hits counter

ألعاب الفيديو والتفوق الدراسي .. بينهم علاقة ؟؟ *أصحاب العيون الحارة برا*

Naserano

Naserano

True Gamer
7584.jpg


بدايةً خلونا من كلام العلماء والدراسات اللي كل يوم تتكلم عن أضرار ألعاب الفيديو وما إلى ذلك ..

ندخل في صلب الموضوع بدون مقدمات.. أنا واعوذ بالله من هالكلمة دائماً الاحظ إن فيه ناس كثيييرة متفوقة دراسياً والسبب في اعتقادي (موب شرط يكون أساسي) يكون بسبب اهتمام شديد بألعاب الفيديو وبغض النظر اذا كان يفضل هيلو أو فاينل فانتسي أو حتى ماريو جالكسي . شلة كود وبيس برا الموضوع :sarcastic:


طبعاً المحور اللي قاعدين نتكلم عنه هم الهاردكور جيمر بالأساس (واللي اعتقد جميع الأعضاء من ضمنهم) ..


طيب ليش جت في بالك النظرية هذي ؟؟
طبعاً ما جبت الكلام من راسي .. بالعكس أنا كنت مسوي تدقيق شديد في النظرية هذي حتى على نفسي :tongue: ولله الحمد نسبتي دائماً ما تنزل عن 98% وكثير من اخوياي الجيمرز غالباً فوق التسعين . وأحياناً فوق 95% وبغض النظر عن المدرسة اللي هم فيها . وبدون ما اتكلم عن اللي تخرجوا وحالياً في وظائف مميزة جداً ..

يزيد (فانتزي 7) نسبته فوق ال98 وقاعد يراجع لاختبار الفيزياء النهائي من الحين *امزح 85*

فيه علماء يؤيدون كلامك ولا بس أنت قاعد تهذري ؟؟
امممم ما سمعت عالم يتكلم بهالخصوص لكن الكائن البشري له عقل ويفكر ويستنتج ..



وبحكم إن النظرية هذي دائماً تدور في راسي وسببت لي الأرق حبيت اشارككم اياها وما اذا كنتم توافقوني فيها ولا لأ . أو حتى اذا كنتم تعرفون ناس مهتمين في الألعاب لكن يجيبون العيد في الدراسة ..


اختصاراً للموضوع الغريب شوي :
س/ تأثير ألعاب الفيديو على الدراسة ايجابي ولا سلبي ؟؟

من خلال نظرة ورأي شخصي شبه متأكد إن 95% من الهاردكور جيمرز متفوقين دراسياً ..

معذرة على الإطالة بس ابي اطلع اللي في قلبي
 
انا اشوف انه ما يأثر لا يزيد الذكاء ولا ينقصه
 
أشوف انه يسبب الأهمال والأهمال = عدم الاهتمام لدراستك = نسبة 80% مثلي -_-
 
انا اشوف كل المتفوقين من مدرستنا عندهم اهتمام شديد بالتقنية والالعاب .
 
والله مدري بس اتوقع ان العاب الفيديو ممكن تخليك تشغل مخك بشكل مستمر ومتعود على التفكير بشكل سليم
 
إجابة سريعة: الجيمنج هواية واعتناءك بهذه الهواية يجعلها مصقولة ونظراً لان الجيمنج تلعب تدور كبير في التمارين العقلية وان كانت في اطار مسلي + الألعاب بمقدورها احتواء جميع الثقافات والمعلومات باللاعب تلقائياً يصبح من غير مجهود يذكر مثقف ومطّلع في جوانب علمية كثيرة .

لكن تفوق دراسي ؟! ماله علاقة الدراسة التزام واستمرارية اكثر من كونها تعتمد على مهارات هذا اللاعب المثقف/المطّلع .*
 
على فكره .. وعلى طاري الدراسة والتفوق .. بعد 12 سنة من الدراسة .. اصبحت لدي نظرية .. الدراسة لاتعتمد على غني او فقير .. ولا تعتمد على طويل ولا قصير .. ولا على فاضي او مشغول .. ولا على اللي عنده ملهيات واللي ماعنده .. الدراسة تعتمد على نفسك انت + عزيمتك .. اذا اردت ان تتعلم وعندك رغبه والله لو ايش من الملهيات رح تتعلم .
 
