hits counter

الموضوع الرسمي Shogun 2: Total War | فرصة للتعرف على سيدة الالعاب الإستراتيجية ( شرح )

بادئ الموضوع #1
السلام عليكم

بدايةً حبيت أوضح ان هالموضوع شرح أكثر مماهو موضوع رسمي .. بحكم صعوبة تقبل اللاعب الجديد لها .. نبدأ بمعلومات عن اللعبة



المطور : Creative Assembly

الناشر : SEGA

النوع : استراتيجية .. تعدد ادوار \ وقت حقيقي (&)

تاريخ الاصدار : 15 مارس 2011

نبدأ بالشرح :
ملاحظات قبل القراءة :

* كلان = دولة\قبيلة
* قلعة = مدينة

بدايةً أول شي لازم تركز عليه هو Tutorial اللعبة ، لان سلسلة Total War تركز على التفاصيل الصغيرة قبل الكبيرة .. يعني قبل ماتفكر أنك تتوسع بدولتك أهتم بالمدن الي أنت تسيطر عليها بالوقت الحالي .. مثال : أول مابديت اللعبة مباشرةً بديت أهاجم المدن والقلاع الي جمبي الى ان سيطرت تقريباً على 7 مدن بوقت قياسي ! لكن هالشي أثر على تقدمي بشكل كبير .. بحيث أن أغلب هذي المدن كان التطوير فيها مُركز على الجيوش وماكان فيه أي تطوير من الناحية الاقتصادية وفلوس الخزنة كلها تروح على عدد الجيش الهائل الي املكه ، والناس ماكانت راضية عن الضرائب فكانت تقوم مجموعة من القراصنة أو الثوار في بعض المدن ، وأغلب الكلانات " الدول الاخرى " كانت ضدي وتهاجمني من كل جهة .. مما خلاني اندم على تسرعي وأتصالح بأي ثمن مع الدول الي جمبي وكلفني وقت طويل الى أن قدرت اقضي على الثورات وأحسن الحالة الاقتصادية . طبعاً من المعروف ان سلسلة توتال وار تجمع مابين التيرن باسيد كـشيء رئيسي باللعبة وريل التايم فالمعارك والان بشرح كل وحده على حدا :




الجيش & المعارك

تطوير جيشك مهم لكن أنتبه !! حتى لو كان المال متوفر لك لزيادة عدد جيشك حاول ما تترس قلاعك بالجنود لأن كل فرقة لها راتب تستلمه كل دور مما يعني اذا انك جمعت عدد كبير من الجنود بيجيك دور تفضى فيه الخزنة .. فلازم توازن مابين حالتك العسكرية والاقتصادية ، طبعاً الافضل انك تحط قائد على كل جيش لان القائد له قدرات داخل المعركة مثلاً خطبته قبل بداية المعركة تحمس الجنود ( مادري اذا لها تأثير فعلي ) بالإضافة الى انه يقدر يحفز الجنود الهاربين أنهم يرجعون لأرض المعركة ، طبعاً كل جيش له حد معين يقدر يقطعه بالدور الواحد ، اذا التحمت مع جيش آخر او هجمت على قلعة عندك خيارين .. أما انك تخلي الكومبيوتر يلعب مكانك وينتهي القتال بثواني ( ودائماً أستخدم هالخيار اذا كان عددك يفوق عدد جيش العدو بفرق واضح ) أو تدخل انت وتستلم زمام الامور وهي الطريقة التقليدية ، طبعاً داخل أرض المعركة الموضوع كله ريل تايم ومش تعدد ادوار ، ومش أي قتال محسوم بعدد الجيش .. مثلاً أنا مرة قاتلت بجيش يقل عن جيش العدو بـ 200 جندي تقريباً أول مرة انهزمت هزيمة ساحقة .. المرة الثانية لعبت بأستراتيجية مختلفة وقدرت أقتلع راس جنرال العدو وسحقت جيشه تقريباً .. العيب الكبير بالمعارك يكمن في معارك القلاع .. أذا كنت تبغى تهجم على قلعة وعدوك يملك فِرق كثيرة من رامين الأسهم .. هنا الفوز يعتبر " مستحيل ! " والعكس صحيح أيضاً اذا انت كنت تملك هالشي .. لان رامين الأسهم داخل القلعة عندهم زي الدرع الخشبي الي يحميهم بينما رامين الاسهم برا القلعة يقاتلون بالعراء فــ لو حسبناها بشكل سريع .. عدد الفرقة 120 .. كل رمية جماعية تاخذ تقريبا 5-7 ثواني .. الي داخل القلعة ينقص منهم اثنين أو بالكثير ثلاثة بكل رمية .. بينما الي برا 6-8 ! مما يعني ان الجيش الي يقف خارج القلعة سواءً كانو رامين أسهم او مقاتلين يركضون بسرعة لتسلق جدار القلعة أعرف ان كلهم راح يتم الانهاء عليهم بوقت قياسي وهذا عيب كبير باللعبة .. صحيح اني مرة قدرت افوز بس كانت بطريقة صعبة جداً .. طبعاً القلعة تكون بالوسط وانت تقدر تهاجمها من كل الجهات .. فـ دورت على الجهة الي فيها جيش الاعداء أقل وخليت كل جنودي يهاجمون منها وبديت أقضي على الاعداء بشكل متدرج مماسمح لي هالشي ادخل القلعة وأسيطر على مركزها وبهالشكل قدرت أفوز بالمعركة وباقي تقريباً نصف جيش العدو متمركز بالجهة الثانية .. يوم حاولت اسوي هالحركة مرة ثانية ماقدرت ! كل جيش العدو صار يلحقني وين ما احط جيشي فـ صار الموضوع صعب صعب جداً والى الان مالقيت الاستراتيجية المناسبة للفوز بهالمعركة .. المطمئن هنا أن اغلب القلاع مايكون فيها جيش عملاق الا القلاع الي تكون " اخر قلعة بيد الكلان " فيكون متمركز فيها كل جنود الكلان .​

