طالب ثانوي ووظيفة صيفيه

[~ Brook ~]

السلام عليكم ورحمة الله وبركاته
-
بابدأ بالموضوع سريع :happy: ..
أنا طالب ثانوي , كم شهر وأكون دخلت 17 .. وماعندي راتب أو دخل يجيني شهريًا
عندي أشياء كثيرة محتاجها .. ألعاب , أجهزة , جوّال
وأبحث عن وظيفة في الخبر, مستعد أتوظف أي وظيفة
بس لازم يكون دخلها حلو شوي < طرار ويتشرط
فيه أحد عنده أي معلومة أو فكرة عن توظيف طلّاب الثانوي .. أي شيء ممكن يساعدني ,
-
شكرًا

 

[The Doctor]

على ما أعتقد جرير يوظفوا..

 

[s3rorh]

اذكر مره قريت ... بمكان ما بالسعودية يوظف شباب بعمرك .. هالمكان يطلق عليه بـ ( دكتور كيف )

للأمانه أو ما قريت الأسم .. حسبته شي له دخل بالطب .. ولا مستشفيات ... ولا مكتب إستقبال بأسواء الحالات ... و لكن تبين لاحقاً بأنه دكتور كيف = مقهى معفن إذا ما خانتني ذاكرتي :laugh:: .. شوفه .. لعل وعسى تتوظف فيه

 

[Jonas]

على ما أعتقد جرير يوظفوا..

اتذكر مره قدمت على وظيفة في جرير , ردوا علي بعد 5 شهور! تأخروا لدرجة اني نسيت اني قدمت على الوظيفة اساساً!

روح لد.كيف و ستاربكس و اطلب منهم ابلكيشن الوظيفة

 

[T i d u s]

ما أبي أسبب لك إحباط لكن شهادة ثانوية + شغل مؤقت + راتب حلو (حسب كلامك) + ما فيه واسطة .. كل هذا في بلد ثلث شبابه عاطل، صراحة صعبه شوي

 

[إحساس]

شوف .. إذا كنت تفكر بـ " الدخل " فصدقني ماراح تلقى شي .. أنت في النهاية طالب ثانوي فـ ماراح تلقى دخل محترم بالنسبة لك ..

عموماً .. شي جميل جداً أنك تفكر بالشغل بالوقت الحالي .. مو علشان تشتري ألعاب أو جوالات وبس .. لا .. خل تفكيرك أبعد من كذا .. ياما وياما شفت موظفين سعوديين في مكتبة جرير في فروع كثيرة ودايماً أتناقش معهم عن الألعاب وعن طبيعة شغلهم .. أغلبهم بدأو من الصفر في المرحلة الثانوية .. وصارو في عمر الـ 25 أو 26 " مدراء " فروع ويستلمون راتب شهري مايقل عن 8 الآف ..

طبعاً أنا ماعندي معلومة عن الأماكن المتوفرة للشغل بالوقت الحالي .. لكن حبيت أثني على الخطوة اللي تفكر فيها .. بصراحة أنا ندمان أني ما أستفدت من المرحلة الثانوية وضمنت لنفسي مستقبل جيد من ناحية شغل " إحتياطي " يخليني أخطط وأطبق صح في المستقبل .. أنت في النهاية لما تتخرج من الثانوي ماراح تلقى لك جامعة تقبلك بسرعة يمكن .. وبرضو لما تتخرج من الجامعة يبغالك وقت على ماتنقبل في وظيفة .. وأن كانك وظيفة شركات وتبغى وظايف حكومية برضو يبغالك وقت على بال ماتنقبل فيها .. فـ أنت بهذي الحالة يحتاج لك شي " إحتياطي " بحياتك علشان تضمن نفسك قبل كل شي ..

فكر أبعد من كذا .. والله يوفقك حبيبي ..