اممم اعتقد لو الطفل من صغره كان يلعب وكذا راح يتفتح مخه اكثر, اكيد اي شئ زايد عن حده بينقلب ضده فيمكن هي تساعد بتفتيح المخ اكثر ولكنها بنفس الوقت تاخذ من الوقت كثير, شخصيا كنت انسان مهمل ومع ذلك نسبتي مش بطاله 80%
 
التعديل الأخير:
ابي اتكلم باختصار : لو ما كنت قيمر هل اكون **دافور** ؟؟
الجواب : نعم
انا ملاحظ هالشي على نفسي , بعض الاحيان وانا اذاكر تحصلني اطالع بالـ كونسلز الي بغرفتي واشتهي العب , واترك المذاكرة ، طبع حاليا لي تقريبا 3 اسابيع ما شريت لعبة جديدة , وهذا بالنسبة لي انجاز , وان شاء الله ما ابي اشتري شي جديد الين بعد الاختبارات (بعد3 اسابيع) ابي احاول اهتم بدراستي شوي .
 
بالعادة اشوف اللي مهتم بالجيمنج بشكل مكثف تكون لغته الانجليزية ممتازة .. جيدة جدا على الاقل

اما بالنسبة للتفوق الدراسي بشكل عام .. شبه اي :tongue:

هو يعتمد على عزيمة الشخص اولا واخرا ..
 
نظم وقتك وبتقدر تمارس اي هواية تحبها ! حتى لو كان عندك اختبارات نهائية
 
لكن تفوق دراسي ؟! ماله علاقة الدراسة التزام واستمرارية اكثر من كونها تعتمد على مهارات هذا اللاعب المثقف/المطّلع .
أنقر للتوسيع...
التزام واستمرارية قبل .. الحين (على الأقل في مدرستي الحكومية) خلك ساكت طول السنة وآخر اسبوع من الدراسة يعطيك المدرس 4 أوراق ملخص وأنت وشطارتك في الاختبار
 
والله انا عن نفسي .. ملاحظ ان الأنمي له علاقة بالتفوق الدراسي

أولا .. هالناس هذي تشوفها تمشي مع ناس بنفس اهتمامها

دائما تشوفهم جالسين بالبيت ومايحبون الطلعات .. يعني حياة اجتماعيه مو من اهتماماتهم

ماعنده الا انمي وجيم ودراسة ..

حتى لما يطلع من البيت .. لازم يكون في ايده شي له علاقة بالجيم أو الأنمي .. يا كتاب .. أو دي اس أو اي شي !
يعني مستحيل يستغني عن هالعالم ،


مدري يمكن غلط اللي اشوفه .. بس هذا اللي لاحظته كثير مو من شخص واحد
 
والله شوف ، اذا بتتكلم من ناحيه ذكاء وقدرة عقليه .. فانا اشوف ان مالها تأثير في هذي الناحيه .

لكن من ناحيه التفوق الدراسي ممكن ، لان مو كل دافور ذكي .. ومو كل ذكي دافور ، يعني اللي يجيب 80% مثلا ً والسنوات اللي راحت نسبته كلها فوق الـ90% ، الشي هذا مو معناه انه غبي ، او ماعنده "قدرة عقليه" معينه ، بس معاناها انه مايعطي المواد حقها ووقتها في المذاكره في هذي السنه بس .. بسبب الالعاب طبعا ً .
 
اشوفها بالفعل تنمي المخ وتفتحه خصوصا بفترات الطفولة ، الالعاب ممكن تمرن الذهن على سرعة البديهة والتفكير وربط الامور وحتى الابداع والانتاج ، وبعمر الطفولة وبفترات النمو العقل يكون متقبل لتعلم هالاشياء واكتساب الخبرة اكثر واللي بيتطور معاه بالمستقبل..بس مثل ما قال عمر كل شي زاد عن حده بينقلب ضده ..
هذا بجانب ان تقوية اللغة الانجليزية شي بديهي ومسلم فيه واللي يعد من عوامل التفوق الدراسي..اما العاب الاون لاين فتخرب العقل وتضيع الوقت وتزهق الارواح >> متعصب للسنجل p=
 
