إحساس
True Gamer
مسيره حياتك =\= أسرارك, قول الأشياء العاديه الي الكل يقدر يقولها.
مادري شقول أو أشلون أختصر! لكن بحاول ...
1987 شهر 10 يوم 1 خرجت للدنيا وسببت للوالده الله يعطيها طوله العمر السكر! وكانوا أخواني الكبار اذا كانو يبوني أبجي وانا صغير يقولون بسببك امي صار فيها سكر!! وكنت أحس بتأنيب الضمير لول ( طبعاً مجرد كلام لان كل شي بيد الله وهذا أمر مقدر عليها من لما كانت في بطن امها ).
1990 شهر 8 يوم 2 ( طخ بووووم!!! )
1993 شهر 9 أبوي وداني الروضه وفي هذا اليوم بكيت الى ان جفت دموعي وبعدها بساعات قليله أبوي جاني .. وفرحت وماصدقت خبر وركضت له ركض .. لكن هيهات هيهات!!! كان جايب جنطه الأكل لانه نساها بسيارته وراح ... وكملت مسيره دموعي الى ان خريت نائماً! ولما رجعت البيت قلت بالحرف الواحد ( يبا!!!!!!!!! ماراح أروح الروضه خلاص!!!!! ودخلت البيت ولعبت سوبر ماريو بروس ) ومشيت كلمتيمارحت نهائيا مره ثانيه.
1994 شهر 9 أول يوم للمدرسه .. رايح متأخر ودخلني أبوي عند الناظر وقعد يسولف وياه لين بدت الحصه الاولى وكانت رياضيات ... شوي ... ولا أبوي يمشي!!! وانا في مكان موحش مليئ بوجوه أول مره اشوفها .. كل مايبتعد أبوي كل ما أنهار أكثر .. الى حين البكي والتوسل والمناحه الي صارت لأبوي علشان يرجع لي وكان يطالعني من بعيد يبستم ويضحك .. ويبعتد اكثر .. اكثر .. الى حين اختفائه وذهابه!! وكل يوم يقعد معاي لين ينتهي الطابور لمده اسبوع او اسبوعين تقريبا ومن ثم تأقلمت اخيراً لول.
1997 شهر 6 انتقلنا الى بيتنا في صباح الناصر وكان الوضع غريب أولاً لانه في منطقه جديده ثانياً بعيداً عن كل الأصدقاء! وكانت مليانه شوك , وعند بيتنا في براحه كبيره ( ساحه فاضيه كلها تراب ) كنت اخاف اروح العب فيها لاني كنت أعتقد ان فيها ثعابين! والي يعرفني يعرف أني أكثر مخلوق أكره وأخاف منه الثعبان الى يومي هذا <.<!
1998 تعرفت على يوسف باونتي وكان أول صديق أستطيع ان أشارك معاه هوايتي الألعاب وصرت كل أسبوع اروح بيتهم ونقعد من العصر لين الليل مجابلين البلاي ستيشن1
2001 - 2005 دخولي لمرحله الثانويه مرحله الإتتقالات الكبرى ومرحله التعرف على أصدقاء العمر مرحله كثرت فيها الدراما / الكوميديا , من اجمل مراحل عمري.
2008 شهر 11 يوم 19 توظفت وصارت نقله كبيره في حياتي من بعد ما كنت أعتمد على الوالد والوالده في مصروفي أصبحت أعتمد على نفسي كلياً وأدلع نفسي بالي يخطر على بالي من دون ليش وشحقه ولماذا
2009 كامله كانت التنقل بالصوره الشكليه لي! في البدايه السنه تغير جسمي من كان وزني 81 وخدود بلا نهايه الى وزن 63!!! وكان شكلي ضعيف بزياده لكني رديت طبيعي وصار وزني 68 الى يومي هذا وبالصيف لسنه سويت أسناني بسوريا وأصبحت واثق في نفسي من الناحيه الشكليه في هالسنه
2010 شهر 11 حجيت والحمدالله وتغيرت أشياء كثيره في نفسي وحسيت أني قبل ما كنت عايش ولا كنت فاهم الحياه صح , أما الأن ولله الحمد والمنة مرتاح في نفسي مرتاح في أعمالي وأحاول دائما أرضي ربي في أي شي أعمله واعلم ان من صلحت نفسه بالسر أصلحها الله في العلانيه .
ومن الأشياء الي تعلمتها فحياتي : أحرص على الصديق الي يحب لك الخير ويعينك على دينك ويذكرك دائما باخرتك ونهايتك تحت التراب وابتعد عن الصديق الي همه فقط الوناسه مهما كانت أهي حلال او حرام وأبتعد شر البعد عن الصديق المتملل!! والمتشائم بالشر وهناك فئه يتسمون بالسلبيه فتجده دائما سلبي دائما معنوياته في الارض ويحطم نفسه ويحطمك معاه!
خلك دائماً متفائل مبتسماً .
وان جنه الحياه الدنيا مو في المال .. ولا في المركز , إنما هي في الصدر أن كان صدرك منشرح من خشيه وذكر الله في جميع امورك.
وأسف اني طولت عليكم لكن آخر شغله أحب اقولها .. ما راح اتكلم عن الصلاه لان اعتقد الصلاه امر مفروغ منه وان ان شاء الله الكل اهني محافظ على صلاته لكن هل الكل محافظ على تلاوة القرآن ؟ خلونا بدال لا نخلي اليوم كله يروح على العاب/مسلسلات/انمي/طلعات .. الخ
نحدد لنا نص ساعه فقط لتلاوة القرآن ومانخليه مهجور ونحيي قلوبنا فيه.
وأسف مره ثانيه على الإطالة!
أركز على نقطة الناس السلبيين .. فعلا اوافقك تماما في هالأمر ..
اعرف اشخاص للأسف كل شي عندهم سلبي .. أي شي تشتريه شي سلبي أي شي تسويه شي سلبي أي شي تفكر فيه شي سلبي .. يشوف الناس اللي حوله كلهم نصابين ويشوف التعاملات كلها كذب في كذب وكل شي عنده في الدنيا مو صالح ..
مثل هذولي فعلا لابد اننا نحاول بقدر الأمكان اننا نبتعد عنهم .. لأن القعده معهم راح تغسل مخك تماما وراح تخليك متضايق في دنيتك وراح تخليك تشوف كل شي سلبي في الدنيا .. وهذا الشي بيخلي حياتك جحيم ..
أممم .. يمكن النقله النوعيه اللي صارت في حياتي لما سمعت " برنامج إذاعي " على الراديو .. كنت في أول ايام الجامعه وطبعا عندنا الجامعه يبغالها ساعه وربع تقريبا علشان توصلها .. فـ قعدت اسمع الراديو ..
كان فيه برنامج اسمه " المستشار " .. كان يتكلم عن النجاح وعن أسبابه وعن أمثله كثيره من الناس اللي مرو بهالشي ..
فعلا ما أقدر انسى هذيك الحلقه .. الحلقه هذيك هزّتني حرفيا .. غيّرت الكثير فيني .. صرت أفكر تفكير بعيد جدا وصرت أشوف النجاح شيء سهل لكن يحتاج له شوية مثابره علشان تحققه .. مو شرط انك تحقق النجاح بـ نسبة 100 بالميه .. على الأقل تحقق منه 30 بالميه .. هذا أحسن من لا شيء ..
من بعد هذا البرنامج تغيّرت بشكل كامل .. حتى في علاقاتي الأجتماعيه تغيرت كثير .. صرت أكثر أبتساما وأكثر متعه .. صرت أخطط وصرت أفكر وصرت أطبق .. وماعاد أخاف من أي شي .. الحمدلله ..
يمكن الشي السلبي اللي مريت فيه هو تفكيري بالأيام السابقه اللي ضاعت .. معظمها ضاع في أشياء " تافهه " مثل القيمز أو الكمبيوتر .. أنا ما أقول ان القيمز أو الكمبيوتر اشياء سيئه .. لكن لما ياخذون 95 بالميه من حياتك فـ هنا راح يكونون اشياء تافهه وماراح يعطونك أي تقدم بالنسبه لك ..
برضو الشيء الآخر .. فيه اشياء باقيه من تأثيرات " الوحده الأجتماعيه " اللي كنت فيها .. مثال على ذلك الخجل الشديد وأحمرار الوجه والحكه الشديده بجسمي .. كل هذي الأشياء الى الآن تأثر فيني .. لكن مع الوقت إن شاء الله راح تختفي ..
حكمتي في الحياة مو حكمه وحده .. هي حكمه وحده لكن على عدة نقاط راح اعبرها بأسلوبي : أستمتع بحياتك حتى لو كانت مليئه بالأخطاء ، لأن الأخطاء هي اللي راح تصححك مستقبلا فـ ليش تتضايق منها ، حاول أنك " تبتكر " وتكون مختلف عن الناس ، لأن هذا سر النجاح ، حتى لو كان هالشيء المبتكر شيء مثير للأستغراب فـ لاتتضايق ، بالعكس هالشي يخليك مثير للأهتمام أكثر ، أقبل التحدي ولا تخاف ، حتى لو فشلت بالتحدي فـ هذا مايعني انك راح تفشل فيه مره ثانيه أو ثالثه أو رابعه ، تعلّم من أخطاء الناس واسأل وأستفد منهم ، ولاتترك صلاتك وعبادة ربّك لأنهم هم الأساس ، أذا فقدتهم فـ راح تفقد جميع الأشياء .
التعبير من جنبها بس ياليت وصلت المعلومه *_*
