حساب محذوف
Hardcore Gamer
بسم الله الرحمن الرحيم و السلام عليكم
عايز أسأل سؤال بس خلينى الاول افرش مقدمة بسيطة
فى اى مجال من المجالات بيبقي فى خلاف بين الافضل كمستوى والاعلى كمشاهدات/ مبيعات
فمثلا فى الاغانى ففى شخص دا اعلى من التانى كمستوى كتابى وبفرق كبير ولكن التانى بيعمل اغانى بتجيب مشاهدات اعلى وعند اى مقارنة بيقول التانى للأول انه افضل منه فى كل حاجة و انه اجمد كتابيا والدليل أنه ناس كتير بتسمعه رغم ان اللى بيسمعوه ميعرفوش اصلا يعنى ايه مهارات الكتابة فانا كمغنى علشان ابقي ناجح بركز أكتر بقي على الموسيقي او الفيديو بقي او البنات اللى فى الفيديو علشان هو دا الذوق العام واللى هيجبلى مشاهدات واحاول بقي اكجول العمل علشان يوصل لاكتر عدد مكان بدل ما اركز ان الكلمات تبقي اقوى
كذلك الافلام فمثلا هل الفيلم اللى بيخشه عدد اكبر هو الافضل؟ ذا روك بيعمل كل سنة فيلم او اكتر بينجحوا علشان عليهم اسم ذا روك انما هل جودة فيلم س اعلى من ص علشان دا جاب فلوس اعلى؟
كذلك الالعاب كمنتدى العاب فهزود وأقول ان اللاعبين ( مش هم بس) بيعملوا حركة اصيع بقي واللى هى ايه انه لو الارقام معاه هيفرح ولو مش معاه مش هيعتد بها زى ما تعريف الحرية الإبداعية عنده انها ان الفريق يعمل اللى هو عايزه طالما دا اللى انا عايزه
ولكن هى لو بعدد المبيعات= جودة اعلى ودا سبب ان اللعيبه بتشتريها فعلى كدا تبقي كود كل سنة هل افضل لعبة ولا لعبة الموبايل س او ص هى افضل بمراحل من لعبتك المفضلة
نسيب الالعاب ونخش فى كرة القدم فهنلاقي كتير من تصويت الجمهور على اى جائزة ( لاعب شهر/ احسن هدف- الخ) مش بيبقي عادل بس دا رأي الاغلب نعمل ايه معاه يعنى
نسيب دا كله ونرميه على جنب يعنى دا كله مقدمة للى جى وهو
* يمنع ذكر اى اسم او موقف يؤدى إلى خلاف سياسي فى الموضوع
هل نظام تصويت الأغلبية لانتخاب الرئيس هو افضل نظام؟
انتخابات الرئاسة للى ميعرفش بسبب ان دولته مملكة مثلا فعندنا فى مصر كل 4 سنين او 6 مش فاكر بيبقي فى انتخابات دامية الشعب كله بينتظر نتيجتها فى ترقب مين اللى هيكسب ويبقي رئيس الجمهورية بس سؤال هل المفترض يبقي رأي الاغلب هو الأصح؟ ماذا لو عدد الناس الوحشة بقي اكتر من الناس الكويسة الناس الوحشة دى ممكن تكون مستفادة من حاكم ما بس عارفه انه وحش وظالم هل هيظل رأي الاغلب برضك هو الأهم؟
علشان اقرب الفكرة فهقول مثال وهو مثلا دكتور جامعى قال " انا هعمل اختيارين الاول انى اشرح والاختيار التانى انى مش هشرح وفى المقابل هدى لكله A-/A من غير امتحان " ولأن اغلب الطلبة هدفها التقدير الاعلى من انها تفهم اصلا فاختاروا الاختيار التانى بس هل هو الصح؟ لا بس دا تفكير السائد للطلاب ومجبر امشي معاه علشان هو اللى فاز كذلك مثلا فى تخيير الشعب البريطاني بخروج دولتهم من الاتحاد الأوروبي هل دا كان قرار سليم( تخيير الشعب نفسه)؟ طب لو احنا فى دولة س هل ينفع نعمل تصويت عن الشواذ ياماها تقنين الموضوع او تجريمه ؟ ماذا لو عدد الناس الوحشة بقي اكتر من عدد الناس الكويسة؟ فنرجع للسؤال هل نظام تصويت الأغلبية لانتخاب الرئيس هو افضل نظام؟
الإجابة لو لا فهو السؤال التانى هيبقي ايه النظام الافضل؟
وفى مشكلة تانية وهى ازى نحدد ان دا الرأي الصح وان دى الناس الحلوة ودى الناس الوحشة مش العكس فاحنا مجبرين نمشي برأي العدد الاكتر مهما كان ؟