أبي أقفل التورنت!

[Colorization]

المختصر المفيد: أبي طريقة تخليني أقفل التورنت بأي طريقة كانت على كل -أو حتى بعض- مستخدمي الراوتر عندي بالبيت

اليوم أبوي ركّب 2 ميجا بعد ما إشتكيت له من شهر تقريبا ً على الوضع البايخ بالبيت، واحد ينزّل لي 5 ألعاب PSP ما يلعبهم ويلعب Maple Online بنفس الوقت ولما نكلمه عن التقنين يقول لنا أوكي ويسحب علينا سيفون. الكل متفق إنه يحمّل تورنتين كحد أقصى فقط، ويفضّل الكل يقعد مع ملف تورنت واحد. الكل تمام ما عدا أخوي الصغير، كل يوم أروح أشيّك على كمبيوتره وأشوفه يحمل 4\5 ملفات ولا كأنه في ناس تشاركه الإتصال :evil:

دشيت على الـprefrences وحطيت الـMax tasks هو 2، لكنه عرف السالفة ورجّعها حق 16 (16 يا ظالم!!!)، حطيت الـMax. Download يكون 10 ورجعته 5، لكنه يرجعهم Unlimited! وأبوي مو راضي يكلمه لأنه مو عارف شنو التورنت أصلا ً

كلمت اليوم الدعم الفني حق شركة Quality Net وقال لي إنه ما عنده طريقة يمنع فيها الشي ما عدا التحكم بالـprefrences من البرنامج. لذلك؛ أي أحد عنده أي فكرة عن طريقة تقفيل التورنت سواءا ً غلق بورتات من الراوتر أو أي طريقة ثانية؟ عادي عندي أعتزل التورنت لأني ما أستخدمه إلا ما ندر، أفلام\مسلسلات قمت أشتريهم -ما احب أنطر لما انزل شي كبير لول- والألعاب أشتريها، ما عندي شي تقريبا ً بحمله تورنت، ولو فكرت إني بحمل شي ضروري أكنسل الطريقة اللي راح أتعلمها من أي أحد بالموضوع أيا ً كانت وبعدين أرجعها :cryy: مو شرط يتقفل التورنت تقفيل نهائي، أي شي ممكن يساعد بحجب ولو كمية بسيطة من الـhunger اللي هو فيه بكون ممتن 🙁

 

[Humam]

خخخخخ مع الأسف التورنت أعاني منه في البيت كثيرا مع أخوي الصغير, مافي الا تنزيل أفلام.

في طريقة ممكن تنفع, حاول تعرف البورت الي يستخدموه أخوانك في برنامج التورنت وسوي له بلوك من الراوتر لول, صراة ما جربت الطريقة بس يمكن تنفع.

 

[Death match]

ههههههههههه اخوك له مستقبل باهر

حل المشكلة بسيط

انطر لين ما تبدأ المدارس 😀

 

[m7tram]

خرب كمبيوتره P: .

 

[Colorization]

أخوي له مستقبل باهر if I knocked him down to his grave، العناد ما أحبه ياخي + بلعب أونلاين!!!!!!! من أسبوعين تقريبا ً البيت كله سافر وجربت ألعب Gears of War عالـ512 مع الأمريكان، مافي لاق كلش! كان ودي لو أبكي من حلاوة المشهد: ألعب بدون لاق! :cryy: ذاك اليوم لعبت مع Khalid.S ستريت فايتر، لول صوته مو قادر أسمعه واللاق فظيييييع وبالأخير tadaaa الكونكشن فصل
تعبت من الوضع!

خرب كمبيوتره P: .

like أرميه من السطح؟ راح يعرف إنه آنا
أخربه وألعب بملفات السيستم؟ كلها يوم واحد ويرجع الجهاز من المحل جديد وأحسن من قبل :evil:

أصوت لإستخدام Shoryuken على دماغه :evil:

 

[NSider]

قفل بورت برنامج التورنت حقه من الراوتر.

أو ممكن تقفل كمبيوتر أخوك تماما من الراوتر عن طريق الماك أدرس حقه وما ترجعه إلا لما يلتزم بالليميت حقه (وإذا ما التزم، قفله مرة ثانية) لأن أفضل طريقة هي التفاهم.

أنا مجرب الشي هذا مع أخوي، واتفقت معه أن يحط الليميت 2 في نفس الوقت، وما ينزل إلا بالليل. طبعاً أقنعته بالطريقة الثانية لول.

