TG الكويت...بروفه !

[Jizasu]

السلام عليكم و رحمة الله و بركاته


اما بعد...بالامس و تحديدا بالساعه السادسه و النصف من مساء دولة الكويت تم اللقاء بين التاليه اسمائهم :

Arikado
Meshary
خالد 333
Jizasu
Deep River

تم اللقاء بمجمع الرحاب...و على انتظار الاكس بوكس 360 الذي يخطف الانفاس ولكن للاسف لم يتواجد الى الان لول
اخذتنا الاحاديث المطوله عن تروجيمنج و عالم الفيديو جيمز...و الكثير و الكثير من الاحاديث التي تدغدغ مسامع الصاغي و كذلك الافلام و اخر المتطورات و..و..و الخ !

غاب عن هذا اللقاء رابسو و كذلك صديقنا محترم و الذي لم يستطع ان ينتظر اكثر بسبب وجود ضرف طارئ + تأخري على كل من خالد و محترم نفسه
اوكي خلاص بلى لغة فصحى و انتكلم بالعاميه XD
اول شي كان البرد قارص لدرجة انه الشباب و الي انا منهم طبعا اقترحنا على خالد ندش داخل المجمع لانه الحبيب موقفنا بره <<< عاجبه الجو
ديب ريفر و اريكادو سبقونا بالدخول...لأن ديب ريفر كان يبي يشترله جم فيلم جديد فصرت انا و مشاري و خالد و باقي الشباب ^^
و بعد ما دشينا داخل...قال خالد انه انا اليوم مجمعكم لان قبل فترة قال يبي يسوي اجتماع اعضاء TG بس محد لبى النداء...و الغريب اني ما اذكر انه قال هل شي مني بتروجيمنج....يمكن لان انا انقطع عن المنتدى فترة و ادش بعد فترة ماعليه ^.^

و قتله انه TG بالكويت ما ينفع...و حتى لو صار ماراح نقدر نجمع اكبر قدر من الاعضاء لان اعضاء الكويت يميلون للخجل مادري على شنو اذا هم مستحين من اشكالهم و خلقتهم عيل خل يشوفوني >>> لووول انا دب و شعري خفيف و و و...الخ !


على العموم و انا اسولف وي مشاري مراقبنا مشاري اعربلي عن اعجابه الشديد بسلسلة ديد اور الايف...و الي انا اقعد اللعبها بروحي من دون منافسين و ما حصلت التيميت....فدلني على محل شريت منه اللعبه و ابشرك مشاري اليوم طلعت 6 ازياء حق هاتومي اذا ماني غلطان بالاسم !

وراها سألت خالد اذا يعرف يلعب سول كاليبر...و قالي انه يعرف يلعب الجزء الاول الي على الدريم كاست و يعرف يلعب سول كاليبر 2 على الاكس بوكس...قتله تعال نلعب 2 على السوني قالي لأ...لانه يحب يلعب بسباون...و سألني هو بالمقابل اذا اعرف اللعب بديد اور الايف و قتله اي اعرف اللعب فيها...

انا ديد اور الايف ما لعبت فيها من اول ما انزلت على الاكس بوكس...لوول يعني لعبي اي شي فيها سوينا تورنمينت...و لعبنا اول شي سول كاليبر و كانت النتيجه :

خالد X مشاري
صفر - 1
جيزاسو X خالد
2 - صفر
جيزاسو X مشاري
1 - صفر

طبعا سبب تدني القدرات و فوزي مو معناه احترافي...لأني لاحظت انه مشاري كان يقدر يعطي بلعب ولكن ناسي الحركات و حتى خالد نفس الشي

وراها حيطنا ديد اور الايف...و خالد باراني و كانت النتيجه :

خالد X جيزاسو
1 - صفر
جيزاسو X مشاري
صفر - 1
وخلال اللعب انظم الينا ديب ريفر و صار فيه عدد من المباريات و النتيجه :
ديب ريفر X مشاري
صفر - 1
جيزاسو X ديب ريفير
6 - 4
خالد X ديب ريفير
1 - صفر

طبعا خالد اهني طلع لنا المهارات الي كان خاشها طول الوقت و كشر عن انيابه في حلبة القتال...و ما شاء الله مشاري ابدع بلعبه المتواضع و الي فيه فن بكل خطوه يخطوها بلاعبته اياني ! بعدين مشاري اقترح نلعب كلنا...و اصر ان اريكادو يشارك...طبعا اريكادو مالفت انتباه اي شخصيه...لكن بعد ما مشاري قاله انه نينجا جايدن موجود لول ما تردد و خذاه ! و انا خذيت نينجا جايدن و ديب ريفر كاسومي...و مشاري اياني و كانت النتيجه :

