ما هو أقدم شي تتذكره في حياتك؟

[Arashi]

السلام عليكم ورحمة الله وبركاته

يقولون العلماء ان الانسان ممكن يتذكر أشياء من عمر 3-4 والبعض ممكن من عمر 2.

ايش هو أقدم شي تتذكره وكم كان عمرك تقريبا؟

ملاحظه: يقال ان بعض الذكريات عبارة عن خيال (وممكن حلم) لكن الطفل وقتها يكون مصدق ويكبر هالشي معاه على انه ذاكره حقيقيه، لكنه يظل جزء من ذاكرة الشخص.

 

[Arashi]

كان عمري سنتين ونص تقريبا والاهل confirmed انه حدث حقيقي P:

اذكر اختي اللي اصغر بسنه كانت تزحف سريع وتدخل داخل تلبيسة المخدات، وكل ما يطلعونها ترد تدخل بسرعه كأنها قطو

 

[خشبة]

ذكريات الطفوله = عالم عملاق وكائنات عملاقة

 

[Dark Jester]

العمر: ٣ سنوات
المكان: مكة - شارع النزهة مكان خلف كافتيريا خلود. اتذكر ان المكان كان فااااضي لو تقارنها بالوضع الحالي. لكني ما راح انسى المسجد القديم اللي كان في الشارع الرئيسي.

حضرنا حفلة عرس لشخص مجهول بالنسبة لي
قسم النساء كان في السطح لأني كنت مع الوالدة و اخي اللي بالقوة كمل سنتين.
اللي اتذكر اني نزلت للدور الثاني و كنت اروح دورة المياه، و استوعبت بعدها ان الباب علق و مو راضي يفتح.. بالقوة ٥ حريم فتحوها. اوه صحيح!!! الوالدة كانت معاي عشان كذا ما كنت خايف. تخيل انت كأم صرتي حبيسة الحمام مع اطفالك لأن الباب كان دقة قديمة، شكلك بيصير بايخ.

و في نهاية الليلة انا رحت للباب الرئيسي و قابلت والدي اللي كنت مستغرب بيني و بين نفسي ليش ما طلع معانا لوووول.

 

[s3rorh]

- اذكر بانه جيراننا جايبين ذبيحه و قطعوا راسها, و من غير سابق إنذار الذبيحة بدت تركض من غير راس

- اذكر انا و اخوي و ابوي مشتري فخ لصيد العصافيؤ البريه و منخشين ورا كتله رمليه

- اذكر بحوش بيتنا طلعت مع امي خايفين و نطالع فوق بالسما و شفنا هليكوبتر كانت على ارتفاع حيل منخفض و قدرت احس بضغط الهواء من كثر ما هي قريبه، ايام الغزو


كلهم صارت وانا بعمر ٣-٤ سنين

و لما عمري سنتين، اذكر كنت امشي يم نهر و شفت ابو ذنيبة/ frog babies

 

[DINO CRISIS]

رحلة إلى مصر وأنا صغير

 

[MarukoChan]

صديقي بالروضة ليلحين اذكر ملامحه وشكله جني امس شايفته وهم مدرسة عندي بالروضة ماكنت احبها ما انساها .

 

[AzureFlame]

تقريبا كل هذا بنفس العمر

روضة بلال بمنطقة الدسمة عندنا بالكويت
أبله كنت ميت عليها ولما راحت تضايقت (&)

لندن بنفس السنة كنت مستغرب من الشقر اللي هناك (&)

أناقز على السرير وطحت وراسي طق بحافة السرير بعدها ما أذكر شي غير الخياطة (&)

بيتنا كان بيت عربي قديم فتخيلت كل أنواع الأشباح وقتها نفس البيت المسكون (&)

والله ذاكرتي قوية بس ما اذكر شسويت أمس (&)

 

[Zhuge Liang]

اذكر جدي الله يرحمه ذبح دجاجه و شفت راسها مقطوح و تحركت شوية فزعت وقتها
و الدي شره لي بالونات وحده طارت و حده رجعتها للبيت كان لونها اصفر

 

[はる]

في بيت عمتي كانوا جايبين ذبايح وكنت ألعب مع بنت (مش متذكر من هي) مع الخرفان الي رح ينذبحوا. ما طاوعتني نفسي أكلهم يومها. بعدين يوم رجعنا لبيتنا عشان تنفتح شهيتي قدموا لي أهلي بيبسي (كانوا يستخدموه عند الضرورات القصوى فقط) عشان أتعشى من طبخنا ليلتها.

