Eye
السوسة
"ماء ، أرض ، نار ، رياح ، منذ زمن جميع الشعوب عاشت مع بعضها البعض في تناغم ، بعدها تغير كل شي عندما هجم شعب النار ، فقط الافاتار سيد جميع العناصر يستطيع ايقافهم ، ولكن عندما احتاجه العالم بشدة ، اختفى"
-كاتارا ، من مقدمة افاتار آخر معوج الرياح
—————-
# تمهيد :
في الآونة الكثيرة بعد هجوم ملك شعب النار @مظلم_نون احدى عشر على المنتدى بالتحليلات النارية ، شعب المياه قرر الوقوف في وجهه وحماية شعب المياه من الاستعباد
——————
#المقدمة:
بدون مقدمات ، الموضوع ومافيه هو مجرد تحليل مائي ، الماء هو اساس الحياة ، فاذا كانت التحليلات النارية تلسع بالحرارة ، فوجب اخمادها ببرودة المياه
خلونا نغوص في ما ورائيات المتعة في الالعاب ، ونحاول نطلع بتفسير نظري قياسي نقدر نتناقش من خلاله على وش جوانب المتعة في الالعاب ، ليش انا جالس استمتع باللعبة؟ اللعب هو تجربة ميتافيزاقية ، وش الانتوشن اللي يشتغل بالمخ ويخلي الواحد يستمتع باللعبة
مهتم اسمع آراءكم الشخصية ونظرياتكم
دعونا نبدأ!
١. القطرة الاولى : تقمص الدور
# تقمص الدور هو لما تحسس اللاعب انه شخصية ثانية ، بطل خارق او مجرم او كاوبوي او سباك نقازي ، قد تكون الميكانيكيات محدودة ومجنركة ومكررة عشرين الف مرة ، بس لما تسوق الوهم على مخ اللاعب انت تنقله لتجربة مختلفة ، تشيله من فوق الكنبة وتخليه يكون هو الشخصية ، تعيشه حياة ثانية
٢. القطرة الثانية : التحكم المصقول
# اساس اللعب هو التحكم ، والسر في قوة هالنقطة ان شعور التنفيذ اللي يعبر عن غريزة الحركة بشكل حر ومتجاوب مع مدخلات اللاعب شعور مبهج ، شعور تمكين الارادة ، انت تحس ان عندك سيطرة كاملة على الشخصية ، وحدة من التجارب اللي ما انساها هي ماريو ٦٤ ، لما تتحرك وتركض وتناقز وماريو زي العبد يتبع اوامرك وتتفهلى وتسوي حركات وشقلبوبات ونقزات ، ما ادري ليش الشعور ذا ادماني ، وما ادري ليش اذا عفس المطور التحكم يطلع فيه شي غلط ، شي مب ممتع
٣. القطرة الثالثة : الفهم والمسترة
# واعني بذي النقطة كل شي تمستره ، ميكانيكات موارد في لعبة سيم ، علاقات رياضية في ستاتس ، لما تحس انك فاهم تحس ان لك قيمة ، انك سمثنق
٤. القطرة الثالثة : امكانيات الآلة
# ذي النقطة ما عاشها الا المخضرمين ، اسف يا المراهقين ، بس لما تشوف جرافيكس hd اول مرة وانت جاي من بكسل ارت شعور ثاني ، شعور "اما يقدرون يسوون شي زي كذا" "اما يصير كذا" وبضرب مثال ، لما تلعب كود ٤ وتشوف ان والله الرصاصات تطلع خروق في الجدران ولما تلعب بريث وتهبب حريقة في الغابة ، ولا لما شعر الشخصية يتحرك مع الهواء ، ولا لما جويل في تلو وهو يمشي قريب الجدار يمد يده يتكى عليه ، ذا شعور مبهر واعتقد كثير مطورين مدمنين على ذا الشي مع انه ماله داعي بالقيم بلاي ، يعني مثلا لحية الوي ، هم بس يبون يحسوونك باحساس "اما فيه كذا"
٥. القطرة الخامسة : التحدي
# عاد التحدي يمكن اوضح منه مفيش ، لما تتجاوز عقبة او بوس او لغز ، تحس انك انجزت شي غيرك ما قدر عليه ، تحس انك مميز ، تحس انك أد الدونيا
٦. القطرة السادسة : الرحلة
# سواء تتبع قصة شخصية او تبدا حافي منتف وتصير كنق العالم ، البروقرشن ذا له علاقة بشعور الانجاز ، البشر يحبون (اين كنا واين صرنا) ، يمقن التغيير هو الممتع ويمقن لا ، لكن الاكيد ان الناس تستمع بصناعة الذكريات ووالله كنت وسويت وفعلت
٧. القطرة السابعة : الهبل
# هذي حقيقة ، لما يكون عندك مساحة تستهبل فيها وتسوي اشياء غير متوقعة وشاطحة وغبية ، شعور مضحك ، رح اقرب ستريمر وبتشوف ان الناس تستمتع بذا الشي ، تستمتع بالحرية ، تستمتع بانك يمديك تسوي شي ما يمديك تسويه بالحياة الواقعية ، عندك مساحة تخبيص بدون رقيب ولا حسيب ، اعتقد ذا يعكس الجانب الطفولي اللامسؤول في الانسان ، الشعور البرئ بان تجربة كل شي ممتع
———————-
# المؤخ.. خلنا نقول النهاية عشان ما نلقم باند :
وش رايكم بالنقاط؟ هل تشوف فعلا تنطبق عليك؟ اطرح لنا نقاط متعتك باللعبة؟ انا حقيقة مهتم
وشكرن