قاموس اللهجات الخليجيه /العربيه !!

[Tomb raider]

السلام عليكم ورحمة الله وبركاته

لول فاتح هالموضوع علشان نتبادل المعاني الخليجيه والعربيه
لأن مثل ما توقعت ان في كثيرين ما يفهمون اللهجه الاماراتيه
مع انها نفس الباقيين مع اختلاف بعض الاحرف :yuck:
خلونا ابدأ الاول !!

-غالبان في الامارات بدل ما نستحدم حرف الجيم نستخدم حرف الياء
مثلا ...
1- عيبني !!! = عجبني
2-باي//ياينكم = جاي/جاينكم
3-عيايز/عيوز=عجائز/عجوز
4-ايوز؟؟= يجوز؟؟؟
5-يديد=جديد
ملاحظه : بس طبعا مب كل الكلمات اللي فيها حرف الجيم نحولها ياء !!
مثل :جميل-جدا-مجله..الخ

بعض الكلامت نقولها اتوقع ان كثيرين ما يعرفونها /

1- مب او موب = مو / مش / لن
2-توني ناش من الرقاد= توني قاعد/صاحي/من النوم
3-بشكاره=خدامه
4- ما اروم = ما اقدر
5- فريج=حاره/حي
6-ياهل=طفل/بزر بالسعودي
7-توني ظاهر= لسه طالع

ممم هذا اللي عندي:laugh:
يالله نشوف مصطلحاتكم

 

[persona]

زين بطلت الموضوع..
بو لارا ، في قصيدة تقول ياحي من سلملي الشوق وغناها مغني
بعدها كلش ماافهم شيقول؟ ياريت تترجم الكلام اللي يقوله لانه كلش بعد اول بيت ضايع :\

 

[Naif]

لوول .. نسيت اهم كلمة :

رمسه = كلام


و في بعد:

جان (ج = الحرف اللي بين الـ ش و الـ ج ) = اذا (مثال : شان ما تريده = اذا ما تريده )
يزاك = تجازى (مثال: يزاك على فعالك .. و تقال ايضا : الله يازيك على فعالك )
اتريه = انتظر
دريشه = نافذه
زوليه = سجادة
تبا = تريد (بعضهم في الامارات (اعتقد اللي من الشمال) يقولون "تبغي" = تبا )


بعض هذي الكلمات اعتقد يستخدمونهن بعد في باقي دول الخليج ..

لوول اذا تذكرت اشياء بضيفهن بعدين .

 

[persona]

يبيله = لازم

 

[Khalid-S]

خخخخخ انا افهم اللهجه الاماراتيه والكويتيه اكيد .. لكن ابي اعرف ايش سبب هذا التغير .. انا مرات اتكلم كلام غير مهفوم (عامي سعودي) وبعض المصطلحات ما اعتقد احد يفهمها غير السعودين او يمكن سعودي من منطقة نجد (مرات ما افهم كلمات من همام ونفس الشي هو) .. لكن في منطقة الخليج مثل عمان والبحرين .. احسه كلام غير مفهوم .. العمانين بعضهم لمن يتكلمون احسهم يتكلمون هندي .. القطرين والبحرينين احس كلامهم ثقيل شوي بعكس الكويتين والاماراتين .. اما السعودين يختلف من منطقه للثانيه لانها كبير .

لهجتنا واضحه من ناحية الحروف .. اما بعض الكلمات الي تكون عامية بزياده هذي مالها دخل بالموضوع.

مرات ارحم اخواننا الي من الشام (الاردن سوريا فلسطين لبنان) .. حسين واحمد كيوب باقي الشباب .. كيف تفهمون علينا ؟؟ ردودنا عاميه واحس 40% من كلامنا صعب

 

[Pichi]

عني انا .. أفهم للجميع سوى كويتي ولا بحريني ولا عماني "عندي اقرايب عمانيين"..بعض المصطلحات اذا مو اغلبها نستخدمها نحنا بعد اهل الشرقية ..الي ماافهم عليهم صراحة اهل الجنوب واليمن..
بطلت=فتحت P:
وياي=معاي
مادريته؟ = ماتدري؟

 

[The Last Fantasy]

طرشت = أرسلت !!

 

[Pichi]

الغشمرة=المزح
الديرة\ديرتي=البلد و المكان الي يسكن به
بطيت جبدي ! = زهقتني \طفشتني
والدين الي يحشك = كناية على انه ماعندك سالفة p; صعب اشرحها..لول
يتبع..

