بالنسبة لتصميم الشخصيات فالمسألة كانت متفاوتة ، ماحبيتش تصميم جوسكى فى البداية خصوصا شعره ( و إن كنت اتعودت عليه مع الوقت) و نفس الكلام بالنسبة لشخصيات تانية زى تمامى و شيجى بس فى المقابل معظم الشخصيات التانية كان تصميمها جيد بالنسبة لى
بالنسبة للستاندات فى العمل فاللى لاحظته إن معظمها كان ليه نفس الطابع العام (الستاند الشبيه بروبوت سواء صغير أو كبير) و مافيش درجة التنوع اللى كانت موجودة فى الجزء اللى قبله و دى نقطة ماحبيتهاش
العمل بيبدأ بمفاجأة و هى إن جوسكى يبقى ابن جوزيف و دى بصراحة نقطة كان صعب تقبلها
بس بعد تجاوز النقطة دى الأحداث بتبتدى و زى ما قال
@abdullah-kh العمل مبنى على فكرة إيه هايحصل لو ناس عادية بقى عندها ستاند
على عكس البارت الثالث و اللى كل الناس بقى عندها ستاند فيه فجأة العمل هنا حاول يدى تفسير منطقى لحصول الناس على الستاند و هو السهم ، فكرة السهم فى حد ذاتها مش سيئة كتفسير بس المشكلة تبقى الإحساس إن الفكرة تم إضافتها بدون إهتمام حقيقى لتصحيح غلطة خصوصا إننا فى الآخر مش هانعرف أى حاجة عن طبيعته و أصله
بالنسبة للأحداث نفسها فكانت مقسومة لجزئين بالنسبة لى
الجزء الأول يبقى المواجهات المتفرقة مع ستاندات كيشو و اللى بتديك فكرة عامة عن الشخصيات فى العمل و جوه العام
بالرغم من إنى ماحبيتش تصميم جوسكى فى البداية و كنت قلقان من تكرار موضوع التعليق على شعره إلا إن نظرتى لشخصيته اتحسنت مع الوقت ، الشخصية بتديك الإحساس إنها بشرية على عكس جوتارو و بصفة عامة كانت جيدة و إن كنت ماحبيتش استعداده للغش للحصول على المال و اللى ظهر فى أكثر من حلقة بس فى المجمل كان أحسن بكثير من اللى توقعته
برضه قدرته كانت مميزة و مناسبة جدا لعمل بيدور فى مدينة عادية وسط أشخاص عاديين ، كون إنك تقدر تصلح أى ضرر مادى هايسمح بإنك ترجع كل لحاجة لطبيعتها و الحياة العادية فى المدينة هاتستمر بدون مشاكل و لولا القدرة دى المدينة كانت هاتبقى ساحة حرب
نقطة معينة كنت خايف منها و هى الشخص اللى أنقذ جوسكى و هو طفل، بصراحة كنت قلقان من إنه يطلع جوسكى بعد ما رجع بالزمن و ده يدخلنا فى Time Paradox بس سعيد إن العمل مادخلش فى النقطة دى
بالنسبة لباقى الشخصيات فالعمل كمل على أسلوب البارت الثالث بإن البطل يواجه شخصية ما و بعد كده تنضم له بس ده و إن كان مقبول نسبيا فى البارت الثالث لأن الشخصيات كان تحت سيطرة ديو أثناء المواجهة ، شخصيات الجزء هنا كان عندها استعداد حقيقى لإيذاء جوسكى و أصدقائه و يمكن قتلهم و مع كده بينضموا ليهم بعدها بكل بساطة كأن مافيش حاجة حصلت و بشكل غير منطقى
على سبيل المثال هازامادا أصاب عين زميله و حاول التخلص من جوتارو و بعدها قابل كويشى و مشى معاه كأنهم أصدقاء من زمان و شيجى حاول بشكل فعلى قتل جوسكى و أوكاياسو و مع كده كمل كصديق ليهم و نفس الوضع بالنسبة ليوكاكو و روهان و غيرهم (أصلا يوكاكو تبقى من نوعية الشخصيات اللى المفترض تهرب منها بأى شكل
)
لو تجاوزنا النقطة دى فالشخصيات نفسها كانت مثيرة للإهتمام و مقبولة و إن كنت ماقدرش أقول إنى حبيتها بس يمكن شرح كويشى الزائد لبعض النقط كان مزعج
بالنسبة للمواجهات نفسها فكانت جيدة فعلا و واضح تطور أسلوب الكاتب و ثباته فى المستوى مقارنة بالبارت الثالث بس فى نقطة هنا ، فى البارت الثالث فوز الأبطال فى بعض المواجهات كان غير منطقى بالنسبة لى خصوصا مع تفوق واضح للعدو بس اللى حصل هنا العكس ، فى عدد من المواجهات الأبطال كان عندهم تفوق واضح (كفاية وجود شخص Overpowered زى جوتارو) و مع كده واجهوا صعوبات غير منطقية فى المواجهات كان ممكن تجاوزها بأكثر من طريقة
ده برضه واضح مع قدرة مرعبة زى قدرة أوكاياسو بس بالرغم من كده استخدامها فى العمل كان محدود بالرغم من إمكانياتها ، مش هاقول إن ده الوضع فى كل المواجهات بس كانت شئ ملحوظ و صعب تجاهله بالنسبة لى
رجوع جوزيف للعمل و شكله الجديد كان مفاجأة تانية ، بصراحة الوضع اللى بقى فيه كان محزن بالنسبة لى خصوصا إنه كان و مازال شخصيتى المفضلة فى العمل بس على الأقل هو مافقدش قدراته بشكل كامل و أثبت فى الحلقة الخاصة بيه إنه لسه يقدر يتصرف و يكون ليه دور إيجابى
بغض النظر عن العيوب اللى ذكرتها دى فإجمالا الجزء الأول كان جيد فعلا و زى ما قلت قبل كده حبيت جو العمل جدا و المواجهات كانت جيدة فى معظمها (مواجهة يوكاكو بالذات كانت رهيبة
) و الشخصيات و الأحداث مثيرة للإهتمام
الجزء الثانى بيبدأ مع تقديم ريمى و اللى هانعرف منها وجود القاتل كيرا فى المدينة و بعدها هتبدأ المواجهة ضده
العمل بيكمل هنا استخدام الأفكار الغريبة ، المرة دى مع تقديم الأشباح و الكائنات الفضائية (و إن كانت النقطة الأخيرة فيها شك
) و بصفة عامة حبيت طريقة تقديمهم فى العمل
ريمى بالذات كانت شخصية جيدة فعلا بالنسبة لى و حبيت دورها و ميكاتاكا كان شخصية مثيرة للإهتمام و إضافة جيدة للعمل
مستوى المواجهات فى الجزء ده أعلى بكثير من بداية العمل و كنت متحمس ليها جدا و لو أقدر كنت تابعتها كلها فى يوم واحد
الشئ المزعج بالنسبة لى فى الجزء كان هياتو ، الأطفال العباقرة فكرة مش جديدة سواء فى عالم الأنمى أو خارجه بس الشخصية كانت مبالغ فيها ، إحنا بنتكلم عن طفل عنده 11 سنة و حاطط كاميرات مراقبة فى غرفة والديه لسبب ما
، بصراحة دى شئ بيعدى الحدود المقبولة و خلانى ماقدرش استحمل شخصيته
بالنسبة لكيرا قبل متابعتى للعمل كنت سمعت إن عدد من المتابعين بيفضلوه كشرير رئيسى و ده ممكن فهمه ، سواء الذكاء الواضح أو الإصرار الغير العادى على النجاة فالإثنين خلوه المواجهة ضده تبقى صعبة فعلا بالرغم من إنه أقل فى القدرات من شخصيات تانية زى ديو (و إن كانت قدرته الأخيرة Overpowered) و ممكن افهم سبب إعجاب نسبة من المتابعين بيه، حتى بعد ما مات المواجهة ضده مانتهتش و بعدها بيدخل فى مواجهة أخيرة ضد ريمى قبل ما يتهزم بشكل كلى ، بالنسبة لى الشخصية موجود عشان تكرهها و ده شئ نجحت فيه فعلا و المواجهة ضده كانت حماسية و متعبة للأعصاب
يمكن الشئ اللى ماحبيتوش إن معظم الأعداء فى الجزء ده ماكنش ليهم علاقة بكيرا نفسه و إنما تم عملهم عن طريق شبح والده لحمايته بشكل غير مباشر و كنت أفضل لو كيرا كان هو اللى بيحرك الأحداث مش شبح والده اللى صعب التعامل معاه بجدية بس دى نقطة ممكن تجاوزها
العمل بينتهى بنهاية جيدة ، كنت افضل لو كان فى دور أكبر لجوزيف أو حل لمشكلة والد أوكاياسو و الطفلة الخفية بس إجمالا ماكنش عندى مشكلة مع النهاية و التعليق الأخير عن دراسة جوتارو عن السمك كان روعة
ستل متحمس مرة.
