اختبار القدرات ...

[Sky Walker]

هلا شباب ترو

اعتقد معضمكم يعرفون ان 11 محرم الجاي راح يبدأ اختبار القدرات بالسعودية ..

وكل ما اسمع كلمة " اختبار القدرات " احس بالبرد والرجفة لووولز :sarcastic:

الاختبار الاول رحت وانا مادري كيف طريقة الاسئلة ولا بحثت عنها ابد ..

بس الحمدلله جبت 71 على اني حسيت باخذ 30 لان الاجوبة كانت تقريبية ومعضمها ماعرفت احلها " اقصد بالاسئلة الكمية " :xd:

والاختبار الثاني فاتني ولا قدرت اختبر لظروف حسافة :annoyed:

و 18 محرم راح يكون اختباري الثالث ان شاء الله ..

شباب ابي نصايحكم والتجارب اللي مرت معاكم بالاختبار على الاقل استفيد ..

وقولوا لي عن الكتب او شي اللي تفيدني بالحل في الاختبار ..

على الاقل اجيب في هالاختبار فوق الـ 80 ان شاء الله ويطمأن قلبي بالاختبار اللي بعده ..

ارجوكم شباب ساعدوني .. :crying:​

تحرير : لاحد يقول لسة مبكر .. ابي اقضي اجازة الاضحى كلها علشان اجمع معلومات للاختبار :sarcastic:

 

[BioHazard]

اهم شي لا تدخل وانت خايف من الاختبار, الاختبار سهل جداً وما يحتاج تفتح كتاب عشانه.

 

[G7Ga7]

اختبار القدرات يقيس قدراتك (وفي حالات معينة حظّك .)

ماعمري سمعت شي اسمه "مذاكرة" لاختبار القدرات ..

شخصياً اقدر انصحك بكتاب جدا رائع .. من نفس وزارة التقويم والقياس ما ادري وش اسمهم .. بس عنوان الكتاب "اختبار القدرات" .. تلقاه بجرير .
المميز في الكتاب طال عمرك , انه اول شي رسمي .. ثاني شي يعطيك كل المعلومات الي تحتاجها عن الاختبار .. الوقت , نوعية الاسئلة , الاماكن , نصائح .. الخ . وفي نهاية الكتاب حاطين أمثلة كثيييرة عن أسئلة متنوعة .. ممتازة جداً , وفي آخر الكتاب مرة , حاطين اختبارين تجربة .. تجي طال عمرك توقّت ساعتك , وتختبر بنفسك وشوف قدرتك .

برضو كلام بايوهازرد صحيح .. لا تدخل وانت مرتبك ولا خايف . حط في بالك انه المكتوب راح يصير , وان هذا الاختبار ما يبيله لا مذاكرة ولا استعداد اكاديمي (يبيله استعداد نفسي بالمناسبة !).

نقطة أخرى .. الي يقولك ادخل دورات تدريبية .. اضحك في وجهة .. لأنها مضيعة وقت وجهد وفلوس على شي ماله اي فايدة .. ياما عرفت ناس كثييير دخلوا هالدورات ولا استفادوا منها أبداً !!!

في الاخير حبيت اثبت لك كيف انه الاختبار فعلاً يقيس قدرتك ..

انا اختبرت اختبارين تجريبيّين - من الكتاب في البيت - .. وكلهم اخذت فيهم في السبعينات (77 والله اعلم !).
واختربت القياس رسمياً مرتين .. وكلها اخذت فيها نفس الدرجة بالضبط .. حتى ما كان فيه فرق لا كسور ولا شي .. :laugh::

ودائماً توكل على الله ووسع صدرك .

 

[Yaz3D]

أخوي, الجزء الكمي من الاختبار يعتمد على مهاراتك الرياضية الأساسية اللي تعلمتها في المرحلة الثانوية..

