

 

[Fatal Error]

يلا انبسط عمر جاك الي كنت تبغاه:laugh::

 

[Jonas]

طيب ممكن سؤال ألحين لو شركة تنزل لعبة لأروبا وأسيا وأمريكا وتتجاهل العالم العربي

فأضطر أنسخ لعبة هل أكون حرامي ؟؟؟؟ خلك عقلاني

ممكن لمن تنزل رسميا بسوقنا وتعترف بنا كلاعبين عرب لنا لغتنا (أطالب بsubtitle على الاقل)

فحزتها أقول لا وألف لا للكوبي

انت شكلك تحسب ان مافي احد يعرف ان الشرق الاوسط في جيمرز

هذي نسختي من Red Dead Redemption شوف وش مكتوب عليها , يعني تراهم يدرون عن اللاعبين و يدرون بعد ان سوقنا مليء بالقرصنه

 

[Hironobu Sakaguchi]

سبحان الله اليوم من الصباح راسي مدووش ابي اقلب كل سوفتوير مقرصن على البي سي الى فريوير واوبن سورس وابي احاول اقنع الي حولي بهذا المشروع
اﻻقيكم اليوم هنا تتكلمون عن الجيمز وغيرها :laugh::

بس الحمدلله اذا هذا توجهنا ان شاء الله تخف اقرصنة بشكل رهيب مع الوقت, مافي شي يمشي بسرعة

والله فعﻻ الواحد ينكسر مع التكلفة وكل شي , بس بالمنطق للناس الي تشتري العاب مقرصنة , طالما انها شي "مسروق" حرفيا, ليش ادفع فلوسي الي تعبت فيها على شي "مسروق" ؟
على كده حﻻلي "الفلوس" ضيعتها على حرام "مسروق وهذا شي ما يرضي اي واحد يتعب لليل نهار عشان يخزن فلوسه وبالنهاية يصرفها على شي مسروق 🙂
ومؤخرا حركات الديمو المجانية والمحﻻت الي تبيع العاب اصلية مستعملة حدود 100 ريال شي مرة طيب ويساعدك على انك تمتلك شي اصلي + تشتري شي فعﻻ جربته ومقتنع فيه من الديمو
وعلى هذا اﻻساس تﻻقي نفسك فعﻻ ما شريت اﻻ الشي الي فعﻻ تلعبه وتحتاجه, مو كل ما تكون طفشان تنزل تقلب بكاتالوج اﻻلعاب وتشتري ما يقارب 5 العاب على اﻻقل ب 100 ريال ...
الجيمر الحقيقي يعتبر كذلك بالنهاية بتمكنه باﻻلعاب الي يهتم فيها ويحترفها, وليس بكمية اﻻلعاب الي عنده بين ما خلصها وبايخة ومعلقة وما تناسب توجهه او دون مستواه

صحيح اغلب الناس تقول ما تقدر وووو, بس لما تحدد توجهها باﻻلعاب تقدر تكتفي بكم لعبة ولو مستعملة بسعر رخيص

بالنسبة لﻻنميات بصراحة انا اكتفي بالمشاهدة من ترجمة الفانساب, ﻻ افكر اشتريها "من محﻻتنا "وﻻ اتاجر بالي نزلته , يكفي الفانسبز تقول دايما هذا العمل مجاني ولما يتوزع بمنطقتك اشتري اﻻصلي

بالنسبة لﻻفﻻم والمسلسﻻت , ﻻ ابرئ نفسي وﻻ شي, بس فعﻻ انزلها زيها زي اﻻنمي , بس ينطبق عليها زي الالعاب ما عندي كل فلم ماخد رقم 1 وﻻ بالتوب 10, كلها مجموعة خفيفة على ذوقي <<< مو عذرلي ضد القرصنة
حتى فعﻻ جاتني مؤخرا فكرة اني اشوف واحذف , ما يحتاج انسخ على اقراص واخبيها للزمن ﻻنها اوﻻ واخيرا اكيد نادرا ما ارجع اشوفها , على اﻻقل هذا عذر كافي قبل ما اجيب العذر الحقيقي وهو القرصنة

 

[Al Pacino]

" بغض النظر عن مسألة التحليل والتحريم خلونا نتكلم عن الحقوق "


المشكله ( بمجال الالعاب ) الي يستخدم كوبي وهه يفكر يروح للأصلي ويشوف الوضع المأساوي لألعاب نزلت مؤخرا مثل ريد ديد ريدمشن توصل متأخر واحتمال تنمنع وتجيك بسعر يتجاوز الـ 300 وهالكلام ينطبق على مودرين وار فير 2 وهيفي رين وقود اوف وار " مايتحمس " انه يتجه للأصلي اذا شاف وضع السوق كذا ! طبعا هذا مو عذر صح بس لازم الوضع يتحسن عندنا اول بعدين الناس بتبدا تقتنع بالاصلي ..

 

[ryo hazuki]

مهما تحاول تجيب عذر ، مابينفعك .

الخلاصه

مستقبلا بتصير فيه عقوبات كبيرة و بعدها الناس بتتأدب سواء تجار او لاعبين

فا بجد ، اكبر مثال ال ps3 مافيه قرصنة و ماشي حالة بسوقنا ، و فيه ناس قالت الشركات حابة ان أجهزتها تتكهر بالله عليكم هل هذا كلام يعقل ، مايكروا و نينتيندو أجهزتها متهكرة و السوفت وير عليها يبيع اكثر من ال ps3


*