شنو تعريفك بالضبط للمتعة في مشاهدة فيلم درامي يتحدث عن تجربة انسانية ؟
فيلم 432 مو من هوليوود , لذلك ماراح تشوف فيلم تقليدي , ماراح تشوف واحد من الشخصيات يطلع لك بالنهاية يقولك ترى فكرة الفيلم كذه كذه , هذي مشكلة هوليوود مؤخرا , السطحية في توصيل فكرة الفيلم للمشاهد , و المشكلة الأكبر المشاهد الي تعود على هذا النوع من السرد في النص .
و بكلامنا عن الملل و بخص مشهد "العشا" , هذا المشهد يصور لك بطريقة متقنة معنى الدراما النفسية , الغموض , الخوف و الربكة , هذا المشهد بكل صراحه أتمنى أشوف مشهد بقوته في هوليوود الحديثة , الي تتمنى تصور نفسه , ما أبالغ أبد لو أقولك انه هذا أفضل مشهد شفته فسنة 2007 , هالمشهد مرعب أكثر من أفلام الرعب , يحمس أكثر من أفلام الأكشن , مضحك (عالقدر) أكثر من الأفلام الكوميدية , هالمشهد بكل بساطة عظيم! , ليش ؟ أساس المشهد هذا و الهدف منه , انه القدر حاليا يلعب دوره , الحياة تلعب لعبتها , كم شي فكرت فيه بهاللحظه و انت تشوف ملامح أوتيليا ؟ حتى زاوية التصوير كانت عبقرية , الكل يضحك و مبتسم , و أوتيليا القدر يسخر منها , بعد كل الي شافته و جربته , قاعدة في بيت وحده عجوز تحتفل بعيد ميلادها , اللحظات و الدقايق الي تمر ببطئ , أعتقد لو بتكلم عن هالمشهد , ماراح أخلص ليما ينزل فيلم أخرج مشهد مثله ( مع اني ماعتقد ) .
أما بالنسبة لهدف الفيلم , الظاهر انه في مشهد ما ركزت فيه عدل , و هو اعتراف اوتيليا لصديقها عن حادثة جابي , الأسئلة الي سئلتها ( لو حملت منك ؟ لو سويت الخطيئة معاك ؟ شنو بتتصرف ؟ شنو بتسوي ؟ راح أمر بنفس الي مرت فيه جابي ؟ ) و هذي قضية من أشهر القضايا في عالمنا حاليا و الحمل الغير شرعي , و الاجهاض , أو قتل النفس البشرية , و الي هي أبشع الجرايم من بداية التاريخ , كل أنواع الناس يقومون بالخطايا و لكن وقت دفع الثمن هل يكون الانسان مستعد لهذي اللحظه بقدر استعداده لعمل الخطيئة ؟ اسئلة شفافية كثيرة يطرحها السيناريو , بكل واقعية , من تجربة صديقتين , في يوم يعتبر أسوأ يوم في حياتهم .
قلت واو لما أوتيليا بكل يأس و تحطيم قالت أنا ما عندي دورة شهرية و الدكتور غير فكرته , قلت واو بمشهدالصمت و الهدوء بعد ما راح الدكتور و قلت واو على مشهد الاتصال بالتلفون , قلت واو على مشهد رمي الطفل و طريقة التصوير المذهله بذاك المشهد , قلت واو لما شفت الطفل محذوف في الحمام , قلت واو على واقعية الفيلم , قلت واو على الساوندتراك الي مافيه و لا تراك , قلت واو على التمثيل من الثلاث شخصيات في المشهد المرعب في الشقة , قلت واو على تمثيل اوتيليا , قلت واو بمشهد النهاية ( فكرة انه اوتيليا شاهدت الكاميرا ) , قلت واو على مشهد العشا , و قلت واو لما شفت ردك .
فكر بالكلام الي قلته , حاول تربطه بالفيلم , جاول تتوصل لروعانية و كمالية السينما المصورة في هذا الفيلم .
" لوول.