الاختبار هذا ما يتذاكر له من كتاب معين, الطريقة الوحيدة إنك تتجهز له إنك تتدرب على المهارات الرياضية الأساسية اللي تعلمتها في أول/ثاني/ثالث ثانوي ...


لو مصر تبي كتاب, في كتب تنباع في المكتبات توريك كيفية الاختبار ونماذج للأسئلة تفيدك إن شاء الله ..

وعشان ما تزعل, راح أدعليك تجيب درجة عالية .. ^^



علمنا كم تجيب! 🙂


تعديل: أهم شي الاستعداد النفسي!

أبدا أبدا لا تخاف من الاختبار!

لأن لو دخلت خايف, صدقني, راح يأثر على مستواك ..


أعرف ناس المفروض يجيبون فوق الثمانين جابوا من 60 لـ 70, سألتهم ليه؟
قالوا من كلام الناس خافوا ودخلوا الاختبار وتورطوا ..


الاختبار زيه زي أي اختبار غيره و أسهل بعد

 

[Strider]

شوف عموما الشي الوحيد اللي أنصحك به أنك تروح و أنت نايم كويس عشان تعطي أقصى ما عندك انا سمعت أن الجلكوز يزيد التركيز فحاول تشرب شي حلو قبل الإختبار عصير منجا ...الخ

انا جبت 86 درجه

 

[The Doctor]

اطلبوا من استاذكم الرياضيات يعطيكم حصة للقياس يشرح فيها طريقة الحل لبعض السئلة (لأن هم كلهم كم فكرة و معظم الاختبار بس يكرروهم)
و حتى لو الاستاد ما شرح لكم، موجودين هالافكار في الكتاب اللي ذكره جحجاح، فاشتريه، على ما اعتقد ب20 ريال بس
و بالنسبة للفظي فكل شي تحتاجه مذكور في الكتاب

و لا عليك من الدورات و الخرابيط، زي ما قلت لك استاذكم الرياضيات يشرح لكم الكم فكرة و اطلع على الكتاب

الاختبار سهل جداً و مافيه شي، و مدامك اختبرت من قبل فاختباراتك القادمة ادخلها و انت مروق و لا تخوف نفسك

أنا الحمد لله، دخلت أول مرة من دون ما ادخل دورات (بينما كل من أعرفه راح دورة)، قلت مدام عندي أربع فرص أدخل أول مرة اشوف جو الاختبار.. و جبت 84
المرتين اللي بعدهم تدربت شوي (بس ما كنت أعرف طريقة معظم أفكار الاسئلة) و جبت 82 (فيهم ثنينهم :laugh:: )
و المرة الأخيرة دخلت و أنا عارف كل أفكار الاختبار و جبت 90 (قولوا ما شاء الله p: )

على فكرة، إذا تعرف تألف لك قوانين حق تتوصل للجواب من الاختيارات فبتساعدك كثييير

 

[Lonely Heart]

انا هذي الاختبار الثالث لي ان شاء الله ..
المره الاولى دخلت وانا مو فاهم وش السالفه ومرتكب وحالتي صعبه (وكنت داخل الاختبار لحالي)
وجبت 79 درجه

المره الثانيه حضرت حصه مع استاذنا "المصري" وفهمني كم شغله مفيده بصراحه
وقبل صلاة المغرب بفتره طلعت مع اخواياي لـ Macdonald's اللي قدام الجامعه (بجانب التميمي) وقعدنا نضحك وفليناها واخذنا اكله خفيفه عشان تريح الاعصاب في الاختبار .. صلينا المغرب مرينا التميمي وخذينا عصيرات + حلويات .. ودخلنا الاختبار وحنا نظحك ..
وجبت هالمره: 84 درجه

المره الثالثه نفس النظام ان شاء الله .. واتمنى درجه احسن : )

وبالتوفيق ..