ديب ريفر اعرض انه ينافس اريكادو لاسباب مجهولة فاخرجني للحلبه و اريكادو مادري بشنو كان لاهي و انا اطق و اطق فيه لووول P: الظاهر يفكر متى بنشغل سوبر سماش P: على العموم بعد ما قتلت اريكادو ظهر مشاري بلاعبته اياني....و ادخلت ديب ريفر...و فنقشنا مشاري....و ارواحنا قامت تتراوح للآخر...و مافي مجال للفوز...و ديب ريفر ما رضى انه يخسر فدخلني الحلبه و اختمتها على مشاري لووول مسكين...كان بروحه لان اريكادو ماله خبره بديد اور الايف....
النتيجه :

Arikado+Meshary X Jizasu+Deep River
1 - صفر

وراها قررنا نروح نتعشى...و انضمو معانا نخبه من الشباب بينهم اعضاء من منتدى المنتدى بس للاسف الاسماء غابت عن ذاكرتني...ولكن اضفو جو حلو خلال الامسية ^^

و خالد قالنا نختار المكان الي نتعشى فيه...و اقترح برجر كنج على غرار ما فعله اعضاء TG بالمملكه العربيه السعوديه الشقيقه بس قتله لو السالفه جذي...فانا اقترح ماكدونالد لخلق نوع من انواع المنافسه...لول ورحنا ماكدونالد..
بالبداية اريكادو قال انه مو مشتهي...و بعد ماحجزنا طاولات للجلوس رحنا انا و مشاري و طلبنا...وراها...ٌرر اريكادو انه يأكل...بس ديب ريفر كان خايف يزيد وزنه فما أكل شي XD

و في وقت العشى و احنا جالسين ناكل و نسولف و نتغشمر....بالطاولة الي بالخلف...كان فيه فتاة شفت امرها غريب و مشيتها و خطاها قامت تثقل....مره وحده تطيح !!
و الناس قامت تتفرج من دون مساعده...و انا خفت اخطو خطوه و خاصه انه كلهم بنات و اي حركه ممكن يفسرونها خطئ او على هواهم...

ديب ريفر المغاور قرر يتحدى هذه الترددات...و قام و راح للبنات الي معاها و سألهم شفيها قالوله انه فيها ضيق تنفس...فقام و قال ممكن اساعد...و بعد ما أخذ موافقة البنات الي معاها قام و حمل الفتاة من الرض و وضعها بين ذراعيه مسرع للصيدليه الي باسفل المجمع...و السكيورتي بعد ما شافوا محمد (ديب ريفر) شايل البنت قررو المساعده و اكملو المسافه و شالو البنت عنه...و أوصلوها الى الصيدليه ولكن للاسف ما فيها اختصاصيين و مساعدين بمثل هل حالات...فطلبو الاسعاف و على ما يوصل رجعلنا ديب ريفر...

الكل هنئ ديب ريفر على هل شجاعه و وصفه بالشهم و بالفعل هل رجل شهم وله عدة مواقف نشهد عليها ^.^
وراها...على اساس انه خلصنا رحنا نوصل مشاري والشباب و خالد لسيارتهم....و اول ماوصلنا هناك وقفنا على ارجلنا قرابة الساعه اذا ماني غلطان لول...واقفين نسولف.... و قررنا نسوي لقاء ثاني نجمع فيه اكبر عدد من الاعضاء...

و كل شوي نقعد نسولف و كل شوي نقرر نمشي...ممكن اكثر من اربع مرات لوول
و بالاخر قرر خالد انه ناخذ صوره جماعيه....بس اول المعارضين مشاري و ديب ريفر و اريكادو و لاني وافقت خلوني شخصيه مرتزه بكل مكان لووول ! انا ما عارضت احد ياخلذلي صور لانه اول وتالي الكل قعد يشوفني و الكل متقبل شكلي ما اوقفت على اعضاء المنتدى يعني