 

[RIZE]

ممممممم بقول كل الى اعرفهم كويتي ولا غيره ^^

لندني= فاخر أو الأصلي
شقردي = فتوه أو راعيها او زلمه
زغلول <<< هذى حصريه لى ولربعي P: ... = صجمه أو مغفل
خمه = مجموعه سفهاء وحمقى
هيلغ = متخلفين او لا يفهمون شئ
جيله = مممم ما حصلت كلمه ماردفه لها بس تنقال بمثلاً شراء الاغراض (( ها شريتوا جيله هذا الشهر ))
ضل = خلك ناطر أو انتظر
عجرة = عصا تصلح للضرب هع هع .. واحيانا تحصل عليها اكسسوارات (( كالمسامير ... إلخ ))
أنخمد = نام



هذا الى طرا على بالى الحين ..... طرا = قدرت احصله او هيك شي

 

[RIZE]

طرشت = أرسلت !!

= دزيت ^^


جوف = شوف
ييبه = أأتنى به أو احضره
غز = مغازل
مدرعم = يمشي بسرعه من غير ان ينتبه
مطبلن = ضاغط على مكبس البانزين لأقصى حد



صعرورة على اسم ايميلي :yuck: = انتفاخ يظهر على الراس نتيجه التعرض لضربه مؤلمه

 

[Tomb raider]

زين بطلت الموضوع..
بو لارا ، في قصيدة تقول ياحي من سلملي الشوق وغناها مغني
بعدها كلش ماافهم شيقول؟ ياريت تترجم الكلام اللي يقوله لانه كلش بعد اول بيت ضايع :\

لووول مب حافظنها !!
اكيد بتستفيد من الموضوع بس تابع ::

لوول .. نسيت اهم كلمة :

رمسه = كلام

هيه والله ناسنها :laugh:

اتريه = انتظر

نايف اتوقع كلمة اتريا /تريه مأخهوذه من اللغه العربيه الفصحه (تريث) اتوقع :slant:

مادريته؟ = ماتدري؟

اول مره اسمعها :gasp:

طرشت = أرسلت !!

تقولونها ؟؟؟ تحريت= حسبت ان بس الاماراتيين يقولونها والكويتيين

لندني= فاخر أو الأصلي
شقردي = فتوه أو راعيها او زلمه
زغلول <<< هذى حصريه لى ولربعي P: ... = صجمه أو مغفل
خمه = مجموعه سفهاء وحمقى
هيلغ = متخلفين او لا يفهمون شئ
جيله = مممم ما حصلت كلمه ماردفه لها بس تنقال بمثلاً شراء الاغراض (( ها شريتوا جيله هذا الشهر ))
ضل = خلك ناطر أو انتظر
عجرة = عصا تصلح للضرب هع هع .. واحيانا تحصل عليها اكسسوارات (( كالمسامير ... إلخ ))
غز = مغازل
مدرعم = يمشي بسرعه من غير ان ينتبه
مطبلن = ضاغط على مكبس البانزين لأقصى حد



صعرورة

كلها كلمات غريبه علي وانا اقول لي انته مب فاهم شي في فريج !!

 

[Tomb raider]

اوكي عندي كم كلمه !!

1-يود(فتحه عالياء وشده عالواو) = امسك

2-تحريت (اظن مأخوذه من يتحرى الشي) = حسبت /ظننت

3-الباب طلق (طلق كلها سكون )= الباب مفتوح

 

[Futrus]

البحرين مع صغرها اللي يخليها بحجم مدينة متوسطه إلا إن كل اللهجات تختلف عن الثانيه إختلاف شديد
عندك الشائعه هي اللهجه البحرانيه والمحرقيه
وفيه الدرازيه لمنطقة الدراز واللي حولها تختلف شويه عن البحرانيه بحيث يستبدلون في الكلام حرف الجيم بحرف الياء
وعندك اللهجه الستراوية للي يسكنون جزيرة ستره أصعب لهجه في البحرين وما في أحد يقدر يتكلمها إلا الستراويه بس و بعض الكلمات اللي يقولونها تخليني أضحك بشكل هستيري خصوصا اللي من منطقة المهزة في جزيرة سترة ،، بس بصراحه الستراويه من أحسن ناس خوش رجال :laugh:
اللهجة البحرانية يتكلمها اللي من المناطق الشماليه والمحرقيه اللي من المناطق الجنوبيه
وفيه اللهجه اللي يتكملها قليلون وهي الحساويه وهم اللي اصلهم من منطقة الإحساء في السعوديه ويسكنون أكثر شي في العاصمه المنامه

وكل هاللهجات تختلف عن بعضها بشكل كبير وأنا أتكلم بلهجه مخلوطه بين المحرقيه والبحرانيه لكن أميل للمحرقيه لكن ما أتكلم بشكل ثقيل بحيث أمد الكلمه