 

[Dark_N11]

مفتاح الباب اتكسر برأسئ و الأرض صارت مسبح من الدم
بعدها اخذت غفوه خفيفه و صحيت و الأمور طيبة

 

[lucas]

هذا السؤال أسئله كثيراً لعائلتي أو لأي شخص عندما أتذكر السؤال

اقدم ذكرى هي يوم ولادة أمي لأخي الأصغر كان عمري حينها 4 سنوات.
نفس الحدث يتذكره أخي الثاني كان عمره حينها سنتان!
حتى اننا نتذكر محادثتنا سوياً ونحن نخبر أمي ما أسم الطفل؟

 

[game for new]

يوم كنت في الابتدائي او الروضة مو متذكر كنت احب فتاة كانت معي في الباص الي يرجعنا البيت ومن بعدها ماحبيت وحدة غيرها الا يوم دخلت سوني حياتي .

 

[الرعصي]

انضربت من ولد في الروضه

 

[NOBLE]

يوم كنت في الابتدائي او الروضة مو متذكر كنت احب فتاة كانت معي في الباص الي يرجعنا البيت ومن بعدها ماحبيت وحدة غيرها الا يوم دخلت سوني حياتي .

يخي لازم تويست بالاخير

 

[s3rorh]

تذكرت وأنا بعمر البغل … يمكن عمري ١٤ سنه إذا مو اكبر … فجأه رادين من المدرسه و ندور على أمي .. ولا أبوي يقول : يالله مشينا للمستشفى ، نشوف اخوكم البيبي الصغير ،،،
وانا: !!!!!!!!!!!!؟؟؟؟؟؟؟؟؟؟؟


والله كنا تعريف للبراءة ….

مو مثل بنتي الحين، الي عندها ١٠ سنوات تسولف مع ولدي ألي عمره ٤ سنوات ،، و تشرح له شنو يعني gay ,,, و أنا فقط مستمع ،
مبسوط بانها تشرح له شلون هالشي خطأ، و بداخلي حزن على البراءة ألي تم سلبها من بدري بسبب التعليم ببريطانيا

 

[MH MD]

كان حلم، بعدها صحيت بالسرير، وبدأ الذكريات والوعي، من ٤ سنين كذا

اتذكر كم حلم من بعد هالفترة لكن يقال انها ذكريات لقبل اول حلم اتذكره، الاحلام طبعا exaggerated بس وظيفتها تعمل unlock لذكريات ما اتذكرها كأني في تيرز اوف ذا كينجدوم

 

[إبراهيم 906]

اتذكر مدرستنا بالتمهيدي جابت ثلاجة صغيرة مرة فيها تفاحة

 

[KH_m]

كان حلم، بعدها صحيت بالسرير، وبدأ الذكريات والوعي، من ٤ سنين كذا

اتذكر كم حلم من بعد هالفترة لكن يقال انها ذكريات لقبل اول حلم اتذكره، الاحلام طبعا exaggerated بس وظيفتها تعمل unlock لذكريات ما اتذكرها كأني في تيرز اوف ذا كينجدوم

هذا كمان اقدم شيء اذكره. اذكر اللحظة الي وعيت فيها بكل شيء لما فتحت عيني وقمت من الفراش مثل في الأفلام لما يقومون من غيبوبة، واجي الصالة واطالع هذا أخوي وهذي أختي وأمي أعرف علاقتي معهم بس ما عندي ذكريات عنهم قبلها لأن كنت عدم وما عقلت إلا الحين ويقولون لي: كويس صحيت لأن أخوك راح يجيب بيك

كل ما أقول ذي القصة يقولون أنت مو صاحي

 