Art

أيضاً تطوير الـArts وهي ثقافة دولتك وكل Art يحتاج وقت معين من الادوار لأتمامه ومنقسمة لقسمين .. الاول يركز عالاقتصاد والحالة الاجتماعية والثاني يركز عالقوة العسكرية فلازم تحاول انك توازن بينهم وطبعاً لكل Art تأثيرة فمثلاً فيه آرت اذا سويته ينفتح لك مبنى جديد .. وفيه آرت يطور عندك رامين الأسهم .. وآرت يزيد ولاء جنرالاتك لك وغيرها .

Diplomacy

شيء مهم جداً ! علاقتك بالدول الاخرى لها تأثير كبير على تقدمك باللعبة .. من خلاله تقدر توقف القتال بينك وبين كلان آخر اذا حسيت بحالة ضعف عندك وطبعاً يعتمد على حالة العدو العسكرية بأنه يوافق أو لا وتقدر تقدم له مبلغ نقدي عشان يوافق على الطلب ، أيضاً معاهدة السلام بينك وبين كلان آخر تحتم على كل الطرفين مقولة ( عدو صديقي عدوي ) فإذا هاجمك كلان آخر تقدر تستنجد بالكلان الي مسوي معاه معاهدة السلام وإذا رفض مساعدتك تتنكسل هذي المعاهدة والعكس اذا هو طلب منك ، أيضاً اذا كنت في حرب مع كلان وقضيت عليه بحيث انه صار خائر القوى ومستحيل يواجهك مستقبلاً ( بالغالب يكون باقي له مدينة وحدة وينمسح من الخريطة ) تقدر تعرض عليه أنه يكون Vassal أي تابع لك بحيث أنه مجبر انه يقاتل عدوك وأنه في كل دور يقدم لك نصف ميزانيته في مقابل أنك توفر له الحماية الكاملة . بعض الاحيان توضع بموقف صعب ! مثلاً تكون في حرب مع كلان وفجأة تلاقي نفسك تقاتل أثنين وماتقدر تركز على الاثنين فـ مالك وقتها ألا تطلب وقف القتال من أحد الاثنين لكن غالباً يكون قبول هالطلب صعب حتى بالمبالغ الهائلة فـ مالك وقتها الا وضع أحد أبنائك الصغار رهينة عند الطرف الآخر كـضمانةً منك على صدق نيتك بوقف القتال ، أيضاً ممكن تكون تقاتل كلان وفجأة تتفاجئ انك مضطر تدخل حدود كلان آخر عشان تكمل قتالك مع الكلان الاول .. وقتها تقدر تطلب من الكلان الآخر السماح لك بدخول حدوده لفترة معينة بمقابل مادي لأن أي دخول لحدود أي كلان يعتبر إعلان حرب ضده .


الوضع الإقتصادي & السكان

من أهم الاشياء باللعبة ، دخلك الدوري مقسم .. أولاً الضرائب .. شيء مهم أنك تجمع مابين قيمة الضرائب المناسبة ورضى الناس عنها .. وفيه مستويات متعددة لها لكن الافضل انك تثبت على الـNormal وتحاول ترضي الناس فيها .. وهي من أكثر الاسباب الي تخلي الناس تثور عليك بأحد المدن الى جانب الاديان وهذا شيء آخر ، ساعات تلقى كل مدنك راضية على معدل بقيمة الضرائب الا مدينة واحدة .. بكل بساطة تقدر تعفيها من الضرائب وترتاح من مشاكل الناس الي بتواجهك .. أيضاً زي ماقلت سبب آخر لغضب الناس هو الاديان .. اذا كانت عندك مدينة ساحلية على اطراف اليابان فبتكون ديانتها المسيحية بالتأكيد ولازم ترضي سكانها لان ساعات تقوم ثورات دينية والمدن هذي يكون من الصعب إرضاء شعبها .. طبعاً اي غضب من الناس لأي سبب تقدر تسكته بزيادة عدد الجنود في هذي المدينة ، مثلاً كان عندي مدينة ديانتها مسيحية وكانت دائماً تقوم علي ثورات بحيث أن يطلع لي جيش صغير بمسمى ( الثورة المسيحية ) يحاول انه يسيطر الى المدينة فأضطريت اني ازيد عدد الجنود فيها وأحط أحد جنرالاتي فيها لأسكات غضب الناس وطبعاً في رسمة وجه عند كل مدينة تبين لك مدى رضى الناس وفيه ثلاث معدلات ( ممتاز - متوسط - سيء ) ، نرجع للحالة الاقتصادية تقدر انك تفتح مجال تجاري بينك وبين كلان آخر أيضاً بناء الطرق&المزارع يعتبرون أهم دخل للمدينة ولازم تركز عليهم بشكل كبير .


Agents

مايطلعون لك الا اذا بينت المبنى الخاص فيهم وبتكلم عن الي جربتهم الى الان .. النينجا ووظيفته زي ماهو معروف عنه .. إغتيال جنرالات اعداءك بس طبعاً كل جنرال عن آخر يفرق .. فيه نسبة لنجاح المهمة بالإضافة الى مبلغ مالي وكلها تعتمد على الجنرال المستهدف وفيه ثلاث نتائج محتملة ، فشل المهمة ، نجاح جزئي ( إصابة العدو مما يعني انه بيختفي عن القيادة لفترة معينة ) ، نجاح المهمة . أيضاً النينجا له وظائف أخرى مثل احراق بعض المباني في قلاع الاعداء أو حرق البوابة بحيث انك اذا كنت بصدد الهجوم على قلعة معينة راح تلقاه مفتوح في المعركة ومايحتاج وقت لحرقه وفتحه .

وعندنا الـMetsuke أو نسمية شرطي المدينة .. وظيفته هي حفظ الأمان في المدينة وإطفاء الثورات الشعبية وكشف نينجا العدو اذا تواجد فيها .

وفيه غيرهم زي المونك و " المبشر " وكلهم يتخصصون بالجانب الديني .. الى الان صراحة ما اعرف فايدتهم الحقيقية بس أعتقد كل منهم له أثره على الناس واعتقاداتهم وتخفيف غضب الثورات الدينية .


Skills

شي شبيه بالآرت .. كل شخصية لها سكيلز معينة تحتاج نقاط لفتحها .. مثلاً الجنرال اذا انتصر بمعركة يكسب نقطتين تسمح له يطور نفسه عن طريق هالمهارات .. مثلاً مهارة القيادة والي تعطية قدرة اكبر للتأثير على الجنود الهاربين من المعركة أو مثلاً زيادة قوته الشخصية أو زيادة مهارته في المعارك البحرية ، النينجا بعد مايقضي على جنرال يكسب نقطتين تقدر تطوره من ناحية الاغتيال أو التخريب أو قدرة على التجسس على الجيوش والقلاع بخفية زائدة .


هدف اللعبة

أو نقول هدف القصة .. ببدايتها راح تستلم كلان من اختيارك .. طبعاً لكل كلان مهام خاصة لكن المهمة الرئيسية للكل تنص على السيطرة على 25 مدينه بالإضافة الى الزحف لعاصمة الـShogun الحالية كيوتو ( طوكيو اعتقد ؟ ) والي تقع في قلب اليابان في مدة زمنية معينة ( أكره أخر شرط) ، طبعاً موقع كلان في الخريطة عن آخر يفرق .. مثلاً لو اخذت كلان يقع في وسط الخريطة ومحاصرك كلانات اخرى من كل اتجاه اصعب من انك تبدا بأقصى الشرق او الغرب وتكون مركز على عدو واحد ببداية اللعبة عشان كذا الكلانات مقسمة من ناحية الصعوبة .