بجيب كلمات لكل لهجه في وقت ثاني

 

[Humam]

لول حاب اشارك بشوية مصطلحات:

فرك = هرب .. مثال : " ها شباب يلا فركنا من المحاضرة ؟ " الترجمة: " ها شباب يلا هربنا من المحاضرة ؟ "

يفك سبرنت = يجري بسرعة صاروخية.. مثال: " والله يجري وراي الأسد و مالقيت نفسي إلا أفك سبرنت "

أسري = إذهب.. و تقال بمعنى " انقلع "

أستنى = انتظر

قطلة = مشعاب = سلاح ( غالبا قطعة خشب ) للضرب

الهرج = الكلام ( ولو إنه معناها العربي الفصيح يفرق كثيييير )

خدمي = من الخدمنة, وهو مصطلح يطلق لكل ماهو دون المستوى, سواء المستوى الفكري - الثقافي - السلوكي - الاجتماعي .. إلخ.

- أندر = أطلع .. مثال: ياواد أندر الشارع شوف المضاربة الترجمة: " يا ولد أطلع الشارع شوف المضاربة ! "

- يتكابس = يتعارك.. مثال " اليوم رحت البنك واتكابست مع الموظف " الترجمة: " اليوم رحت البنك واتعاركت مع الموظف "

- طاقة = نافذة مثال " ياود افتح الطاقة خلي الهواء يدخل "

ههههههههه الي عنده استفسار عن بعض الكلمات إلي أقولها في المنتدى ومو فاهمها ياريت يقول

 

[Khalid-S]

همام .. ايش معنى "ديكك ما اذن" ؟؟

 

[Humam]

ههههههههه خالد.. أبشر.. ديكك أذن = الواحد يصير بالغ

مثال: " ماشاء الله ولدي مازن ديكه أذن وصار رجال "

الترجمة: ماشاء الله ولدي مازن بلغ وصار رجال لول...

 

[Khalid-S]

خخخخخ

طيب هذا سؤال لنايف .. مرات اشوفك تقول "هيه" .. هي "ايه" بس لهجتكم تقولون كذا ؟

 

[Tomb raider]

ههههههههه خالد.. أبشر.. ديكك أذن = الواحد يصير بالغ

مثال: " ماشاء الله ولدي مازن ديكه أذن وصار رجال "

الترجمة: ماشاء الله ولدي مازن بلغ وصار رجال لول...

هههههههههههههههههههههههههههههههه
ما لقوا الا ديك هههههههههه ضحكت والله

همام عندي استفسار !!
في مره قلت
(والله صار وجهه سته على سبعه ) ضحكت عليها ضحك !! ليش يعني سته على سبعه ؟؟

 

[Tomb raider]

خخخخخ

طيب هذا سؤال لنايف .. مرات اشوفك تقول "هيه" .. هي "ايه" بس لهجتكم تقولون كذا ؟

هيه صح = ايه صح ::

سوري نايف جاوبت بدالك

 

[Nintendo]

بسه = قطو
اسكتونيوس = مستكن ومتونس بكلمه وحده ( يعني واحد يوم يسالك كيف حالك تقله استكونيوس ) وهاذي الكلمه من تأليفي وحققت نجاح شعبي كبير جدا
100% = ايضا كلمة ثانيه ( او رقم !! ) من تأليفي يوم واحد يقلك كيف حالك وش اخبارك والخ الخ انت بس قله 100 فيفهم انك تمام
سرى الليل يابو تلاته = يوم فريق يفوز على فريق 3-0 نغنيها له ومعناها الليل خلص وانتم مهزومين ثلاثه
يانامر ياتامر = يوم تنادي اي شخص ( وودك يكون اسمه تامر !! )
ياواد بطل شغل السبهلله حقك = بلاش اتستعباط وخلك صريح
الولد دا شكله كوول = يعني يتابع نارتو
الولد دا شكله محترم = يتابع نارتو
الولد ذا دمه خفيف = يتابع نارتو
اي وصف كويس = يتابع نارتو

يكفي ...

