Atelier Girl
Casual Gamer
شنو العاب أتيلير؟
ألعاب أتيلير العاب JRPGs مع social sim كانت حصريات في اليابان اول ما نزلت. واكثر ما يميزها عن غيرها ويخليها سبيشل هو alchemy system
alchemy
نظام الخيمياء بالضبط نفس اسمه، انت تاخذ لك مواد بسيطة وتمزجها مع بعض. تحطهم كلهم بالجدر بعدين يطلع لك ايتم جديد، ممكن تفكر انه سستم سهل وبسيط لكن وقت ما تلعب في اكثر يصير اعمق. كل مكونات تحصلها تملك ميزات مختلفة تنتقل للايتم الي تبي تسويه. والايتمز هذي مرات عندها hidden abilities تخليها اقوى اذا استخدمت مكونات افضل. لكن اذا بأي حال من الاحوال لفل الخيمياء عندك مب عالي ممكن ما تقدر تسوي الايتمز هذي او عندك احتمالية تفشل. هالامور تخلي alchemy system ادماني وبالنسبة افضل اللي تقدمه سلسلة اتيلير بألعابها ومتحمسة لكل لعبة اتيلير تنزل
ليديا وسولي جابوا العيد ولخبطوا طلبية سريعة D:
القصة والجيمبلاي
كل لعبة اتيلير تتكلم عن بطلة، مرات بطلتين، وقصتهم. القصص هذي light-hearted ومب حزينة وعن نهاية العالم أو توديك رحلة طويلة نفس باقي الاربيجيز. تركز على قصة بسيطة وتبنيها لحاجة اكبر شوية مب واضحة بأول اللعبة، مثال تكشف اسرار كتاب يتكلم او البطلة دخلت مدرسة خيمياء. الالعاب تتبع الفورميلا هذي ويخلونك تروح تقاتل عشان تلفل وتجمع مكونات لalchemy مالتك. المكونات هذي تخليك تسوي ايتمز واسلحة/دروع اقوى تخليك تقاتل اعداء اقوى اللي بدوره يخليك تحصل مكونات احسن. تقدر تشوف شلون الدايرة تدور من اللوب هذا. بين الخيمياء وتجميع المكونات، تصير social interaction بين البطلة وشخصيات اللعبة والبارتي مالتك ومرات يعطونك شغلات تسويها لهم. و وقت تبني علاقتك معاهم تنفتح لك نهايات معينة باخر اللعبة.
لولو صارت ساحرة خفة
combat
الكومبات مب معقد نفس العاب التيرن بيسد المشهورة كل لعبة تقدم كومبات مختلف شوية لكن مب صعب الفهم. طبعاً بعض العاب اتيلير لازم تنتظر كم ساعة عشان تشوف شلون الجيمبلاي يصير
Time mangment
ألعاب Atelier تحتوي جانب مثير للجدل، واللي هو ضغط إدارة الوقت. بمعظم الألعاب، فيه ساعة تسوي عد التنازلي أكثر فأكثر وقت تسوي حاجات معينة، نفس تجمع مكونات أو تسوي ايتمز بالجدر مالك أو الاستكشاف ومقاتلة الوحوش، ويعطونك مجموعة من المهمات الي لازم عليك إنجازها خلال فترة زمنية معينة مثلاً ثلاثة اشهر بتقويم اللعبة. معظم الألعاب متسامحة جدًا فيما يتعلق بإدارة وقتها، لكن تريلوجي Arland صارت فيها انتقادات خاصة بسبب إدارتها القاسية للوقت وتظل تريلوجي مثيرة للجدل بين الفانز ليومك هذا، سواء كانت محبوبة أو مكروهة (حسب وجهة نظرك). بالرغم من هالشي، ما تلتزم جميع الألعاب بنظام زمني وديدلاينز لازم تسوي شغلك قبله، بعض العاب اتيلير الجديدة ألغت هالنظام بالكامل تقريبًا، اللي أسعد الكثيرين من الفانز. برايي تسمح إدارة الوقت، بجميع مشكلاتها، تطلع للي جاي وشنو الاسايمنت او الي لاظم تسويه بالفترة المحددة، الي يمنع اللاعبين من تشتيت انتباههم على التفاصيل الصغيرة ويسمح لهم بالتركيز على الصورة الكبيرة ويخليك تنتقل من النقطة أ إلى النقطة ب وعندك هدف واضح. أحب هذا لأنه يحافظ على تركيزي مع المهمات الكثيرة، ممكن فيه ناس يضطروا يمارسوا اللعبة بطريقة مب متعودين عليها. لكن نظام الديدلاينز برايي يساعد بتمييز Atelier عن باقي ألعاب JRPG المتوفرة وساعد بتحديد هوية Atelier لأكثر من 20 سنة لين تريلوجي ميستري ورايزا.
أوريجن أتيلير
بدأت سلسلة Atelier في عام 1997 بعنوان صغير لطيف ومتواضع على جهاز سوني البلايستيشن اسمه Atelier Marie. بعد تقييم عالي من مجلة Famitsu واستقبال قوي من المعجبين، انولدت السلسلة بامتياز كبير.
أتيلير الاصلية وبداية كل شيء، اتيلير ماري
تم إصدار خمسة ألعاب حصرية باليابان بين 1997 و2004 وظلت حصرية يابانية حتى يومنا هذا - الألعاب هذي هي ألعاب Salberg (Atelier Marie وElie وLilie) وألعاب Gramnad (Judie وViorate). على الرغم من أنهم ما طلعوا من اليابان ابداً، إلا أنه ما صار وقت طويل حتى استمتعوا الناس الذين يعيشون برا اليابان بمباهج Atelier!
بالرغم ان Mana Khemia مب لعبة اتيلير بالاسم بس قدمت تجربة اتيلير روعة
بأحد الأيام المبروكة، مع إصدار Atelier Iris بعام 2005 لجهاز PS2، وبعد ثمان سنوات كاملة من الإصدار الأول لـ Atelier Marie، وصلت ألعاب Atelier أخيرًا إلى باقي العالم. صحيح اتيلير ما تحظى بشعبية كبيرة مثل باقي الاربجيز نفس ألعاب Final Fantasy وDragon Quest، إلا أن هذه الألعاب وجدت فاندوم وفي أخذوا Atelier إلى قلوبهم وصارت سلسلتهم المفضلة، لكن فيه فانز يجادلون بأن السلسلة بتاخذ خمس سنوات ثانية قبل أن تحصل على لعبة Atelier حقيقية بالفورميلا الي نرفعها اليوم.
اتخذت العاب Iris وMana Khemia اتجاه مختلف عن صيغة Atelier التقليدية الي نعرفها قبل ما صدروا، حيث ركزوا على الكومبات اكثر وبشكل اكبر على قصة اللعبة والمغامرة والاحداث، بدل ما يركزوا على الخيميا ونظام إدارة الوقت اللي خلت السلسلة مشهورة وناجحة نجاح قوي باليابان.
ما صار هالشي واقع ملموس لين عصر PS3، وقت انتقلت Atelier أخيرًا لعصر موديلات وبيئات ال3D ، وقتها رجعت سلسلة Atelier إلى جذورها القديمة وشددت على الشعور بالراحة والاسترخاء المعروف مع السلسلة اليوم، واعادوا تعريف نظام إدارة الوقت و إعادة التركيز بشكل أكبر على الخيميا. لاقت ألعاب Arland (Rorona وTotori وMeruru وقبل اربع سنين Lulua) وألعاب Dusk (Ayesha وEscha وLogy وShallie) استقبال كبير ومدح وقدمت تجارب قوية من خلال تقديم جيل جديد تمامًا لعجائب سلسلة Atelierسلسلة اتيلير لجيل جديد ما يعرفها قبل . التريلوجيز المختلفة هذي قدمت شغلات معينة خلتها محبوبة بين الفانز ووضعتها بين أفضل الألعاب في السلسلة. تريلوجي أرلاند خاصة اعادت تعريف بعض عناصر اتيلير القديمة بالعاب عصرية لوقتها وجذبت ناس كثيرة جديدة لشنو اتيلير تتميز فيه من ايام البلايستيشن الاصلي وتكافئ اللاعب الصبور لين يتعلم شنو المطلوب منه و شقد نظام الalchemy ممتع تجرب فيه مختلف الوصفات وتطلع بحاجات مرات مب متوقعة.
اتيلير رورونوا كانت اول 3D Atelier، تحبها او تكرهها هي من اسباب شعبية السلسلة بعصرها الحديث
من ناحية أخرى، تريلوجي Dusk، في حين انها تزال محافظة على نظام الخيمياء المعقد بشكل ممتاز، الا انها قدمت عوالم melancholy اكثر وقصص حزينة، عوالمها تموت ببطء ويتعين علىشخصيات التريلوجي تتصالح مع واقعها الحزين وتكاتف مع بعضها البعض. لتنقذ عائلتها واصدقاءها او ببساطة تعيش يوم اخر.
أبطال ثلاثية Dusk معًا بكل مجدهم!
بالمقارنة معهم، تريلوجي ميستري تلقت استقبال فاتر اول ما جات، حيث يدعي العديد من المعجبين أن الألعاب هذي ما قدمت أي تحدي جديد والقصة الشاملة ما لها وزن يذكر يساعد في الحفاظ على استثمار اللاعبين بالسلسلة. وبرايي العاب Ateliers Sophie وFiris وLydie وSuelle تعرضت لانتقادات غير عادلة ابداً من ناس ما تعرف وش تتكلم عنه، لأنها ألعاب ممتازة تقدم لنا حكاية مختلفة، ومش اقل سحر من تريلوجي الغسق، وتقدم بنفس الوقت بعضً من أفضل الشخصيات التي ظهرت في السلسلة حتى الآن. . على الرغم من منتقديهم، لا بد أن ترلوجي ميستري سوت شيء صحيح، حيث تمكنت بطلة الجزء الاول والشخصية المتكررة صوفي من الحصول على المركز الأول لأكثر شخصيات Atelier شهرة في استطلاع شعبية الشخصية الذي أجراه Gust لعام 2018 ومؤخراً في 2022!
صوفيا شخصيتي المفضلة بكامل السلسلة
كلمة اخيرة
الموضوع راح يكون مخصص لكل العاب اتيلير من ريميك اتيلير ماري لين لعبة رايزا الثالثة وما بينهم. يجمع الانطباعات وكل السوالف والاسئلة والاستفسارات حول اتيلير بمختلف العابها
الموضوع اول موضوع اسويه والسموحة اذا موب مرتب لكن بحثت عن موضوع لاتيلير بالمنتدى وما حصلتها وهي السلسلة المفضلة عندي وقلت لازم اسوي لها موضوع
يعطيكم العافية على القراءة