رحلة طويلة مع النفسية والتصالح مع النفس, الناس ممكن تستصغر الشي هذا او ما تعيره اي أهمية,لكن السلامة النفسية يعني السلامة البدنية وسلامة حياتك.
الصحة النفسية ممكن تغير من الانسان بدون ما يحس ويمكن يحس لكنه ينكر بقوة.
ما ودي اتكلم عن حياتي الشخصية لكن بحاول اشارك البعض شي من التجربة لعله احد يمكن يستفيد.
لكن الحالة النفسية ممكن تحولك لإنسان بغيض بدون ماتحس بالذات في الانترنت ومريت بتجربة سيئة وكنت شخص سيء جدا في الانترنت وما كنت احس على نفسي.
الموضوع ممكن مايبان عندك في البداية ويمكن ما تنتبه له او تتجاهله تحت بند "والله مضغوط" او "الناس ما صايرة دراما" وكثير من الاعذار هذي, الين يجيك كف محترم من الحياة.
للامانة يمكن الي سويته خطأ لكن بأحكي عن تجربة بسيطة, مو شرط انها صحيحة واكيد فيه طرق أفضل.
لكن بعد ما اخذت كف من الحياة وبديت انتبه لوضعي وتحديدا 13/5/2020 اتخذت القرار وهو اني احذف كل شي يخص السوشال ميديا وانقطع تماما حتى عن اقرب الناس لي "مو شي جيد".
بديت احط كل سلبية قدامي وايش الطرق الي ممكن تساعدني اغيرها.
بحط بعض المشاكل ( الكلام السي او السب, النقد لمجرد النقد, ما اشوف اي شي جميل)
الخطوة هذي لحالها كافية انك تبدأ تغير من حياتك للافضل, انك تحدد مشاكلك ونقاط ضعفك.
خلال سنة ونص تقريبا ولله الحمد تخلصت من كل العيوب الي ذكرتها و الي ما ذكرتها, لكن المقابل ما كان بسيط لكن كانت تجربة تستحق المقايضة.
وبعض العيوب خفت عن سابقتها ولله الحمد.
بعض من التجارب الي كنت اسويها هي اني احاول اسوي شي ما كنت احبه او خلينا نقول كنت احسب انه شي سيء وخايس, مثلا جربت ألعب العاب ما كنت في يوم اتخيل اني ألعبها.
ممكن يكون شي تافه لكن الشي هذا خلاني أبدأ اشوف الاشياء من زاوية اخرى واقدر الجمال الي ماكنت اشوفه, صرت استمتع اكثر بالالعاب وصرت اشوف الجماليات فيها اكثر من اي وقت مضى.
طبعا انك تنقطع عن العالم مو خيار جيد لكن لازم تخفف من الانترنت والسوشال ميديا بشكل كامل.
بصراحة اكتشفت انه السوشال ميديا سلاح ذو حدين لكن الشفرة الموجه عليك اسوأ وأخطر بكثير وممكن تدمر حياتك بدون ما تدري.
الاخبار السيئة اليومية الي تشوفها سواء جرائم او سياسة او غيرها من الاخبار السيئة الي ممكن تنكد عليك يومك.
نصيحة صعبة كمان في السوشال ميديا:
مو كل شخص تعرفه لازم تسويله فولو في تويتر او انستجرام او غيره, الشخص قد تنبسط معاه جدا وجها لوجه لكن في السوشال ميديا هو عدو لك.
بحاول اشرح النقطة ذي, الشخص لما تقابله وجها لوجه تقدر تتحكم وتدير الحوار بينكم بشكل كبير, عكس السوشال ميديا الي ما تقدر تتحكم وتدير الموضوع
هو يكتب في اراء سياسية او حتى ينشر اشياء سيئة مع الوقت تبدأ تأثر عليك بشكل كبير, وانت مو قادر تسويله ان فولو بسبب "صاحبي واخاف يزعل".
اسف على الاطالة لكن حبيت اشارك جزء من تجربتي يمكن احد يستفيد.