 

[Colorization]

شلون أطلّع الـexact port اللي يستخدمه؟
+
أعرف سالفة الماك أدرس لكن مادري شلون أطلعه بالضبط، بشوف الطريقة بجووجل وراح أخليها حل ثانوي، حلي الأولي التعاطف والمودة مع إنه مو عاجبني

 

[NSider]

البورت تعرفه من إعدادات برنامج التورنت.

الماك أدرس ممكن تعرفه من الراوتر، أو من الجهاز نفسه بالطريقة التالية:

-روح لـ Start --> Run
-اكتب cmd بعدين اضغط enter
-في شاشة الـcmd اكتب ipconfig /all (لا تنسى المسافة قبل الـ/) واضغط enter
- راح تطلع لك معلومات كل النتوورك أدابترز. شوف الماك أدرس (aka physical address) حق النتوورك أدابتر المستعمل مع الراوتر (يعني إذا كان وايرلس شوف معلومات الوايرلس).

 

[Colorization]

تسلم NSider

امممم شي واحد جا على بالي، آنا أعرف كيف أفتح بورتات من الراوتر لكن كيف أعطيهم بلوك؟ ما يحتاج شرح تفصيلي أبدا ً، بس بعرف إذا كان موجود ضمن نطاق فتح البورتات والـsecurity tab

 

[Colorization]

مكرر.......

 

[q8 spy]

كينجي أنا نفسك 🙁


لاعت جبدي ....


ولا يشبك أونلاين بعد

كاهو يمي قاعد ... ودي أشوته :evil:

ولا يلعب
يلعب بوكيمون على الدي أس ( اللاق ذبحه ) لوول 😀



يامعود


قسم وقتك أنت وياه

أنا وأخوي مانشغل التورنت إلا إذا نبي نام ...

لما نام نشغله ... لين مانقوم من النوم ...

 

[Mr.3B]

...

الله يخلي الدبج :yuck:

 

[Colorization]

لول q8 spy، عشان جذي ما أقبل الـinvites اللي تدزها لي ولما لعبت معاك جم مرة كنت زفت 😛 النت عندي زي الزفت =_=

لقيت طريقة حلوة بالراوتر (توه جديد، قاعد أكتشف خباياه لول)، حظرت الموقع اللي أخوي يحمّل منه ألعاب البلاي ستيشن2 والـPSP. يحمل ألعاب حجمها 4 جيجا ولا يلعبها!!!!!! يستاهل الشنق

هذا بأسوأ أحواله ترا لول، من جد فلة

 

[Mista Koo]

كذا تخليني أحس بمعاناة اللي معاي في البيت xD
لو تهوروا نزلوا ملف 100 ميجا.. وأنا أتحسف أخلي الكمبيوتر فاضي لما أنام.. أخليه ينزل 4 جيجا ولا شي زي كذا P:

 

[AMG]

استخدم سياسة التهديد و الوعيد :evil:

 

[CyberMaster]

فيه برنامج لو تبي يفصله من الروتر بدون مايحس بس يفصل النت كله عنده
http://www.arcai.com/modules/mydownloads/
جربته مع عدة روترات وشغال فعلاً بس الى يشغل نفس البرنامج ماعد تقدر تفصله

 

[Khalid-S]

كنت استخدم ستلايت في البيت لفتره ...... طويلة بقوه ... انفصلت عنهم من سنتين تقريباَ .. ركبت تلفون خاص فيني وعليه DSL لي ... احلى حلاوه .. 1 ميجا .. الي يمتص السرعه كامله هو انا.

 

[Ginko]

الصغير؟ ياحليلك. انا يوم كنت في الرياض اخوي الكبير الي كان يجيب خبر الكونكشن، المشكله انا الي معلمه على التورنت، لكن في النهايه اتفقنا على التنزيل فقط واحنا نايمين.

عموما، اولا وش نوع الراوتر؟
هل يفتح بورتات للتنزيل او ينزل على عماها؟

عطني الجواب لهذول السؤالين ثم نبدأ عمليه اجباره على سماع الكلام.

