ادارة أعمال .. قسم محاسبة .. رأيكم ؟

[Al Pacino]

السلام عليكم


انا الحين باخر سنه ثانوي ومقبل على الجامعه وناوي على تخصص اداره أعمال لأسباب :

1_ مش تخصص الصعب

2_ مش تخصص سهل وله مستقبل

3_ الكلية صارت علمية اخر سنتين


بس للأسف الاقي تحطيم كبير وغالبا يكون من كبار السن وكلمتهم دائما تكون " ادارة الاعمال مكتفين من 20 سنه " .. واذا ناقشتهم وطال النقاش يقولون اوكي ادارة اعمال بس لاتدخل الا محاسبة لان هي الي لها طلب كبير بالشركات .

ولي صديق يدرس بأدارة الاعمال ونصحني بها كثير .. لكنه يقول ان المحاسبة ابد ماتصلح وصعبة من وجهة نظرة

والحين انا محتار المشكلة البعض يقولي لاتدوخ راسك بالتخصص الحين انت اول شي فكر بدخول السنة التحضيرية بجامعة الملك سعود لكن المشكله السنه التحضيرية بتحصرني بتخصصات معينة وممكن بالاخير ما ارغب بـ ولا وحده منها .. السنه التحضيرية بتكون لـ " هندسة - تمريض اعتقد - علوم - ادارة اعمال - حاسب " ..

بالنسبة للحاسب فـ المادة العلمية الي ادرسها بالثانوي ابد ابد ماجازت لي ومن اكره المواد لي بأخر سنتين وأقل مادة جبت فيها بالاختبار الفصل الاول .. فـ عشان كذا انا شايلها من راسي

الهندسه اخوي داخلها ويحول رايح فيها مدرسين كل يوم وحامل له مادة بالصيفية ومنغث بس انه ما قالي لاتدخلها بس انا يوم شفت حاله كذا شلتها ايضا من راسي .


وبالنسبة للأبتعاث .. ما خش براسي صراحة اروح اتغرب عن اهلي واخوياي فترة ودراسه وبلد غريب حتى بالسعودية ماودي اطلع برا الرياض ..

زبدة الموضوع

اني افكر حاليا بأدارة الاعمال واغلب الناس نصحوني لو اني اصريت على الادارة اني ادخل قسم محاسبة لانه مرغوب بشكل كبير .. بس ابغى اعرف طبيعة المحاسبة يعني وش شغلتي بالضبط ووش الدراسه الي بأدرسها ووش طبيعة عملي كـ محاسب .. وأي نصائح لتخصصات غير ادارة الاعمال اتمنى تطرحونها لي


ادري مثل هالمواضيع كثرت هنا هاليومين بس تعرفون هنا النقطة الي بتحدد مصير حياتي كلها ولازم الواحد يسوي الي يقدر عليه عشان يختار الطريق الصحيح !


بالنسبة للميول .. دائما اسمع هالكلمة واحاول اني ابحث بنفسي وش الي احبه .. بس مالقى شي ! ما احس ان لي ميول معين ..الرياضيات ما اكرهها عشان كذا ناوي على الادارة

 

[KOTSHY]

شوف اخوي انا ما عندي اي فكرة عن ادارة الأعمال
بس بأقول لك شيء ادخل التخصص الي انت نفسك فيه ورغبتك فيه وليس الي أهلك يرغبوا فيه
هذه نقطة مهمة جدا عشان تبدع بالمجال الي تحبه

 

[emtak]

انا صار لي 6 اشهر متخرج من قسم إدارة اعمال بشكل عام اكثر مواد الإدارة نظرية وفرص التوظيف فيها كثير

لكن عندك المحاسبة افضل لكن اصعب تحتاج واحد فاهم في الحسابات والارقام

ملاحظة المحاسب يقدر يشتغل في الإدارة لكن الإداري ما يقدر يشتغل في المحاسبة

اذا اي سؤال عندك انا حاضر

 

[Mario2]

بما اني تخصصت ادارة اعمال حره واكره تخصص كان بالنسبه لي هو المحاسبه , ما انصحك تدخله ابدا الا لو انت فعلا تحبه ولك ميول في الرياضيات راح يكون فيه امكانية تبدع حتى فيه .
بالنسبه لي كانت اسوا مادة اخذتها طول سنين دراستي واسوا علامة اخذتها وسوتلي نقطة سودا بالمعدل بس يظل الميول هي اللي تلعب دور لانه فيه ناس تحب هالمجال وحتى اللي يدخلون المحاسبه يقولون انتوا كيف تتحملون الاداره ؟ لول , كل واحد وامكانياته والله يوفقك ويشرح لك صدرك في اختيار التخصص القادم ولا تنسى انها اكثر تخصص مطلوب من بين كل التخصصات حاليا في سوق العمل والقبول مرتفع باي جهه حكوميه كانت ولا خاصة .

 

[Al Pacino]

نسيت اوضح شي مهم بالموضوع .. تم التعديل باللون الاحمر

 

[Al Pacino]

ماريو - امتاك ... وش طبيعة الدراسه بالمحاسبة بشكل مختصر ؟

 

[T i d u s]

فيه معلومة مغلوطة منتشرة بين إلي ما يعرفون المحاسبة زين .. المحاسبة المالية ما لها أي علاقة بـ الرياضيات
المحاسبة علم مستقل تماماً عن الرياضيات وما يحتاج من الواحد مهارات رياضية عالية,, تعرف تجمع وتطرح
وتضرب وتقسم ؟ خلاص هذا المطلوب منك (رياضياً) !

ولي صديق يدرس بأدارة الاعمال ونصحني بها كثير .. لكنه يقول ان المحاسبة ابد ماتصلح وصعبة من وجهة نظرة

كيف يعني ما تصلح ؟ آه ما تصلح له هو ؟ يمكن
المحاسبة المالية زي أي تخصص ثاني .. إتعب عليه شوي تشوفه سهل, نم راح تشوفه ألغاز ومعقد وصعب

بس ابغى اعرف طبيعة المحاسبة

لو حبينا نعرّف "المحاسبة" نقدر نقول إنها علم تسجيل وتبويب (تصنيف) العمليات المالية للمنشأة الإقتصادية
والإبلاغ عنها في القوائم المالية .. وبشكل بسيط جداً هو العلم إلي يهتم بـ جميع الشؤون المالية للشركة, البعض
يسميه "هندسة الإقتصاد" أو اللغة إلي من خلالها نصيغ ونعبّر عن الأحداث المالية إلي صارت خلال السنة

وش شغلتي بالضبط

شغلتك كـ محاسب تبي تكون في قسم المالية والوظائف فيها كثيرة (ماسك دفاتر, أمين صندوق, في قسم التأمينات, تسجيل القيود وترحيلها)
حسب طبيعة الشركة لكن كيف بالضبط صعب أشرح لك خاصة إنه ما عندك أي فكرة عن هذا التخصص

ووش الدراسه الي بأدرسها

دراسة أكاديمية يعني راح تدرس الجانب النظري + العملي في المحاسبة .. وطبعاً المحاسبة شي جديد على الطالب
مهب زي الأحياء أوالفيزياء أو اللغة العربية وغيرها من التخصصات إلي عند الطالب المتخرج من الثانوية أساسات لها
يعني مثلاً في مادة "المحاسبة 1 / 101" كأنك تاخذ كتاب لغة عربية صف أول وقتها ما كنت تدري وش يعني أ,ب,ت ..

أي إستفسار عن تخصص المحاسبة انا موجود :/

 

[Al Pacino]

ملاحظة المحاسب يقدر يشتغل في الإدارة لكن الإداري ما يقدر يشتغل في المحاسبة

هالكلام حمسني اكثر للمحاسبة يعني اقدر اضمن قدر اكبر من الوظائف في المستقبل ..


بس كلامك يا تايدوس حطمني نوعا ما يوم قلت انها شي جديد ومالي فيه اي اساسات درستها من قبل هذا الشي ممكن يصعب مسألة الدراسه علي واعتقد ان هذا هو سبب كره الناس لهذا التخصص .. المشكله ودي اعرف فعلا الدراسه وش تتكلم عنه بس اعتقد حتى لو واحد شرح لي ماراح افهم شي على قولتك ..

 

[T i d u s]

بس كلامك يا تايدوس حطمني نوعا ما يوم قلت انها شي جديد ومالي فيه اي اساسات درستها من قبل

هذا الواقع فعلاً .. لكن ما أشوف إنه عائق في دخول القسم :nerd:

 

[غريب]

طبعا عندك تخصص التمويل بعد (Finance) مطلوب بالسوق بقوة

بالنسبة للمحاسبة ترى فيها انواع الابداعات وانواع المناصب والرواتب لان فيها شهادات مهنية قوية جدا جدا مثل ال CPA ولا ال CMA طبعا لو اخذت ال CPA تقدر تفتح مكتب قانوني ولا تشتغل بأحد شركات البق فور او تصير شريك فيها
واحد من الربع خريج محاسبة بكالوريس واخذ شهادة ال CPA السعودية ويشتغل في احد البنوك راتبة لايقل عن 22 الف وماشاءلله هو توه ماكمل ال 30

 

[Al Pacino]

طيب الشهادات ذي تكون بالجامعة ولا بعد الجامعة ومن معاهد حكومية ولا اهليه وكم تتطلب فلوس لو انها اهليه .. مع ان باقي لها كثير بس كـ زيادة معلومات ..

 

[Al Pacino]

شباب سؤال مهم جدا : .. هل اذا جيت اقدم على جامعة الملك سعود سنة تحضيرية .. بالنسبة للثانوي يشوفون نسبتي بس ولا يشوفون درجاتي بالمواد العلمية !!؟

 

[Mute City]

^
أهم شي عندهم النسبه أعتقد الكليه الوحيده الي تطلب منك درجاتك في مادتي الرياضيات و الإنجليزي هي الجيبل
+
أنا أقولك ومن تجربه شخصيه لاتدخل تخصص إنت ما ترغبه ولا تدخل تخصص علشان والله فلان قالك إدخل ولا أبوك جالس يضغط عليك ويقولك إدخل
رواتب مضمونه ووظيفه وما إلى ذلك وفي النهاية تتفاجأ إنك قرفان وتبغى تخرج وإذا جيت بتسحب شوف الهجوم الشرس من الأهل إنت غبي إنت مو حق دراسه شوف ولد عمك شوف أخوك
شوف فلان شوف علان عقلك في راسك تعرف خلاصك وتضرب فيك الدنيا وتجلس في حيره

نصايحي لك :
1- إنت إيش ترغب ( إذا ما تعرف ) حاول تعرف
2- إستخير ربك لو كان عندك عدت خيارات
3- لا ضير من مشورة الأهل في التخصصات الي إنت إخترتها ( إنت مثلا متحير بين هندسه كهربا و هندسه كيمياء ) مافيها شي إنك تشوف وتستشير
4- لا تخلي الناس هي الي تمشك : )

شوف موضوعي يمكن تستفيد من ردود الأعضاء هناك ويقولك تعلم من أخطاء غيرك : )
http://www.true-gaming.net/boards/showthread.php?t=20496

 

[Al Pacino]

همم اخوي زي ماقلت بالموضوع بالنسبة للرغبة فـ انا ماعندي شي ارغبة وودي فيه مره ! .. بينما فيه اشياء اكرهها وهذي قاعد اتحاشاها .. زي الطب والهندسه .. فـ ادارة الاعمال بما اني ماكرهها وحاس اني بحبها مادري ليه خاصة اني ما اكره الرياضيات ابدا فحاس انها هي مستقبلي .. والحمد لله مو هذي مشكلتي وانا خلاص ان شاء الله بأتجه لأدارة الاعمال بس فيه كم شغلة شاغلة تفكيري ذكرتها بالموضوع .. تشكر على النصيحة .

 

[BioHazard]

مافي شي صعب ادخل الي تبيه وشد حيلك

 

[Mute City]

همم اخوي زي ماقلت بالموضوع بالنسبة للرغبة فـ انا ماعندي شي ارغبة وودي فيه مره ! .. بينما فيه اشياء اكرهها وهذي قاعد اتحاشاها .. زي الطب والهندسه .. فـ ادارة الاعمال بما اني ماكرهها وحاس اني بحبها مادري ليه خاصة اني ما اكره الرياضيات ابدا فحاس انها هي مستقبلي .. والحمد لله مو هذي مشكلتي وانا خلاص ان شاء الله بأتجه لأدارة الاعمال بس فيه كم شغلة شاغلة تفكيري ذكرتها بالموضوع .. تشكر على النصيحة .

بما إنك خلاص إخترت تخصصك ومو عارف إيش بالضبط تبغى عليك بالسؤال والإستشاره والإستخاره والله يقدم الي فيه الخير : )

 

[Magnificent]

اعتذر مقدماً ان كنت اعيد عليك كلام انت سامعه قبل كذا ، رد الاخ غريب مهم جداً و انصحك تتمعن فيه قبل ما تقرر تخش التخصص هذا ، و اتمنى ما تكون فكرة انك تتخصص في المحاسبة نابعة من جهلك بهذا التخصص !! لأني اعرف حوالي 5 اشخاص كلهم ندموا عليه ، و السبب انهم دخلوه و هم ما يعرفون ايش يعني محاسبة و يفكرونها على قولتك "سهلة" و في الأخير اكتشفوا انهم ضيعوا وقتهم في شغلة ما يبغون يشتغلونها ، و في المقابل اعرف على الأقل واحد محول للتخصص هذا من علوم حاسب آلي و يعشق المحاسبة و ياكل كتبها اكل و اعطيته يوم تخرج خبر عن وظيفة ممتازة بدخل عالي و رفضها مقابل عرض براتب اقل في شركة تدقيق محاسبي !! و السبب انه بعيد نظر و يبغى يكتسب في الشركة هذي خبرة و فهم اكبر للعلاقة بين المحاسبة النظرية البحتة و ترجمتها القانونية حسب القانون التجاري السعودي


المحاسبة من ناحية مستقبل وظيفي لها مسار من ثلاث :


1- دور دعم في شركة مجال عملها الرئيسي غير متعلق بالمحاسبة ، الوظيفة هنا سهلة و مباشرة و تحدياتها قليلة و مستقبلها قد يرضي الكثير من المحاسبين ، لكن ما انصح بها ان كنت ذو طموح


2- انك تعمل في مجال استشاري يستخدم تأهيلك الاكاديمي في المحاسبة لكن ما يكون بالضرورة في نفس مجالها ، يعني ممكن مثلاً تعمل لصالح جهة اعلامية كمحلل لأسهم الشركات أو ممكن يكون عملك في القطاع المصرفي ، و هذي تتفاوت في قوة مستقبلها الوظيفي حسب قوة الجهة اللي تعمل لديها و حسب قوتك انت ، و انا انصح بالقطاع المصرفي و قطاعات المال بشدة خاصة في مجالات تمويل الشركات لان مساراتها الوظيفية المتاحة في الفترة الحالية غير طبيعية ...


3- انك تعمل في شركة تقدم خدمات التدقيق المحاسبي أو التدقيق القانوني و مثل هذي الشركات مستقبلك فيها بيكون قوي بما انها تعمل في نفس مجال المحاسبة بالضبط ، و أمثلة على هذي الشركات E&Y و KPMG و Diloitte و PwC و الشركات الاربع هذي يطلق عليها اسم الـBig four ، على الاقل للوقت الحالي هم الاربعة الكبار و لا ترى الكبار يروحون و يجون ... المهم ان العمل في هذي الشركات في بدايته بيكون مقرف جداً مقابل دخل اقل من عادي !!!! و بتعيش على الأقل 50% من حياتك العملية في مستودعات و غرف ارشيف و بين فواتير و غبار و بتتعب خلال الفترة هذي من مشوارك الوظيفي ... راح تتعلم على انظمة كمبيوتر و ممكن تلقى نفسك في يوم مكلف بتعليم استخدامها لغيرك و خذ لك ساعتها من انواع الـ"ثوارة" اللي بتقابلها ... راح تعامل باحتقار و راح تعامل باستخفاف و اكيد 100% انك راح تعامل بعنصرية !!! لكن ان كنت تطمح لتطوير نفسك ما راح تطلع من هالمجال و راح تبقى فيه لاكتساب الخبرة ... و ما راح توقف دراسة بعد الجامعة و موب شرط تاخذ ماجستير ممكن تحصل بدالها على شهادة الـCPA و هذي ان اخذتها بعد الجامعة (او حتى لو بعد سنتين خبرة عملية) بتغنيك عن 5 شهادات ماستر في سوق العمل ... و مع الوقت ان اثبت نفسك و مع شوية صبر بتتحول من محاسب صغير الى شريك (يعني شريك في وحدة من الـbig four) ، و ساعتها اضمن لك ان المال بيكون آخر همك و بتتحول اهتماماتك الى امور ابعد و اكثر اهمية مثل المنافسة في السوق و رفع معايير خدمات الشركة و أعمال تطوير و غيرها ... عادةً ما يكون الشريك اللي في مثل هذي المرتبة حاصل على الدكتوراة و عشان نكون واقعيين الهدف اللي مثل كذا جداً بعيد و صعب و يحتاج مثابرة



ايضاً ، فكر في تخصص الادارة المالية او التمويل كما سماه غريب + شهادة CFA بعد التخرج و بتصير ساعتها اقوى واحد في العالم

شهادات الـcpa و cma و cfa تمنحها مؤسسات عالمية و قيمتها في سوق العمل تضاهي شهادة الماجستير

 

[Al Pacino]

و يفكرونها على قولتك "سهلة"

انا قلت سهلة -_-"



والله كلامك اخوي ممتاز ومفيد جدا واكيد بأرجع اقراه مره ومرتين في المستقبل .. بس بالنسبة للخيار الثالث الي انا استبعدته صراحة .. هل شهادة الـ cpa تغنيني عن هالمرمطة ؟ لانك حطيتها بفقرة وحده فـ هل قصدك اني بعاني من كل هالصعوبات + صعوبة الحصول على الشهاده ! .. ولا قصدك الحصول على الشهادة بيغنيني عن المشوار الصعب الي ذكرته بالفقرة الثالث ؟


وبالنسبة للشهادات الي ذكرتها بالنهاية والي تكون بعد البكالوريس .. الدراسه تكون طبعا هنا " بالرياض " ؟ + تكلفة الدراسه معقولة ؟


اضافة : انا اعتقد بالمستقبل ان شاء الله اذا جيت اتخصص بأدارة الاعمال .. ما أعتقد اني بطلع بين خياراين .. يالمحاسبة يالادارة المالية .. ماعتقد ادارة عامة لان الي عرفته ان الخيارين الي ابيهم يقدرون بالمستقبل يشتغلون بالاداره بينما الادارة العامة مايقدر العكس ..

 

[JOKER MASK]

السلام عليكم

شف انا ماني ناصحك بتخصصات غير عن المجال ادارة ولكن بوضحلك شي اي تخصص في تخصصات الادارية له طلب بسوق العمل واولها المحاسبة ولكن جميعها يبغلها مثابرة وصبر ( ويبغالها صبر اكثر بما انك بتروح لملك سعود )

ولكن حط في بالك انك ممكن يحطونك بر الرياض ( حسب النسبة و عدد المقاعد )

واذا انت مصر تبي الرياض رح جامعة الامام ( لا تخاف ترى كلية علوم ادارية الي يشرفون عليه دكاترة الملك سعود حتى اختبارات ممكن ما تجي من نفس الدكتور الي يدرسك ... اساس انت بتشوف الكتب الي تدرسها انه المؤلف دكتور في الملك سعود )

ونصيحة لوجهة الله قدم لبتعاث و خلها ضمن الخيارات اذا ما صابت اولى ولا صابت الثانية ممكن تصيب الثالثة وعلى فكره الدراسة هناك افضل من هناء بكثير ما ابي احطمك ولكن اذا ماصبت خصوصا الاولى تذكر انها خيره ( وهذي بركه دعاء يميمتك )

بالمناسبة حاول انك تسال عن معهد الادارة من خويك واسال سؤال هذا ( كيف مستقبل خريجينة مقارنة بخريجين البكالوريوس ) او اي شخص ثانية خذ فكرة عامة عنة اذا مصر تدرس بالرياض ؟ ( انا ما اعرف هل الجامعات معترفين بخريجين معهد الادارة او لا ولكن اسال هل اذا بغيت اكمل بالكلوريوس ببداء من جديد ولا ادرس سنتين ولكن اغلب انه لا تبدا من جديد مثل خريجين كلية التقنية بس اعتقد لك ابتعاث ) حقين البكالوريوس تراني ابي حرش معكم :tongue:

بالنسبة لبعد الباكالوريوس فيه اكثر من طريقة غير الي قالوها اخوان دبلوم عالي من معهد ادارة ايضا بعثة ماستر ( نصيحة لا تفكر ماستر هناء واعتقد الوحيدين يعطونك ماستر هم جامعة الملك سعود اذا تبي هناء رح الملك عبد العزيز اصرفلك ! )

 

[Al Pacino]

انا على طول تحت الملك سعود الامام .. لاني مو ناوي بعثة ابد

بس مادري يمكن اذا سمعت كلام اكثر عن الابتعاث وحسب الدولة .. يمكن افكر فيها اكثر ..

بالنسبة لخويي فهو الحين بكلية الادارة مش المعهد .. بس بالنسبة للمعهد سمعت عنه كلام طيب انه سنتين بس وتخصصين يا إدارة مستشفيات يا إدارة بنوك .. بس انها مو طموحي ابدا بما انها دبلوم ..


اما بالنسبة لبعد البكالوريس فبحاول اني ما اركز عليها كثيرا " حاليا " بما ان باقي كثير ومن الحين الى 4 سنوات قدام ان الله احيانا بتتغير اشياء واشياء !