^
هذا الي قاعد يصير فيني , السنة الي فاتت كنت جايب فوق ال90% , و الحين 84% 🙁
انا تعلمت الغة النجليزية من الجيمس و النت طبعا P:
 
هذا الشيء ماله علاقة مباشرة، هو على حسب الواحد وتنظيمه، مثلا انا احب العاب الفيديو كثيرا ونسبتي في الغالب 99 ولله الحمد، وواحد اعرفه نفس الشيء بالضبط لكن نسبته ما تزيد عن السبعين! و انا ما العب ايام الدراسة ، بس نهاية الاسبوع، وهو نفس الشيء، لو الواحد عنده هدف للتفوق فهو يقدر يتفوق مهما كانت الظروف، واذا واحد بس همه يلعب وتكون الدراسة في ذيل اولوياته فطبعا ماراح يحقق نجاح حتى لو كان محترف في العاب الالغاز ويختمها 100% وكان الأول في الليدبورد !:laugh::
 
انا العب من يوم ما وعيت على هالدنيا ، كنت تمام بالدراسة من المرحلة الابتدائية الا الثاني متوسط*خصوصا الانجليزي لان الالعاب ساعدتني كثير باللغة الانجليزية * , ثالث متوسط والثنوي درجاتي جداا نزلت , تخرجت من المتوسط بمجموع 90% وانا الآن بالثانوي (تراكمي) ونسبتي الترم الي راح 88% ، المادة الوحيدة الي احس اني دافرو فيها ومحد يرفع ايده غيري الي هي الانجليزي .
سبب نزول الدرجات هو اهمال مني،, والرغبة باللعب بدلا عن المذاكرة ، حاولت انظم وقتي بس ما قدرت للاسف لأني مش من النوع المرتب .
 
انا اقلك ليش الداوفير ما يخرجون من البيت كثير و مالهم علاقات اجتماعية كثيره فالجيمز من اهم وسائل الترفيه عندهم ..
 
^^
بالضبط ,جبتها ، انا اعرف اشخاص *زملاء دراسة* خروجهم من البيت قليييل جدا ، استغرب صراحة منهم ، اذكر الترم الي فات كان واحد طول الترم ما سمعت صوته ، كلامه قليل مجرد مشاركة بحصص الرياضيات والفيزياء , يوم من الايام كان في اختبار كان قريب مني ، سلمت عليه وصرت اتكلم معه على ما تتوزع الاوراق ، سألته عن نشاطاته وقال : قبل الاختبارات النهائية ب 3 اسابيع ما يطلع من البيت ، يجلس يذاكر واذا في وقت فراغ يلعب فديو جيمز ، انا طبعا انفجعت من كلامه ، سألني : انت برضوا تذاكر من بدري علشان الاختبارات ، قلتله : طبعا طبعا !! ، انا طبعا خراط ما أذاكر الا قبل الاختبارات بيوم واحشك نفسي واطنش المذاكرة بعض الاحيان علشان اطلع مع الاصحاب ، ان شاء الله اشد حيلي هالسنة وابطل هالاهمال .
 
الي أعرفه أن الشطرنج يزيد من ذكاء الأشخاص أما ألعاب الفيديو يمكن تزيد لكن بنسبة بسيطة خاصة ألعاب الألغاز مثل بورتل.
 
مااشوف هالكلام صحيح يعني ممكن الالعاب تفيدك زي ماقال رازييل وتفيدك بالانجليزي برضوا لكن مااشوف الشي هذا له علاقة بالدراسة

أنا الالعاب تلهيني عن الدراسة ومااقدر أوزن بين اللعب والمذاكرة

الدراسة يبيلها شدة حيل وبس .
 
ننتندو فان قال:
الي أعرفه أن الشطرنج يزيد من ذكاء الأشخاص
أنقر للتوسيع...
أما ألعاب الفيديو يمكن تزيد لكن بنسبة بسيطة خاصة ألعاب الألغاز مثل بورتل.
أنقر للتوسيع...

أنا كنت أعتقد كذا , لكن اكتشفت أنها لعبة سطحية تعتمد بشكل كبير جداً على حفظ الOpenings .





ما أشوف علاقة بين الجيمنج والتفوق , لكن أغلب الهاردكورز اللي مروا علي متفوقين .

الشيء اللي من فترة مقتنع فيه هو أنه المفروض يكون عند الطالب القدرة أنه يدخل الاختبار بدون مذاكرة ويجيب 75% من الدرجة على الأقل , لأن المفروض ما تحتاج تذاكر أصلاً لو كنت تحضر الدروس وفاهم - مهو حافظ!! - الكلام اللي يقوله الدكتور أو المدرس ..
 
قد تكون من ناحيتين :

1/ كتعلم اللغة والتحسين من مستواها.
2/ تسبب إهمال الدراسة وغيرها من الأمور الإجتماعة اذا كانت من ناحية الإدمان.

والناحية الثانية أكثر تأثير من الأولى.

في النهاية هدف صنع ألعاب الفيديو للترفيه لا غير وليس له علاقة في تحسين التفوق الدراسي لكن العكس قد يحدث اذا تجاوز الأامر اكثر من كونه ترفيه الى إدمان وغيره.
 
هو شي واحد بس .. انت تشوف نفسك تقدر تعطي الدراسة حقها و في نفس الوقت الفيديو جيمز؟ اي يعني تنظيم وقت و بما انك تنظم وقتك هذا يعني انك تعطي دراستك حقها و في نفس الوقت ما تحرم نفسك من اللعب خصوصا وقت الدراسة .. مثل على الناس اللي مايعرفون ينظمون وقتهم و انا منهم سابقا كنت العب طووول اليوم و لا افتح اي كتاب هذا الكلام في الثنوية و كان معدلي 1.0 من 4.0 الـGPA (مدرسة امريكية) و ثاني ثنوي معدلي كان 1.3 من 4.0 لكن كبرت و عقلت و فهمت انه مستقبلي في دراستي و ليس في هوايتي اللي هي الفيديو جيمز عاد في الثالث ثنوي سويت لي جدول اسبوعي و حددت فيه ساعات اللعب و ساعات الدراسة و لله الحمد هذا الجدول خلاني اطلع بمعدل 3.4 من 4.0 آخر السنة و هذا يعتبر انجاز و الشكر يعود لله سبحانه ثم الجدول الإسبوعي .. و بالنسبة لسوالك اللي طرحته في آخر الموضوع شوف هو ايجابي و سلبي في نفس الوقت .. سلبي من ناحية قصتي اللي ذكرتها لك غير انه كثرت الساعة تعور عيونك و الخ و ايجابي لأنه يفتح مخك خصوصا لين تلعب العاب يبيلها ذكاء و تركيز و عزيمة غير تقوية اللغة الإنجليزية مثال انا ولد عمي ميييييح في الإنجليزي كان مايعرف الا الكلمات البسيطة لكن لما كان يلعب فاينل فانتسي كان يحط قاموس جنبه و طول ما هو يلعب يفتح القاموس و يقرأ و يثقف نفسه بالكلمات و الحين ما شاء الله يرطن انجليزي كأنه امريكي. فالنهاية الفيديو جيمز هواية عند الإنسان و مستحيل تمنع الإنسان من انه يمارس هوايته لو شتسوي والله لو تسجنه بتلاقيه يبتكر لك شي و هذا بسبب حبه لهوايته و الشي اللي يستمتع فيه
 
أنا مجنون شي إسمه هيلو :evil:: , بس نسبتي ما تزيد عن الـ 90 أببببد

قاعد عـ الـ 80 و مو عارف أتخلص منها:sarcastic:

بس نعمة .. نعمة :inlove:
 
انا الان فاشل دراسيا للاسباب نفسية 🙁

بالنسبة للفيديو جيمز اشوف انطباعها ايجابي بالنسبة لي من ناحية الخيال, اللغة والتجارب وطريقة التفكير وانا اتعايش مع اللعبة -RPG- الي تحتوي على هذه العناصر غالبا
لكن كطابع دراسي مممم مدري اذا لها تاثير او لا... الا اذا تقصد ان اغلب الجيمرز يكونوا شطار او دوافير تقريبا الاحظها لكن مافي شي مثبت اكثر من فرضيات علمية واحصائيات لا اكثر والله اعلم
 