أشياء أخرى

اللعبة توفر لك مود خاص بالمعارك اذا كنت تبغى تدرب نفسك وتقدر تخوض معارك معينة حقيقية حدثت بتلك الفترة من الزمان .. المولتي بلير ماتعمقت فيه لاني ماقدر أستسيغ الاونلاين في الالعاب الاستراتيجية ، اللعبة ثقيلة عالجهاز فلازم توفر جهاز محترم اذا كنت تبغى تلعبها على أعلى الاعدادات أو متوسط اذا كنت تبغى تلعب على أقلها .. شخصياً حدي الميديم .


طبعاً الشرح ركز على " وش " تفاصيل اللعبة أكثر من " شلون " أسويها .. أي احد عنده اي استفسار عن طريقة تنفيذ شي شرحته لايتردد بالسؤال .

بالنهاية أتمنى أن شرحي غطى أهم النقاط لان مستحيل اقدر اغطي كل تفاصيل اللعبة لانها أعمق مما تتصور ، وأي سؤال يتعلق بها بأكون بالخدمة .​
 
#3
يعطيك العافية Al Pacino...

واضح عمق اللعبة وفرقها عن الألعاب الباقية من نفس نوعها. تمنيتها تكون على الكونسولز بس واضح ان هالشيء بيكون صعب خصوصا ان الألعاب الإستراتيجية مكانها على الـ PC.
 
#4
ما شاء الله شرحك ممتاز ومتعوب عليه!

وفيه غيرهم زي المونك و " المبشر " وكلهم يتخصصون بالجانب الديني .. الى الان صراحة ما اعرف فايدتهم الحقيقية بس أعتقد كل منهم له أثره على الناس واعتقاداتهم وتخفيف غضب الثورات الدينية .
اللي اعرفه من خلال تجارب سابقة انه احدى فوائدهم هو نشر فكر ديني معين في مناطق معينة من خلال تنقلاتهم بالمنطقة ومع الوقت حتلاقي انه في فرق في عدد معتنقي الديانة
 
#5
يعطيك ألف عافية على الشرح الرائع ! واو اللعبة طلعت أعمق مما كنت أتخيل بكثيييييييييير ، حسيت نفسي أقرأ عن civilization !

بس هي المشكلة ضلت "كيف" تلعب ! *__*

عموما اللعبة جاهزة عندي ، بحاول أبدأ أتعلمها و انطباعاتي هنا ان شاء الله ، و مبدئيا الارت "فن" في اللعبة .
 
بادئ الموضوع #6
^

بالنسبة لكيفية اللعب أهم شي تمشي على توتوريال اللعبة + ماعتقد عندك مشكلة مع اللغة , فـوضعك بالسليم .
 
#7
طيب سؤال قبل ما أبدأ اللعبة ! هل رح أحتاج السكرول بالماوس ؟ لأنها خربانة عندي ! اذا جوابك نعم رح أضطر أشتري ماوس جديدة قبل ما أبدأ اللعب .
 
بادئ الموضوع #8
تحتاجه للتقريب أو التبعيد ( التزوريم ) .. فايدته اذا كنت تبي تشوف الجنود يقاتلون بعض عن قرب ( تقريب ) أو تاخذ نظرة شاملة لأرض المعركة ( تبعيد ) .. للأمانه انا استخدمه بشكل دوري .. ممكن بدايةً ماتحتاجه بس مستقبلاً أنصحك توفره + ماعتقد انك بتعيش بدون سكرول بالاستخدام العادي للكمبيوتر *_* !
 
#9
الله يعطيك العافية على الموضوع

حسين من زمان يحلم بموضوع رسمي اللعبة والآن تحقق الحلم لول

إن شاء الله ناوي ألعبها في أقرب فرصة ممكنة ولي عودة

edit : بالمناسبة جربت ألعبها على شاشة كبيرة وكان الخط صغير جدا لدرجة غير قابلة للقراءة ! أحد عنده فكرة ؟
 
#10
تشبه لعبة ثانية حبيتها بس الفرق بينهم هذي في اليابان وهذي في أنجلترا ...



عموما الألعاب ذي عشق لعيوني بس ,,, وما أقدر ألعبها لعدم توفر " بي سي محترم " أغرز فيه وسط الألعاب الأستراتجية :angry:: لووول ...