موضوع نقاشي عن الدراسه بالخارج

[xX Wolf Shooter Xx]

السلام عليكم

بما انه الدراسه بالخارج اصبحت رائجه مؤخرا

فا يا شباب الي يدرس برع يعطينه رايه في الدراسه بالخارج و بالاحوال هناك

لانه انا في اخر سنه و يمكن ادرس في امريكا

فبغينا رايكم ( وخاصه الي في امريكا )

وشكرا

 

[Ze Truth]

عن عدم وجود تجربة شخصية, الدراسة في الخارج اوفر ريتيد.

 

[Megagarcon]

انا مادرس برا، لكن راح اعطيك نصيحة، اذا انت مستواك عالي و تبي تدخل جامعة قوية، فاستحمل الغربة و ادرس برا، لكن اذا مستوى الجامعة اللي تبي تدخلها موجود مثله في البلد فوفر على نفسك و ادرس في جامعة البلد.

 

[Andrew X]

انا مادرس برا، لكن راح اعطيك نصيحة، اذا انت مستواك عالي و تبي تدخل جامعة قوية، فاستحمل الغربة و ادرس برا، لكن اذا مستوى الجامعة اللي تبي تدخلها موجود مثله في البلد فوفر على نفسك و ادرس في جامعة البلد.

بلأضافة الى انه مافي احسن انك تدرس بين اهلك واحبابك..ومرتاح ومبسوط وماعليك خلاف..صراحة انا كان عندي الفرصة ادرس برة بس رفضت ..

 

[Still Alive]

ميزة الدراسة في الخارج انك راح تبني شخصية قوية لك, وتعرف كيف تعتمد على نفسك وتدبر أمورك, طبعاً غير أمور الجانب العلمي الثانية

اما السلبيات, أنا وعن تجربة ما كان فيه شي اصعب علي من الغربة, كل شي ممكن تتأقلم معه إلا مسألة فقدان الأهل والبعد عنهم

 

[G7Ga7]

ميزة الدراسة في الخارج انك راح تبني شخصية قوية لك, وتعرف كيف تعتمد على نفسك وتدبر أمورك, طبعاً أمور الجانب العلمي الثانية

اما السلبيات, أنا وعن تجربة ما كان فيه شي اصعب علي من الغربة, كل شي ممكن تتأقلم معه إلا مسألة فقدان الأهل والبعد عنهم

أتفق مع ستيل ألايف, واضف مع السلبيات انك راح تواجه امور اكثر انفتاح من بلدك مما قد لا سمح الله تدخلك في مشاكل.

 

[M 7 L]

ميزة الدراسة في الخارج انك راح تبني شخصية قوية لك, وتعرف كيف تعتمد على نفسك وتدبر أمورك, طبعاً أمور الجانب العلمي الثانية

اما السلبيات, أنا وعن تجربة ما كان فيه شي اصعب علي من الغربة, كل شي ممكن تتأقلم معه إلا مسألة فقدان الأهل والبعد عنهم

كلام سليم، ولكن يظل الأمر مختلف بين كل شخص وشخص !

بالنسبة لي حالياً أدرس بالخارج، وفعلاً هي بناء للشخصية سواءاً على الصعيد الأخلاقي أو الديني أو أو أو ...

فإذا كنت من " المحظوظين " وحصلت على نعمة الإبتعاث برأيي لا تفرّط فيها أبداً، هي درس متكامل بجميع النواحي بالإضافة إلى الجانب العلمي !

 

[black.heart]

هممممممممممم الدراسه برى
انا لي شهرين الحين بامريكا و بكلمك عنها
من وجهة نظري اذا جيت تدرس برى اقدر اقولك انك راح تحب الدراسه صدقني ما كذبت عليك اسلوبهم بالتدريس ممتع مره صحيح اني الحين ادري انجليزي و باقي علي تقريبا 6 شهور و اخلصه باقي لفلين من اصل 6 انا حاليا بلفل 4 طبعا دخولك اللفل يعتمد على درجتك بالبليسمنت تيست
طبعا الدراسه هنا مو تفتح كتاب و يجيك المدرس و يجلس يهذر فوق راسك و اخر الحصه يقولك فهمت و الا .. هنا مثلا الكلاس اليوم يقولك بكره واجبك انك تحضر الدرس الفلاني تقرى الصفحات الفلانه و تحل الاكسرسايزيز الفلانيه و تعال بكره نتفاهم اليوم الثاني يجلس يناقشك بالدرس وش تعلمت و ايش الشي اللي واجهته و صعب عليك يقوم يشرحه لك
من ناحية الحياه هنا فما فيه اي وجه مقارنه بنيها و بين الحياه بالسعوديه .. صحيح راح تواجه صعوبات و اهمها الغربه لكن بمقدروك تتغلب عليها بتكوين صداقات راح توجه مشكله بالاكل طبعا يمكن مش في كل ولايه لكن على حسب المكان اللي تروح له و من ناحية التمشيه و الوناسه فما راح تلاقي مكان عنده سيكيروتي يقولك عوايل لووووووووووول

 

[Silent Dream]

الي من السعودية .. سمعت إن ذي السنة بتكون الأخيرة للأبتعاث , وبعدها راح يغلقون الشيء هذا .. مدري الكلام ذا صحيح ولا لا ؟

 

[The Doctor]

^العام الماضي ما كان فيه بعثات إلا طبية..

 

[black.heart]

الي من السعودية .. سمعت إن ذي السنة بتكون الأخيرة للأبتعاث , وبعدها راح يغلقون الشيء هذا .. مدري الكلام ذا صحيح ولا لا ؟

اللي بالسعوديه طال عمرك صحيح هذي اخر سنه بالبعثات من السعوديه نفسها
لكن اللي بيطلع يدرس على حسابه ما عنده مشاكل لكن المشكله الوحيده ان الالتحاق بالبعثه اول كان علىطول و انت تدرس لغه حتى لكن الحين توقف هالشي صار لازم تخلص لغه + 30 ساعه بالجامعه بعدها تلتحق

 

[Lunar Poet]

و بالنسبة لموضوع "الغربة"، فهي تختلف من شخص إلى شخص، و هالشي يعتمد على الشخص نفسه و عائلته. أهم شي إنك تكون إيجابي في نظرتك لموضوع الإبتعاث -لو قررت عليه إن شاء الله- و تبعّد قد ما تقدر عن كل شي سلبي فيه (حتى الكلمات! حاول إنك ما تستخدم كلمة "غربة" مثلاً لأنك وقتها بتحسس نفسك إنك فعلاً غريب عن الأرض اللي انت فيها.) أيضاً حاول تبعد عن تدوين الأحداث اللي تصير لك (مثل بعض الناس يكتبون كل شي يصير لهم بالحرف، تقول رايحين المريخ. لول كل اللي أعرفهم و سووا هالحركة كان الـhomesickness لهم أسرع من أي شي ثاني.)

بالتوفيق

 

[Lonely Heart]

زين مدام فيه موضوع انفتح عن الابتعاث..

كيف دراسه الطب في الخارج ؟

 

[Still Alive]

زين مدام فيه موضوع انفتح عن الابتعاث..

كيف دراسه الطب في الخارج ؟

الحين انت بتسافر عشان تدرس طب ؟! خلك في بلدك احسن :laugh::

أنت اذا بتسافر سافر عشان تخصص هم متفوقين بمراحل فيه, او متوفر هناك بس.. موب طب !!

 

[Lonely Heart]

الطب هنا ممتاز وهذا اللي اعرفه ..
لكن حبيت اشوف كيف الطب برا بس : (

 

[squall leonhart]

الطب هنا ممتاز وهذا اللي اعرفه ..
لكن حبيت اشوف كيف الطب برا بس : (

طبعا الدراسه للطب برا في بلد متقدم علميا افضل و بمراحل( مو تورح لي المجر مثلا و لا سلوفاكيا لوول نفسي اعرف كيف يرحون لها ) .. لكن السؤال هل انت بتتحمل 7-8 سنوات تكرف لوحدك و بتخصص صعب جدا و مكافئه بسيطه جدا ؟ اذا تقدر فهو افضل لك من الناحية الدراسيه و الاحترافيه و كل شي .. او ادرس هنا لكن بتشوف اشياء عجيبه احيانا

 

[Lonely Heart]

^
مثل ؟؟
وكيف مكافاه بسيطه ؟

 

[Id]

طبعا الدراسه للطب برا في بلد متقدم علميا افضل و بمراحل( مو تورح لي المجر مثلا و لا سلوفاكيا لوول نفسي اعرف كيف يرحون لها ) .. لكن السؤال هل انت بتتحمل 7-8 سنوات تكرف لوحدك و بتخصص صعب جدا و مكافئه بسيطه جدا ؟ اذا تقدر فهو افضل لك من الناحية الدراسيه و الاحترافيه و كل شي .. او ادرس هنا لكن بتشوف اشياء عجيبه احيانا

فيصل .. في بلدان في أوروبا دراسة الطب فيها أفضل من دول متقدمة عالمياً و علمياً مثل أمريكا و بريطانيا ...

الكلام هنا يختلف وشو البلد .. في فرنسا و التشيك و كرواتيا .. تتم بعثات يرسلون فيها طلاب طب لتخصصات تدرس في هذي البلدان بأفضل الأساليب العلمية الممكنة ..

المكافأة الي تقدمها الحكومة تعتبر ممتازة في كل البلدان ما عدا بريطانيا بسبب الأرتفاع الغالي في مصاريف المعيشة هناك .. و هذا الكلام كله سمعته من كثير من الشباب الي أبتعثوا لهالبلدان ...

 

[Still Alive]

سكوال انت ذكرتني بنقطة مهمة. شباب أي واحد راح يبتعث للخارج لازم يحط في باله أنه مكافأت الوزارة او الحكومة ما توكل عيش للآسف.. كذا ولا كذا راح يضطر يطلب فلوس من أهله, يعني الى اهله حالتهم المادية تعبانة لا يورط نفسه من البداية

وهالكلام بالتحديد لشباب بريطانيا مثل ما قال ثامر

 

[pacino]

ياعمي ادرس برا وفك عمرك
انا حصلت لي بعثه بامريكا تخصص هندسه معماريه ورفضتها
الحين متحسف عليها ..لان الدراسه عندنا بكليه الهندسه جامعة الكويت صعبه جدا وكنظام دراسي ينافس الجامعات الامريكيه لكن للاسف الهيئة التدريسيه والطلاب احباط خخ

الغربه تعلمك تنظيم الوقت وهذا اهم شيء..انا افتقد هالشي هذا اهني صراحه ..لان الحياه الاجتماعيه لها تاثير كبير علي وتاكل وقتي

نصيحه اذا حالتك الماديه متوسطه وحصلت لك بعثه لا تطوفها ..الغربه راح تتعود عليها ..ما راح تعيش طول عمرك اهناك!.وراح تتعلم تكون ذاتك وشخصيتك

 

[Yaz3D]

أنا أي شي ممكن أتعود عليه إلا الغربة .. جتني أكثر من فرصة للابتعاث لكني كملت دراستي هنا

 

[xX Wolf Shooter Xx]

تسلمون شباب على الردود
انا الصراحه شكلي بقدم على نظام هيئة كهرباء ومياه ابوظبي

وهم يعطون مكافأت بس بعد حتى لو ما كفى
الخير موجود والحمد لله

بس بغيت أسأل سؤال سخيف شوي للي يدرسون في أمريكا ( لونار والشباب )
شي وقت انه الواحد يجلس ويلعب العاب في وقت الفراغ ؟طبعا ما اقصد 24 ساعه اقصد مال ساعه او ساعتين

 

[Megagarcon]

جا على بالي سؤال ودي احصل على اجابته من الطلاب السعوديين المبتعثين عن طريق الحكومة. الحين لما حصلت على بعثة، انت اخترت المدينة-الولاية و الدولة اللي تبيها ولا هم رموك و بس؟ ولا لازم يكون عندك قبول مسبق من جامعة-معهد لغة؟

 

[ZiZ]

الصراحة، أنا ناوي أطلع قريب لأمريكا.

اختبرت التوفل والـ GRE. بس المشكلة لازلت محتار على أي جامعة أقدم.

 

[s3rorh]

تبي تعرف منو انت ؟؟؟ وايش هي قدراتك ... وشنو تقدر تسوي ... وتبي تتعلم دروس ما بتنساها لو حييت ... وتبي تكون شخصيتك ... وتبي تعرف لأي مدى انت متدين ومتمسك بالدين




ادرس برا







بس بقول لك!!! ... بتصير عاطفي بزياده .. وممكن بأي لحظه بتحصل الدمعه بعينك وحتى ولو أنت كنت باسعد لحظه بحياتك ..
وبتعاني من الوحده بأول شهرين .. وراح تفتقد أهلك وربعك واحبابك... وتبدأ تشتري كروت الاتصال وتقعد لوجه الصبح على النت ويحوشك الأرق ونومتك تنعفس فوق تحت

بس بعدين بتتعود على الامر ... وبتشوف الامور اشلون صايره ... واشلون الناس ألي برا يحترمون الوقت و يلتزمون فيه ... واشلون يقدرون يشتغلون ويدرسون بنفس الوقت .... وهالشي راح يخليك تخجل من روحك و تتسأل (( أنا ايش كنت اسوي ببلدي !!!؟ ))

وراح يكون قلبك مفتوح لأي شخص .. لأنك بتكون بعيد عن اهلك ببلد الغربه .. ويكون قلبك مجروح وراح تدور على أي حد بس علشان يسد الفراغ ألي صار فيك وبقلبك .. ويكون بديل لأهلك ... واهني حاول تختار الشخص المناسب ... موب شرط تكون فتاه ... لأنه ممكن توقعك بمشاكل ( إلا اذا كنت عارف نفسك بانك مو ممكن توقع بالمشاكل وبأنك ممكن بترتاح لهل شخص .. وتعتبرها من الاقارب بحيث ما تفكر تغلط معاها ) ... بل حاول تختار شخص ويكون صح الاختيار ... ويكون مثل (( صديق الدرب )) و لازم تجربه بكذا موقف قبل لا تعتبره بانه صديقك

وشغله أخيره ........ حاول تبعد عن السيجاره كثر ما تقدر ... ولو مهما كان !! لا تقرب صوبها ... وحتى لو انت تدخن ألحين ... حاول بانك تقطعها

وانسى انه عندك سوالف الغريزه ... واعتبر نفسك بانك متزوج و زوجتك ناطرتك ببلدك ... وتذكر بانه في احد يراقبك ... وانه ممكن بيوصل أي شي أول بأول لزوجتك ولأهلك
وهو الله ..
وحط ببالك بانك مسافر علشان تدرس وتحصل شهاده محترمه وترفع فيهم راسك وراس اهلك .. وبتكون الشخص ألي يضرب فيه المثل
وبالتوفيق

اوه صح نسيت ... لووول وبتعاني بحساسيه من المطار P:

 

[Mute City]

موضوع مهم بصراحة
أنا ما أخذت بعثه برا لأني لسع أدرس ثانوي لكني أقولك زي باقي الأعضاء إذا كان الجامعة قوية
وغير متوفر في بلادك أو شي من هذا فأن أنصحك بالسفر أما لو العكس فلا تحمل على نفسك وتتغرب
لأنه هناك راح تواجه بعض المتاعب

 

[Mansoury]

اممممم امريكا ما ادري وشو نظامها
بس كتجربة شخصيه بالابتعاث :

" اول شي لازم تستخير ربك وتاخذ رأي أهلك واقاربك اذا شفت ان شاء الله انهم واثقين فيك وعارفين انك قدها ان شاء الله فتوكل على الله , حدد التخصص اللي بتدرسه اول ما تقرر وحاول تجمع اكبر قدر من المعلومات عنه وعن الجامعه اللي بتدرس فيها , اذا كان في اشخاص غيرك بيطلعون معك على نفس الجامعه اللي بتدرس فيها فتعرف عليهم و حاول تصاحب الطيب فيهم بس ان شاء الله يطلعون كلهم طيبين , طبعا انت بتروح لبلد غريب عن بلدك فالاحسن انك تعايش اهل البلد على القوانين اللي هم عايشين عليها طبعا انا ما اقول لك انك تنسى عاداتك وتقاليدك ولكن انك تلتزم بقوانينهم بتتجنب المشاكل بإذن الله , لاتستبعد انك تتعرض لمضايقات بس لا تعطي لها بال وخلها كان ولا شي صار , ونصيحتي الاخيره لك حط الله بين عينيك وحافظ على الصلاه وان شاء الله بتفلح بدنياك و أخرتك "

الاخ Mars ما شاء الله عليه بعد ماقصر و ما حبيت اعيد الكلام اللي قاله
واتمنى لك ان شاء الله التوفيق :

 

[The Bloodstains]

بما أن الموضوع انفتح عن الدراسة بالخارج بس حبيت اسأل عن فرص قبول الأجانب في معهد ماساتشوستس للتقنية (MIT) وخاصة السعوديين لأني وبصراحة ناوي اقدم عليها وما امبا اخسر امالي في النهاية. يس! متفائل جداً بالقبول. xD

 

[SPIRIT X360]

(MIT)

أختيار موفق صراحه . Mit تعتبر الافضل في المجالات الهندسيه وبالتحديد الهندسة الكهربائيه والميكانيكيه

 

[Silent Shadow]

كويس إن الموضوع انفتح خاصة إني بالسنة الأخيرة بالمرحلة الثانوية واحتمال كبير انرفض بسوريا

Mansoury

بما إنك بألمانيا فكيف الوضع هناك من ناحية التأقلم واللغة ؟ كيف مستوى الجامعات بشكل عام ؟ كيف الوضع بالنسبة لمسألة التكلفة بالمعيشة خاصة إني لو رحت ما بروح عن طريق بعثة ؟ كيف تعامل السكان معك كعربي ؟