والله حسب كلام الوالده الله يحفظها دايما تتذمر من الاكس بوكس وتجزم ان الفيديو قيمز يأثر بشكل سلبي 😀‏
انا عن نفسي حاس أني شيبت .. ذاكرتي صارت ضعيفه ومستواي تدنى خلال السنتين الاخيرتين ! ماأقدر أقول السبب هو الفيديو قيمز خصوصا أني ألعب من عمر 5 سنوات وكنت متفوق دراسيا "ماشاء الله"
حتى الان مدري وش السبب ؟ هل فيه أحد مر بفترة حس انه غبي وبطيء الفهم ؟ ياريت يطرح تجربته لعل وعسى أحسن ذاكرتي شوي
 
صعب تقيس بهالستاندرز اللي عايشين فيها. الموضوع يتشعّب لأمور كثير ومنها مستوى التعليم عندنا, يعني فيه ناس كثيرة يمديها تصير توب دراسيا وتكرف آخر 3 اسابيع قبل النهائي وياخذون 98% وهم نايمين. لو مثلا وزنتها على اختبارات الوزارة لما كانت موجودة, اقولك "يمكن" بحُكم ان اختبارات الوزارة إلى حدّ ما تُعتبر مقياس إلى حدّ ما جيد. أنا اشوف هنا اللي يدخل الجامعة ينسى يحصل وقت يلعب فيه, إلا إذا كان "مرتب" بمعنى الكلمة وهذا شيء برضوا ثقافيا منقرض من عندنا يالعرب. نادر تحصّل عائلة عندها اساسات مرتبة بشكل كامل والسبب يعود إلى التكاثر الـ "غير مُطلق" ولا يدرون وين الله راميهم ومافيه غير جيب بزران..ألخ وهذا عامل كبير برضوا يحدّدك مستواك الدراسي من جهة ثانية. ولو اتكلم عن العوامل الأخرى اللي مُمكن تدخل فيها الدراسة اللي تتكلم فيها انت راح نتعب. لكن عموم الكلام صعب جدا تقيسها بدون ماتحط في بالك الأمور اللي مُمكن تأثر فيها. علما اني كنت 98%-95% إلى ماجت اختبارات الوزارة وشطحت فيني لـ 90% لذا ذكرتها كـ معيار جيّد لقياس مستوى تعليم الطالب.

على فكرة, انا و Photon قبل كم يوم كنا نتكلم بهالموضوع وكلنا اقرّينا ان التعليم في السعودية يُعتبر "ولاشيء" خصوصا مراحل التربية والتعليم. وبالمُقابل حنا قاعدين ندفع الثمن بصعوبة منهجية غير منطقية على الإطلاق. وفوق هذا كله راح تحتاج تدرس سنة إضافية زيادة قبل الفاونديشن علشان تصير مثل مستوى باقي الطلبة اللي يبدؤون بـ ماث 189 اول سنة مثلا, ولو تقارن هالمستوى مع كُتب ماث الثانوية اللي ندرسه راح تحصل انه فيه gap يُقدّر بحدود 3 لفلات بالنص بين منهج الثانوية اللي يُعتبر "نظرة" للماث بشكل عام بالمُقارنة مع المناهج الحقيقية اللي تُدرس في ثانويات المدارس برا السعودية. هذا يثبت ان مش بس اسلوب التعليم فاشل, لكن المناهج كلها مالها اي داعي في الحياة.

بشكل عام اللي حاب اقوله ان مافيه امل تقيس على دراستنا, ابدا.
 
التعديل الأخير:
^

كلام جميل .. أضيف على كلامك أن أختبار القياس والتحصيلي أيضاً معيارين جيدين لـ قياس مستوى التعليم العام .. وأكبر دليل على ذلك الفروق الواضحه مابين درجات المدرسة ومابين درجات القياس مثلاً ..
 
يجب تسجيل الدخول أو التسجيل كي تتمكن من الرد هنا.
عودة
أعلى