و بس بالاخر كل من ركب سيارته و مشينا و سلمنا على بعض و سجلت رقم خالد و مشاري و خذيت اميلاتهم
طبعا رابسو و محترم غابو عن هل لقاء بس ان شاء الله المره اليايه كلهم يوون معانا و ناخذ صوره !!!!!! -ضروري- و الي يعترض بشهر فيه بالمنتدى مثل ما سويت بالي فوق...و كذلك نبي Ash و محمود ينضمون معانا بالمرة القادمة...و اي عضو كويتي يي معانا حياه الله ^.^ أعضاء TG Welcome


و ما طولها عليكم اكثر من جذي لووول...
السلام ختام Jizasu,,​

 

[خالد 333]

مشكور عيسى على الموضوع الروعة بصراحة والي مليان فضايح :bigSmile: << قلنا صريح بس مو جذي

ديب ريفر المغاور قرر يتحدى هذه الترددات...و قام و راح للبنات الي معاها و سألهم شفيها قالوله انه فيها ضيق تنفس...فقام و قال ممكن اساعد...و بعد ما أخذ موافقة البنات الي معاها قام و حمل الفتاة من الرض و وضعها بين ذراعيه مسرع للصيدليه الي باسفل المجمع...و السكيورتي بعد ما شافوا محمد (ديب ريفر) شايل البنت قررو المساعده و اكملو المسافه و شالو البنت عنه...و أوصلوها الى الصيدليه ولكن للاسف ما فيها اختصاصيين و مساعدين بمثل هل حالات...فطلبو الاسعاف و على ما يوصل رجعلنا ديب ريفر...

لوووووووووول فضحت الولد

وحبيت أضيف إن الإجتماع الرئيسي لأعضاء TG ( لأنه مثل ماقال عيسى هذي كانت بروفة )

راح يكون بوقت ما من شهر ديسيمبر

طبعا بعد أخذ رأي عيسى وباجي الشباب يعني لازم كل شباب الكويت يكونون موجودين

 

[Final Fantasy]

لو كان أي يوم ثاني جان ييت معاكم .. بس الميتنج ما سويتوه الا يوم الخميس و هاليوم بالذات ما أقدر أطلع فيه لأنه يوم مخصص لتجمع العائلة في بيتنا >_<

ان شاءالله الجايات أكثر

و موقف البنت يكسر الخاطر .. شلون محد تكرم و ساعدها !!

 

[Jizasu]

ان شاء الله اليايات اكثر...و باليايات...راح نأكد على كل من يبي يي...و راح نشوف يوم يناسب الجميع ! ان شاء الله ^.^

 

[bnbn]

التجمع شكله كان ناجح

و عجبني موقف ديب ريفر البطولي :razz:

و انا بانتظار التجمع الثاني
...

 

[Jizasu]

التجمع شكله كان ناجح

و عجبني موقف ديب ريفر البطولي :razz:

و انا بانتظار التجمع الثاني
...

لازم تيي لول ولو ييت تراجع جم درس من ال JP Class نسوي لنا منظمه

 

[Khalid-S]

ما شاء الله اهم شي انكم استانستوا ^^ .. ومحمد ما شاء الله عليه شهم فعلاَ ومو غريب عليه هذا الشي ,, الا على فكره وش صار للبنت !! لا يكون ماتت او شي !!

وياريت تسون تجمع ثاني اكبر وتقررون يوم الكل يقدر يجي فيه وتاخذون صور وفيديوز يصير مثل TG Jeddah, Riyadh ونشوفه في عدد TGM الجاي

 

[king zell]

اجتماع حلو جدا.. لكن فعلا زي ما تقول أحس أعضاء TG الكويت ما يعزمون مثل اللي هنا على الإجتماع و لا أحس في علاقات كبيرة بينهم مثل هنا مثلا..


عالعموم أنا أكلم جولدن سن من فترة على إجتماع رسمي نسويه في الكويت بس المشكلة ما رد علي من وقتها لأني ما أعرف كيف الجدول الدراسي عند أغلبتكم..

اكيد بنقدر نضبط موعد يرضي الجميع

 

[Golden_Sun]

اجتماع حلو جدا.. لكن فعلا زي ما تقول أحس أعضاء TG الكويت ما يعزمون مثل اللي هنا على الإجتماع و لا أحس في علاقات كبيرة بينهم مثل هنا مثلا..

فعلاً <-- واحد صريح لول .. انا نفس الفكرة واردتني اليوم وانا اوري ديب ريفر مجلة TGM! .. *توه يوشفها لول*

وعن..

عالعموم أنا أكلم جولدن سن من فترة على إجتماع رسمي نسويه في الكويت بس المشكلة ما رد علي من وقتها لأني ما أعرف كيف الجدول الدراسي عند أغلبتكم..