 

[Colorization]

كذا تخليني أحس بمعاناة اللي معاي في البيت xD
لو تهوروا نزلوا ملف 100 ميجا.. وأنا أتحسف أخلي الكمبيوتر فاضي لما أنام.. أخليه ينزل 4 جيجا ولا شي زي كذا P:

بالأول كنا بس 3، بعدين صرنا دبل (يا شين اليهال لما يتعلمون على النت غلط من أولها!)، المشكلة آنا اللي علمته عالتورنت وعلى كل شي، والحين متحسف قد شعر راسي :\

استخدم سياسة التهديد و الوعيد

إستخدمتها، وإستخدمت طريقة أخرى: مسحت كل ملفات التورنت اللي يحملها، وقلت له لو عاندت مرة ثانية راح تندم. بعدها بيومين شفته يحمل 6 ملفات مع بعض، كأنه يقول لي "go to hell"، رحت ومسحت الميموري كارد حقه للبلاي ستيشن2 😛 بعدها تاب أسبوع كامل ورجعت حليمة لعادتها القديمة
حركاتي بايخة لكن شسوي؟ :s

كنت استخدم ستلايت في البيت لفتره ...... طويلة بقوه ... انفصلت عنهم من سنتين تقريباَ .. ركبت تلفون خاص فيني وعليه DSL لي ... احلى حلاوه .. 1 ميجا .. الي يمتص السرعه كامله هو انا.

كلمت أبوي وقلت له، اركب خط آنا أدفع فلوسه وأركب إشتراك آنا أدفع له والمودم عندي، ما رضى. قال أدوبل السرعة قلت له ماكو فايدة، أمس رجع وصدمني يوم قال لي ركبت لكم 2 ميجا، لكن ما دامه على الـ20 تورنت اللي يحملهم، عز الله ما راح يتغير شي

الصغير؟ ياحليلك. انا يوم كنت في الرياض اخوي الكبير الي كان يجيب خبر الكونكشن، المشكله انا الي معلمه على التورنت، لكن في النهايه اتفقنا على التنزيل فقط واحنا نايمين.

عموما، اولا وش نوع الراوتر؟
هل يفتح بورتات للتنزيل او ينزل على عماها؟

عطني الجواب لهذول السؤالين ثم نبدأ عمليه اجباره على سماع الكلام.

عندي 2 أكبر مني وواحد أصغر مني بسنة، لكننا كلنا متفقين لأنه كلنا فاهمين إنه التورنت عنده hunger ما يمليه أي سرعة بالعالم، لذلك قلنا 2 حد أقصى. كلنا ملتزمين ما عدا زبوط النقعة اللي معانا :evil: وبما إنه الطيب والقوة ما نفعوا، بصير وحش معاه وأسلبه كل ما يملك

نوع الراوتر Speedtouch ما أذكر رقمه عدل (أقدر أجيبه لو تبي)، أقدر أحط بورتات معينة لكن حتى بالراوتر القديم ما كنت فاهم كيف أقفل بورتات معينة. حاليا ً، آنا قفلت موقع كان يدشه بشكل كبير ويحمل منه ألعاب، سواء حس بهالشي وإلا لأ آنا عارف إنها خطوة موفقة. باقي علي أقفل البورتات وأتخذ إحتياطاتي من ناحية الماك أدرس والبرنامج اللي حطه زينغ (شكرا ً!)

 

[Ginko]

ما قد استخدمته، لكن غالب الراتورات فيها نفس الخصائص.

المهم الحين تعرف كيف تدخل على صفحة الراوتر ولا؟ روح هناك.
قلب في الاعدادات الما تلقى شيء فيه Restrictions او Parental Control او اي شيء من هالقبيل في اعدادات الراوتر.
مثلا في الراتر حقي والي هو LinkSys فيه خصائص اقدر اخلي اي كمبيوتر على الشبكه ما يدخل اي موقع فيه كلمة Torrent، واقدر اخليه ما يستخدم النت في اي وقت ابيه واي ساعه ابيها، ما ادري اذا حقك في هالميزه، لكن دائما الواحد يقدر يشتري راوتر افضل.

المهم اذا رحت عند الPC او الRestrictions مهما كان اسمها، اكيد بيطلب منك انك تحط رقم الاي بي تبع الجهاز الي تبي تسوي عليه حجر، وعلى حسب الخيارات المتوفره بيعرضها لك.
لكن لا تنسى مهما تسوي في الراتر انك اذا خلصت غير الباسوورد للراوتر ولا تعلمه اياها.


وبالمناسبه البرنامج الي حطه زنغ ممتاز.