 

[Humam]

والله صار وجهه سته على سبعه

لول اذا واحد اتفشل أو انحط في موقف محرج وجهه بيتغير وينعفس, فكأنك تجيب رقم ستة وتضربه في رقم 7 = وجه التفشيلة

اسكتونيوس = مستكن ومتونس بكلمه وحده ( يعني واحد يوم يسالك كيف حالك تقله استكونيوس ) وهاذي الكلمه من تأليفي وحققت نجاح شعبي كبير جدا

ههههههه خطييييييير

 

[Khalid-S]

ترى عمر فنان بالكلمات الجديده .. بعض الي اخرجها صرت استخدمها في حياتي العادية

 

[ASWD]

لوووووووول يمكن اكثر لهجة عندنا ما تنفهم هي لهجة اهل سترة وضواحيها ههههههه عليهم مسطلحات عجيبة اما كلام العامية فيه كثير نتشارك مع لكويت والامارات والسعودية بعد..مثلا

دريشة=نافذة
زولية=سجادة
كبت=خزانة ملابس
قلاص=كاسة مثل كاست الجبن
كوبة=كوب
سطل=دلو
طبيلة=كراج
هوز=خرطوم
سنور=قطو/بسة
سيكل=دراجة هوائية
موتر سيكل=دراجة نارية
شمسية=اللمبة اللي يخلونها بالسقف عشان تنور المكان
شتري=مظلة مالت المطر
دولاب=مزرعة
برادة=سوبر ماركت
دكان=محل
بروش=فرشاة اسنان
مخمة=اللي ينظفو بيها المكان
قوطي او قوطية=علبة
عيش=رز*اظن الكل عنده*
صالونة=مرق دجاج لحم ألخ
جقارة=زقارة اوتبغ
حطبة=لوح او خشبة
جحٌة*بالشدة*=رقية
طرشت=دزيت/ارسلت
جاي=قادم
سمج=سمك
ربيان=جمبري
قبقب=سلطعون
طراد=قارب
بانوش=سفينة كبيرة شوي*اظن عند كم دولة بعد هالاسم*
انخمد=انطبن=نام
لفة=منعطف
لصقة=ملصق اوستيكر
يفلت=يرمي/يحذف
برجة=بركة/حوض سباحة
شخاط=شبريت/اعواد ثقاب

بس هذ اللي جاي على بالي

واذا ذكرت شي ثاني بكتبه

 

[The Last Fantasy]

تقولونها ؟؟؟ تحريت= حسبت ان بس الاماراتيين يقولونها والكويتيين

لوول .. مستحيل ! ..
طرشت عندنا في السعودية معناها = استفرغت (وأنتم بكرامة) ..
مشكلة يوم تصير اللهجات مختلفة لهالدرجة P:

 

[NSider]

في كلمة إماراتية رهيبة صرنا نستخدمها أنا والشباب (علمنا إياها صديق إماراتي):

اربع = اهرب = انحش = BAIL OUT

لول ودكم لو ناخذ صور الفوتوشوب اللي فيها BAIL OUT و نكتب بدالها "اربع!".

 

[Pichi]

طرشت عندنا في السعودية معناها = استفرغت (وأنتم بكرامة) ..

احم..يعني ارسلت شخص لول P: مثال
"طرشت محمد يجيب لي بيبسي"
edit :-
ماانتبهت لردك فوق لول..sorry

 

[Tomb raider]

لول توني كنت يالس اطالع "فريج" ذكروني بكم كلمه !!

- غاوي = حلو (والله اللعبه غاويه= والله اللعبه حلوه )
-اربيعي= رفيجي/صديقي (اربيعي بيي اليوم)
فنان = رووووعه /جميل(الحلقه فنانه اليووم= الحلقه روعه اليوم)
المهم انا الحين ساير بيحطون حلقه ثانيه من "فريج"

 

[Mada Mada Dane]

انا عندي صديق اماراتي واماراتي هنا ... دايم يضحكون على كلامي ولا يشوفون كلامهم ..


مره قلت " ياخي هاللعبة قلق" مااااااتوا ضحك على قلق .. مدري وش فيهم :slant:

 

[Naif]

انا عندي صديق اماراتي واماراتي هنا ... دايم يضحكون على كلامي ولا يشوفون كلامهم ..


مره قلت " ياخي هاللعبة قلق" مااااااتوا ضحك على قلق .. مدري وش فيهم :slant:

لوول .. يالله هذا الموضوع بيفيدك ترد عليهم .... ههههه

 

[ASWD]

تذكرت جم كلمة بعد

جامة=زجاجة او زجاج
تاير=اطار سيارة/كفر
جرنة=زاوية
سنطوانة=عمود
ليت=كشاف*كشاف سيارة مثلا*
درزي=خياط
قيمر=قشطة
بيكب=وانيد/بيكآب
برندة=شرفة
دلة=زمزمية
شلف=رف
فشي=فلين
نفيش=فشار
آلو=بطاطس
صلصل=معجون طماطم
صبار=خرخش*مسطلح كويتي لول*
بحاري*بالشدة على الحاء*=رز اصفرمع دجاج/ لحم ألخ
محموص=مجبوس/رز لونه بني