 

[ESRB]

ليش ماتسجل في التدريب الصيفي بأرمكوا ؟

تستفيد تعليم ومكافأه اعتقد انها بحدود 2500 ريال

 

[BioHazard]

حتى انا ابي ادور لي شغله في جده ولا يهمني الدخل ابداً بس احسن من القعده في البيت

 

[Mute City]

بالنسبه لوظايف الطلاب الثانوي عندك مكتب العمل يدبر لك وظيفه

بيتزا هت , مكاتب جرير , أسواق المزرعه , الدانوب , الرايه , بن داود , طوكيو , وفي شركات كثير توظف لكن عليك بمكتب العمل هو يحل مشكلتك
جاب لاصحاب وظايف صيفيه في الاماكن الي ذكرتهم لك =) وبالتوفيق لكن الله يعينك على الراتب ساعات يبتكرون عليك أعذار بس مشي حالك
أصحابي إشتغلو شهر ونص في بيتزا هت واحد مداوم وواحد يغيب يوم كل إسبوع الي مداوم أعطوه 900 ريال من أصل 1500 والي كان يغيب يوم في الإسبوع اعطوه 600 ريال
مو بس الصيف حتى في إجازة الحج تقدر تتوظف في حملات في مكه مدة أيام الحج يعطونك 1500 ريال لكن لما أصحابي جو يستلمون الراتب عطوهم 1000 ريال يقولك لاسباب
فحاول توقع عقد معاهم بالمبلغ

 

[Painkiller Q8]

لو انك في الكويت تتوضف وانت تضحك !!

في الصيف عندنا قانون ان الشركات والمطاعم والكافيهات والمحلات الرسميه...الخ .. الحكومه تجبرهم يوظفون طلبة الثانوي والجامعيين الي ماعندهم كورس صيفي
طبعا وضيفه طول الصيف فقط وليست دائما ...
والصيف الي فات صديق اخوي توضف في مطعم ايطالي وكانو الشباب يروحون هناك وهو بنفسه يقدم لهم الاكل ... طبعا يقول اكتسبت خبرات في الطبخ وياكل هناك مجانا :laugh::

وانا دايم اشوف شباب في الكافيهات والمطاعم والمحلات .. واستغرب انهم كويتيين .. لين عرفت ان الحكومه تجبر الشركات بتوظيفهم في فترة الصيف وطبعا هذا شيء رائع واتمنى اني اشوفه في الخليج كله !

الهدف ان الشباب يستغلون وقت الفراغ في شيء نافع ومتعه في نفس الوقت !

 

[Al Pacino]

زي ماقالو لك الشباب .. على بداية الصيفية مكتب العمل يتسقبل طلاب الثانوي والمطلوب منك تعريف من المدرسة + صورة لبطاقة الاحوال .. ويسألك الموظف عندك شركة معينة تبي تروح لها ولا هو يختار لك بشكل عشوائي والشركة الي تروح لها غصبن عنها بتوظفك ولا بيجيها غرامه " حتى بعض الشركات تقول للطلاب بنستفيد من اسماءكم ومايحتاج تداومون وبنعطيكم نص الراتب شهريًا " .. الراتب المتعارف عليه هو 1500 .. يقل او يزود حسب الشغل والشركة.

 

[Sonata]

ليش ماتسجل في التدريب الصيفي بأرمكوا ؟

تستفيد تعليم ومكافأه اعتقد انها بحدود 2500 ريال

اولا انتهى موعد التسجيل
ثانيا النسبة لازم تكون اعلى من 98% عشان تنقبل
ثالثا حتى لو سجل ف له فرصة تسجيل وحدة و اذا فاتته راحت عليه
و رابعا التسجيل لاول و ثاني ثانوي بس .

 

[JOKER MASK]

@بروك : رح غرفه التجاريه حقت الدمام او غرفه الخبر بتلقى هناك شركات توظفك

عندي رابط لموضوع في منتدى ثاني اذا يسمح احطه هناء عشان يستفيد الكل ؟

وعشان اخلاص النيه بحطه لك في ملفك الشخصي اذا كانت اجابه ادارة تروجمينج تمنع للي يبيه يقدر يطلع عليه في ملف بروك وفيه وظايف جامعيه + ثانوي طبعاً كلها صيفي

 

[xz995]

سؤال: اللي ثالث متوسط وداخل ثانوي يقبلونه في الوظائف الصيفية حقت الثانوية؟