للدكاتره أو اللي عندهم خبره .. تكفون هنا شوي

[إحساس]

سلام عليكم

ماودي أطول الموضوع وأقول قصة حياتي .. لكني إنسان مصاب بمرض القولون الله يبعده عنكم .. القولون الهضمي ..

القولون كان موجود فيني من زمان .. وكنت ناسيه بالمرة .. تمتعت بحياتي وكان الوضع طبيعي جداً وماكان القولون يتأثر بشكل كبير إلا بالسنة مرة ..

جلست على هذا الوضع فترة طويلة .. لما وصلت لحالتي الحالية بعد تقريباً أربع إلى ثلاث سنين من الحالة الطبيعية .. بصراحة الأمر تغيّر كثير .. الوضع تأزّم أكثر وصرت الحين مجبور أني آكل جبن وكاس مويه حرفياً .. أو رز أبيض .. أو بيض مسلوق .. فقط لاغير .. والمشكلة مو بالأكل وبس .. المشكلة بالحالة النفسية في البيت وبالجامعة .. قبل أمس أعتذرت بنص المحاضرة وطلعت لإن حالتي كانت سوبر سيئة في ذيك الوقت .. وأنتم تعرفون مريض القولون إذا القولون شب عليه كيف تصير حالته .. من دون شرح تفصيلي للوضعية ..

الكثير قاعد يقترح علي علاج .. ناس قالولي لاتفكر " أنا ماني عارف إيش هذا العلاج المستحيل صراحةً " .. وناس قالولي علاجك الوحيد أنك تترك الأكل اللي يضرك .. وناس قالولي أن القولون أساساً هو عين .. وعلاجه هو القرايه ..

ماني عارف أصدق مين .. أنا في حالة سيئة والحمدلله أن العطلة قربت علشان أقدر آخذ وقتي بالعلاج بالفترة الجاية .. ياليت أي شخص جت له تجربة في هذا المرض يعطيني أي شي ممكن يساعدني .. لأني فعلاً في وضع جداً سيء ..

 

[Al Pacino]

ماقدر أفتيك يافهد بس أتمنى لك من كل قلبي الشفاء العاجل والسلامة .. ان شاء الله تعدي على خير.

 

[s3rorh]

الله يبعد الشرع عنك إحساس

للأسف صديق عمري ... زف لي خبر من أسابيع بأنه يملك نفس المرض ... وجداً حزنت من هالشي .. وقال بأنه لا يوجد علاج لهالمرض لأنه الشغله شغله نفسيه وبس !!

وقال بأنه اذا الواحد يبي يحس بتحسن ( وليس الشفاء ) لازم يبعد عن الأمور ألي تخليه يزعل أو يتوتر ... علشان ما يشّب عليه القولون

والله يشفيك ويشفي الجميع يا رب

 

[alakafi]

الله يشفيك

لكن هل الي يصيبه وجع في القولون شديد مرة في عمره يعتبر مريض بالقولون ولا ينتبه لنفسه .. ارجو التوضيح

 

[Naserano]

الله يعينك ويشفيك ):

معلوماتي الطبية صفر على الشمال الشرقي بس راح اقول اللي شفته حولي بحكم إن القولون هذا بالذات موجود مع ابوي الله يحفظه ومن فترة طويلة بعد .. وبيني وبينك إلى الآن على الحبوب المسكنة فقط لا غير ! ما يواجه مشاكل مع الحميه وما إلى ذلك لكن أهم شيء إنه ما ينسى الحبوب المسكنة .

واعتقد مثل ما قالك صعرورة , المسألة نفسية بالمقام الأول .

مرة ثانية كلامي ممكن يكون معرّض للخطأ أكثر من الصواب ....


بانتظار دكاترة المنتدى يدلون بدلوهم

 

[Mesho360M]

ألف لاباس عايك يافهد
مدام قلت ان اللي معاك قولون هضمي ابتعد عن الحراريات في الاكل والبهارات والقهوة والحليب نهائيا ابعد عنه وابعد عن الاكل وانت زعلان والدهون

ويقولون اليانسون طيب للقولون ومهدي للاعصاب

والله يشافيك

 

[Primal]

القولون عموما يشب لما تعصب وتنقهر ومن البهارات والاكل الحار والدسم والقهوة العربية خصوصا(فنجال واحد ما يضر غالبا) وطبعا الكلام هذا مو جديد عليك

انا اغلب عائلتي مصابين بنفس حالتك لكن الي كانت حالته مزرية فعلا اخوي وكان احيان يطرش دم الله يكرمكم
فكان لما ياكل رز على طول كاس يانسون او شاي اخضر بعد اي وجبة دسمة

كمان احتمال كبير تكون عين والعلاج الديني شىء اساسي سواء كانت عين او لا

او انك تروح لطبيب تغذية وتساله وهو بيعلمك بكلل شىء
الغالب انه بيعمل لك تحليل دم وبواسطة تحليل الدم راح يقول لك ايش يناسب وايس الي لازم تبعد عنه
وكمان ما يمكن يمنعك من كل شىء
يقدر يسمح لك بكثير اشياء ثانية حتى ولو كانت دسمة
لكن لها طريقة معينة في الاكل
بعد مدة او على حسب حالتك راح يضع لك حمية
ايش فائدة الحمية؟الغالب انك تعاني من سوء هضم والحمية هذه راح تنضم الهضم في جسمك وراح تخف عنك اعارض القولون بشكل كبير لكن ما راح ترجع مثل زمان (طبعا مو ترجع لاهمال زمان راح تستمر على حمية معينة اقل حصرا من حمية تنظيم الهضم عشان تستمر على وضعك)
كمان الحمية هذه تخفف من الامساك والاسهال وصعوبة التنفس والصداع والحرقان وكثير من اعراض القولون الاخرى

ممكن اغلبكم يقول كلامي تخاريف لكن انا تعايشت مع الامر هذا من عرفت نفسي لذلك عندي خلفية بسيطة عنه

هذا الي اقدر اساعدك فيه تقريبا

ما تشوف شر طهور لا باس

 

[53]

انا فيني قولون عصبي، يعتمد على الحاله النفسية، والحمدلله نادراً ما احس فيه. البعض يفكرون القولون نوع واحد. بس القولون الهضمي علاجه صعب ويحتاج بالغالب جراحه او حبوب على مدى طويل. الردود هني ما راح تريحك. راجع دكتور "محترم" بأقرب فرصه ممكنه.

والله يشفيك يارب.

 

[NESTA]

ماتشوف شر ان شاء الله .... انا عندي القولون مثلك تماما , بسبته اضطريت اترك وظيفتي السابقه مع ان راتبها ضعف راتب وظيفتي الحاليه

للاسف ماله علاج جذري لكن حاول تبتعد عن بعض الامور

الزعل والقلق - الاكل الحار والدسم

فيه عندك شراب الصبار ممتاز جدا جدا جدا .... تشرب منه كل يوم بياله راح ترتاح كثييييير

وسلامه تسلمك

 

[Mute City]

جرب الحجامه

 

[Netero]

الوالد من عرفت نفسي وعنده قولون والوالدة ايضاً , الوالد ياكل احيناً اكل دسم بس ما يكثر فما يأثر عليه والوالدة دائما تاكل اكل حار ودسم وما سأثر عليهم , بس الالم ما يجيهم الا اذا عصبوا او زعلوا فحاول انك ما تعصب وتبتعد عن الاشياء اللي تزعلّك

وما تشوف شر

 

[m5050]

اي اكل تشوف انه يضرك اتركه ، حاول ما تعصب ابداً ولا يرتفع ضغطك

واقرأ هنا مره مفيد وخاصه شرب البابونج
www. ar.wikipedia.org/wiki/متلازمة_القولون_المتهيج

 

[SAM]

نفس الشيء الوالد بعد عنده قولون للاسف , ! الاكل يآكل عآدي وكل حاجه لكننَ يحاول قدر الامكان يبتعد عن الاشياء الي تتعبه او تخليه يعصبَ !

 

[Vorg Zangief]

ليش ماشي على كلام الناس و ما رحت لدكتور ؟
ياخي روح اقرب مركز صحي و خله يحولك للمستشفى و ان شاء الله تحصل نصائح مفيدة اكثر مليون مرة من انك تسمع كلام فلان و فلنتان
انا ابوي مثلك . و فعلاً هو يبتعد عن الاكل اللي يزعجه و بس
و اتمنى لك الشفاء العاجل

 

[قناص]

أنظر للجانب الإيجابي .. القولون أفضل من السكر أو الضغط كونه ما يترافق مع مضاعفات مع الزمن

أعرف ناس واجد عندهم القولون .. من أهم أسباب تعب القولون الحالة النفسية السيئة إذا تعاني من هالشيء

فيه حبوب مهدئة للأعصاب لمن عندهم هذا المرض ..

 

[إحساس]

الله يعطيكم العافية حبايبي على النصائح والإهتمام ..

هو مشكلتي أني أكره شي أسمه مستشفيات .. روحتي للمستشفى أقعد أأجلها لفترة طويلة .. لكن بإذن الله راح أروح لمستشفى خاص وأحاول أتواصل مع الدكتور دايماً بالعطلة القريبة ..

