بوسيف39
True Gamer
مقدمة:
قبل كم سنة لو حد سألني عن العمالقة كنت بقول له الاتي: الأكشن ماله حلو، الغموض فيه حسن، الشخصيات ماله عادية لدرجة بعيدة، والأنمي فنيا أموره طيبة ونبرة صوتي لما أجي أتكلم عنه ممكن توحي بأني أعتبره منفوخ لأني نوعا ما كنت كذلك.
هذا الكلام كنت أقوله بعد ما شفت الموسم الأول سنة 2014 -إذا ما خانتني الذاكرة- وبعدها بفترة بسيطة قريت المانجا لين الفصل 67 ومن بعدها اهتمامي بدأ يضمحل رويدا رويدا، لكن مع صخب المواسم الماضية قرّرت أعطيه فرصة ثانية وأبدأ من الموسم الثاني وأدوّن ملاحظاتي عليه موسم موسم مع حرية
الحرق لكل جزئية، وهذي المقالة الي طلعت بيها.
تنويه بسيط: كتبت نقاطي/ملاحظاتي بحرية حرق الجزئية الي أتكلم عنها بدون عن أحرق الي بعدها، فلو كنت متابع إلى الموسم الثالث مثلا تقدر تقرا المقالة إلى تلك الجزئية بعدها توقف.
الموسم الثاني:
لو بتسألني عن ثيمة العمالقة بقول لك هي صراع البشرية من أجل البقاء، فيه جدران مقسمة على طبقات عشان تحميهم، صنعوا أسلحة ونظام عسكري يقسم الجنود، بعضهم يحمي الملك، آخرين يحلوا محل الشرطة، والبقية جيش يقاتل العمالقة، فالبشر يعيشوا داخل الأسوار عشان يحاولوا النجاة من العمالقة الي هم المفترس والبشر الفريسة، وتقدر تقول أنه بشكل ما ممكن يمثّل الفضول البشري لأن البشر يحاولوا معرفة طبيعة العمالقة وسرهم وما إلى ذلك من أمور، لكني أعتقد أن هذا جاي من دافع نزعة البقاء لأنك لو تعرف عدوك وتفهمه بتقدر تهزمه، وبصراحة أحسن شي بالنسبة لي بهذا الأنمي هم العمالقة وأشوفهم أحسن شي بالسلسلة.
فيه عدة أشياء تستحق الذكر عن العمالقة، أولها هو تصميمهم الي يشبه البشر ويختلف عنهم في آن، ولما تجي تاخذ بعين الاعتبار تنوع أحجامهم بين الطويل والقصير، العريض والرفيع، وملامحهم المتدرجة في سلم القبح، وطريقة تلوين أجسامهم المختلفة عن البشر وحركتهم أجسامهم الغريبة، خاصة لما يطلع لك عملاق راسه كبير وجسمه صغير أظن تقدر تفهم ليش أشوفهم ينفعوا في تجسيد دور الوحش(المفترس)،
وما أظن فيه مثال أحسن على مقصدي من هذي العملاقة:
جسمها طويل بس أذرعها طويلة وأرجلها قصيرة نسبيا، نحيفة لدرجة تشوف عظام القفص الصدري، العيون الصغيرة والابتسامة العريضة والأسنان الكبيرة تعطي مسحة وحش رعب creepy شكله يشبه الإنسان بس فيه عدة أشياء غلط تخليه للوحش أقرب.
وطبعا قبح العمالقة يتبلور لما تجي المشاهد الدموية الي نشوف فيها العمالقة تقطع البشر وتفترسهم بوحشية، بالنسبة لي مشهدي المفضل بالموسم الثاني هو مشهد العملاق القرد لما يخلي العمالقة يهجموا على البشري المسكين، وتلقاهم ينقضوا عليه كذئاب تهجم على فريسة لا حول له ولا قوة، فوق أن مظهر العملاق القرد يميزه عن البقية لأن فيه شي غير مريح بأنه يتكلم ويتحكم بالعمالقة، وأظن هذا الشي غير المريح لما يجي مع وحشية العمالقة يطلع لك مشهد مثل هذا:
وبصراحة الأسرار المتعلقة بالعمالقة كانت من الدوافع الي خلتني أكمل متابعة الموسم، عندك سالفة القرد وقدرته على الحديث والتحكم بالعمالقة.
وعندك سالفة كون كل من يمير وراينر وبيرلوت عمالقة.
وعندك سالفة قرية كوني الي ما فيها غير عملاقة واحدة غير مكتملة النمو والقرية خاوية على عروشها، مع أنها كان واضح أنها أمه بس كان فضولي أعرف كيف بيتعامل مع الموضوع وكيف صار الي صار.
وسالفة العمالقة الي بالجدران.
كل هذي الأمور طرحت أسئلة خلتني مهتم أكمل الموسم عشان أعرف أجوبتها، أتصور أي متابع بتجتمع هذي الأسرار مع بعضها البعض وتكون نصف الدافع القوي الي بيخليه يريد يكمل الأنمي ويعرف بقية الأحداث، وتزداد هذه الكتلة قوة لما نضيف لها نصفها الثاني وهو الأكشن.
أظن الشي الي يخلي الأكشن بالعمالقة مثير أنه ما قتال واحد ضد واحد وإنما معركة فريق ضد فريق، فريق العمالقة ضد فريق البشر، لما البشر يقتلوا عملاق يقصوا رقبته بحركة فيها نوع من الرشاقة والخفة، بس لما يموت إنسان تشوفه يتقطع ويمكن يتم افتراسه بشكل وحشي، وهذا يصنع وحشية العمالقة وهشاشة البشر في آن، لكن بنفس الوقت طريقة حركة البشر بالحبال والسيوف مميزة وفيها نوع من الخفة الممزوجة بالقوة، كأن السالفة سبايدرمان معه سيوف والبشر بطبيعة الحالة متفاوتين بالمهارة في استعمال هذه الآلة في قتال العمالقة، وأتوقع لو كانت القتالات فرد ضد فرد كان بيصير الموضوع ممل، لأن الي أشوفه البشر عندك نوعين واحد يكون العقل والبقية جنوده، وممكن العقل ينلغي من الحسبة فيبقوا الجنود، والمنفذين تلقاهم متشابهين للغاية من ناحية مهاراتهم متفاوتين من ناحية مستوى إتقان المهارة، يعني لما تشوف الأشياء الي تسويها ميكاسا تراها ما تفرق عن البقية غير أن مستواها مليون ومستواهم عشرة، بصياغة أخرى ميكاسا عندها نفس قدرات بقية الجنود الي مستواهم عشرة، بس هي أقوى بكثير، لكن هذا الشي مجرد ملاحظة هامشية ما أثرت على طبيعة الأكشن لأن السالفة سالفة معارك أفرقة، والأهم من هذا أصلا أن المعارك نفسها مختلفة وفيها تقلبات تخليها مثيرة، وخلينا ناخذ معركة القصر بالحلقة الرابعة والخامسة كمثال.
بالبداية الأبطال ما عندهم أسلحة ويدخل عليهم عملاق صغير يحاولوا يمنعوه على قد حالهم.
والي معهم أسلحة يقاتلوا العمالقة الي تجمعوا حول القصر ونشوف بهلوانية البشر بالقتال ضد العمالقة الي تعودنا نشوفها كثير، بس هذا ما ينفع وانهزموا هزيمة نكراء بسبب تدخل مباغت من العملاق القرد
بعدين يمير تتحول عملاقة وتقاتلهم لكنها عملاق صغير سريع، مب مثل راينر الي كبير مدرع وهذا كان بيوصلنا لهزيمة نكراء لولا تدخل الفيلق بآخر لحظة.
أظن هذي المعركة مثال حلو لطرفي نتائج المعارك على الأبطال، النصر والفخر في مقابل الهزيمة والخذلان، لما يفوزوا الأبطال يكون فيه شعور لذيذ، لأنهم قدروا يهزموا وحوش قوية شديدة البأس، بس لما يخسروا تكون النتيجة تقطع البشر على أيدي تلك الوحوش.
بخصوص قتال إيرين ورانير بصراحة كان نوعا ما محبط، كنت متوقع أشوف قتال يشبه قتالات ال mma لسبب ما، بس الي شفته كان لا بأس به كتنويع، لكنه كقتال فرد ضد فرد ما فيه شي مثير للاهتمام بصراحة ونوعا ما ممل، على عكس المعركة الأخيرة بهذا الموسم الي أبسط شي ينقال عنها ملحمية، مطاردة الجنود للعمالقة بعدين استغلال إيريون للعمالقة ضد راينر وأصحابه والمد والجزر الي صاير بالمعركة كان رائع بكل ما تعنيه الكلمة من معنى.
فخلاصة الكلام نعم الأكشن حلو جدا كمحتوى وطبعا كعرض، يعني ينفع ننسى جمال الرسم ولا الأنميشن الجيد المعبّر شوف هذي اللقطتين وشوف الفرق بين براعة ميكاسا بالقتال:
و"براعة" هيستوريا:
ولا المشاهد الي يتلاعب بيها المخرج بالكاميرا كأن المرسوم 3D؟
وعلى الهامش تعجبني طريقة رسم قزحية العين واستخدامها في التعبير عن المشاعر مثل الغضب والرعب والصدمة ونحوها من أمور:
فواضح لين الحين نظرتي للأنمي تغيرت للأحسن، وهذا صحيح لأن الأكشن كنت ناسي لأي درجة هو حماسي ولذيذ، والأسرار كنت ناسي وقعها تماما، ويمكن تقول أن نبرة صوت المتغطرس الناظر للسلسلة على أنها منفخوة تبخرت تماما، ما صرت مغرم بها بس صرت أفهم سبب الحماس العالي، لكن فيه شي واحد ما تغيرت نظرتي عنه من كل الأشياء الي قلتها بالبداية، وهو أن الشخصيات بشكل عام عادية لدرجة بعيدة.
خلينا نرتب السالفة أول، بالعادة لما نتكلم عن الشخصيات نحن نتكلم عن صفاتها وانعكاس هذه الصفات على حوارها وأفعالها، نتكلم عن تتطورها عبر الأحداث الي المفروض تغيرها، عن تفسير هذه صفاتها ومواقفها لما نشوف ماضيها، نتكلم عن علاقتها مع الشخصيات الأخرى، تقدر تقول نتكلم عن البناء وطبعا ما ملزم الكاتب يسوي كل هذا، ما شرط كل شخصية يطرح لنا ماضيها، وبالنسبة لي أهم شي بالشخصيات هي صفاتها وعلاقاتها، ما إني لا اكترث أبدا ببقية الأشياء مثل الماضي والتطور، لكن الصفات والعلاقات هي الأولى عندي، وقبل لا أتكلم عن شخصيات AOT عندي سؤال بسيط: كيف تقنع الآخر أنك تشوف شي معين بأنه عادي؟
الشي الي نوصفه بالعادي هو يعتمد علينا وعلى تجاربنا وعلى منظورنا للأمور فإذا كان هذا صحيح، فالمفترض لما تقول عن شي أنه عادي فكرة أنك تثبت أن شي معين عادي أقرب للجنون، حتى لو بتجيب سالفة والله هذه الشي شفناه بكثرة ممكن يجيك واحد ويتفق معك بس ما يحطه كشي سلبي، لأن موقفنا من العادي واعتباره عادي سلبي أو عادي ما عندك مشكلة معه، مسألة ذاتية مثل أن نظرتنا لأمر معين أنه عادي أو لا هو أمر ذاتي صرف عسير بل مستحيل الإثبات، وإذا ما تصدقني فجرب تاخذ عمل فني معين تشوف فيه جانب معين عادي وحاول تثبت هذا ولو قدرت تعال كلمني.
وعلى الهامش موضوع العادي أنصح بهذا الفيديو الي يطرح نفس السؤال: ويش هو العادي؟
الكلام الي فوق عن سالفة العادية وأن محاولة أثباته شيء من الجنون، هذا الكلام كتبته بتاريخ 9/5/2021 كفكرة أساسية ثم نقّحت الصياغة مع الوقت، وأنا ما زلت مقتنع بأن العادي فيه جانب نسبي عالي لأنه يعتمد على الإنسان وتجاربه ونحوها من أمور، بس سالفة أن إثباته مستحيل تراجعت عنها.
من عادتي لما اشتغل على مقالة أعرضها على بعض الأصدقاء أتناقش معهم واستفيد من ملاحظاتهم، بس العاقل المفترض يسمع من العاقل خاصة لما يكون أعقل منه وعنده سالفة، فعرضت هذي المقالة على أحد الأصدقاء ولما طلبت منه ملاحظة ذكر هذا:
الطريف أن الشيطان بنفس اليوم أو بعده بوقت الغداء وسوس لي أشوف جزء من سلسلة ديجيبرو بعنوان The Asterisk War Sucks الي يستعمل فيها هذا الأنمي كسفينة يتكلم فيها عن مواضيع متمايزة بكل حلقة، الحلقة الرابعة تكلم فيها عن سالفة الشخصية العادية، وطرح كلام رائع عن الموضوع من خلال فكرة أن الشخصيات عادة ترجع لقوالب معينة والكاتب شغله يتلاعب بيها ويضيف لها لمساته الخاصة، ولما يكون القالب محض قالب جاهز بدون تفاصيل ذات معنى أو غير متناسقة مع بعضها البعض، ساعتها تكون الشخصية مبتذلة/عادية.
هذا رابط السلسلة كلها، والحلقة المقصودة تبدأ بالدقيقة 47:50 وتنتهي بالدقيقة 1:03:14 وفيها كلام أكثر من المختصر الي قدمته وأنصح بشدة بمشاهدتها، وما تحتاج تشوف أي شي قلبها أو بعدها عشان تفهم كلامه.
وبعد هذا، أظن أحسن نقسم الشخصيات لعدة فئات، بس من الحين بقول شي مع أن مستواهم ككل في تقديري عادي، لكنه هذا العادي ما يوصل لمرحلة القرف ولا مرحلة التقبل، العادي الي يخليني أقول لو ماتوا أكثرهم ما يفرق معي أبدا، ما بتعاطف ما بهتم، هذاك النوع من العادي، وشخصيات مثل بيرلوت وكوني هذيلا الأثنين يمكن أحسن نموذج لمقصدي لأن ما عندي أي شي أقوله عنهم غير أنهم شخصيات عادية وبس.
الحين خلينا نتكلم عن الشخصيات العادية النمطية، الي هي قالب واحد ويتكرر على طول ظهورها ونمر على عدد منها، الأولى مجنونة إيرين القوية الي كل همها رضاه وقربه وحمايته من كل شر، ولا أكثر من هذا ولا أقل.
وعندنا العالمة المجنونة هانجي:
نوعا ما متقبل هانجي بس يمكن هي مثال حلو على فكرة مكررة بطبيعة الشخصيات وما مطبقة بذيك الجودة، بالعادة لما تطلع تحاول تراوينا أنها ذكية لما تعطي تحليلات ومرات مجنونة وشوفوني أنا مجنونة ومرات تطلع حركات المجنونة بشكل عبيط مثل هذا:
من بداية المشهد لين اخر شي قالته بعد ما رمت القس كان مشهد طبيعي ما عندي أي مشكلة عنه، بس كلامها بالأخير عبيط/سخيف، لسبب أو آخر مع إني أحب هذا النوع من الشخصيات إلا أن هانجي ما عجبتني، يمكن السبب أن بالعادة الشخصيات الي مثلها نشوف فيها انصهار الجنون مع الذكاء وممكن أشياء أخرى فوق هذا، بس هنا أشوف واحد منهم دون الآخر وما أشوفهم مع بعض.
وبالحديث عن العباطة عندنا ساشا:
الجائعة الساذجة، يا تشوفها تروح تركض ورا الأكل يا تكون ساذجة وعبيطة، وهذا بحد ذاته ما مشكلة بس مرات تطلع مشاهد مثل هذا بعد ما تلقى بنت أمها تنوكل قدامها من عملاق صغير:
تجي ساشا تكلمها كأنها متفشلة من موضوع معين بوقت ما تنفع تتفشل فيه وقتلت المشهد كله بالنسبة لي.
وبعد ما قلت هذا فما أظن يحتاج أتكلم عن إيرين لأنه البطل الأخرق المتحمس الي يريد يسوي المستحيل:
وأرمين الي نوعا ما خواف بس ذكي.
ولأننا خلصنا من الشخصيات النمطية ونقدر ننتقل لشي أحسن وهم شخصيات أشوفها غير مقنعة بما يكفي.
هيستوريا:
الي أظن الكاتب يريد يسويه هو أنه يخليها شخصية طيبة بسذاجة، ولو كان يريد يسوي هذا بذاك الماضي مع يمير فبصراحة ما أقدر أقول إني اقتنعت، لأني ما أشوف فرق كبير بينها وبين بقية الشخصيات الطيبة بالأنمي هذا، لكن الي يسعفها نوعا ما علاقتها مع يمير الي بتكلم عنها بعد ما نتكلم عن إيروين.
أظن الكاتب يريد يعطينا شخصية عندها الأناة والكاريزما وقائد عسكري من الطراز الرفيع، وأشوف هذا لحد ما لكن أحس بفجوة ما بين الشي الي يحاول الأنمي يحسسني بيه وبين الي أحس بيه وأشوفه، يعني لو هو يريد يخليه ممتاز بس أنا أشوفه بأحسن أحاوله جيد، صحيح الي سواه بالملحمة بنهاية هذا الجزء فنان بس أعتقد أحتاج أكثر من هذا عشان أقتنع أنه ممتاز كما يحاول الأنمي إظهاره.
وترا ولا واحد من الي ذكرتهم لين الحين في تصوري يخرج من دائرة النمطية لكن ما معناه مافي ولا شخصية زينة بالموسم، عندك يمير وراينر أحسن شخصيات الموسم في تقديري.
أظن سالفة يمير طلعت بشكل كامل، وسالفة راينر طلع منها شي جيد فأريد أقول أنهم أبطال هذا الجزء، ماضي يمير وعلاقتها مع هيستوريا والأشياء الي سوتهن بهذا الجزء خلاني مهتم بهذه الشخصية.
وراينر وصراعه بين كونه جندي ومقاتل وحالة الانفصام الي يعيشها بسببه مثير للاهتمام، خاصة أن المفترض يكون عنده العملاق المدرع بس حالته النفسية للهشاشة أقرب.
ما بقول عنهم شخصيات ممتازة لكنها شخصيات جيدة خلتني اهتم بها، وهذا شي زين قدر يسويه هذا الأنمي لأني أشوف الشخصيات نقطة ضعفه، على عكس أغلب الشخصيات لو طلع أحد هذيلا الأثنين قدام بكون مهتم بأي شي يصير له، مهتم أشوف كيف يتطور ولو مات يمكن أتأثر، وعسى وضحت نظرتي للشخصيات وعندي فضول أسمع نظرة الي يشوفهم شخصيات ممتازة.
وأخيرا فيه مشكلتين لاحظتهم بالأنمي، الأولى بقول القصة تحتاج editing والثانية ال cliffhangers
قصدي بكل بساطة لما أقول القصة تحتاج editing أن فيه حشو وأحداث ما لها داعي، أو وجودها يخدم شي بسيط بس ما يفيد الحلقة/الموسم بشكل كافي ليُبرر وجودها، بذكر عدة أمثلة على هذا:
عندك الحلقة السابعة الي فيها قتال إيرين وراينر، إيرين جلس نص الحلقة يتذكر التدريب مع آني عشان يتذكر حركتها ويطبقها على راينر، كل هذيك الأحداث كان ممكن تختصر بأنه يطبق الحركة بعدين وحدة من الشخصيات يتذكر الموضوع على شكل لقطات/صور وكفى.
بالحلقة الثانية فجأة ساشا تذكرت حوار دار بينها وبين هيستوريا ويمير، لما كانت تهرب من العملاق الي اكل الأم وهي بنفسها لما تذكرته جلست تقول أنا ليش تذكرته؟الحين هذي meta joke والمفروض نضحك يعني؟
بالحلقة الخامس فلاشباك يمير وهيستوريا الي تحاول هيستوريا تنقذ واحد بعاصفة ثلجية، ويمير تستنكر فعلها بعدين تنقذهم بأنهم "يلمحوا" لنا أنها يمكن عملاقة، بصراحة فوق أن السالفة ما أشوفها مقنعة بما يكفي عشان تخلني أعتبر هيستوريا طيبة واجد واجد، خاصة أن هذي حركات شخصيات الشونين الطيبة المتكررة، السالفة ممطة وبالأخير تلمح لنا أن يمير عملاقة ويمكن هيستوريا تعرف، المشكلة ترتيب هذا جاي بعد ما عرفنا أن يمير عملاقة وهيستوريا قريبة منها واجد فويش فايدة الفلاشباك؟
أثنين من هذيلا خذوا نص حلقة، أتوقع لو كان طول الموسم 25 حلقة أو حولها ما بشوفها ذيك المشكلة الكبيرة لو كانت أغلب الأحداث أمورها طيبة، بس لما يكون الموسم طوله 12 حلقة هذا الموضوع بيكون أوضح وتزيد حجم المشكلة، ومع أن الموضوع تكرر عدة مرات، الحشو موجود بس ما كل حلقة وهو مب أسوأ شي بالموسم لأن هذي الجايزة تروح للإفراط باستعمال الكلفهانجرز.
كلنا نعرف المثل الي يقول:"كل شي يزيد عن حده ينقلب ضده"، وهذا تقدر تطبقه على سالفة الكلنفهانرجز بالموسم هذا، من كثرته صار خلاص ماله طعم وفقد قيمته عندي، لما يطلع ما صرت أتحمس أشوف الحلقة الجاية لأن الأنمي أسرف باستعماله، وغير هذا مرات الحلقة كانت ممكن تخلص بشكل عادي بس في اخر الدقايق يصير شي "حماسي" عشان تخلص الحلقة على كلفهانجر والسالفة مصخت، لو الحركة هذي هدفها يخليني أتحمس أشوف الحلقة التالية، فمبروك فشل الأنمي بهذا لأنه أسرف باستعماله حتى فقد بريقه.
الموسم الثالث
بعد الموسم الثاني والأشياء الي تكلمت عنها، ألقى نفسي ما عندي الكثير لأقوله عن هذا الموسم، لأن أكثر الأمور ما زالت حاضرة وهذا الجزء المزيد من العمالقة مع بعض التعديلات.
لكن قبل هذا أريد أشير لأن خطف إيرين مرة ثانية ببداية الموسم حسسني كأنه الأميرة خوخة من ماريو.
لكن لو بنبدأ من مكان فمشكلتيّ الإسراف في استعمال الكلفهانجرز، واحتياج القصة للتعديل اختفوا تماما من هذا الموسم، وحتى طبيعة الأحداث اختلفت بشكل ما وبنرجع لهذا بعدين.
رغم أن طبيعة الأحداث أخذت شفت-shift- قوي من ثيمة صراع البشرية لأجل البقاء إلى الملك والتاريخ كذبة بدون سابق إنذار أو بناء، وهذا يعطينا نظرة أن كاتبنا عيسى-ايساياما- مضيع القبلة، لكني لو قلت أن مستوى الأحداث لم يتفوق على الموسم الماضي فهذه محض كذبة.
طبيعة الأحداث بهذا الموسم تختلف عن السابق لدرجة ما لكنها في تقديري الشخصي أفضل، عجبتني سالفة هيستوريا وماضيها وماضي العائلة الحاكمة الحقيقة، وعجبتني سالفة كيني وماضيه المتعلق بليفاي
وطبعا عجبتني كل الأمور الكاشفة للأسرار، خاصة ماضي أبو إيرين والي فسر أمور مختلفة وفتح آفاق أحداث الموسم القادم، وطبعا أعجبني جدا تسلسل الوصول للقبو بس هذا نخليه بعدين.
ما أظن يحتاج نتكلم عن الشخصيات لأنهم بنفس المستوى لكن لو بقول شي فبيكون حتى بعد حركة إيروين الانتحارية بهذا الموسم بعده كلامي هو نفسه.
طبعا لازم نذكر أن فيه تطور إنتاجي ملحوظ في هذا الموسم ويكفي لقطة ليفاي هذه ببداية الموسم بينما يطارده فريق كيني، تذكر لما كنت أقول كأنهم سبايدرمان لما يستعملوا الحبال بالحركة؟ بهذه اللقطة خاصة تحس كأنك سبايدرمان يحاول يصور ليفاي وهو يهرب من الأعداء.
الأكشن بعد حصل على تتطور ملحوظ بإضافة قتال البشر ضد البشر، والمسدسات ضد السيوف وأراها إضافة موفقة فتسلسل ملاحقة ليفاي كان مشوق ومثير وحماسي لأنه أقرب للعبة مطاردة بس الي يهرب واحد ماهر وبارع، والي يلحقوه عندهم مسدسات وهم كثرة فهذا يعطيهم أفضلية عليه، ومع ذلك قدر بمهارته العالية يتفوق عليهم،
تسلسل الكهف كان موفق وما زال الأنمي محافظ على هشاشة البشر بس الحين المعركة فيها مسدسات وهذا كما قلت إضافة حميدة تزيد حلاوة الأكشن، وطبعا أحسن تسلسل أكشن كان المعركة الأخيرة الي شفنا فيها هجوم انتحاري لمحاولة هزيمة العملاق القرد والي تذكرني بتسلسل المعركة الأخيرة الملحمية بالموسم الماضي لكن على مستوى أعلى، لأن عندنا ثلاث أطراف كبيرة في فريق الخصم وهم العملاق القرد والضخم والمدرع ضد فريق الأبطال الي هزم واحد منهم بسلاح جديد، وأثنين منهم بخطط، وهزيمتهم بعد هذا كله كانت لذيذة للغاية، لأن طبيعة قتال كل منهم وقدراتهم تم التعامل معها بشكل مختلف فصار فيه تنويع من ناحية طريقة الهزيمة والطبيعة الخصم، وفوق هذا الأنمي كان ينتقل بينهم بشكل مرن بين هذه الثلاثة معارك بحيث أن المتابع ما يضيع بين المعارك الثلاثة.
وخلينا أقول هذا بنهاية هذي الجزئية، المواسم الثلاث الأولى من العمالقة تتشابه وممكن تعتبرها حقبة واحد أو كتلة واحدة، بس بصراحة ما أعتقد أن هذا دقيق، نعم تتشابه في أنها بنفس الأسلوب الفني الي شفناه يتحسن عبر المواسم، تتشابه في مستوى الشخصيات وطبيعتها، تتشابه في أن نقطة قوتها الأكشن والناس تتابعها عشانه وعشان الحماس الي تبثه في نفس المشاهد فيكمل الحلقات، وكذلك الأسرار والرغبة في معرفة أجوبتها، وهذي تشابهات كبيرة بس فيه فرق محوري في تصوري يخليني أقول أول موسمين فترة زرع الأسرار، والموسم الثالث حصاد الأجوبة.
الموسم الأول هدفه كان بناء الشخصيات، وصناعة أكشن وتشويق عشان المتابع يتحمس يكمل، بس كان فيه عدة أسئلة مثل ليش العالم بهذا الشكل؟ ويش سالفة الجدران؟ليش إيرين يقدر يتحول عملاق؟ويش سالفة اني؟ويش سالفة العملاق الطويل والعملاق المدرع؟هل ممكن يكونوا بشر مثل اني وإيرين؟ بس التركيز ما كان على هذه الأسئلة وإنما على الأكشن والتشويق، وأن المتابع يصير متحمس يكمل الحلقات بس نفس الوقت مهتم يعرف الأجوبة، يعني بصياغة أخرى كانت موجودة بالخلفية وممكن تتسائل عنها بس الأحداث ما تركز عليها.
بالثاني عرفنا أجوبة مختلفة وزرعنا أسرار أكثر، وصحيح الموسمين يتشاركوا بالأهداف بس اهتمام الأنمي بالأسرار صار يساوي اهتمامه بالأكشن وانتقلت من الخلفية للمقدمة لأنها صار هدف مهم، أما الثالث تقريبا جاوب على كل الأسئلة لأن هدفه الأساسي كان حصاد الأجوبة وبعد هذا صناعة الأكشن.
لو أول موسمين هم زرع الأسئلة، والثالث حصاد الأجوبة، فويش يكون الرابع؟ وجوابي هو الحرب.
بل الانتقال للحديث عن الموسم الأخير الجزء الأول -أكره ذا الاسم- أريد أقول شي، دايما كنت أحس أن رسم السماء بهذا الأنمي فيه شي غلط بس الله أعلم ويش، لكن قبل فترة انتبهت أن السماء رسمها واقعي بدرجة أعلى من رسم الشخصيات فمشكلتي معها مشكلة تناغم بين العناصر الفنية إن صح التعبير، يمكن الموضوع مسألة شخصية بحت بس حبيت أقولها قبل الانتقال لموضوع الحرب والموسم الرابع.
الموسم الأخير الجزء الأول
على عكس الموسم الماضي فأظن هنا عندي أشياء أكثر أقولها منها أن شارة البداية هي الأفضل بالسلسلة، وأعتقد لازم نبدأ بالتغيرات ومنها تغير الاستديو وبالتالي تغير التوجه الفني، وبصراحة ما عندي هذيك المشكلة الكبيرة مع الموضوع.
تصميم الشخصيات في نظري صار أحسن، اختيار الألوان صار متناسق وقامِت-داكن- أكثر وهذا يتماشى مع طبيعة الحرب، رسم الخليفات بعد جيد:
وفيه كذا لقطة فيه انتقال رائع بالمشاهد:
أو عرض الماضي من خلال الحاضر كلها كانت موفقة:
لو فيه شي فعلا قل مستواه هو كثرة استعمال ال 3D بمشاهد الأكشن وكلنا نعرف أن الأنمي وال3D بشكل عام وضعهم ما تمام، لكن بصراحة ما أشوفه شي من الدرك الأسفل من النار بس لو كان 2D نفس مستوى المواسم الماضية أكيد بيكون أحسن، وأصلا مشاهد الأكشن بهذا الموسم ما كثيرة ولو نستثني العملاق القرد لأنه شكله كان سيئ للغاية الباقي ينبلع، أقل من المواسم السابقة كعرض؟أكيد بس شخصيا قدرت أتقبله.
ولأن جبنا سيرة الأكشن فبصراحة محبط شوية انهم جابوا عمالقة جدد والي هم الفك والمطرقة بس استعملوهم بشكل جدا بسيط بس ننتظر الموسم القادم عسى نشوف استعمال أكثر لهم، وعلى فكرة المعركة الي صارت بالموسم هذا كانت حلوة.
غير هذا التغيير عندنا تغيير اخر وهو أن طبيعة الأحداث صارت درامية أكثر، وهنا لازم أعترف أنها كانت دراما حلوة وأعتقد أحد الأسباب أن الحوار صار أسلس وواقعي أكثر، والسبب الاخر أن كالعادة الأشياء المتعلقة بماضي الشخصيات كانت موفقة ومثيرة للاهتمام وتبرر مواقفهم، والأهم من هذا كله أن النص الأول من الموسم كان مركز على جانب راينر -شخصيتي المفضلة- وجماعته ونجح في أنسنتهم وجعلهم طرف منطقي وسهل تفهم موقفه من خلال الأحداث الي شفناها عنهم، ولذلك بالمعركة الي بتصير بينهم أعتقد المشاهد على غرار المواسم السابقة ما بيكون الوضع فيه طرف خيّر وشرير وإنما طرفان كلهم لهم أسباب للقتال-هذا توقع مني لا أكثر-، ومع أن شخصية جابي بصراحة كانت شخصية مزعجة وكريهة لكنها نتيجة منطقية للبروباجندا وأثرها على الناس، وبعد هذا كله وشكري لجودة النص الأول من الموسم ما أقدر أقول نفس الكلام عن النص الثاني.
مشكلة النص الثاني في تصوري أن الأحداث بشكل غريب كأنها توقفت وصرنا نشوف أحداث ممكن تكون حلوة لو شفناها كقصة جانبية ب OVA بس كقصة أساسية لا، جلسنا كثير ننتظر نشوف ليش ايرين تغير بهذا الشكل وصار أكثر هدوءً وأقرب لإيمو شكليا وهذا التوجه ما عندي مشكلة معه، بس الموضوع طوّل لين يعطونا سبب تحوله، جلسنا كثير لين شفنا شي مثل ماضي زيك الي كان الشمعة بآخر النفق وضيعنا وقت أكثر من اللازم على جابي وفالكو، فالموضوع كأنك صرت تلعب مهام جانبية بلعبة عالم مفتوح بدل أنك تكمل القصة الأساسية.
غير هذا مرة أخرى يثبت لنا عيسى أنه مضيع القبلة، بس عشان نعطيه حقه أشوف النقلة في طبيعة الأحداث بهذا الموسم موفقة بسبب الفارق الزمني، بس ما أعتقد أقدر أقول عبارة أحسن من أنه مضيع القبلة بخصوص اختلاف الثيمات، عنصرية وطبقية ووهم الاختيار وأنك أصلا مخدوع تسوي شي مجبر عليه، هذه الثيمات ممكن تطرح بشكل أعمق ومثير للاهتمام، بس سالفة العنصرية والطبقية عندي سؤال أوجه له: أنت ناسي أنك مسوي عالم قبل فيه ثلاث أسوار تقسم الناس لعدة فئات ولا كيف؟
كثرة الثيمات مش بالضرورة تكون شي إيجابي أو سلبي، العبرة بطريقة التعامل مع الثيمات، ما أعتقد أن الأنمي يعاني من زحمة أفكار تنافر بعضها البعض، لكن يكب علينا أفكار بعضها فيها نوع من العمق-أو يستثمرها إن أحببت- وبعضها تميل لكونها تعامل سطحي/بسيط مع الثيمة، أعتقد القصة من هذي الناحية ممكن تكون أحسن لو ركّزت على ثيمات أقل واهتمت بأنها تعطيها عمق بدل أن تطرح كل فترة فكرة جديدة بدون وجود بناء قوي لها طالما السياق يسمح، ومرات ما تستثمر فيها، طبعا ما أطالب عيسى يكتب شي من الأدب الرفيع، لكن أتمنى يتحسن من هذه الناحية بعمله القادم.
بعد هذا كله أقدر أقول أن التغيير بهذا الموسم كان موفق، لكنه أضعف من الموسم الثالث، الموسم الثالث كان على طوله مثير للاهتمام بينما هذا الموسم نصه موفق ونصه مب بالضبط، ومع هذا أقدر أقول أن اختلاف طبيعة الأحداث والتمهيد للنهاية كان موفق، ويخليني متشوق للقادم وخصوصا النهاية.
المانجا
خليني أبدأ بالكلام عن الجوانب الي عجبتني عشان نبدأ بشي إيجابي، ماضي يمير عجبني وكان جميل، وكعادتها الأشياء الي لها دخل بالماضي تكون موفقة وكذلك الأحداث الي صارت بين زيك وإيرين لما جلسوا يبحروا بالذكريات، أول معركة صارت بعد الموسم الرابع على طول كانت موفقة، واستعمال رائع للعملاقة العربة، وبقية المعارك كذلك، الفصل لما شفنا الإبادة الجماعية واثرها على مناطقة مختلفة كان مثير، وكل هذي الأشياء متحمس أشوفها بالأنمي لأن العرض بالمانجا دون مستوى مانجا احترافية خاصة لما نتكلم عن شي شهري.
أسلوب عيسى بالرسم ما عندي مشكلة معه، فيه مسحة لون رمادي واضح ويذكرني بالكومكس أكثر من المانجا، بس العبرة كلها بالإتقان والإخراج.
مرات يرسم بشكل يعطيك شعور أنه يرسم بدون Reference فتطلع poses غريبة،
ومرات يرسم بشكل يخليك تستغرب من عدم إحساسه بالمسافات مثل يد عملاق أكبر من اللازم، أو أجسام ضخمة ورؤوس فاصوليا، وحتى جمجمة مضغوطة وما إلى ذلك من أمور وهذه أمثلة:
رؤوس فاصوليا.
وضعيات بعض العمالقة غريبة بشكل سلبي، كأنه يرسم بدون رفرنس.
طول اليد هنا.
حجم الجمجمة ونحافة اليدين مال العملاق الطويل.
جمجمة البنت الصغيرة.
مرة أخرى أبعاد أيدي العملاقة.
ولو تحسبني أتصيد صدقني لا هذي أمور تتكرر وبسهولة تلقاها بأي فصل، وغير هذا إخراج المشاهد عنده جدا عادي، ويحب لسبب ما استعمل هذي التقنية بأنه يحرك البانل بس بصراحة يذكرني باللي يستعمل فلتر وهو يصور ما عشان يضيف للصورة أو شي، لكن عشان يقدر يسويه فيطلع الموضوع مب سيئ ولا جيد، لكن بدون أثر، شي تسويه لأنك تقدر تسويه ما لأن لك غاية من وراه.
التقنية الي اقصدها.
هذي الركاكة الفنية-إن صح التعبير- ممكن أبلعها من رسام هاوي، بس محترف ويرسم فصل واحد شهريا الموضوع عسير البلع، وهذا كان الجزء الأول من جواب سؤال طرحته على نفسي وكان: ليش صرت أقرا المانجا بشكل بطيء للغاية بمعدل فصل باليوم؟ لأن عادتي لما أتحمس بقصة مانجا التهم الفصول، لأن النص الثاني من الجواب متعلق بالأحداث والشي الي أقدر اسميه ببساطة: لعنة الارك الأخير.
أعتقد سهل تعرف لعنة الارك الأخير بالأنمي والمانجا، الحالة لما المؤلف يكبّر اللقمة ويحاول يسوي شي كبير وملحمي وضخم واخرتها ما يقدر له ويجيب العيد، هنا صار شي مشابه ويمكن كل مشاكلي ممكن اختصرها بسالفتين: الرخص وقصر النظر.
أكيد أنت مريت بشي يعبر عن معنى Deus Ex machina بقصص مختلفة، ويمكن ترجمات مثل قوة الصداقة أو المخرج عاوز كدة تنفع كترجمات متحررة لهذا المعنى، لكن هي بكل بساطة لما يصير حدث معين من اللامكان عشان القصة تكمل، مثل البطل يحصل قوة جديدة عشان يغلب الشرير، والشي الي يخلي الموضوع فيه "المخرج عاوز كدة" أو لا هو وجود البناء من عدمه، فلما البطل يحصل قدرة من العدم أو صاحبهم فجأة ينقذهم بدون بناء، شي كهذا طبعا غير مقبول، بس جالك مر عليك الكاتب يسوي هذا لشي يقدر يتفاده بنفس الفصل؟عيسى عطانا أثنتين من هذه الحركة.
مرة بفصل زيك انفجر وانفجر معه ليفاي، وطبعا كل واحد وصل لمرحلة على حافة الموت، سالفة بقاء ليفاي خليها أهون شوي لأنه ولو كانت غير منطقية في تقديري الشخصي لكن على الأقل ممكن تتفسر من ناحية قوة الأكرمان وتغتفر شوية -بس شوية- من ناحية كونه صار جريح وكذا، لكن زيك يكون على حافة الموت بعدين يطلع عملاق من العدم يشق بطنه ويدخله هناك عشان يتعالج هذا ويش؟
ولا إيرين لما جابي فجرت راسه والفصل الي بعده بقدرة عجيبة يعيش، كل هذا عشان كلفهانجر رخيص، الصادم بالنسبة لي بالحالتين أنه سهل يتفادى الموضوع مع تعديلات بسيطة للفصلين، سالفة إيرين كان ممكن جابي تضرب رجله أو شي مشابه ومع ذلك يوصل لزيك وتمشي الأمور.
السلسلة ما عودتنا تسوي أشياء هبلة كهذه، والمخرج عاوز كدة بالعادة شي كريه بالقصص، بس فرق بين سلسلة تعودك عليها وبين وحدة تدمرها بالأخير، ومع الأسف هذا ما اخر شي سلبي بقوله عن إيرين وزيك.
فيه فرق ما بسيط بين أنك تسوي قصة سوداوية، وبين أنك تسوي قصة رخيصة، فكرة أن أحد الشخصيات تقرر تسوي إبادة جماعية بحد ذاتها ما فكرة سيئة، بس شي كبير مثل الإبادة الجماعية المفترض الكاتب يتعامل معه بحذر عالي، الشي الي ما أقدر أشوفه غير أنه رخص لما أشوف زيك وإيرين كل واحد منهم يطلع بخطة أغبى من أخوه عشان يصل لنتيجة نكدية، زيك يريد يمنع الإلديين من التناسل وينهي العرق بموت بطيء، وإيرين يريد يسوي إبادة جماعية لبقية الأعراق لأنه تحول لإيمو، وبصراحة أجد نفسي عاجز عن التعبير عن مدى غباء كل خطة، وعن سخافة الموضوع عشان توصل لنهاية كئيبة أو تصنع أحداث كئيبة، وبعد ما وصلت لهذي النقطة رغبتي بأني أكمل المانجا بدت تضعف بشكل غير عادي، لدرجة صرت أقرا فصل باليوم بس عشان أخلص لأن كل مرة أشوف أحداث زيادة أقول لنفسي: ما شاء الله مزيد من النكد الفارغ لأن عيسى قرر يحصر نفسه بين خيارين لاستعمال قدرة المؤسس، كل واحد منهم أغبى من الثاني في تصوري.
يمكن الشي الي يخليني أستسخف هذي الفكرة وتعامله معه هو لأي درجة الموضوع مقحم أو عبيط أو شي بينا هذا وذاك، وعشان تكون بالصورة ترا السلسلة ما أنها بدون لحظات سوداوية، بس كل هذيك الأحداث لما صارت كانت متماشية مع طبيعة الأحداث ونتيجة طبيعية للي صار، عندك مثلا هذا المشهد بماضي يمير، لما بناتها ياكلوها حسب طلب أبوهم:
أو مشهد افتراس عملاق لأم قدام بنتها بالموسم الثاني ولو أن ساشا خربته، أو تعذيب ليفاي وهانجي لواحد كانت شغلته يعذب ناس عشان يطلعوا منه كم معلومة، لما أشوف هذيك الأحداث أشوف شي سوداوي صار له معنى ووزن وماشية مع سياق الأحداث، بس لما أشوف خطط الأخوين يجير أشوف طريقة هبلة لاستعمال قدرة المؤسس وتحقيق أحداث نكدية.
وفيه سالفتين غبيتين بهذا الارك زيادة وهم موت هانجي وتحول فالكو لعملاق مجنح، تحوله لعملاق مجنح من أي قبيل؟هل أكل زيك؟لا كان حي ساعتها، ليش عشان حلم؟وعشان يرجع اني لأرض المعركة؟ مجرد أن الشخصية تحلم بحاجة ما عذر جيد عشان يتحقق الحلم لأن هذي المخرج عاوز كدة مرة أخرى.
وموت هانجي الشي الوحيد الي بقوله عنه هو فارغ، محاولة خلق سيناريو بطولي لشي أصلا تحققه غير منطقي، هذيلاك العمالقة الطوال لو تهجم على واحد عشان توفر وقت لهم ويهربوا ما يتأثروا لأنهم جيش كبير، فأصلا هجومها المفروض ما ينفع والسالفة تلفيقة عشان يقتل شخصية ويحسس المشاهد بالحزن لا أكثر، هو مسوي نفس الشي مع ساشا والموضوع كان ملائم بزيادة عشان يوصل لموتها بس هذي مرحلة أخرى من أن الحظ يضبط وتصير الخطة.
وبالحديث عن المؤسس وإيرين، عندي تحفظات على عرض قدراتهم، مدرك أنه عملاق قوي بس دايما أفضّل بالقصص لما توضح لنا قدرات الشخصيات وتصير تتلاعب بيها حسب الشرح، العملاق المؤسس يتحكم بالعمالقة؟ شي أفهمه، بس هو يقدر يصنع عمالقة قدماء ويحركهم كأنهم بيادقه شي نوعا ما أفهمه بس هنا بالذات أشوف قدرته فيها نوع من الضبابية السلبية، لكن هذا لا شيء بالمقارنة مع قدرة العملاق المهاجم.
يرسل ذكريات من المستقبل عشان يعدل الماضي، هذا الشي أفهمه بس ويش أثره على الحاضر؟هل هذا يصنع تايملاين جديد؟ولا ويش بالضبط؟ تخيل التالي: خلينا نقول أنك شخصية بعالم العمالقة وعندك القدرة هذي وقررت ترسل ذكريات للماضي عن كيفية صناعة الصواريخ الي تطلق على العمالقة، ما المفروض هذا يطلع لنا تايملاين جديد وتتغير الأحداث فيه بناء على معرفة الناس بآلية صنع الصواريخ من وقت مبكّر؟بس كيف هذا الشي بيأثر على الحاضر بالضبط؟أو السالفة أن القدرة هذي هي تفسر أحداث صارت قبل بس ما تأثر على الماضي؟يعني أبو إيرين مثلا سوّا الي سواه عشان شاف المستقبل وأُمر بالموضوع، لين الحين ما فاهم حدود القوة ومدى تأثيرها لأني أعتقد فيه ضبابية سلبية بالموضوع.
أعتقد واضح من الحين عدم إعجابي بالأحداث الي صارت بعد الموسم الأخير الجزء الأول كلها جاية من إني أشوف الأفكار المستعملة خايسة، ومرة وحدة خلينا نروح للنهاية ونكمل سلسلة الخياس:
كنت أسولف مع واحد من الشباب عن الموضوع وجلس يقول شكل السالفة time loop عشان كذا إيرين مسوي هذا وجلس يمشي على الي يشوفه بالمستقبل، وبالفصل الزيادة الي طلع بعد النهاية رقم 139.5 كان فيه تلميحات لهذا الموضوع، ولو هذي النظرية صحيحة بصراحة ما أشوف الفكرة عرضت بشكل جيد أو واضح بما يكفي عشان أشتريها كمتابع، لذلك سالفة أنه جلس يقتل عشان ينقذهم وما منع حريتهم عشان يكونوا أحرار وما إلى ذلك محض محاولات سخيفة عشان عيسى يخلينا نتقبل ونشفق على إيرين لأنه مجبور ما عنده خيار أو شي من هذا القبيل، تكلمت قبل عن غباء حصره لنفسه داخل خطتين عشان يحقق فكرة الإبادة، بس لما يجي يختمها بأن حب ميكاسا ساعد بشكل ما بالموضوع لا هنا ختم الهبل، فمن ناحية التفسير الي يفسر بيه أفعال إيرين خربها، ومن ناحية أنه يراويك الأشياء الي صارت بعد النهاية ما أعتقد الموضوع كان كافي.
في تصوري القصة كان تحتاج زيادة أحداث هادية بعد ذروة القصة عشان تختمها بشكل أفضل، فصلين زيادة أو شي كهذا بيكفي وزيادة ولكن هذا لم يحصل، فالخاتمة كانت شي سيئ بصراحة، أحسن مما توقعت بسبب استياء الناس العالي بس بعده شي سيئ.
كيف تطورت السلسلة؟
أعتقد أحسن طريقة عشان نختم كل هذا الكلام عن السلسلة بأننا نرجع ونشوف كيف السلسلة تطورت/تغيرت عبر المواسم؟ وبتكلم عن ثلاث محاور وهي: الشخصيات والغموض والأكشن.
كتابة الشخصيات كانت دايما تتألق بالأشياء المتعلق بماضيها لا صفاتها وعلاقاتها، والموسم الرابع تحسن الموضوع لأن الحوار صار أسلس من قبل، وشخصيتي المفضلة بالسلسلة هو راينر لسالفة الانفصام الي يعيشه.
أما الغموض بالموسم الثاني كان فيه أربعة أسئلة أساسية: من هو العملاق القرد؟ويش سالفة راينر وبيرلورت ويمير؟ويش سالفة العملاقة بقرية كوني؟
الموسم الثالث انتقلنا لسوالف لها دخل بتكوين العالم والتاريخ والملك، مع أجوبة على الأمور السابقة، وكما أحب أسميه حصاد الأجوبة.
والموسم الرابع نقدر نقول بأريحية أن الغموض اختفى من الحسبة وهذا ما شي سلبي على فكرة لأنه عوضنا بالدراما.
أما الأكشن فأعتقد أنه أكثر شي تتطور، بدأ الموضوع بقتال بشر ضد عمالقة، بعدين أضيف عملاق إيرين للحسبة، بعدين صار الموضوع عملاق ضد عملاق بقتال اني وبعده قتال راينر، وصار الموضوع مطاردة ملحمية بنهاية الموسم الثاني وبداية إضافة العملاق القرد، بالثالث شفنا إضافة قتال البشر والمسدسات مع إضافة الصواريخ، وشفنا قتال فيه ثلاث عمالقة مع بعض باخر معركة القرد والطويل والمدرع، بالموسم الأخير الجزء الأول والمانجا شفنا عمالقة أكثر، العربة والفك والمطرقة، والمؤسس طبعا.
أعتقد ما شفنا استعمال كافي للفك والمطرقة، بس الطويل والمهاجم-بدون قدرته- والأنثى والقرد والعربة كلهم شفنا استعمال موفق لهم، ومع الأسف أشوف استعمال المدرع بدأ يضعف كل مرة تقدمنا بالأحداث، والمؤسس قدرته كان فيها نوع من الضبابية وقدرة المهاجم تكلمت عنها سلفا، لاحظت أن عيسى يعرف كيف يطور بالأكشن بأن يضيف فكرة بسيطة بس يستغلها ويستثمرها ويعطيها حقها، وما يجلس يكرر نفسه، في تصوري هذا أحسن شي بأكشن أتاك أون تايتن، يعرف متى يضيف فكرة وكيف يستعملها ولو كانت بسيطة.
وهذا كل شي عندي أقوله عن السلسلة، كانت رحلة متابعتها وتدوين هذي الملاحظات شيقة ومثيرة بالنسبة لي، وبانتظار تعليقاتكم كي استفيد منها، لكن لو برتب السلسلة بقول:
والأول ما أتذكر منه إلا أشياء ضبابية فما بخليه بالحسبة، وتقريبا هذا كل الي عندي وسلامتكم.
ملحق المقالة:
هذي الفكرة من دهر أريد أسويها بوحدة من المقالات، طبعا لما أي واحد يكتب مقالة بيصرف عليها وقت وجهد ويبحث، وممكن تصير أشياء مثيرة للاهتمام أو يلقى أشياء مثيرة للاهتمام بس لسبب أو اخر ما يقدر يدخلها داخل نسيج المقالة، فمن هذا الباب جات هذي الفكرة كشي إضافي أقوله زيادة على المقالة، وتقدر تسحب عليها وما بينقص شي.
خلصت اشتغل على النسخة الأولية من جزئية الموسم الثاني بتاريخ 9/5/2021 وخلصت المسودة الأولية كلها تاريخ 25/9/2021، وقبل ثلاثة أيام بدأت أنقح المقالة عشان تطلع النسخة الي قدامكم، وتقريبا كان أغلب الشغل هو اللمسات الأخيرة وحذف أشياء اكتشفت مالها داعي وكم شي غبي مسحته، الي خلاني اخذ كل هذي المدة هو الكسل أولا والأشغال ثانيا، بالعادة الكتابة ما تطول واجد يمكن تاخذ يومين إلى أربعة لكل جزئية لو أجلس كل يوم مال ساعتين ونحوها بس هذا ما صار، أعتقد هذي أول مرة اشتغل على مشروع أخليه on/off لكل هذي المدة، وطبعا لو طلع المقال خايس المقال خايس، أنا مؤمن أن الوقت والجهد المصروف على شي ماله دخل بجودة النتيجة النهائية، وصار لي شي قريب علمني هذا الدرس بالطريقة الصعبة.
فيه عدة أشياء مثيرة للاهتمام لقيتها وأنا أبحث عن العمالقة، أولها هذي المقابلة مع عيسى، مع الأسف ما قدرت اقتبس منها بدون أن أحشر النص بشكل بغيض، لكن المثير للاهتمام بالمقابلة أن الي يقابله-المذيع/المُقابل؟ماعرف ويش أحسن كلمة عشان توصف شغله- طبيب نفسي وتقدر تشوف بسهولة أنه كان يحاول يشفط المعلومة منه عشان يحاول يصنع صورة بانورامية لشخصيته بشكل يستحق التأمل:
https://mangabrog.wordpress.com/201...d-art-and-stand-out/?utm_source=pocket_mylist
المقابلة تطرقت لعدة أمور منها رسمه وأن يشوف أحسن يكون الرسم فريد ولو بشكل رديء عشان يبرز، وذكروا قبح العمالقة وتكلموا عن إيرين وميكاسا وليفاي، أكثر شي صدمني كلامه عن إيرين وأنه ما فهمه لين طلع بالأنمي.
شفت هذا الفيديو ل Super Eyepatch Wolf يقدم تفسيره لشعبية العمالقة، إحدى النقاط الي ذكرها أن العمالقة خليط بين الزومبيز والكايجو وهذيك نقطة مثيرة للاهتمام بصراحة، أعتقد أن يحيى تطور واجد من كل النواحي وفيديوهاته الحالية أحسن من هذا بكثير بس أعتقد أن فيه نقاط مثيرة للاهتمام ولو أنه شرحها ما كان بأحسن صورة.
الفترة الي كتبت فيها أكثر المقالة كنت أتابع واجد مقاطع للناقد السينمائي محمود مهدي، وإحساسي يقول إني تأثرت بأسلوبه بشكل لاواعي، عن نفسي أتابع قناته من سنين وتعجبني فيديوهاته جدا جدا، مع أن اهتمامي بالسينما ضئيل وما يتجاوز فلم قديم أبيض وأسود بالعيد كعادة أمارسها من كم سنة لسبب ما.
https://www.youtube.com/c/FilmGamed/videos
لو فيه أحد عنده مقالات أو فيديوهات مثيرة للاهتمام عن العمالقة بكون شاكر له لو شاركها، خاصة لو تتكلم عن الجانب الفني لأني بالسنين الماضية جالس أحاول أحسن مستواي بالكلام عن الفنيات وأعتقد أحتاج أقرا عنها أكثر.
وبس هذي الأشياء الي عندي بالملحق ونراكم على خير بإذن الله.
قبل كم سنة لو حد سألني عن العمالقة كنت بقول له الاتي: الأكشن ماله حلو، الغموض فيه حسن، الشخصيات ماله عادية لدرجة بعيدة، والأنمي فنيا أموره طيبة ونبرة صوتي لما أجي أتكلم عنه ممكن توحي بأني أعتبره منفوخ لأني نوعا ما كنت كذلك.
هذا الكلام كنت أقوله بعد ما شفت الموسم الأول سنة 2014 -إذا ما خانتني الذاكرة- وبعدها بفترة بسيطة قريت المانجا لين الفصل 67 ومن بعدها اهتمامي بدأ يضمحل رويدا رويدا، لكن مع صخب المواسم الماضية قرّرت أعطيه فرصة ثانية وأبدأ من الموسم الثاني وأدوّن ملاحظاتي عليه موسم موسم مع حرية
الحرق لكل جزئية، وهذي المقالة الي طلعت بيها.
تنويه بسيط: كتبت نقاطي/ملاحظاتي بحرية حرق الجزئية الي أتكلم عنها بدون عن أحرق الي بعدها، فلو كنت متابع إلى الموسم الثالث مثلا تقدر تقرا المقالة إلى تلك الجزئية بعدها توقف.
الموسم الثاني:
لو بتسألني عن ثيمة العمالقة بقول لك هي صراع البشرية من أجل البقاء، فيه جدران مقسمة على طبقات عشان تحميهم، صنعوا أسلحة ونظام عسكري يقسم الجنود، بعضهم يحمي الملك، آخرين يحلوا محل الشرطة، والبقية جيش يقاتل العمالقة، فالبشر يعيشوا داخل الأسوار عشان يحاولوا النجاة من العمالقة الي هم المفترس والبشر الفريسة، وتقدر تقول أنه بشكل ما ممكن يمثّل الفضول البشري لأن البشر يحاولوا معرفة طبيعة العمالقة وسرهم وما إلى ذلك من أمور، لكني أعتقد أن هذا جاي من دافع نزعة البقاء لأنك لو تعرف عدوك وتفهمه بتقدر تهزمه، وبصراحة أحسن شي بالنسبة لي بهذا الأنمي هم العمالقة وأشوفهم أحسن شي بالسلسلة.
فيه عدة أشياء تستحق الذكر عن العمالقة، أولها هو تصميمهم الي يشبه البشر ويختلف عنهم في آن، ولما تجي تاخذ بعين الاعتبار تنوع أحجامهم بين الطويل والقصير، العريض والرفيع، وملامحهم المتدرجة في سلم القبح، وطريقة تلوين أجسامهم المختلفة عن البشر وحركتهم أجسامهم الغريبة، خاصة لما يطلع لك عملاق راسه كبير وجسمه صغير أظن تقدر تفهم ليش أشوفهم ينفعوا في تجسيد دور الوحش(المفترس)،
وما أظن فيه مثال أحسن على مقصدي من هذي العملاقة:
جسمها طويل بس أذرعها طويلة وأرجلها قصيرة نسبيا، نحيفة لدرجة تشوف عظام القفص الصدري، العيون الصغيرة والابتسامة العريضة والأسنان الكبيرة تعطي مسحة وحش رعب creepy شكله يشبه الإنسان بس فيه عدة أشياء غلط تخليه للوحش أقرب.
وطبعا قبح العمالقة يتبلور لما تجي المشاهد الدموية الي نشوف فيها العمالقة تقطع البشر وتفترسهم بوحشية، بالنسبة لي مشهدي المفضل بالموسم الثاني هو مشهد العملاق القرد لما يخلي العمالقة يهجموا على البشري المسكين، وتلقاهم ينقضوا عليه كذئاب تهجم على فريسة لا حول له ولا قوة، فوق أن مظهر العملاق القرد يميزه عن البقية لأن فيه شي غير مريح بأنه يتكلم ويتحكم بالعمالقة، وأظن هذا الشي غير المريح لما يجي مع وحشية العمالقة يطلع لك مشهد مثل هذا:
وبصراحة الأسرار المتعلقة بالعمالقة كانت من الدوافع الي خلتني أكمل متابعة الموسم، عندك سالفة القرد وقدرته على الحديث والتحكم بالعمالقة.
وعندك سالفة كون كل من يمير وراينر وبيرلوت عمالقة.
وعندك سالفة قرية كوني الي ما فيها غير عملاقة واحدة غير مكتملة النمو والقرية خاوية على عروشها، مع أنها كان واضح أنها أمه بس كان فضولي أعرف كيف بيتعامل مع الموضوع وكيف صار الي صار.
وسالفة العمالقة الي بالجدران.
كل هذي الأمور طرحت أسئلة خلتني مهتم أكمل الموسم عشان أعرف أجوبتها، أتصور أي متابع بتجتمع هذي الأسرار مع بعضها البعض وتكون نصف الدافع القوي الي بيخليه يريد يكمل الأنمي ويعرف بقية الأحداث، وتزداد هذه الكتلة قوة لما نضيف لها نصفها الثاني وهو الأكشن.
أظن الشي الي يخلي الأكشن بالعمالقة مثير أنه ما قتال واحد ضد واحد وإنما معركة فريق ضد فريق، فريق العمالقة ضد فريق البشر، لما البشر يقتلوا عملاق يقصوا رقبته بحركة فيها نوع من الرشاقة والخفة، بس لما يموت إنسان تشوفه يتقطع ويمكن يتم افتراسه بشكل وحشي، وهذا يصنع وحشية العمالقة وهشاشة البشر في آن، لكن بنفس الوقت طريقة حركة البشر بالحبال والسيوف مميزة وفيها نوع من الخفة الممزوجة بالقوة، كأن السالفة سبايدرمان معه سيوف والبشر بطبيعة الحالة متفاوتين بالمهارة في استعمال هذه الآلة في قتال العمالقة، وأتوقع لو كانت القتالات فرد ضد فرد كان بيصير الموضوع ممل، لأن الي أشوفه البشر عندك نوعين واحد يكون العقل والبقية جنوده، وممكن العقل ينلغي من الحسبة فيبقوا الجنود، والمنفذين تلقاهم متشابهين للغاية من ناحية مهاراتهم متفاوتين من ناحية مستوى إتقان المهارة، يعني لما تشوف الأشياء الي تسويها ميكاسا تراها ما تفرق عن البقية غير أن مستواها مليون ومستواهم عشرة، بصياغة أخرى ميكاسا عندها نفس قدرات بقية الجنود الي مستواهم عشرة، بس هي أقوى بكثير، لكن هذا الشي مجرد ملاحظة هامشية ما أثرت على طبيعة الأكشن لأن السالفة سالفة معارك أفرقة، والأهم من هذا أصلا أن المعارك نفسها مختلفة وفيها تقلبات تخليها مثيرة، وخلينا ناخذ معركة القصر بالحلقة الرابعة والخامسة كمثال.
بالبداية الأبطال ما عندهم أسلحة ويدخل عليهم عملاق صغير يحاولوا يمنعوه على قد حالهم.
والي معهم أسلحة يقاتلوا العمالقة الي تجمعوا حول القصر ونشوف بهلوانية البشر بالقتال ضد العمالقة الي تعودنا نشوفها كثير، بس هذا ما ينفع وانهزموا هزيمة نكراء بسبب تدخل مباغت من العملاق القرد
بعدين يمير تتحول عملاقة وتقاتلهم لكنها عملاق صغير سريع، مب مثل راينر الي كبير مدرع وهذا كان بيوصلنا لهزيمة نكراء لولا تدخل الفيلق بآخر لحظة.
أظن هذي المعركة مثال حلو لطرفي نتائج المعارك على الأبطال، النصر والفخر في مقابل الهزيمة والخذلان، لما يفوزوا الأبطال يكون فيه شعور لذيذ، لأنهم قدروا يهزموا وحوش قوية شديدة البأس، بس لما يخسروا تكون النتيجة تقطع البشر على أيدي تلك الوحوش.
بخصوص قتال إيرين ورانير بصراحة كان نوعا ما محبط، كنت متوقع أشوف قتال يشبه قتالات ال mma لسبب ما، بس الي شفته كان لا بأس به كتنويع، لكنه كقتال فرد ضد فرد ما فيه شي مثير للاهتمام بصراحة ونوعا ما ممل، على عكس المعركة الأخيرة بهذا الموسم الي أبسط شي ينقال عنها ملحمية، مطاردة الجنود للعمالقة بعدين استغلال إيريون للعمالقة ضد راينر وأصحابه والمد والجزر الي صاير بالمعركة كان رائع بكل ما تعنيه الكلمة من معنى.
فخلاصة الكلام نعم الأكشن حلو جدا كمحتوى وطبعا كعرض، يعني ينفع ننسى جمال الرسم ولا الأنميشن الجيد المعبّر شوف هذي اللقطتين وشوف الفرق بين براعة ميكاسا بالقتال:
و"براعة" هيستوريا:
ولا المشاهد الي يتلاعب بيها المخرج بالكاميرا كأن المرسوم 3D؟
وعلى الهامش تعجبني طريقة رسم قزحية العين واستخدامها في التعبير عن المشاعر مثل الغضب والرعب والصدمة ونحوها من أمور:
فواضح لين الحين نظرتي للأنمي تغيرت للأحسن، وهذا صحيح لأن الأكشن كنت ناسي لأي درجة هو حماسي ولذيذ، والأسرار كنت ناسي وقعها تماما، ويمكن تقول أن نبرة صوت المتغطرس الناظر للسلسلة على أنها منفخوة تبخرت تماما، ما صرت مغرم بها بس صرت أفهم سبب الحماس العالي، لكن فيه شي واحد ما تغيرت نظرتي عنه من كل الأشياء الي قلتها بالبداية، وهو أن الشخصيات بشكل عام عادية لدرجة بعيدة.
خلينا نرتب السالفة أول، بالعادة لما نتكلم عن الشخصيات نحن نتكلم عن صفاتها وانعكاس هذه الصفات على حوارها وأفعالها، نتكلم عن تتطورها عبر الأحداث الي المفروض تغيرها، عن تفسير هذه صفاتها ومواقفها لما نشوف ماضيها، نتكلم عن علاقتها مع الشخصيات الأخرى، تقدر تقول نتكلم عن البناء وطبعا ما ملزم الكاتب يسوي كل هذا، ما شرط كل شخصية يطرح لنا ماضيها، وبالنسبة لي أهم شي بالشخصيات هي صفاتها وعلاقاتها، ما إني لا اكترث أبدا ببقية الأشياء مثل الماضي والتطور، لكن الصفات والعلاقات هي الأولى عندي، وقبل لا أتكلم عن شخصيات AOT عندي سؤال بسيط: كيف تقنع الآخر أنك تشوف شي معين بأنه عادي؟
الشي الي نوصفه بالعادي هو يعتمد علينا وعلى تجاربنا وعلى منظورنا للأمور فإذا كان هذا صحيح، فالمفترض لما تقول عن شي أنه عادي فكرة أنك تثبت أن شي معين عادي أقرب للجنون، حتى لو بتجيب سالفة والله هذه الشي شفناه بكثرة ممكن يجيك واحد ويتفق معك بس ما يحطه كشي سلبي، لأن موقفنا من العادي واعتباره عادي سلبي أو عادي ما عندك مشكلة معه، مسألة ذاتية مثل أن نظرتنا لأمر معين أنه عادي أو لا هو أمر ذاتي صرف عسير بل مستحيل الإثبات، وإذا ما تصدقني فجرب تاخذ عمل فني معين تشوف فيه جانب معين عادي وحاول تثبت هذا ولو قدرت تعال كلمني.
وعلى الهامش موضوع العادي أنصح بهذا الفيديو الي يطرح نفس السؤال: ويش هو العادي؟
الكلام الي فوق عن سالفة العادية وأن محاولة أثباته شيء من الجنون، هذا الكلام كتبته بتاريخ 9/5/2021 كفكرة أساسية ثم نقّحت الصياغة مع الوقت، وأنا ما زلت مقتنع بأن العادي فيه جانب نسبي عالي لأنه يعتمد على الإنسان وتجاربه ونحوها من أمور، بس سالفة أن إثباته مستحيل تراجعت عنها.
من عادتي لما اشتغل على مقالة أعرضها على بعض الأصدقاء أتناقش معهم واستفيد من ملاحظاتهم، بس العاقل المفترض يسمع من العاقل خاصة لما يكون أعقل منه وعنده سالفة، فعرضت هذي المقالة على أحد الأصدقاء ولما طلبت منه ملاحظة ذكر هذا:
الطريف أن الشيطان بنفس اليوم أو بعده بوقت الغداء وسوس لي أشوف جزء من سلسلة ديجيبرو بعنوان The Asterisk War Sucks الي يستعمل فيها هذا الأنمي كسفينة يتكلم فيها عن مواضيع متمايزة بكل حلقة، الحلقة الرابعة تكلم فيها عن سالفة الشخصية العادية، وطرح كلام رائع عن الموضوع من خلال فكرة أن الشخصيات عادة ترجع لقوالب معينة والكاتب شغله يتلاعب بيها ويضيف لها لمساته الخاصة، ولما يكون القالب محض قالب جاهز بدون تفاصيل ذات معنى أو غير متناسقة مع بعضها البعض، ساعتها تكون الشخصية مبتذلة/عادية.
هذا رابط السلسلة كلها، والحلقة المقصودة تبدأ بالدقيقة 47:50 وتنتهي بالدقيقة 1:03:14 وفيها كلام أكثر من المختصر الي قدمته وأنصح بشدة بمشاهدتها، وما تحتاج تشوف أي شي قلبها أو بعدها عشان تفهم كلامه.
وبعد هذا، أظن أحسن نقسم الشخصيات لعدة فئات، بس من الحين بقول شي مع أن مستواهم ككل في تقديري عادي، لكنه هذا العادي ما يوصل لمرحلة القرف ولا مرحلة التقبل، العادي الي يخليني أقول لو ماتوا أكثرهم ما يفرق معي أبدا، ما بتعاطف ما بهتم، هذاك النوع من العادي، وشخصيات مثل بيرلوت وكوني هذيلا الأثنين يمكن أحسن نموذج لمقصدي لأن ما عندي أي شي أقوله عنهم غير أنهم شخصيات عادية وبس.
الحين خلينا نتكلم عن الشخصيات العادية النمطية، الي هي قالب واحد ويتكرر على طول ظهورها ونمر على عدد منها، الأولى مجنونة إيرين القوية الي كل همها رضاه وقربه وحمايته من كل شر، ولا أكثر من هذا ولا أقل.
وعندنا العالمة المجنونة هانجي:
نوعا ما متقبل هانجي بس يمكن هي مثال حلو على فكرة مكررة بطبيعة الشخصيات وما مطبقة بذيك الجودة، بالعادة لما تطلع تحاول تراوينا أنها ذكية لما تعطي تحليلات ومرات مجنونة وشوفوني أنا مجنونة ومرات تطلع حركات المجنونة بشكل عبيط مثل هذا:
من بداية المشهد لين اخر شي قالته بعد ما رمت القس كان مشهد طبيعي ما عندي أي مشكلة عنه، بس كلامها بالأخير عبيط/سخيف، لسبب أو آخر مع إني أحب هذا النوع من الشخصيات إلا أن هانجي ما عجبتني، يمكن السبب أن بالعادة الشخصيات الي مثلها نشوف فيها انصهار الجنون مع الذكاء وممكن أشياء أخرى فوق هذا، بس هنا أشوف واحد منهم دون الآخر وما أشوفهم مع بعض.
وبالحديث عن العباطة عندنا ساشا:
الجائعة الساذجة، يا تشوفها تروح تركض ورا الأكل يا تكون ساذجة وعبيطة، وهذا بحد ذاته ما مشكلة بس مرات تطلع مشاهد مثل هذا بعد ما تلقى بنت أمها تنوكل قدامها من عملاق صغير:
تجي ساشا تكلمها كأنها متفشلة من موضوع معين بوقت ما تنفع تتفشل فيه وقتلت المشهد كله بالنسبة لي.
وبعد ما قلت هذا فما أظن يحتاج أتكلم عن إيرين لأنه البطل الأخرق المتحمس الي يريد يسوي المستحيل:
وأرمين الي نوعا ما خواف بس ذكي.
ولأننا خلصنا من الشخصيات النمطية ونقدر ننتقل لشي أحسن وهم شخصيات أشوفها غير مقنعة بما يكفي.
هيستوريا:
الي أظن الكاتب يريد يسويه هو أنه يخليها شخصية طيبة بسذاجة، ولو كان يريد يسوي هذا بذاك الماضي مع يمير فبصراحة ما أقدر أقول إني اقتنعت، لأني ما أشوف فرق كبير بينها وبين بقية الشخصيات الطيبة بالأنمي هذا، لكن الي يسعفها نوعا ما علاقتها مع يمير الي بتكلم عنها بعد ما نتكلم عن إيروين.
أظن الكاتب يريد يعطينا شخصية عندها الأناة والكاريزما وقائد عسكري من الطراز الرفيع، وأشوف هذا لحد ما لكن أحس بفجوة ما بين الشي الي يحاول الأنمي يحسسني بيه وبين الي أحس بيه وأشوفه، يعني لو هو يريد يخليه ممتاز بس أنا أشوفه بأحسن أحاوله جيد، صحيح الي سواه بالملحمة بنهاية هذا الجزء فنان بس أعتقد أحتاج أكثر من هذا عشان أقتنع أنه ممتاز كما يحاول الأنمي إظهاره.
وترا ولا واحد من الي ذكرتهم لين الحين في تصوري يخرج من دائرة النمطية لكن ما معناه مافي ولا شخصية زينة بالموسم، عندك يمير وراينر أحسن شخصيات الموسم في تقديري.
أظن سالفة يمير طلعت بشكل كامل، وسالفة راينر طلع منها شي جيد فأريد أقول أنهم أبطال هذا الجزء، ماضي يمير وعلاقتها مع هيستوريا والأشياء الي سوتهن بهذا الجزء خلاني مهتم بهذه الشخصية.
وراينر وصراعه بين كونه جندي ومقاتل وحالة الانفصام الي يعيشها بسببه مثير للاهتمام، خاصة أن المفترض يكون عنده العملاق المدرع بس حالته النفسية للهشاشة أقرب.
ما بقول عنهم شخصيات ممتازة لكنها شخصيات جيدة خلتني اهتم بها، وهذا شي زين قدر يسويه هذا الأنمي لأني أشوف الشخصيات نقطة ضعفه، على عكس أغلب الشخصيات لو طلع أحد هذيلا الأثنين قدام بكون مهتم بأي شي يصير له، مهتم أشوف كيف يتطور ولو مات يمكن أتأثر، وعسى وضحت نظرتي للشخصيات وعندي فضول أسمع نظرة الي يشوفهم شخصيات ممتازة.
وأخيرا فيه مشكلتين لاحظتهم بالأنمي، الأولى بقول القصة تحتاج editing والثانية ال cliffhangers
قصدي بكل بساطة لما أقول القصة تحتاج editing أن فيه حشو وأحداث ما لها داعي، أو وجودها يخدم شي بسيط بس ما يفيد الحلقة/الموسم بشكل كافي ليُبرر وجودها، بذكر عدة أمثلة على هذا:
عندك الحلقة السابعة الي فيها قتال إيرين وراينر، إيرين جلس نص الحلقة يتذكر التدريب مع آني عشان يتذكر حركتها ويطبقها على راينر، كل هذيك الأحداث كان ممكن تختصر بأنه يطبق الحركة بعدين وحدة من الشخصيات يتذكر الموضوع على شكل لقطات/صور وكفى.
بالحلقة الثانية فجأة ساشا تذكرت حوار دار بينها وبين هيستوريا ويمير، لما كانت تهرب من العملاق الي اكل الأم وهي بنفسها لما تذكرته جلست تقول أنا ليش تذكرته؟الحين هذي meta joke والمفروض نضحك يعني؟
بالحلقة الخامس فلاشباك يمير وهيستوريا الي تحاول هيستوريا تنقذ واحد بعاصفة ثلجية، ويمير تستنكر فعلها بعدين تنقذهم بأنهم "يلمحوا" لنا أنها يمكن عملاقة، بصراحة فوق أن السالفة ما أشوفها مقنعة بما يكفي عشان تخلني أعتبر هيستوريا طيبة واجد واجد، خاصة أن هذي حركات شخصيات الشونين الطيبة المتكررة، السالفة ممطة وبالأخير تلمح لنا أن يمير عملاقة ويمكن هيستوريا تعرف، المشكلة ترتيب هذا جاي بعد ما عرفنا أن يمير عملاقة وهيستوريا قريبة منها واجد فويش فايدة الفلاشباك؟
أثنين من هذيلا خذوا نص حلقة، أتوقع لو كان طول الموسم 25 حلقة أو حولها ما بشوفها ذيك المشكلة الكبيرة لو كانت أغلب الأحداث أمورها طيبة، بس لما يكون الموسم طوله 12 حلقة هذا الموضوع بيكون أوضح وتزيد حجم المشكلة، ومع أن الموضوع تكرر عدة مرات، الحشو موجود بس ما كل حلقة وهو مب أسوأ شي بالموسم لأن هذي الجايزة تروح للإفراط باستعمال الكلفهانجرز.
كلنا نعرف المثل الي يقول:"كل شي يزيد عن حده ينقلب ضده"، وهذا تقدر تطبقه على سالفة الكلنفهانرجز بالموسم هذا، من كثرته صار خلاص ماله طعم وفقد قيمته عندي، لما يطلع ما صرت أتحمس أشوف الحلقة الجاية لأن الأنمي أسرف باستعماله، وغير هذا مرات الحلقة كانت ممكن تخلص بشكل عادي بس في اخر الدقايق يصير شي "حماسي" عشان تخلص الحلقة على كلفهانجر والسالفة مصخت، لو الحركة هذي هدفها يخليني أتحمس أشوف الحلقة التالية، فمبروك فشل الأنمي بهذا لأنه أسرف باستعماله حتى فقد بريقه.
الموسم الثالث
بعد الموسم الثاني والأشياء الي تكلمت عنها، ألقى نفسي ما عندي الكثير لأقوله عن هذا الموسم، لأن أكثر الأمور ما زالت حاضرة وهذا الجزء المزيد من العمالقة مع بعض التعديلات.
لكن قبل هذا أريد أشير لأن خطف إيرين مرة ثانية ببداية الموسم حسسني كأنه الأميرة خوخة من ماريو.
لكن لو بنبدأ من مكان فمشكلتيّ الإسراف في استعمال الكلفهانجرز، واحتياج القصة للتعديل اختفوا تماما من هذا الموسم، وحتى طبيعة الأحداث اختلفت بشكل ما وبنرجع لهذا بعدين.
رغم أن طبيعة الأحداث أخذت شفت-shift- قوي من ثيمة صراع البشرية لأجل البقاء إلى الملك والتاريخ كذبة بدون سابق إنذار أو بناء، وهذا يعطينا نظرة أن كاتبنا عيسى-ايساياما- مضيع القبلة، لكني لو قلت أن مستوى الأحداث لم يتفوق على الموسم الماضي فهذه محض كذبة.
طبيعة الأحداث بهذا الموسم تختلف عن السابق لدرجة ما لكنها في تقديري الشخصي أفضل، عجبتني سالفة هيستوريا وماضيها وماضي العائلة الحاكمة الحقيقة، وعجبتني سالفة كيني وماضيه المتعلق بليفاي
وطبعا عجبتني كل الأمور الكاشفة للأسرار، خاصة ماضي أبو إيرين والي فسر أمور مختلفة وفتح آفاق أحداث الموسم القادم، وطبعا أعجبني جدا تسلسل الوصول للقبو بس هذا نخليه بعدين.
ما أظن يحتاج نتكلم عن الشخصيات لأنهم بنفس المستوى لكن لو بقول شي فبيكون حتى بعد حركة إيروين الانتحارية بهذا الموسم بعده كلامي هو نفسه.
طبعا لازم نذكر أن فيه تطور إنتاجي ملحوظ في هذا الموسم ويكفي لقطة ليفاي هذه ببداية الموسم بينما يطارده فريق كيني، تذكر لما كنت أقول كأنهم سبايدرمان لما يستعملوا الحبال بالحركة؟ بهذه اللقطة خاصة تحس كأنك سبايدرمان يحاول يصور ليفاي وهو يهرب من الأعداء.
الأكشن بعد حصل على تتطور ملحوظ بإضافة قتال البشر ضد البشر، والمسدسات ضد السيوف وأراها إضافة موفقة فتسلسل ملاحقة ليفاي كان مشوق ومثير وحماسي لأنه أقرب للعبة مطاردة بس الي يهرب واحد ماهر وبارع، والي يلحقوه عندهم مسدسات وهم كثرة فهذا يعطيهم أفضلية عليه، ومع ذلك قدر بمهارته العالية يتفوق عليهم،
تسلسل الكهف كان موفق وما زال الأنمي محافظ على هشاشة البشر بس الحين المعركة فيها مسدسات وهذا كما قلت إضافة حميدة تزيد حلاوة الأكشن، وطبعا أحسن تسلسل أكشن كان المعركة الأخيرة الي شفنا فيها هجوم انتحاري لمحاولة هزيمة العملاق القرد والي تذكرني بتسلسل المعركة الأخيرة الملحمية بالموسم الماضي لكن على مستوى أعلى، لأن عندنا ثلاث أطراف كبيرة في فريق الخصم وهم العملاق القرد والضخم والمدرع ضد فريق الأبطال الي هزم واحد منهم بسلاح جديد، وأثنين منهم بخطط، وهزيمتهم بعد هذا كله كانت لذيذة للغاية، لأن طبيعة قتال كل منهم وقدراتهم تم التعامل معها بشكل مختلف فصار فيه تنويع من ناحية طريقة الهزيمة والطبيعة الخصم، وفوق هذا الأنمي كان ينتقل بينهم بشكل مرن بين هذه الثلاثة معارك بحيث أن المتابع ما يضيع بين المعارك الثلاثة.
وخلينا أقول هذا بنهاية هذي الجزئية، المواسم الثلاث الأولى من العمالقة تتشابه وممكن تعتبرها حقبة واحد أو كتلة واحدة، بس بصراحة ما أعتقد أن هذا دقيق، نعم تتشابه في أنها بنفس الأسلوب الفني الي شفناه يتحسن عبر المواسم، تتشابه في مستوى الشخصيات وطبيعتها، تتشابه في أن نقطة قوتها الأكشن والناس تتابعها عشانه وعشان الحماس الي تبثه في نفس المشاهد فيكمل الحلقات، وكذلك الأسرار والرغبة في معرفة أجوبتها، وهذي تشابهات كبيرة بس فيه فرق محوري في تصوري يخليني أقول أول موسمين فترة زرع الأسرار، والموسم الثالث حصاد الأجوبة.
الموسم الأول هدفه كان بناء الشخصيات، وصناعة أكشن وتشويق عشان المتابع يتحمس يكمل، بس كان فيه عدة أسئلة مثل ليش العالم بهذا الشكل؟ ويش سالفة الجدران؟ليش إيرين يقدر يتحول عملاق؟ويش سالفة اني؟ويش سالفة العملاق الطويل والعملاق المدرع؟هل ممكن يكونوا بشر مثل اني وإيرين؟ بس التركيز ما كان على هذه الأسئلة وإنما على الأكشن والتشويق، وأن المتابع يصير متحمس يكمل الحلقات بس نفس الوقت مهتم يعرف الأجوبة، يعني بصياغة أخرى كانت موجودة بالخلفية وممكن تتسائل عنها بس الأحداث ما تركز عليها.
بالثاني عرفنا أجوبة مختلفة وزرعنا أسرار أكثر، وصحيح الموسمين يتشاركوا بالأهداف بس اهتمام الأنمي بالأسرار صار يساوي اهتمامه بالأكشن وانتقلت من الخلفية للمقدمة لأنها صار هدف مهم، أما الثالث تقريبا جاوب على كل الأسئلة لأن هدفه الأساسي كان حصاد الأجوبة وبعد هذا صناعة الأكشن.
لو أول موسمين هم زرع الأسئلة، والثالث حصاد الأجوبة، فويش يكون الرابع؟ وجوابي هو الحرب.
بل الانتقال للحديث عن الموسم الأخير الجزء الأول -أكره ذا الاسم- أريد أقول شي، دايما كنت أحس أن رسم السماء بهذا الأنمي فيه شي غلط بس الله أعلم ويش، لكن قبل فترة انتبهت أن السماء رسمها واقعي بدرجة أعلى من رسم الشخصيات فمشكلتي معها مشكلة تناغم بين العناصر الفنية إن صح التعبير، يمكن الموضوع مسألة شخصية بحت بس حبيت أقولها قبل الانتقال لموضوع الحرب والموسم الرابع.
الموسم الأخير الجزء الأول
على عكس الموسم الماضي فأظن هنا عندي أشياء أكثر أقولها منها أن شارة البداية هي الأفضل بالسلسلة، وأعتقد لازم نبدأ بالتغيرات ومنها تغير الاستديو وبالتالي تغير التوجه الفني، وبصراحة ما عندي هذيك المشكلة الكبيرة مع الموضوع.
تصميم الشخصيات في نظري صار أحسن، اختيار الألوان صار متناسق وقامِت-داكن- أكثر وهذا يتماشى مع طبيعة الحرب، رسم الخليفات بعد جيد:
وفيه كذا لقطة فيه انتقال رائع بالمشاهد:
أو عرض الماضي من خلال الحاضر كلها كانت موفقة:
لو فيه شي فعلا قل مستواه هو كثرة استعمال ال 3D بمشاهد الأكشن وكلنا نعرف أن الأنمي وال3D بشكل عام وضعهم ما تمام، لكن بصراحة ما أشوفه شي من الدرك الأسفل من النار بس لو كان 2D نفس مستوى المواسم الماضية أكيد بيكون أحسن، وأصلا مشاهد الأكشن بهذا الموسم ما كثيرة ولو نستثني العملاق القرد لأنه شكله كان سيئ للغاية الباقي ينبلع، أقل من المواسم السابقة كعرض؟أكيد بس شخصيا قدرت أتقبله.
ولأن جبنا سيرة الأكشن فبصراحة محبط شوية انهم جابوا عمالقة جدد والي هم الفك والمطرقة بس استعملوهم بشكل جدا بسيط بس ننتظر الموسم القادم عسى نشوف استعمال أكثر لهم، وعلى فكرة المعركة الي صارت بالموسم هذا كانت حلوة.
غير هذا التغيير عندنا تغيير اخر وهو أن طبيعة الأحداث صارت درامية أكثر، وهنا لازم أعترف أنها كانت دراما حلوة وأعتقد أحد الأسباب أن الحوار صار أسلس وواقعي أكثر، والسبب الاخر أن كالعادة الأشياء المتعلقة بماضي الشخصيات كانت موفقة ومثيرة للاهتمام وتبرر مواقفهم، والأهم من هذا كله أن النص الأول من الموسم كان مركز على جانب راينر -شخصيتي المفضلة- وجماعته ونجح في أنسنتهم وجعلهم طرف منطقي وسهل تفهم موقفه من خلال الأحداث الي شفناها عنهم، ولذلك بالمعركة الي بتصير بينهم أعتقد المشاهد على غرار المواسم السابقة ما بيكون الوضع فيه طرف خيّر وشرير وإنما طرفان كلهم لهم أسباب للقتال-هذا توقع مني لا أكثر-، ومع أن شخصية جابي بصراحة كانت شخصية مزعجة وكريهة لكنها نتيجة منطقية للبروباجندا وأثرها على الناس، وبعد هذا كله وشكري لجودة النص الأول من الموسم ما أقدر أقول نفس الكلام عن النص الثاني.
مشكلة النص الثاني في تصوري أن الأحداث بشكل غريب كأنها توقفت وصرنا نشوف أحداث ممكن تكون حلوة لو شفناها كقصة جانبية ب OVA بس كقصة أساسية لا، جلسنا كثير ننتظر نشوف ليش ايرين تغير بهذا الشكل وصار أكثر هدوءً وأقرب لإيمو شكليا وهذا التوجه ما عندي مشكلة معه، بس الموضوع طوّل لين يعطونا سبب تحوله، جلسنا كثير لين شفنا شي مثل ماضي زيك الي كان الشمعة بآخر النفق وضيعنا وقت أكثر من اللازم على جابي وفالكو، فالموضوع كأنك صرت تلعب مهام جانبية بلعبة عالم مفتوح بدل أنك تكمل القصة الأساسية.
غير هذا مرة أخرى يثبت لنا عيسى أنه مضيع القبلة، بس عشان نعطيه حقه أشوف النقلة في طبيعة الأحداث بهذا الموسم موفقة بسبب الفارق الزمني، بس ما أعتقد أقدر أقول عبارة أحسن من أنه مضيع القبلة بخصوص اختلاف الثيمات، عنصرية وطبقية ووهم الاختيار وأنك أصلا مخدوع تسوي شي مجبر عليه، هذه الثيمات ممكن تطرح بشكل أعمق ومثير للاهتمام، بس سالفة العنصرية والطبقية عندي سؤال أوجه له: أنت ناسي أنك مسوي عالم قبل فيه ثلاث أسوار تقسم الناس لعدة فئات ولا كيف؟
كثرة الثيمات مش بالضرورة تكون شي إيجابي أو سلبي، العبرة بطريقة التعامل مع الثيمات، ما أعتقد أن الأنمي يعاني من زحمة أفكار تنافر بعضها البعض، لكن يكب علينا أفكار بعضها فيها نوع من العمق-أو يستثمرها إن أحببت- وبعضها تميل لكونها تعامل سطحي/بسيط مع الثيمة، أعتقد القصة من هذي الناحية ممكن تكون أحسن لو ركّزت على ثيمات أقل واهتمت بأنها تعطيها عمق بدل أن تطرح كل فترة فكرة جديدة بدون وجود بناء قوي لها طالما السياق يسمح، ومرات ما تستثمر فيها، طبعا ما أطالب عيسى يكتب شي من الأدب الرفيع، لكن أتمنى يتحسن من هذه الناحية بعمله القادم.
بعد هذا كله أقدر أقول أن التغيير بهذا الموسم كان موفق، لكنه أضعف من الموسم الثالث، الموسم الثالث كان على طوله مثير للاهتمام بينما هذا الموسم نصه موفق ونصه مب بالضبط، ومع هذا أقدر أقول أن اختلاف طبيعة الأحداث والتمهيد للنهاية كان موفق، ويخليني متشوق للقادم وخصوصا النهاية.
المانجا
خليني أبدأ بالكلام عن الجوانب الي عجبتني عشان نبدأ بشي إيجابي، ماضي يمير عجبني وكان جميل، وكعادتها الأشياء الي لها دخل بالماضي تكون موفقة وكذلك الأحداث الي صارت بين زيك وإيرين لما جلسوا يبحروا بالذكريات، أول معركة صارت بعد الموسم الرابع على طول كانت موفقة، واستعمال رائع للعملاقة العربة، وبقية المعارك كذلك، الفصل لما شفنا الإبادة الجماعية واثرها على مناطقة مختلفة كان مثير، وكل هذي الأشياء متحمس أشوفها بالأنمي لأن العرض بالمانجا دون مستوى مانجا احترافية خاصة لما نتكلم عن شي شهري.
أسلوب عيسى بالرسم ما عندي مشكلة معه، فيه مسحة لون رمادي واضح ويذكرني بالكومكس أكثر من المانجا، بس العبرة كلها بالإتقان والإخراج.
مرات يرسم بشكل يعطيك شعور أنه يرسم بدون Reference فتطلع poses غريبة،
ومرات يرسم بشكل يخليك تستغرب من عدم إحساسه بالمسافات مثل يد عملاق أكبر من اللازم، أو أجسام ضخمة ورؤوس فاصوليا، وحتى جمجمة مضغوطة وما إلى ذلك من أمور وهذه أمثلة:
رؤوس فاصوليا.
وضعيات بعض العمالقة غريبة بشكل سلبي، كأنه يرسم بدون رفرنس.
طول اليد هنا.
حجم الجمجمة ونحافة اليدين مال العملاق الطويل.
جمجمة البنت الصغيرة.
مرة أخرى أبعاد أيدي العملاقة.
ولو تحسبني أتصيد صدقني لا هذي أمور تتكرر وبسهولة تلقاها بأي فصل، وغير هذا إخراج المشاهد عنده جدا عادي، ويحب لسبب ما استعمل هذي التقنية بأنه يحرك البانل بس بصراحة يذكرني باللي يستعمل فلتر وهو يصور ما عشان يضيف للصورة أو شي، لكن عشان يقدر يسويه فيطلع الموضوع مب سيئ ولا جيد، لكن بدون أثر، شي تسويه لأنك تقدر تسويه ما لأن لك غاية من وراه.
التقنية الي اقصدها.
هذي الركاكة الفنية-إن صح التعبير- ممكن أبلعها من رسام هاوي، بس محترف ويرسم فصل واحد شهريا الموضوع عسير البلع، وهذا كان الجزء الأول من جواب سؤال طرحته على نفسي وكان: ليش صرت أقرا المانجا بشكل بطيء للغاية بمعدل فصل باليوم؟ لأن عادتي لما أتحمس بقصة مانجا التهم الفصول، لأن النص الثاني من الجواب متعلق بالأحداث والشي الي أقدر اسميه ببساطة: لعنة الارك الأخير.
أعتقد سهل تعرف لعنة الارك الأخير بالأنمي والمانجا، الحالة لما المؤلف يكبّر اللقمة ويحاول يسوي شي كبير وملحمي وضخم واخرتها ما يقدر له ويجيب العيد، هنا صار شي مشابه ويمكن كل مشاكلي ممكن اختصرها بسالفتين: الرخص وقصر النظر.
أكيد أنت مريت بشي يعبر عن معنى Deus Ex machina بقصص مختلفة، ويمكن ترجمات مثل قوة الصداقة أو المخرج عاوز كدة تنفع كترجمات متحررة لهذا المعنى، لكن هي بكل بساطة لما يصير حدث معين من اللامكان عشان القصة تكمل، مثل البطل يحصل قوة جديدة عشان يغلب الشرير، والشي الي يخلي الموضوع فيه "المخرج عاوز كدة" أو لا هو وجود البناء من عدمه، فلما البطل يحصل قدرة من العدم أو صاحبهم فجأة ينقذهم بدون بناء، شي كهذا طبعا غير مقبول، بس جالك مر عليك الكاتب يسوي هذا لشي يقدر يتفاده بنفس الفصل؟عيسى عطانا أثنتين من هذه الحركة.
مرة بفصل زيك انفجر وانفجر معه ليفاي، وطبعا كل واحد وصل لمرحلة على حافة الموت، سالفة بقاء ليفاي خليها أهون شوي لأنه ولو كانت غير منطقية في تقديري الشخصي لكن على الأقل ممكن تتفسر من ناحية قوة الأكرمان وتغتفر شوية -بس شوية- من ناحية كونه صار جريح وكذا، لكن زيك يكون على حافة الموت بعدين يطلع عملاق من العدم يشق بطنه ويدخله هناك عشان يتعالج هذا ويش؟
ولا إيرين لما جابي فجرت راسه والفصل الي بعده بقدرة عجيبة يعيش، كل هذا عشان كلفهانجر رخيص، الصادم بالنسبة لي بالحالتين أنه سهل يتفادى الموضوع مع تعديلات بسيطة للفصلين، سالفة إيرين كان ممكن جابي تضرب رجله أو شي مشابه ومع ذلك يوصل لزيك وتمشي الأمور.
السلسلة ما عودتنا تسوي أشياء هبلة كهذه، والمخرج عاوز كدة بالعادة شي كريه بالقصص، بس فرق بين سلسلة تعودك عليها وبين وحدة تدمرها بالأخير، ومع الأسف هذا ما اخر شي سلبي بقوله عن إيرين وزيك.
فيه فرق ما بسيط بين أنك تسوي قصة سوداوية، وبين أنك تسوي قصة رخيصة، فكرة أن أحد الشخصيات تقرر تسوي إبادة جماعية بحد ذاتها ما فكرة سيئة، بس شي كبير مثل الإبادة الجماعية المفترض الكاتب يتعامل معه بحذر عالي، الشي الي ما أقدر أشوفه غير أنه رخص لما أشوف زيك وإيرين كل واحد منهم يطلع بخطة أغبى من أخوه عشان يصل لنتيجة نكدية، زيك يريد يمنع الإلديين من التناسل وينهي العرق بموت بطيء، وإيرين يريد يسوي إبادة جماعية لبقية الأعراق لأنه تحول لإيمو، وبصراحة أجد نفسي عاجز عن التعبير عن مدى غباء كل خطة، وعن سخافة الموضوع عشان توصل لنهاية كئيبة أو تصنع أحداث كئيبة، وبعد ما وصلت لهذي النقطة رغبتي بأني أكمل المانجا بدت تضعف بشكل غير عادي، لدرجة صرت أقرا فصل باليوم بس عشان أخلص لأن كل مرة أشوف أحداث زيادة أقول لنفسي: ما شاء الله مزيد من النكد الفارغ لأن عيسى قرر يحصر نفسه بين خيارين لاستعمال قدرة المؤسس، كل واحد منهم أغبى من الثاني في تصوري.
يمكن الشي الي يخليني أستسخف هذي الفكرة وتعامله معه هو لأي درجة الموضوع مقحم أو عبيط أو شي بينا هذا وذاك، وعشان تكون بالصورة ترا السلسلة ما أنها بدون لحظات سوداوية، بس كل هذيك الأحداث لما صارت كانت متماشية مع طبيعة الأحداث ونتيجة طبيعية للي صار، عندك مثلا هذا المشهد بماضي يمير، لما بناتها ياكلوها حسب طلب أبوهم:
أو مشهد افتراس عملاق لأم قدام بنتها بالموسم الثاني ولو أن ساشا خربته، أو تعذيب ليفاي وهانجي لواحد كانت شغلته يعذب ناس عشان يطلعوا منه كم معلومة، لما أشوف هذيك الأحداث أشوف شي سوداوي صار له معنى ووزن وماشية مع سياق الأحداث، بس لما أشوف خطط الأخوين يجير أشوف طريقة هبلة لاستعمال قدرة المؤسس وتحقيق أحداث نكدية.
وفيه سالفتين غبيتين بهذا الارك زيادة وهم موت هانجي وتحول فالكو لعملاق مجنح، تحوله لعملاق مجنح من أي قبيل؟هل أكل زيك؟لا كان حي ساعتها، ليش عشان حلم؟وعشان يرجع اني لأرض المعركة؟ مجرد أن الشخصية تحلم بحاجة ما عذر جيد عشان يتحقق الحلم لأن هذي المخرج عاوز كدة مرة أخرى.
وموت هانجي الشي الوحيد الي بقوله عنه هو فارغ، محاولة خلق سيناريو بطولي لشي أصلا تحققه غير منطقي، هذيلاك العمالقة الطوال لو تهجم على واحد عشان توفر وقت لهم ويهربوا ما يتأثروا لأنهم جيش كبير، فأصلا هجومها المفروض ما ينفع والسالفة تلفيقة عشان يقتل شخصية ويحسس المشاهد بالحزن لا أكثر، هو مسوي نفس الشي مع ساشا والموضوع كان ملائم بزيادة عشان يوصل لموتها بس هذي مرحلة أخرى من أن الحظ يضبط وتصير الخطة.
وبالحديث عن المؤسس وإيرين، عندي تحفظات على عرض قدراتهم، مدرك أنه عملاق قوي بس دايما أفضّل بالقصص لما توضح لنا قدرات الشخصيات وتصير تتلاعب بيها حسب الشرح، العملاق المؤسس يتحكم بالعمالقة؟ شي أفهمه، بس هو يقدر يصنع عمالقة قدماء ويحركهم كأنهم بيادقه شي نوعا ما أفهمه بس هنا بالذات أشوف قدرته فيها نوع من الضبابية السلبية، لكن هذا لا شيء بالمقارنة مع قدرة العملاق المهاجم.
يرسل ذكريات من المستقبل عشان يعدل الماضي، هذا الشي أفهمه بس ويش أثره على الحاضر؟هل هذا يصنع تايملاين جديد؟ولا ويش بالضبط؟ تخيل التالي: خلينا نقول أنك شخصية بعالم العمالقة وعندك القدرة هذي وقررت ترسل ذكريات للماضي عن كيفية صناعة الصواريخ الي تطلق على العمالقة، ما المفروض هذا يطلع لنا تايملاين جديد وتتغير الأحداث فيه بناء على معرفة الناس بآلية صنع الصواريخ من وقت مبكّر؟بس كيف هذا الشي بيأثر على الحاضر بالضبط؟أو السالفة أن القدرة هذي هي تفسر أحداث صارت قبل بس ما تأثر على الماضي؟يعني أبو إيرين مثلا سوّا الي سواه عشان شاف المستقبل وأُمر بالموضوع، لين الحين ما فاهم حدود القوة ومدى تأثيرها لأني أعتقد فيه ضبابية سلبية بالموضوع.
أعتقد واضح من الحين عدم إعجابي بالأحداث الي صارت بعد الموسم الأخير الجزء الأول كلها جاية من إني أشوف الأفكار المستعملة خايسة، ومرة وحدة خلينا نروح للنهاية ونكمل سلسلة الخياس:
كنت أسولف مع واحد من الشباب عن الموضوع وجلس يقول شكل السالفة time loop عشان كذا إيرين مسوي هذا وجلس يمشي على الي يشوفه بالمستقبل، وبالفصل الزيادة الي طلع بعد النهاية رقم 139.5 كان فيه تلميحات لهذا الموضوع، ولو هذي النظرية صحيحة بصراحة ما أشوف الفكرة عرضت بشكل جيد أو واضح بما يكفي عشان أشتريها كمتابع، لذلك سالفة أنه جلس يقتل عشان ينقذهم وما منع حريتهم عشان يكونوا أحرار وما إلى ذلك محض محاولات سخيفة عشان عيسى يخلينا نتقبل ونشفق على إيرين لأنه مجبور ما عنده خيار أو شي من هذا القبيل، تكلمت قبل عن غباء حصره لنفسه داخل خطتين عشان يحقق فكرة الإبادة، بس لما يجي يختمها بأن حب ميكاسا ساعد بشكل ما بالموضوع لا هنا ختم الهبل، فمن ناحية التفسير الي يفسر بيه أفعال إيرين خربها، ومن ناحية أنه يراويك الأشياء الي صارت بعد النهاية ما أعتقد الموضوع كان كافي.
في تصوري القصة كان تحتاج زيادة أحداث هادية بعد ذروة القصة عشان تختمها بشكل أفضل، فصلين زيادة أو شي كهذا بيكفي وزيادة ولكن هذا لم يحصل، فالخاتمة كانت شي سيئ بصراحة، أحسن مما توقعت بسبب استياء الناس العالي بس بعده شي سيئ.
كيف تطورت السلسلة؟
أعتقد أحسن طريقة عشان نختم كل هذا الكلام عن السلسلة بأننا نرجع ونشوف كيف السلسلة تطورت/تغيرت عبر المواسم؟ وبتكلم عن ثلاث محاور وهي: الشخصيات والغموض والأكشن.
كتابة الشخصيات كانت دايما تتألق بالأشياء المتعلق بماضيها لا صفاتها وعلاقاتها، والموسم الرابع تحسن الموضوع لأن الحوار صار أسلس من قبل، وشخصيتي المفضلة بالسلسلة هو راينر لسالفة الانفصام الي يعيشه.
أما الغموض بالموسم الثاني كان فيه أربعة أسئلة أساسية: من هو العملاق القرد؟ويش سالفة راينر وبيرلورت ويمير؟ويش سالفة العملاقة بقرية كوني؟
الموسم الثالث انتقلنا لسوالف لها دخل بتكوين العالم والتاريخ والملك، مع أجوبة على الأمور السابقة، وكما أحب أسميه حصاد الأجوبة.
والموسم الرابع نقدر نقول بأريحية أن الغموض اختفى من الحسبة وهذا ما شي سلبي على فكرة لأنه عوضنا بالدراما.
أما الأكشن فأعتقد أنه أكثر شي تتطور، بدأ الموضوع بقتال بشر ضد عمالقة، بعدين أضيف عملاق إيرين للحسبة، بعدين صار الموضوع عملاق ضد عملاق بقتال اني وبعده قتال راينر، وصار الموضوع مطاردة ملحمية بنهاية الموسم الثاني وبداية إضافة العملاق القرد، بالثالث شفنا إضافة قتال البشر والمسدسات مع إضافة الصواريخ، وشفنا قتال فيه ثلاث عمالقة مع بعض باخر معركة القرد والطويل والمدرع، بالموسم الأخير الجزء الأول والمانجا شفنا عمالقة أكثر، العربة والفك والمطرقة، والمؤسس طبعا.
أعتقد ما شفنا استعمال كافي للفك والمطرقة، بس الطويل والمهاجم-بدون قدرته- والأنثى والقرد والعربة كلهم شفنا استعمال موفق لهم، ومع الأسف أشوف استعمال المدرع بدأ يضعف كل مرة تقدمنا بالأحداث، والمؤسس قدرته كان فيها نوع من الضبابية وقدرة المهاجم تكلمت عنها سلفا، لاحظت أن عيسى يعرف كيف يطور بالأكشن بأن يضيف فكرة بسيطة بس يستغلها ويستثمرها ويعطيها حقها، وما يجلس يكرر نفسه، في تصوري هذا أحسن شي بأكشن أتاك أون تايتن، يعرف متى يضيف فكرة وكيف يستعملها ولو كانت بسيطة.
وهذا كل شي عندي أقوله عن السلسلة، كانت رحلة متابعتها وتدوين هذي الملاحظات شيقة ومثيرة بالنسبة لي، وبانتظار تعليقاتكم كي استفيد منها، لكن لو برتب السلسلة بقول:
- الموسم الثالث
- الموسم الرابع
- الموسم الثاني
- المانجا بعد الرابع
والأول ما أتذكر منه إلا أشياء ضبابية فما بخليه بالحسبة، وتقريبا هذا كل الي عندي وسلامتكم.
ملحق المقالة:
هذي الفكرة من دهر أريد أسويها بوحدة من المقالات، طبعا لما أي واحد يكتب مقالة بيصرف عليها وقت وجهد ويبحث، وممكن تصير أشياء مثيرة للاهتمام أو يلقى أشياء مثيرة للاهتمام بس لسبب أو اخر ما يقدر يدخلها داخل نسيج المقالة، فمن هذا الباب جات هذي الفكرة كشي إضافي أقوله زيادة على المقالة، وتقدر تسحب عليها وما بينقص شي.
خلصت اشتغل على النسخة الأولية من جزئية الموسم الثاني بتاريخ 9/5/2021 وخلصت المسودة الأولية كلها تاريخ 25/9/2021، وقبل ثلاثة أيام بدأت أنقح المقالة عشان تطلع النسخة الي قدامكم، وتقريبا كان أغلب الشغل هو اللمسات الأخيرة وحذف أشياء اكتشفت مالها داعي وكم شي غبي مسحته، الي خلاني اخذ كل هذي المدة هو الكسل أولا والأشغال ثانيا، بالعادة الكتابة ما تطول واجد يمكن تاخذ يومين إلى أربعة لكل جزئية لو أجلس كل يوم مال ساعتين ونحوها بس هذا ما صار، أعتقد هذي أول مرة اشتغل على مشروع أخليه on/off لكل هذي المدة، وطبعا لو طلع المقال خايس المقال خايس، أنا مؤمن أن الوقت والجهد المصروف على شي ماله دخل بجودة النتيجة النهائية، وصار لي شي قريب علمني هذا الدرس بالطريقة الصعبة.
فيه عدة أشياء مثيرة للاهتمام لقيتها وأنا أبحث عن العمالقة، أولها هذي المقابلة مع عيسى، مع الأسف ما قدرت اقتبس منها بدون أن أحشر النص بشكل بغيض، لكن المثير للاهتمام بالمقابلة أن الي يقابله-المذيع/المُقابل؟ماعرف ويش أحسن كلمة عشان توصف شغله- طبيب نفسي وتقدر تشوف بسهولة أنه كان يحاول يشفط المعلومة منه عشان يحاول يصنع صورة بانورامية لشخصيته بشكل يستحق التأمل:
https://mangabrog.wordpress.com/201...d-art-and-stand-out/?utm_source=pocket_mylist
المقابلة تطرقت لعدة أمور منها رسمه وأن يشوف أحسن يكون الرسم فريد ولو بشكل رديء عشان يبرز، وذكروا قبح العمالقة وتكلموا عن إيرين وميكاسا وليفاي، أكثر شي صدمني كلامه عن إيرين وأنه ما فهمه لين طلع بالأنمي.
شفت هذا الفيديو ل Super Eyepatch Wolf يقدم تفسيره لشعبية العمالقة، إحدى النقاط الي ذكرها أن العمالقة خليط بين الزومبيز والكايجو وهذيك نقطة مثيرة للاهتمام بصراحة، أعتقد أن يحيى تطور واجد من كل النواحي وفيديوهاته الحالية أحسن من هذا بكثير بس أعتقد أن فيه نقاط مثيرة للاهتمام ولو أنه شرحها ما كان بأحسن صورة.
الفترة الي كتبت فيها أكثر المقالة كنت أتابع واجد مقاطع للناقد السينمائي محمود مهدي، وإحساسي يقول إني تأثرت بأسلوبه بشكل لاواعي، عن نفسي أتابع قناته من سنين وتعجبني فيديوهاته جدا جدا، مع أن اهتمامي بالسينما ضئيل وما يتجاوز فلم قديم أبيض وأسود بالعيد كعادة أمارسها من كم سنة لسبب ما.
https://www.youtube.com/c/FilmGamed/videos
لو فيه أحد عنده مقالات أو فيديوهات مثيرة للاهتمام عن العمالقة بكون شاكر له لو شاركها، خاصة لو تتكلم عن الجانب الفني لأني بالسنين الماضية جالس أحاول أحسن مستواي بالكلام عن الفنيات وأعتقد أحتاج أقرا عنها أكثر.
وبس هذي الأشياء الي عندي بالملحق ونراكم على خير بإذن الله.
التعديل الأخير: