ابتكار جديد من ابل .. حذاء Nike + جهاز iPod nano = ابتكار !!

[Khalid-S]

طرحت شركة ابل بالتعاون مع شركة Nike للاحذية والملابس جهاز اسمه Nike+iPod Sport Kit ,, الجهاز عبارة عن قطعة صغيرة تحطها داخل الحذاء من Nike ( لازم يكون من نوع Nike+ ) وقطعة ثانية صغيره تشبكها في الـiPod nano

الوصلة داخل الجزمة تحسب لك كم خطوة مشيتها ,, كل خطوة كم كالوري حرقت .. كم كيلو مشيت , تحدد بالـiPod كم كيلو تبي تمشيه , بعد ما تمشي اوتوماتيك يطلع لك الـiPod صوت من السماعات الي تسمع فيها الاغاني انك مشيت المسافة المطلوبة .

غير كذا ,, اول ما ترجع البيت ,, تشبك الاي بود في جهازك الكومبيوتر ( سواء Mac او PC ) تلقائياَ يتم وضع جميع المعلومات من كم كيلو مشيت كم كيلو حرقت وووالخ من المعلومات هذي للبرنامج الخاص في الكومبيوتر ومن البرنامج لموقع Nike الخاص في القطعة هذي ,, يعطوك نصائح وكم لازم تحرق كالوري عشان توازن جسمك وصحتك وينزلون لك اغاني من Nike مجانية و ملفات فيديو ووالخ

غير كذا ,, تسوي عضوية في موقع Nike المخصص للقطعة ,, تتبادل مع اصحابك المعلومات الي اخذها الجهاز , تسون تحدي مين فيكم يمشي مثلا 15 كيلو في يومين ,, بعد يومين تشوف اصحابك كم مشوا ومين فاز بالتحدي .

البرنامج يحفظ لك جميييع المعلومات من المسافات للدقائق للكالوري الي حرقته من بداية اقتناء القطعة الى ما لا نهاية.

هذا الي فهمته من الموقع الخاص ,,
http://www.apple.com/ipod/nike/
http://www.nike.com/nikeplus/

I LOVE APPLE
هي الي تفكر ,, مو تسرق

 

[Nintendo]

تحس جهاز المشي اللي بغرفتي يسوي كل ذي الاشياء

لول عموما الفكره حلوه للي وجهم يخسون ويتسلون بنفس الوقت . خالد اشتريه وعطنا انطباعاتك

 

[Khalid-S]

ما اعرف يا عمر من متى جهازك الي في الغرفه حق المشي يقدر يتواصل مع اجهزة المشي في جميع انحاء العالم ... وتتبادل معلومات مشيك في جميع انحاء العالم . غير كذا , ما تضطر تمشي في جهاز ممل ,, تمشي في مكان عام الطبيعة حولك والجو العام ممتاز جداَ ,,

عموماَ الجهاز ما ينفع عندنا لان الجو خايس واذا مشيت في الشارع تسوي رياضة الناس تناظرك يقولون وش ذا المتخلف.

عمر الي يبون يخسون يستفيدون من الجهاز ,, الي يبون يحافظون على صحتهم هم المستفيدين الاولى اكثر من الي عندهم وزن زائد يبون يتخلصون منه ... احتمال كبير لمن اروح امريكا اشتريه هناك بمى ان Boston مليانه حدائق وجو ممتاز قدام بحيرة.

 

[Mukuro]

ماشاء الله عليهم ابل, دايما ينزلوا بافكار جبارة.

القطعة حلوة للي مداومين على الرياضة. لكن ما أتوقعلها ذاك النجاح لو جات القطعة عندتا. تعرف أغلبنا : أكل+شرب+نوم.

 

[Nintendo]

وش الفايده خالد من انه يتواصل مع باقي العالم !! يعني اروح اشوف كم انت مشيت عشان اغار منك واروح امشي اكثر !!

واذا كان هذا مزعلك جهازي حق المشي جنب الكمبيوتر واقدر ادخل الانترنت وانا امشي واتواصل مع العالم

 

[king zell]

حركة حلوة للي يحبون يجرون في الطبيعة بدل السير وودهم يحسبون بياناتهم

أما بقية الخصائص تبهيرات زايدة ما لها لزمة

 

[The Sinner]

انا اشوف هالجهاز ممتاز خصوصا للي يجرون كل يوم بهالحركة يكسرون الروتين حقهم ويقدرون يتواصلون مع تاس ثانين يمكن عندنا ما يهتمون بهالاشياء بس برا اظن في وبعدين فيه ميزة عن جهاز الجري بالبيت انه تقدر تجري وين ماكان بالكورنيش بالنادي باي مكان انت تحب تجري فيه وتسمع للتبي امن بالبيت انت وهالتلفزيون او الاربع جدران

 

[Leon]

عموماَ الجهاز ما ينفع عندنا لان الجو خايس واذا مشيت في الشارع تسوي رياضة الناس تناظرك يقولون وش ذا المتخلف.

والله صادق .. مرة اخدت الأيبود ورحت قلك باسوي رياضة بوجهي حسيت انو كل الناس وقفت فجأة عن اللي كانوا بيسووه وجلسوا يتفرجوا عليا خخخخخخخخ

من رأيي اختراع جميل ومهم على الأقل بالنسبة ليا ...

 

[The Sinner]

ما ادري عندكم بجدة ولا بالرياض بس بالشرقية دايما في ناس يركضون حتى ايام الرطوبة في الصباح او فالليل دايم اشوفهم عالكورنيش

 

[Khalid-S]

همم محمد من متى نقول للتطور وقف ؟؟ هذا الـLIVE ,, شوف كيف ناجح وبالاخص مع الـ360 .. تلعب العاب وتطلع اتشيفمنتس وتسوي كومبير مع العاب صديقك وتشوف هو وين موصل باللعبة وانت متغلب عليه وين وبالعكس .. نفس الشي هنا , تسوي كومبير مع اصحابك كم كيلو مشيت كم كيلو حرقت وووالخ ... فكره حلوه وواضح جداَ انها بتنجح في امريكا , كفاية اسم Apple + Nike عليها وكفاية كلمة iPod ..

هناك كثير يمشون في الطبيعة ,, يومياَ مثل ما احنا نصلي يومياَ هم هناك يمشون في الصباح على الطبيعة في الحدائق.

 

[Khalid-S]

وش الفايده خالد من انه يتواصل مع باقي العالم !! يعني اروح اشوف كم انت مشيت عشان اغار منك واروح امشي اكثر !!

واذا كان هذا مزعلك جهازي حق المشي جنب الكمبيوتر واقدر ادخل الانترنت وانا امشي واتواصل مع العالم

خخخ توني انتبه لردك عمر ... كلامي لمحمد تقريباَ هو نفس الي بقوله لك ... الآن كل شي صار كونيكتد بين بعض من جزمة لكومبيوتر وانترنت !!

ايه تروح متشي اكثر وتستفيد اكثر ,, مثل ما انت تستع في شي اسمه فيديو جيمز في ناس هذي حياتهم يحافظون على صحتهم يشوفون اصدقائهم كم مشوا يتعرفون على احوالهم يسون تحديات وووالخ ..

خخخ عمر ,, انت في جهاز كبير قاعد تمشي وحوليك اربع جدران وملل غير انك تمشي على الطبيعة الناس حولك ,, خخخ كثر لي منها تقعد تتصفح على الانترنت وانت تمشي ,, انا ابي العب دي اس وانا امشي مستحيل اوفق عقلي بين هذا وهذا .. تجي انت تقولي ادخل انترنت وانا امشي.

عموماَ ما ادري ليش الشغله مي داخلة مخك بالمفهوم الصح , الناس كلها منبهرين من هذي القطعة الا انت ,, تبي تمشي في المشاية الي الناس تبي تتخلص منها باي طريقة .. بالاخير كل واحد ورايه ونمط حياته والروتين .

 

[king zell]

خالد انت و سليمان بس اللي تقارنون اشيفمينتس و كم واحد ثاني متحمسين

بعدين هذي ألعاب وضع مختلف.. لما تتحدون بالأشيفمينتس مثل ما تحددون بالألعاب الجماعية و بتحطيم الأرقام القياسية


لكن المشي؟

يعني بروح لعمر مثلا اليوم و أقوله أنا مشيت ساعة و بيتحمس يروح يمشي ساعتين؟ هالعامل ما يفيد أبدا بالتخسيس خصوصا.. الشخص لازم يكون عنده عزيمة.. يا ما شفت ناس نقصوا وزن بالكيلوات و علموا ناس غيرهم و لا شفنا أحد تحمس..

البرامج التلفزيونية عندك كل يوم يقول فلان كان وزنه مدري كم و في اسبوعين صار رشيقا.. و لا تشوف أحد تحمس و قال اوه خلاص لازم أضعف و هذا مش أحسن مني الخ..

يعني أنا ما أقول للتطور وقف ما أدري كيف استنتجتها انت.. بس أنا أقول ان سالفة أحط بياناتي في النت بس كذا للدعاية و لا فايدتها عقيمة.. بالنسبة للجهاز نفسه فكرة ممتازة

 

[Khalid-S]

محمد مو بس انا وسلومي ,, كل اصحاب الـLIVE وقريبا اقولك كل اصحاب الـPS3 لان سوني 100% بتسويها لانها طريقة ناجحة جداَ جداَ جداَ .. عموماَ ما ابي اطلع من الموضوع

محمد يوم تمشي والمشي يكون داخل في حياتك ودك تعرف ملخص مشيك في اليوم , تقارنه بقبل يوم - اسبوع - شهر - سنة - قرن .... معلومات عن نفسك تبي ترجع لها , تبي تقارن نفسك من اسبوع لاسبوعين ,, جهازك يا عم عمر يسوي كذا ؟؟ لووول واذا كان في جهاز مشي بهذي الخاصية لك الي تبي لو ما كان سعرة دبل الـPS3

محمد بالنهاية هذي اضافات .. وهو ابدا مو موجه للي يبون يخسون, هو موجه لجميع العالم .. الناس الي ماشيه صح بصحتها ونظام حياتهم .. ومن باب التسلية ( مثل ما احنى كل يوم ندخل منتدى عشان نكتب اخبار لاشياء تسلينا بالنهاية ) تقدر تقارن نفسك بعمر او بهمام او خالد وتشوف احواله الصحيه ( لحد يقولي هذا تطفل ,, اذا انت حاب تشبك وتنقل للانترنت وتسوي عضوية بكيفك ,, اذا ما تبي احد يشوف احوالك الامر راجع لك )

وبصراحه انا اشوف ان مثلا كل اصحابك تخصصون تمشون كيلوات معينة في 4 ايام ونشوف مين يخلصها اول او تحدي كم خطوه تمشي باليوم هذا شي جداَ مسلي وحافز يخليك تتقدم وتحسن صحتك .. ما ادري ليش انتم تربطون الصحة = الوزن الزائد .... حياتك اليوميه كلها تشكل اضرار لصحتك من ناحية التنفس والهواء في المدينة للبيت والاكل الغير صحي او المعلب للمشروبات الغازيه لجلوسك على الكومبيوتر .. الخ

 

[Futrus]

WooooooooooooooooooooW
عجبتني الفكره بشكل كبير مبتكره وبتنفعني خصوصاً إني في الصيف ناوي كل يوم أروح لي ساعه أتمشى على الكورنيش

مع إن الجو مايساعد والرطوبه شديده

لكن المشي على الكورنيش والناس حواليك يتمشون معاك ممتع

بحاول أشتريها مع حذاء رياضي من Nike ،، لول خالد شرايك تضيف على الموضوع معلومات عن أفضل الأحذيه إلي بتكون مناسبه لهالقطعه XD

 

[king zell]

لول خالد تقارن لما تلبس هذي الجزمة كل يوم عشان تعرف احصائيات و تقارنها بالسنة الماضية

شي مش عملي

 

[Pichi]

فكرة ممتازة ,,
ان شاء الله راح احصل القطعه عندنا..

 

[Khalid-S]

خخخخ ومين قالك اشتري جزمه وحده ؟؟ اذا انت تحب تشتري اكثر من جزمة رياضه انت حر ... بعدين انت شكلك ما قرأت الموضوع كويس ,, السالفه مو سالفه جزمه هي الي تحسب ,, السالفه سالفه القطعة هذي

هي الي تحسب لك وتسوي لك الي تبي ,, طفشت من الجزمة ذي روح اشتري لك غيرها وركب القطعة هذي عليها.

Nike بتطلق 11 جزمة للرجال والنساء .. هذي هي الصوره ( لدانتي ومحمد المشكك ان السالفه مو عمليه )

 

[Kratos]

حركة ممتازة من شركة nike
القطعه هذي راح تمشي بالعالم الغربي بالراحة إذا كان سعرها معقول مع الجزمة لأنها موجه لحضارة معينة و نمط حياة معين ..

 

[Khalid-S]

نسيت اذكر السعر ,, السعر بيكون الجزمة + القطعتين ب120 دولار ... الجزمة بلحالها بعضها ب80 بعضها ب90 دولار.

 

[king zell]

أدري خالد انها قطعة تتركب في جزمة.. لكن ليش ألبس جزم نايكي رياضة بس سنة كاملة

هذا قصدي مش عملية..

 

[Khalid-S]

محمد القطعة مخصصه للمشي والرياضه ,, بالله بتمشي بجزمة رسمية ؟؟ عموماَ ما ادري ليش ركزت على سالفه الخطوات ,, ركز على كم كيلو مشيت يحسبلك من يوم بديت .

 

[Futrus]

السعر لا بأس فيه غالي شوي مع ipod جيجا 1 بكون مناسب

 

[king zell]

المشي ما فيه فايدة ان أحسب كم كيلوا مشيت

حسبتها تفيد بس اذا كنت تخسس.. يعني في ناس تمشي 10 كيلو بالأسبوع.. البعض ينقص في الوزن و البعض لأ حسب النظام الغذائي

أما للأشخاص اللي يمشون للصحة و ليس التخفيف.. فيحتاج الواحد مقدار محدد.. يمكن ساعة كل ثلاث أيام بالأسبوع.. اللي يمشي ساعتين مش شرط صحته تكون أفضل ما تحسب كذا هي

عموما حساب عدد ساعات المشي و مقارنتها بالنت شي ما له قيمة (مجرد وجهة نظر)

أما الجهاز جيد و حساب السعرات الحرارية المحروقة ممتاز للأشخاص المخففين و اللي يحبون يجرون في الطبيعة بدل الجهاز

ابتكار ممتاز

 

[Nintendo]

خالد شكلك نسيت ( الويموت )

تقعد تمشي على الجهاز وبالويموت تتصفح الانترنت وتدلع نفسك تراني ماخذ الشغله مزح لاودي اناقش ولا شئ .. بس حلو النقاش مع محمد لول .. عاد محمد ودي اشوفك تحطم رقم هشام القروج ولا جبرا سلاسي

 

[king zell]

عمر انتبه على نفسك

تراني مشيت اليوم 5 كيلوا .. لحق قبل ما يروح عليك الأشيفمنت و لا نخليك تركض معانا

 

[Khalid-S]

محمد اعتقد احنا آخر ناس نتكلم وش الفائده من هذا او وش الفائده من ذاك .. لان الي قاعدين نسويه كله على بعضه بدون فائده ........

بعطيك مثال ..

الحين رجال حالته الصحيه ممتازه ,, كل يومين يمشي 2 كيلو تقريباَ ,, بعدها بفتره بطل يمشي , اخذ له ثلاث اسابيع ما يمشي الشغل او الدراسه معطلته ,, راح مشى اليوم الي بعده وتعب بسرعه, استغرب من الأمر , رجع البيت شبك الاي بود حقه وشاف والله في فرق من اسبوعين ,, في فرق 2.5 كيلو عن اول (مسافه) ,, يشوف عدد خطواته اليوم عن اول عشان يحاول يتفاداها المرات القادمه .. يشوف كم كالوري نقص لانه في الاسبوعين هذي ما كان يمشي وياكل اكل غير صحي لان ما عنده وقت وعشان ينقص الي زاده من كالوري يحدد اني بمشي الين ما انقص 300 كالوري ,, وهو يمشي لمن العداد داخل الجزمه شاف انه وصل 300 كالوري الموسيقى الي تسمعها توقف ويطلع صوت حرمه تقول لك انك وصلت 300 .. او مثلا وصلت 250 وباقي 50 وكذا..

بالاخير الامر يرجع كمتابعه صحيه لنفسك ,, عشان تعرف مستواك عن كم يوم كيف ,, انت قاعد تتحسن ولا لأ فقط لا غير ..

*تعال ادخل الماسنجر*

 

[Nintendo]

مالك داعي محمد !!

طيب وش رايك ارسلك جزمتي وجهازي وتقعد تمشيلي شوي عشان تعدل الScore حقي ؟ ويايت توصل الجزمه بعد كذا لباقي الشباب كل يوم واحد الين واصلكم ..

محمد لاترد خارج الموضوع

 

[Khalid-S]

خخخ المشكله انتم ماخذينها سالفه سكور وخرابيط ,, السالفه مقارنه .. السالفه متابعه صحيه.

روح يا عمر شوف اخبار فاميتسو الي بتنزل بعد شوي وانت محمد العب بالدي اس لايت ,, صدقني فيه فائده جباره

 

[Kratos]

أنا أطالب بالعدالة و الديموقراطية ..
لازم زيل و نينتيندو يوقفون أنفسم كم يوم كذا عشانهم مخربين الموضوع << قمة العدالة هههههههه

 

[king zell]

خالد تبي الصراحة.. عندنا الواحد يتعيجز يركض أو يمشي حتى بدون ما يكون في السالفة قطعة و جزمة.. تبيه الحين يمشي و يركض و يحسب و يدخل سكور بالنت لول

*عشان عيونك*