المكان جاهز ، والموعد اللي يناسب الكل *اتوقع* هو بداية/منتصف شهر ديسمبر قبل امتحانات الفاينال والعيد بثلاث اسابيع تقريباً .. حتى يكون الكل فاضي..

 

[king zell]

كلمني بالمسنجر عبدالله

 

[Ash]

كان في TG الكويت ؟ حسبته شراء جماعي للاكس 360 فما اهتميت بالموضوع .

أوكي ان شاء الله الميتنج الرسمي القادم أكون موجود , و شكل الميتنج كان FUN ! خيرها بغيرها .

 

[Jizasu]

محمد هي مو سالفة انه الكل يعزمون بعض او من هل قبيل لأن لو هي سالفة العزيمه فانا اقدر اعزم كل الاعضاء الي عندنا بدوانيتنا او على طلعه او اي مكان يامرون عليه...السالفه انه معظم الاعضاء من دون ذكر اسماء يعانون من خجل رهيب لدرجة انه يخاف يسمعك صوته بالموبايل !!؟ ليش الله اعلم! اما عن اريكادو فهو مارضى ياخذ صوره -____- و قعد تناقشه عن لقاء اكبر من هذا ماعليه عبادي طبيت فيك بس الحق ماينزعل منه ! يعني صج...أنا شايف انه الصوره الي كان المفروض ناخذها امس ماكانت بتضر اي شخص...و حتى لو ما انعرضت بمجلة تي جي...تكون تذكار حلو على اول يوم تقابلنا فيه كلنا...الواحد ياخذ الموضوع من اكثر من منظور...و انا شايف انه صوره تذكاريه للشخص ابدا ما تضر ولا شنو رايكم شباب ؟

 

[king zell]

لا ان شاء الله نسوي اجتماع رسمي و نصور و نحط في TGM و أهم شي نجيب كل اللي يستحون لول..

و طبعا نسوي مفاجأة وشي مميز زي ما صار للرياض و جدة

 

[الــخــــارق]

نبارك لكم هذا الاجتماع الحلو
مع انكم كنتم ناوين ترجعون ومعكم
الـXbox 360

أهم شيء شفتوا بعض وانبسطتوا..

 

[Mesharey]

مع انكم كنتم ناوين ترجعون ومعكم
الـXbox 360

ماتقدر تقول ان كنا رايحين نشتري الـX360 .. كنا رايحين للقاء أغلب شي P:
هو في أحد كان بيشتري الجهاز ؟ P:

اليوم طلعت 6 ازياء حق هاتومي اذا ماني غلطان بالاسم !

الاسم تقريبا صح .. اسمها هيتومي ^^
تدرب أكثر عشان اللقاء القادم أباريك :razz:

اللقاء كان حلو صراحة واستمتعنا فيه كثير ^___^
بس كأول مرة ماكنا متعودين على بعض عدل P:
كان ناقصنا نشغل الجيم كيوب .. كان موجود معانا لكن مافي مكان نشغله P:

هذا اللقاء نقدر نقول بروفة وإن شاءلله بكون فاضي للقاء القادم بشهر ديسمبر بأي وقت ^___^

 

[m7tram]

خخخخخخخخخ يقولون تعال الساعه 5 ونص .. وهم ما وصلو الا الساعه 7 مالت -_-

انا ناقع داخل الرحاب من الساعه 5 وربع لي 7 وربعي شوي وياكلوني -_- يقولون اخرتنا على طلعتنا ووناستنا p:

فقلت خلاص خلونا نمشي ومشينا ..

المره الجايه ان شاء الله

 

[Aizmov]

لوووووول كان ودي انا موجود معاكم علشن احفلها في عبووووووووود (( Arikado ))
و موقف Deep Reiver مره حلو المره الجايه حاول تطيح عيسى شوف مين يجي يساعدك :jawDrop:: !!!
المره الجايه بجيكم بالهاليكوبتر تبعي على طول فوق مجمع الرحاب :razz:

 

[خالد 333]

خخخخخخخخخ يقولون تعال الساعه 5 ونص .. وهم ما وصلو الا الساعه 7 مالت -_-

انا موجود الساعة 5 ونص بس المشكلة ما اعرف رقم تلفونك فماقدرت أدق عليك

هو في أحد كان بيشتري الجهاز ؟ P:

لووووول بعد سعر الجهاز(270 دينار ) ما اعتقد

كان في TG الكويت ؟ حسبته شراء جماعي للاكس 360 فما اهتميت بالموضوع

الأغلبية فكروا بنفس التفكير و هذي كانت المشكلة ​

 

[Jizasu]

اليايات اكثر ان شاء الله...و بنتظار المفاجئه شهر ديسمبر !

