السلام عليكم ورحمة الله وبركاته ^^
ياخي ما تبغي تذاكر لا تذاكر ... محد غصبك :yuck: <<< أمزح والله 
انا بسألك سؤال أوكي ^^ :
أنت كيف تبدأ مذاكرتك؟
و يوم تذاكر ذاكر بتركيز و لا تقرأ كأنك قاعد تقرأ جريدة ^^ ... و إذا عندك وقت قبل الإمتحان بفترة ... مثلا يومين قبل الإمتحان أو 4 أو اسبوع بكبره ... حاول تراجع اللي خذته ولو ساعة أو نص ساعة باليوم ^^ ... علشان ما يتراكم عليك كل شيء لـ ليلة الإمتحان ^^ ...
للأسف كثيرين اللي يسوون هالحركة يراكمون كل الدراسة ليوم الإمتحان و بعدين ما يحصلون وقت يخلصون فيه المادة اللي عليهم >_<" <<< أنا كنت منهم :slant:
أنا عن نفسي قبل ما أبدأ مذاكرة و بعد ما أخلص مذاكره أقرأ هذي الأدعية ^^
دعاء أقراه قبل ما أذاكر
اللهم إني أسألك فهم النبيين وحفظ المرسلين والملائكة المقربين... اللهم اجعل ألسنتنا عامرة بذكرك وقلوبنا بخشيتك وأعمالنا بطاعتك إنك لما تشاء قدير وحسبنا الله ونعم الوكيل.
دعاء أقراه بعد المذاكره
اللهم إني استودعتك ما قرأت وما حفظت فرده إليّ عند حاجتي إليه. إنك لما تشاء قدير وحسبنا الله ونعم الوكيل.
دائما دااائما توكل على ربك ... و لا تتواكل ^^
و تذكر ما في شي يجي بالسهل لازم تتعب علشان تحصل اللي تبغيه ^^
و يوم الإمتحان ... هدي من نفسك لا تدخل الأفكار السلبية في راسك .... الحرف لا شيله من راسك ... دايما حط في بالك ... أنك بتنجح و بتقدر تجيب الدرجة اللي تبغيها ^^
طلع الأفكار السلبية من راسك ... طلعها طلعهااااااا :evil: <<< أنزين ليش معصبة >_>"
و بقول لك سالفة ... <<< يا حبها للسوالف -___-"
السنة اللي طافت كانت أول سنة لي في الكلية ^^ ... و انصدمت جدا جدا لما عرفت إني لازم آخذ مادة كريهه جدا جدا بالنسبة لي ... و اللي هي الرياضيات ... عاد رياضيات كليتنا كله أنجليزي ما في يمين و لا يسار تبغي تمشي سيدا أمش سيدا <<< وين ودتنها هذه اشارات المرور P:
المهم قلت لازم أشد حيلي فيها و انجح فيها لأن اللي ناخذه كله ماخذينه أيام المدارس بس الفرق أنه بالأنجليزي ^^ ... أول إمتحان رسبت و الفرق كان درجة و حدة و مشيناها لأني كنت بادية دراسة متأخرة في الكلية ... ثاني إمتحان إمتحنته يبت فيه نفس الدرجة اللي قبله ... و قلت إن شاء الله بعوض المرة الياية ... عاد المرة الياية هذه كنت دايما طايحة عند المس كل ما حسيت عمري ما فهمت شي اركض لها و أسألها و لو كان شي تافه ...
أمتحنت الإمتحان الثالث ... و مع الهارد وركينج و دراسة و مراجعة يومية رسبت فيه و بجدارة مش درجة وحدة لاااا 15 درجة ناقصة مني من النجاح تخيل ... و الله اول ما دريت بدرجتي طلعت من الكلاس ورحت الحمام قعدت أصيييييح :cryy: .. و الله اني انقهرت و قلت هذا و أنا مذاكره و متعبة عمري و يبت هالدرجة ><" ... المهم الإمتحان اللي بعده اللي هو الرابع ... درست له من جد و قعدت مع صديقاتي و كنا نذاكر كلنا بجد و إجتهاد و جدية و ما في غشمرة ... 3 أيام متواصلة من المذاكرة ... و يومين مذاكرة بروحي ... و أيضا رسبت .... هني أنا فقدت اعصابي ... و مسكتني مدرستنا و قعدت تكلمني و تقول انا اعرف انج تبذلين جهدج و هارد وركينج ستيودينت ... و فجأة الدمعة نزلت من عيني .. و هي ما صدقت قعدت تصيح معاي لوول
و الله كل أنواع الإحباط ياني بس الحمد لله صديقاتي كانوا دايما يشجعوني ... و أنا كنت أعتبر نفسي غبية لأن الإمتحانات كانت سهلة جدا بس انا مخي ما اعرف شو يصير فيه وقت الإمتحان>_<"
اني وي استمرت هالحالة معاي لييييين أخر السنة ... يعن يالسيميستر اللي بعده أيضا رسبت فيه ... تخيل في آآخر إمتحان اللي إنشمل فيه 10 كتب للرياضيات نجحت فيه و على الحفة
و الحمد لله انتقلت للسنة الأولى دبلوم عالي بس الحين رجعت أعيد هالماث الكريه ... أني وي الحمد لله إمشية الحال بس الله يعيني في الـ challenge exam إذا رسبت فيه خلااص يا حلوة في الدبلوم و لا طرد ><" ... هم و كيفهم عاد >_>"
اني وي ... انا ما قلت هالسالفة علشان تصيحون معاي :yuck: ... و لا تشفقون علي لأني غبية في الرياضيات ... كل اللي أبغيك تعرفه أن لا يأس مع الحياة و لا حياة مع اليأس ^^<<< و أنزين ليش معورة لنا راسنا من الصبح و كاتبه هذا كله ... خبرينا هالجملة من قبل و ظفي وجهج :roll:
قلت يمكن تستفيدون و تاخذوني عبرة لول ... و أهم شي في المذاكرة التركيييييييييييز ... و المراجعة ^^
ما راجعت مو مشكلة بس خلي فكرك كله في المذاكره ... <<< الأخت صدعتنا بفلسفتها @_@
الله تعالى قال:
(وقال ربكم ادعوني استجب لكم)...(غافر:60).
وقال تعالى:
(واذا سألك عبادي عني فاني قريب اجيب دعوة الداع اذا دعان فليستجيبوا لي وليؤمنوا بي لعلهم يرشدون) (البقرة ـ 186).
صدق الله العظيم
ادعُ ربك ^^ ... و استغفره
إذ قال صلى الله عليه و سلم
(من أكثر من الاستغفار جعل الله عز وجل له من كل هم فرجاً ومن كل ضيق مخرجاً ورزقه من حيث لا يحتسب).
أرجوا أني أفدتك بردي هذا ^^ ... و السموحة منكم على الإطالة ^^
و نشوفكم على خير ان شاء الله تعالى .. و موفقين إن شاء الله
P.S : ما أدري ليش حاسة إمتحانك القادم هذا ... راح يكون سهل إن شاء الله ^^ ...
<<< يا ويلي لو طلع صعب لوووول >>> تستاهلين محد قال لج تتفلسفين :yuck:
:
