Humam
True Gamer
طبعا اليوم هو أول يوم لتداول أسهم شركة إعمار في سوق الأسهم السعودية بعد انتظار طويل, الكل كان مترقب هذا اليوم بفارغ الصبر بعد الhype الخرافي للشركة بجكم إنها ماسكة مشروع مدينة الملك عبد الله الاقتصادية...
التداول كان من المقرر يبدأ الساعة 12 ظهرا بتوقيت مكة المكرمة.. أنا من أمس مانمت بس حتى ألحق أكو أول واحد في صف ماكينة بطاقات الصرف الآلي إلي تتيح عملية البيع ( مو مشترك في خدمات الإنترنت مع الأسف ) .. قبل ما يبدأ التداول بنصف ساعة طلعت بالسيارة في عز الظهر ومعاي الجريدة ( عكاظ ) أقرأ لين يمر الوقت وأبيع واتيسر.. قرأت اليوم إن المحللين الاقتصاديين يتوقعوا سعر افتتاحي 80 ريال .. أنا استبشرت خير وقلت " واو " .. نبيع 25 سهم الواحد ب 80 ريال = 2000 ريال سعودي = ضربة في الصميم.. خصوصا ان التوقعات السابقة كانت تقول 60 ريال..
بعد ماجات الساعة 12 .. طالعت وراي في السراء ( صف الانتظار ) بالمصادفة وما ألاقي إلا إمة لا إله إلا الله محمد رسول الله مجتمعة كلها تبغى تبيع !!! لول.. نزلت أول واحد.. دخلت البطاقة ورحت لخيار البيع.. الماكينة تقلي: " لا نستطيع خدمتك حاليا لا يوجد أسهم للبيع".. قلنا خير.. ننتظر ربع ساعة.. نحاول ثاني برضه نفس المشكلة.. بعد ربع ساعة ثانية نزل واحد من الشباب جرب ويقول يمديك تبيع ( بس مسكين هو ماباع لأن الشمس كانت محرقة جدا وساطعة على شاشة الماكينة فمو قادر يشوف ) .. نزلت أنا أبيع إلا الماكينة تقلي " نأسف لألغاء العملية " .. أنا قلت لا حول ولا قوة إلا بالله..
شوي نفس الشاب يجي من بعيد يقول السهم فعلا نزل للتدوال وسعره 40 ريال !!!!!!! العالم كلها ما صدقت ايش 40 ريال مين قالك ومن فين جبت الكلام هذا .. الشاب أكد إن واحد شغال في أحد البنوك أكد له هذا الكلام.. أنا قلت الله لا يوفقكم 40 ريال ايش تجيب.. ركبت سيارتي وقلت للي وراي يلا ياشباب نتيسر 40 ريال هذي خلوها مرررة ماتخارج.. بس ورجعت البيت..
فتحت قناة العربية على أسعار السوق ولقيت السهم نازل فعلا بسعر 46 ريال ومستمر في النزول..
أنا للآن حاقد من الموضوع.. 40 ريال أجل .. قسم بالله ما توفي حق انتظر ساعة كاملة تحت الشمس المحرقة في نهار رمضان..
أنا أصلا كنت عارف إن شركة إعمار + مشروعها في مدينة رابغ " مدينة الملك عبد الله " راح يكون أكبر خازوق ياكله الشعب السعودي هذا العام.. hype خياااااااااااالي ومدينة رووووووووووووعة وتصميم فانتساااااااااتيك ومدينة متطوووووووووووووورة .. يوسف ممكن أستعير كلمتك الشهيرة ؟
meh