 

[Colorization]

محد يعرف صفحة الـconfiguration غيري آنا وأخوي الكبير (هي الـDefault Gateway بس محد يعرف لول). أمس دشيت عالبارنتل كونترول وحجبت الموقع اللي قلت عنه فوق، الحين بدش وبشوف شنو أقدر أسوي، وبحاول آخذ الـlistening port وأحجبه عشان تزيل الشبهة عني 😛 لأنه لو شاف إنه كل مواقع التورنت ما تشتغل راح يعرف إنه السالفة فيها شي وبيكلم أبوي، المشكلة أبوي ما نقدر نتفاهم معاه عالتورنت لأنه مو فاهمه.

بالنسبة للبلوك، أحط الآيبي أدرس وإلا الماك أدرس؟ لأنه إذا الآيبي معناتها لازم أسوي له Static IP Address

 

[Ginko]

اكيد البارنتل كونترول فيه اعدادات الى بكره، قلب فيها والعب فيها.

بخصوص الlistening port فهي مو مهمه، بما انه ما يعرف كيف يسوي اعدادات للراوتر اذا هو ما يعرف كيف يفتح بورتات للتنزيل، عشان كذا لو تروح عنده وتشوف سرعة كل تورنت ينزله مستحيل يعدي 10 كيلو، ودائما الstatus اصفر او بما معناه Firewalled. فبما انه ما يعرف ان اساسا تقدر تعدل هالشيء وتقدر تخلي التنزيل اسرع بمليون مره، اذا ما يهم انك تحجب عليه بورت، لان اساسا كل البورتات محجوبه الا الي تفتحها انت manually، وعلى كلامك ما يعرف ان صفحة الراوتر لها وجود لول، اذا ما يقدر يسوي شيء ولا تشيل هم البورتات حاليا.

بخصوص الماك ولا الاي بي، فهم كلهم ينفعون. انا في الراتر عندي يطلب مني الماك ادرس او الاي بي ادرس، الاخير تقدر تعرفه بأنك تروح جهازك وتضغط على الشاشتين الي تحت في الزاويه الي تمثل الاتصال بالنت، ثم روح support وبعدين تلقى ال IP Address هناك، وكل كمبيوترات النتورك لها نفس الارقام الثلاثه الاولى، زي مثلا انا هنا كل الكمبيوترات لها ادرس مثل التالي:
(هنا ثلاث ارقام او اقل، تختلف من جهاز لاخر).192.168.1
فانت كيد عندك نفس الشيء، احصل على اخر ثلاث ارقام بالطريقه المذكوره من جهازه. لكن خل في بالك انها ممكن تتغير اذا طفأ الراوتر او فصلت الاسلاك. فاذا صار هالشيء فلازم تحصل على الادرس مره ثانيه وتعدل الادرس الي كنت حاطه في الراوتر الي عليه حجب.
وتقدر تستخدم الماك ادرس بعد.

 

[Colorization]

هو Improved nOOb لول، ما يعرف شي غير التورنت اللي إحنا علمناه بالغلط. ينزل أغاني ما يعرفها (هو أصلا ً ما يسمع ولا يهتم للأغاني! بس جذي ينزل!) ينزل ألعاب PSP\PS2\PC بالهبل وعالمزاج، بس جذي! وفوق هذا كله يعاند

بالنسبة للآيبي أدرس، عندي شيئين أقدر أسويهم، إما إني أحط له Static IP وهو آيبي ثابت ما يتغير حتى لو فصل، أو آخذ الماك أدرس لأنه ثابت على طول. الحلو بالراوتر هذا إنه فيه أشياء يديدة ما كانت متوفرة بالقديم، منها إني أشوف منو شابك عالراوتر؛ أقدر أشوف أسامي الأجهزة كلهم وأمسك اللي أبيه وآخذ الماك أدرس حقه وأصكه بلوك شنيع لووووول

it's time to get dirty 😛 شكرا ً جينكو

 

[Ginko]

اجل ممتاز، الخصائص هذي بتسهل لك عملك كثير. العفو، ولا تخف عليه لول.

 

[Colorization]

^ مساكين المحظورين 🙄

أشكر كل من ساعدني لبلوغي إلى هذا الهدف النبيل 😛
خلني أحمّل كم لعبة آركيد خاطري فيها وألعب شوية Online matches بعدها أفكر أشيل الحظر، وناسة :cryy: