ما ادري كيف إدارة منتدى ألعاب عادي يكون عندها عضو يفتح أكثر من موضوع ويعمل سبام لفكرة إن المنتدى كله مبني للتفاهة. طيب يعني الأعضاء هنا الي كتبوا لآلاف الساعات على مر السنين ايش رح يكونوا لو خلوا كل هذا الوقت على التوافه؟ ايش رح يكون وضع الإدارة الي شغلتها تشرف على ردود "التوافه"؟ كذا فكرة ممكن الواحد يطريها ويفضفض الي في راسه بشكل معقول, لكن كيف عادي يتحول المنتدى آخر يومين بس عن كيف تواجدنا للتوافه؟ يعني لو نيتي ما اصير جزء من بيئات التوافه لازم اترك المنتدى ولا كيف؟ يعني اقدر اعطي مليون مثال لكيف غلط تروح لمجتمع معين وتطرح فكرة "أنت تواجدك هنا للتوافه" وما رح يخلوني اكمل في المكان بعد كذا رد ولا للحظة واحدة... لأن الصدق؟ ايش الفكرة هنا؟ كلمنا أوجي-سان ايش الي محسسك كل الهواية صارت توافه؟ يعني إنت كنت المشرف الأكبر لكم سنة على بيئة التوافه وجزء من الفضل ليه ذي البيئة لسه مستمرة ليومك هذا هو بفضل مجهودك الي بذلته لهذا المجتمع... هل كونك صرت تلعب كم لعبة في السنة خلاك خلاص متندم وكاره ماضيك؟ طيب يعني على كذا نقفل موضوع تختيم الألعاب عشان الوضع يفشل مرة كيف في أعضاء يقضوا كل هذا الوقت في التوافه ولا؟ ليه ما نبدأ نسولف عن الألعاب بخجل ونقفل كل موضوع يفتخر فيها؟ خلينا نسولف عنهم كأننا نسولف عن إدمان مذموم ونحاول ننصح بعض كيف نترك الألعاب وبعدها نجيب لنا كم لاعب تائب ونجلس في دائرة حولهم ونسمع قصتهم وكيف تحسنت حياتهم للأفضل بعد ترك اللعب والإبتعاد عن ذي التوافه... تعرف ليه؟ عشان هذا أحسن شيء ممكن يحصل في المنتدى اللاعب الحقيقي! بعدها خلينا نروح لقسم الأنمي طالما الصراحة ما أشوف الأنمي أقل تفاهة من الألعاب. خلينا نروح للقسم العام ونقفل مواضيع الأفلام والمسلسلات والرياضات عشانك لو ركزت كويس, ذي برضو توافه. تصدق؟ حتى الرد هذا طالع تافه طالما كل شيء جالس اتكلم عنه يندرج تحت بند التوافه... ايش الحل هنا؟ نبكي ونصارخ "تافه تافه تافه" وبعدين؟
&&