 

[BioHazard]

ايه صح اذا اصحابك بيختبرون قبلك, اسألهم وش الاسئله الي جت لهم لانها تتكرر, انا نص المعاني داخل وعارفها :laugh::

 

[Lunar Poet]

لا تضيع وقتك على كثير من التدريب و التحضير للإختبار لأنه بيزيد من توترك. أنا التحضير اللي سويته للإختبار كان كله ساعتين مع الشباب (و نصها ضحك و وناسة) قبل يوم الإختبار، و الحمد لله جبت درجة مرضية. أهم شي خلّك واثق من نفسك ولا تخاف، و إن شاء الله بتجيب الدرجة اللي ترضيك

.

تعديل: مثل ما قال لك BioHazard راجع أسئلة الإختبارات السابقة (موجودة بكل مكان على النت) لأنها تتكرر حيل.

تعديل2: لو أحد شرح لك طريقة حل أحد المسائل لا تعتمدها على إنها الطريقة الصحيحة، أو لا تعتمد على طريقة معينة في الحل. كل واحد له طريقته المختلفة لكل نوع من المسائل

.

 

[Sky Walker]

شكرا اخواني على تفاعلكم القوي ..

كلامكم جعل معنوياتي مرتفعة 🙂 ..

بس الدورة اللي باخذها انا بس حق الكمي ..

الاستاذ اللي يدرس هناك معروف .. يبسط لك حل المسائل اللي تجيك بالقدرات ويعلمك طريقة الحل بأبسط صورة ..

ويخليك تستثني من الـ 4 فقرات فقرتين اذا نظرت فيها عدل ..

يعني ان شاء الله راح تفيدني ..

BTW : بعض ربعي نصحوني بكتاب رام1 .. تنصحوني فيه ؟؟

 

[G7Ga7]

بس الدورة اللي باخذها انا بس حق الكمي ..

الاستاذ اللي يدرس هناك معروف .. يبسط لك حل المسائل اللي تجيك بالقدرات ويعلمك طريقة الحل بأبسط صورة ..

أنا اصر اقول ان الدورة مضيعة وقت لاختبار القدرات .

تبي تستفيد ؟ .. اشتر كتاب اختبار القدرات الرسمي , اقعد مع اي مدرس رياضيات تعرفه .. خليه يشرح لك بعض اسئلة الكمي الي ما تعرفلها وخلاص.

 

[Double T]

ابغى اعطيك نصيحة وحدة فقط و استخدمتها و جابت نتيجة .. و ما اختبرت الا مرة وحده فقط

خذ معاك ساعة ..و كل سؤال خلي له دقيقة مهما كان اذا عدت دقيقة شقح للي بعده .. بعد ما تخلص القسم راح يبقالك 5 دقايق تقدر تحل فيها الأسئلة الي شقحتها

اسئلة القدرات سهلة و تستخدم فيها طرق حل غير معقدة لكن فيها فكرة لذلك المفروض ما تاخذ منك اكثر من دقيقة

و الله يوفقك ان شاء الله

 

[Lunar Poet]

ابغى اعطيك نصيحة وحدة فقط و استخدمتها و جابت نتيجة .. و ما اختبرت الا مرة وحده فقط

خذ معاك ساعة ..و كل سؤال خلي له دقيقة مهما كان اذا عدت دقيقة شقح للي بعده .. بعد ما تخلص القسم راح يبقالك 5 دقايق تقدر تحل فيها الأسئلة الي شقحتها

اسئلة القدرات سهلة و تستخدم فيها طرق حل غير معقدة لكن فيها فكرة لذلك المفروض ما تاخذ منك اكثر من دقيقة

و الله يوفقك ان شاء الله

امممم ما أوافقك في هالنقطة. أعتقد إن مسألة الساعة و الوقت ممكن تسبب توتّر للشخص و ممكن بسببها ينشغل بالوقت أكثر من إنشغاله بالأسئلة نفسها. بالنّسبة لي كنت أسوي "سكان" للأسئلة.. اللي أشوف شكله سهل أبدأ فيه على طول، أما اللي شكله معقد أو محتاج وقت أخليه لبعدين (دائماً حاول إنك تقدّم المسائل البسيطة على المعقدة، لأنها كلها في النهاية لها نفس الدرجة).