 

[rubso]

بانتظار ديسمبر "اذا ما في امتحانات" شكراً جيزاسو

 

[Final Fantasy]

بليز لا يكون يوم الخميس .. و لو تنتظرون للعطلة الشتوية و نختار أحد أيام الأسبوع يكون أفضل بكثير و الكل فاضي و محد عنده حجة غياب !

نطلع من الصبح نتقابل الرحاب نتمشى شوي و بعدين نروح للسينما و بعدين نتغذى و نجلس أحلى جلسه للمغرب أو الليل .. شرايكم ؟

 

[Shot]

ان شاء الله الميتنج الياي اكون موجود معاكم بس اهم شي انه ما يصادف وقت الامتحانات لأن نص شهر ديسمبر راح تبدي امتحانات الـ 11 حق المقررات

واقتراح محمود خوش اقتراح

 

[Jizasu]

بليز لا يكون يوم الخميس .. و لو تنتظرون للعطلة الشتوية و نختار أحد أيام الأسبوع يكون أفضل بكثير و الكل فاضي و محد عنده حجة غياب !

نطلع من الصبح نتقابل الرحاب نتمشى شوي و بعدين نروح للسينما و بعدين نتغذى و نجلس أحلى جلسه للمغرب أو الليل .. شرايكم ؟

فكرتك حلوه و أيد رايك...ديسمبر و بالذات اخر ديسمبر وقت الاختبارات...فانسب وقت اعتقد يا نص ديسمبر او عطلت الربيع !

 

[squall leonhart]

شكل الاجتماع كان رهيب ^_^

و موقف ديب ريفر يدل على شجاعته و شهامته الكبيره ... يا ليت يصير لنا موقف زي كذا بميتنج جده الجاي و انا اصير الشهم لووووووول

 

[Ash]

بالنسبه لي من بداية ديسيمبر الى نهاية يناير اختبارات .

مع رأي محمود و بقوة .

 

[rubso]

بالنسبه لي من بداية ديسيمبر الى نهاية يناير اختبارات .

مع رأي محمود و بقوة .

انا اتفق مع راي محمود بعد .. وخلاص الامتحانات راح تبدأ 17 ديسمبر .. والامتحانات النهائية وراها باسبوع ! لكن في فرصة "عيد الاضحى" وبعدها نكمل الامتحانات!

 

[Jizasu]

عيل المفاجئه لازم تأقلم نفسها بخلال عطلة الربيع لان الشباب راح ينشغلون مع الاختبارات...ان شاء الله نحاول قدر المستطاع نخلي الموعد يناسب الكل !

 

[deep_river]

مشكوريين بصراحه حدكم اخجلتوني و اشكركم كثير الشكر...الصراحة الميتنج كان حلو انا احب التعارف على الناس و مختلف الشخصيات و هذا شيئ وايد يساعدني حتى في كتابة قصصي....(اقتباس سمات او كلمات معينة من شخصية معينة و انشالله اذا الله كتب احاول انشر قصة في المنتدى عما قريب...)

 

[Naif]

ماشاء الله محمد سوبرمان P:

لا و الله موقفك حلو ..

جمعتكم شكلها كانت حلوة ^^ في انتظار الحدث الرسمي (مش البروفه^^) .. و الصور P:

 

[خالد 333]

انا مع إقتراح محمود

مشكوريين بصراحه حدكم اخجلتوني و اشكركم كثير الشكر...الصراحة الميتنج كان حلو انا احب التعارف على الناس و مختلف الشخصيات و هذا شيئ وايد يساعدني حتى في كتابة قصصي....(اقتباس سمات او كلمات معينة من شخصية معينة و انشالله اذا الله كتب احاول انشر قصة في المنتدى عما قريب...)

لوووول محمد أخيرا رديت على الموضوع :razz:

عيل المفاجئه لازم تأقلم نفسها بخلال عطلة الربيع لان الشباب راح ينشغلون مع الاختبارات...ان شاء الله نحاول قدر المستطاع نخلي الموعد يناسب الكل !

عيسى لاتقول الموعد حق اريكادو خلها مفاجأة عشان لايقول ممنوع التصوير مرة ثانية