[Bill Cober]

لما رحت الطائف عند عمتي الله يرحمها و كان عمري ٨ سنوات

 

[Arashi]

ذكريات الطفوله = عالم عملاق وكائنات عملاقة

نفس الاشياء اللي كنت تجوفها ضخمه في ذاك الوقت الحين تبين نتفه في عينك، لكن تظل ضخمه في ذاكرتك لما تفكر شلون عشتها وانت صغير... اولها امهاتنا وخالاتنا كانوا يبينون عمارات ضخمه لما كنا نمشي معاهم واحنا ماسكين عباباتهم، حتى وجوههم ما كنا نجوفها XD

- اذكر بحوش بيتنا طلعت مع امي خايفين و نطالع فوق بالسما و شفنا هليكوبتر كانت على ارتفاع حيل منخفض و قدرت احس بضغط الهواء من كثر ما هي قريبه، ايام الغزو

كان عمري وقتها 5، كنت أسمع صفارات انذار بس ما كنت اعرف ايش هالصوت المرعب، مره ضربت صفاره لفتره اطول وجفت امي متوتره تتكلم بالتليفون مع خالي (كانوا حاذفينا بتقبله XD)، ولما سألتها عن الصوت كانت دايما تقول انه صوت طياره عشان لا نخاف، عقب نسيت السالف، على كبر استوعبت الصوت لما لعبت Silent Hill وتذكرت اللي صار، وعرفت حقيقة الصوت لما قالوا انه صوت صفارة انذار وقت الحروب P:

أناقز على السرير وطحت وراسي طق بحافة السرير بعدها ما أذكر شي غير الخياطة (&)

عندي موقف مشابه في سن الروضه بس ضاربه جبهتي بطاولة حديد واذكر ويهي تسبح بالدم، وخياط P:

اتذكر مدرستنا بالتمهيدي جابت ثلاجة صغيرة مرة فيها تفاحة

عن ايش كان الدرس؟ XD

و بداخلي حزن على البراءة ألي تم سلبها من بدري بسبب التعليم ببريطانيا

حتى لو ما تعلمت من المدرسه مردك تعلمها عشان تحذر، ربعي صايرين يعلمون عيالهم هالسوالف وايش معنى قوس الدلع ذو الست ألوان من عمر 5 سنين ):

 

[m7tram]

عمري 3 سنين بوقت الغزو على الكويت .. وطلعنا رحنا للسعوديه .. كنت نايم بالحوش واختي شالتني علشان اتدخلني داخل فتحت عيني على هاللحظة وهي حرفيا أقدم شي أتذكره.

 

[Good Hunter]

اتذكر فلاتر وكمامات وشبابيك مغطاة باكياس سودا.
اتذكر غزو جراد،
اتذكر تفجيرات العليا والوالد كان مقر عمله هناك.
اتذكر جت عاصفة قوية وكان يطفى الكهرب من مربع سكني في حي منفوحة؛ فاللي ساكنين في المربع ذا يروحون للي ساكنين في المربع المقابل واذا انطفا عندهم يشتغل في المربع الاول، فنرجع ويرجعون معنا.
ياخي كمية الالفة والبساطة رهيبة، جيران كلهم يعرفون بعض.

اتذكر الوالد جاب جهاز والله مدري وشو مثل الصخر من مقر عمله، كان كله شاشة أوامر وخرابيط ويشبه الصخر - مو صخر- شبكناه على التلفزيون العادي واشتغل. والله ناسي وش الجهاز وايش ماهيته.
اللي اذكره شاشة سودا واوامر خضراء بخط صغير مثل شاشة الاوامر.
وغيرها الكثير

 

[*RA!N*]

كان عمري ممكن 5 او 6 سنوات ورايحين نعيد على جدتي الله يرحمها وشفت بسه في الشارع رحت اخوفها ماخافت ولما جيت بمسكها خربشت وجهي
وانفجرت صياح .