لاحظ أخ Sky Walker إن لكل شخص أسلوبه الخاص في حل أسئلة إختبار القدرات، و معظمها ممكن تحقق نتائج بالرغم من إنها مب بالضروري إنها تناسب الجميع

.

 

[Mista Koo]

عليك بحل جحجاح + دبل تي
الكتاب ممتاز جدا ومفيد.. والسي دي اللي معاه كمان مفيد (فيه نماذج اختبارات ودورات مسجلة فيديو)

أهم شي نام زين قبل لا تروج الاختبار ولا ترتبك

BTW : بعض ربعي نصحوني بكتاب رام1 .. تنصحوني فيه ؟؟

أي شي فيه مسائل رياضيات من نفس النوعية شوفه.. أنا تدربت على كتاب GRE :laugh::

 

[EPIC FAHAD]

والله اختبار حلو انا جبت فيه 71 بس الصعب والي يبغاله قوة معلومات هو التحصيلي

 

[cube001]

انا خذته قبل خمس سنين تقريبا طلعت من الاختبار احس اني جبت العيد ( خاصه بالعربي) كانت النتايج بالتليفون(قديييم...) الزبده قالي جبت 86 بالعربي اول شي (انبسطت)بعدين 96 بالرياضيات عاد فليتها هههه الكلي 91 (مشت معاي) اخر شي ما استفدت من الاختبار اصلا لاني خشيت ارامكو وذاك الوقت ما كانوا ياخذون القدرات(الحين ياخذونه) لان كان عندهم اختبار خاص فيهم...

المهم الى الان ما شفت احد خذ الاختبار وتغيرت نتيجته تغيير ملحوظ (الا اذا واحد صدفت معاه) بس المذاكره + الدورات وغيره ما اشوف انها مفيده او راح تغير شي اذا فيه شي واحد ممكن يفيدك فهو السرعه (مع اني اشوف الوقت فوق الكافي) لكن اذا كان ما يمديك تخلص ممكن تحاول تسرع نفسك بالحساب وغيره والباقي على الله ثم حظك عاد والله يعينك ويوفقك:happy:

 

[GreeN StorM]

سجل يوم الخميس الصبح ولا تطلع الأربعاء بس وروح وانت مروق بدون ما تكون مرتبك وحط براسك انه عندك فرصة غيرها ..
بالنسبة لكتاب القدرات إلي من المؤسسة يعلمك الطريقة بس و ترى الإختبار الكمي ماله دخل بمنهج الثانوية ولو كنت ملزم على دورة رائز ممتاز جدا ً والكل يمدحه ..
غير كذا لا تهمل اللفظي ومعاني الكلمات والمتضادات لو كنت ما تعرفها اختار اقرب وحدة لنفسك عشان تستفيد من الوقت ..
وينصح انك تروح الحمام قبل دخول القاعة ولا تفتح أي كتاب/مذكرة/ملاحظات قبل ساعة من الإمتحان وحاول ان مخك يكون فاضي لأقصى الحدود * لا تاخذ مواعيد فاليوم هذا ولا تطلع فيه الزبدة يعني ما وراك اشغال ورا الأختبار * !

وأهم شي:
إذا طمرت سؤال لا تنسى تطمر الجواب يعني واحد يطمر السؤال 3 و يحل الرابع ويلون مكان السؤال الثالث وياكلها هواء محترم !

 

[Double T]

امممم ما أوافقك في هالنقطة. أعتقد إن مسألة الساعة و الوقت ممكن تسبب توتّر للشخص و ممكن بسببها ينشغل بالوقت أكثر من إنشغاله بالأسئلة نفسها. بالنّسبة لي كنت أسوي "سكان" للأسئلة.. اللي أشوف شكله سهل أبدأ فيه على طول، أما اللي شكله معقد أو محتاج وقت أخليه لبعدين (دائماً حاول إنك تقدّم المسائل البسيطة على المعقدة، لأنها كلها في النهاية لها نفس الدرجة)..