 

[SAUD~F-16]

^
اول شي,, الله يشفيك ويرفع الضر عنك واتمنى لك الشفاء العاجل, بالنسبة للموضوع المستشفى ترا اغلب الناس يكرهون الذهاب للمستشفى,, انا لو رحت لو عندي مشكلة بسيطة تجيني كأبة من المستشفى,,طبيعي
بس وانا اخوك شفلك دكتور مختص او معروف وشف وش يقولك,, وانا اعرف بعض الأشياء لأن الوالد مصاب بنفس مشكلتك ,, ابتعد عن اي طعام فيه بهارات و اي شي(سبايسي) والأكل الدسم والله يعينك لأن الموضوع مو بسيط لأن راح تشوف ان اغلب الأطعمه راح تضرك وكذالك حاول ما تعصب و تتنرفز كثير,,, وطهور ان شاء الله

نصيحة لكل الشباب,, امراض مثل القولون الهضمي والبواسير وغيره من الأمراض الي تصيب الجهاز الهضمي منتشره كثيرا عندنا والسبب؟ سوء التغذية والأكل الحار
انا ملاحظ كثير من الشباب مستحيل يتغدا بدون شطة ومستحيل ياكل بطاطس غير الحار وكذالك البروست لازم (حراق)..للأسف وانا منهم,, المهم الواحد يقلل من الأكل هذا اذا كان يخاف على صحته

 

[Jonas]

و عليكم السلام و رحمة الله ، اتمنى لك الشفاء العاجل و نصيحتي لك انك تروح لدكتور احسن من انك تاخذ معلومات ممكن تكون غلط و على حساب صحتك

 

[Double T]

الله يكون في عونك .. راح اعطيك نصيحة كوني طبيب و كوني مصاب بالمرض كمان

زي ما نصحوا الشباب الله يجزاهم خير الافضل انك تتابع مع استشاري امراض الجهازي الهضمي لسبب مهم و هو تشخيص القولون العصبي عادة يكون بعد اقصاء كل الامراض الي ممكن تصيب الانسان بنفس الاعراض و ذا الشي مهم جذا لان بعض الدكاترة يتساهل في تشخيص اي واحد بالقولون العصبي و هو مصاب بامراض ثانية .. بعض الدكاترة ينصح انه ما يشخص اي مريض يالقولون العصبي الا بعد عمل فحص بالمنظار للقولون و التاكد من انه سليم

نصيحة عامة و لا تغني عن زيارة الطبيب لا تكثر من الاكل الدهني و الاكل الحار و البقوليات او اي اكل يسبب بزيادة في غازات البطن .. و انت اكيد تعرف الاشياء الي تهيج القولون عليك فابتعد عنها

شخصيا ما خف عني الا بعد ما تخرجت من الجامعة و بعد الزواج ( ) و بعدت عن الضغط النفسي

و اي استفسار انا حاضر

 

[Primal]

الله يعطيكم العافية حبايبي على النصائح والإهتمام ..

هو مشكلتي أني أكره شي أسمه مستشفيات .. روحتي للمستشفى أقعد أأجلها لفترة طويلة .. لكن بإذن الله راح أروح لمستشفى خاص وأحاول أتواصل مع الدكتور دايماً بالعطلة القريبة ..

لا تاجل اخ احساس من كلامك انك واصل مرحلة حرجة لا تضيع زيادة وقت وروح احجز لك موعد في اي مستشفى
راجع لك باسم كم مستشفى جيد(اخاف القوانين تمنع+مب شرط يكون مستشفى كبير)

 

[إحساس]

صراحه مدري وش أقول .. أنا خجلان كثير وماني عارف كيف أرد لكم الجميل .. الإهتمام الكبير اللي لقيته بالرسايل الخاصة وبالموضوع هذا لايوصف .. ألف ألف شكر على إهتمامكم .. إهتمامكم هذا غالي علي كثير وماراح أنساه ..

 

[Spartan-A34]

ما تشوف شر يا فهد و اكيد بيكون فيه اهتمام كبير بالموضوع احنا منك و انت منا

 

[MAX9009]

الله يبعد عنك كل شر يا فهد والف سلامه عليك والافضل زي ما قالوا الشباب تراجع دكتور و الله يكتبلك اللي فيه الخير ويرفع عنك

 

[Dark soul]

نصيحة لوجه الله ، اهتم بنفسك و رح للمستشفى و افحص نفسك !. احد معارفي توفى قبل فترة قريبة بسبب انه كان يعتقد ان الي فيه قولون، و الله يرحمه ما كان يرضى يروح المستشفى. لكن طلع الي فيه شي اكبر الله يبعدكم عن الشر .. و توفى بسببه.

رح المستشفى ولا تهمل نفسك.