 

[Arashi]

كان عمري ممكن 5 او 6 سنوات ورايحين نعيد على جدتي الله يرحمها وشفت بسه في الشارع رحت اخوفها ماخافت ولما جيت بمسكها خربشت وجهي
وانفجرت صياح .

في نفس السن حاولت أختبر قدرات قطوه، فدزيتها من على الدرج اللي ارتفاعه قد طابق كامل وطيحتها عالارض، لا اله الا الله طاحت على كرشتها بس ما صار لها شي، تسع ارواح XD

 

[Qué mirás bobo]

هنالك صورة دائماً ببالي، وهي في الشاطئ.

 

[خشبة]

اتذكر يوم كان عمري ٥ سنوات وامي تشرح لي عن " المدرسة " وكل اللي في ذهني عنها انها عباره عن محطة بنزين.

 

[Solar]

اذكر كنا مسافرين من حفر الباطن الى الرياض وكان فيه ديناصور كبير يلحقنا

 

[STARDUST]

هو مو اقدم شي لكنه شي جميل.
رحت مع اخويا واشتريت معاه ps2، الشي هو اني اتذكر بالتفصيل ايش اخذ معاه.
وقتها اخذ ميتل غير 2، GTA Vice City، و Crash wrath of cortex، و Tekken 4 وغيرهم.
واخذ معاه الميموري كارد الازرق السبيشل.

اتذكر بنفس اليوم مسكت سلك الAV وفكفكته عن بعضه... شفته ثلاثة اسلاك مرتبطة ببعضها قلت اكيد المقصد اني افكهم وبالفعل فكيتهم...
ثم اختفيت عن الانظار... صحيت شفته زعلان عليه بس ما كلمني عنه، طبعا وقتها استوعبت ايش سويت لانه امي سمعتني كلمتين
بس يعني رجعنا نلعب بعدين


الاخ ذا:

اتذكر بوحدة من الاعياد صحيت ولقيته مشتري God of war الظاهر ولعبة لسلاحف النينجا، طبعا لعبت سلاحف النينجا لول

--

- ذكرى لطيفة اخرى لكن ما تعتبر قديمة اتوقع.. اذكر لما رحت اشتريت psp go، كان عندي اولريدي psp عادي، مع ذلك رحت جبت غو لسبب ما، فطلعت انا واخوية وخالي واولاد خالاتي عشان نروح نجيب الجهاز من عالم سوني في جدة البلد اتوقع، كنت لابس قميص لاكوست اصفر واشترينا عصير وانا اخذت شي فيه رمان الظاهر وانكب على القميص... وما طلع ابدا.
وقتها تعلمت انه عشان تكسب شي من الطبيعي ان تخسر شيئا بالمقابل

طبعا الpsp go مع انه عزيز على قلبي الا انه اقل محمول لعبت فيه، قلبته جهاز عرض افلام وتشغيل اغاني

--

- هذه ذكرى قديمة حقيقية، يمكن كان عمري 4 سنوات او 5، طلعنا مرة لابها وتعرفت على توأم هناك، كنت كل يوم اروح العب معاهم، مدري فين اهلي عني بس اتذكر كنت اروح لوحدي ومحد يدري، ما اتذكر اشكالهم غير انهم توأم وكان معاهم بنت تنتبه عليهم.
- بنفس ذيك الرحلة خالي جاب"برشومي" ومن حماسي مسكت حبة بدون ما تتقشر بكامل يدي... طبعا دخل شوك كثير بيدي ذيك وامي جلست تطلع الشوك.




الحقيقة هي، مع انه عندي ذكريات كثيرة عزيزة علي، لكن كثير منها مسك معي بسبب حاجة هبلة حصلت معي لول.
اتوقع اني شخص يرتكب اخطاء كثير، لدرجة انه اتوقع صرت انسى كثير ويمكن سنين كثيرة من حياتي ما اتذكر منها شي يا اما بسبب عدم مبالاة او انه ما صار معايا شي مهم او ببساطة حصل شي يستحق النسيان. ومدري اذا الشي ذا طبيعي او لا.

 

[XORO]

شكلي الوحيد هنا اللي ما يقدر يتذكر شي قبل حقبة المدرسة