صدقني ما يضيع الطالب الا انه يحوس في سؤال مع عرف له على حساب اسئلة ثانية ممكن يجاوبها .. و حركة سكان هذي الي تودي الطالب في ستين دهية لأنك تصير منت عارف اصلا ايش في السؤال الين ما تقراه و على الاقل تفكر فيه شوي عشان تعرف هو صعب و الا لأ .. و بطبيعة الإنسان راح يقعد يفكر شوي و يقول " يمكن السؤال الي بعده اسهل " و يقعد ينقز من سؤال للثاني بدون ما يركز على سؤال واحد في وقت واحد .. طالما وصلنا لهذي النقطة ليش ما تزيد شوي على السكان الي انت تسويه و تخليه حل كامل للأسلة بدل ما يتشتت الواحد ..

الوالد ايام كانت جامعة البترول هي الي تسوي الإختبار كان دائما يكون في لجنة الإختبار ( قبل لا اختبر انا ) .. و يوم جيت اختبر قاعد اقله كيف و كيف و كيف .. ما نصحني الا هذي النصيحة و حتى اعطاني ساعته 😀 .. و الحمد لله جبت درجة عالية من مرة وحده . و ما قد خلص عليه الوقت و كان باقي لي اي سؤال

الي كان يصير لي اني اجاوب على الأسئلة و يمر عليه 2-3 ما عرفت احلهم في دقيقة .. الي يصير ان يبقالي وقت اكثر لكل واحد منهم + الدقيقة الي انا فكرت فيها من اول .. و كذا عرف اوظف الوقت من صالحي بدل ما يقتلني و اصير اخمن في النهاية

 

[Lunar Poet]

^انزين سو skim (ألق نظرة على السؤال و إعرف فكرته)

.

Sky Walker مركز الإختبار اللي بتروح له يعرضون فيه مؤقّت؟ لو فيه فأشوف إنه أنسب من الساعة اللي تحتوي على عقرب الثواني، اللي ممكن يسبب التّوتّر و يشتت التفكير..

 

[Zero]

أهم شيء تعرف الخدع الموجودة في الاختبار ، ولما تعرفها بتحس أنها خدع رخيصة ، إشتري الكتاب اللي قال لك عليه جحجاح .

الكتاب يعطيك فكرة ممتازة عن طريقة التفكير في الأسئلة ، بعض الأسئلة عبيطة وما تدري على أي أساس تتجاوب ، شوف الكتاب هذا وبس .

 

[Mista Koo]

المهم الى الان ما شفت احد خذ الاختبار وتغيرت نتيجته تغيير ملحوظ

أنا.. لما تدربت كثير تحسنت درجتي بالكمي بس عوضتها بالعربي >.>
الحين ايش يبون بالعربي؟؟ لو يحطون مكانه انجليزي أصرف :

رائز ممتاز جدا ً والكل يمدحه ..

هم نفسهم حقين الاختبار التحصيلي؟ أصحابي دخلوها وأنا ما فتحت شي قبل الاختبار جبت أعلى منهم :sarcastic: (ودراسيا هم أحسن مني)

 

[Mute City]

في حالة عجزت عن حل الإجابة إذا كانت بالنسبة لك شبه مستحيله عليك بالإختيار (ج)

 

[Sky Walker]

خلاص قررت شباب ..

بشتري كتاب من المكتبة اللي قال لي جحجاح عنه .. وممكن اخذ معاه رام1 ان شاء الله ..

وبشوف بعض المسائل وبقعد مع استاذ الرياضيات قعدة اليمة علشان يفهمنا عليها احسن من دورة >.>"

سجل يوم الخميس الصبح ولا تطلع الأربعاء بس وروح وانت مروق بدون ما تكون مرتبك وحط براسك انه عندك فرصة غيرها ..

الحمدلله سجلت بيوم الخميس 18 محرم بالصباح .. :happy:

Sky Walker مركز الإختبار اللي بتروح له يعرضون فيه مؤقّت؟ لو فيه فأشوف إنه أنسب من الساعة اللي تحتوي على عقرب الثواني، اللي ممكن يسبب التّوتّر و يشتت التفكير..

السنة اللي راحت اختبرت بكلية المعلمين وكانت في ساعة تجيب القلق .. وواحد يردد ان باقي 10 دقايق او 5 دقايق او دقيقة :

هالمرة بختبر في جامعة الملك فيصل ان شاء الله ..

في حالة عجزت عن حل الإجابة إذا كانت بالنسبة لك شبه مستحيله عليك بالإختيار (ج)

وليش بالذات (ج) :what: ؟؟ فوق راسها ريشة (&) ؟؟

 

[NSider]

اختبار القدرات كان رهيب وممتع بالنسبة لي. المدرسة الثانوية اللي كنت أدرس فيها سوت دورة مجانية لنا عن الاختبار.. جابوا لنا مدرس رياضيات كان يشرح لنا الاختبار من كتاب الوزارة الرسمي ويعلمنا خدع عشان نعرف نحل بدون تضييع وقت. هو عموماً كان يعلمنا أشياء كنت أشوف أنها بديهية لكن في شباب استفادوا منها كثير.

الحمدلله ما احتجت أختبره إلا مرة واحدة وجبت درجة مرضية جداً.

 

[Nemesis Zone]

اختبار القدرات ماهو شي مخيف ولا شي بالعكس تختبر فيه معلوماتك العامه

صدقني كل الأسلئه الي فيه عامه وحتفهم اجوبتها من مجرد النظر لها وحسب نظرتك للجواب الصحيح اما الأسئله الحسابيه فهي شوية معادلات وفك أقواس وغيره وطبعاً الأسلئه كلها قصيره وتقدر تجاوبها في دقيقه

وعموماً تقدر تشتري سي دي من اي مكتبة علشان تشوف اسلوب الأسئله

توكل على الله بالتوفيق 🙂

 

[Andrew X]

مايحتاج انت مكبر السالفة شوي /: كلها على الحظ واذا ماعرفت عد حقرا بقرة قلي عمي عد العشرة 1 2 3 ...(10 !! ج؟ يالله جيم يعني جيم )وخلاص لول..الله يوفقك في الأخبار على كل حال 🙂

 

[Lonely Heart]

مايحتاج انت مكبر السالفة شوي /: كلها على الحظ واذا ماعرفت عد حقرا بقرة قلي عمي عد العشرة 1 2 3 ...(10 !! ج؟ يالله جيم يعني جيم )وخلاص لول..الله يوفقك في الأخبار على كل حال 🙂

اختبار القدارت مايعتمد على الحظ .. الا اذا انت مافي راسك تحل شي ابد ..
اكثرها مسائل وفيها تشغيل مخ .. والعربي بالنسبه لي كان اصعب بالف مره من الكمي .. لانه طويل ويباغلك تركز بكل شي ..

بس:

القدرات =/= الحظ

 

[Andrew X]

الا اذا انت مافي راسك تحل شي ابد

هذا اللي سويته صراحة في القسم الكمي ..لول>.>"

 

[Lonely Heart]

ودي اعرف وش كنت افكر فيه يوم قلت خلني اختبر القدارات يوم الخميس الصبح : (

 

[The Blue King 9]

الدورات صدقونه مامنها اي فائده
اعرف واحد اختبر 3 مرات قياس ودخل دورات مع هذا كل مره ياخذ نفس الدرجة مازاد ولا نقص ولا درجة
حتى في الدورة يختبرونه ويغيرون الأسئلة ويجيب نفس الدرجة