كم التطورات و الأحداث اللى حصلت فى الحلقات اللى فاتت كان رهيييييب
😱
بداية الموسم كانت قوية بس الإتجاه اللى القصة مشيت فيه كان مختلف عن اللى توقعته و مع كل حلقة المستوى بيبقى أعلى
فى نفس الوقت كان فى بعض النقط الغير منطقية اللى ماحبيتاش و كان ممكن تقديمها بشكل أحسن
من النقط دى السهولة اللى هاكومين قدر يخدع بيها قوات البشر عشان يحروره ، القادة صدقوا كلام هاكومين بسهولة غريبة و حتى لو كانوا نسيوا موضوع أوشيو فطريقة تصرفهم السريع من غير أى تأكد من المعلومات كانت غريبة
فى نفس الوقت إذا كان العلماء فى مؤسسة هامر ما فقدوش ذكرياتهم ليه ماحذروش القادة أو على الأقل عرفوهم بموضوع أوشيو
موضوع ناجارى ماتمش البناء ليه بشكل جيد و عشان كده حسيت كأنه ظهر فجأة من غير مقدمات
فى نقط تانية بسيطة ماحبيتهاش بس بالرغم من كده ده مايمنعش إنى حبيت الحلقات بصفة عامة و إن الأحداث كانت رهيبة
😀
بالرغم من إنى ماحبيتش تغير موقف ناجارى إلا إن مواجهته لتورا كانت رائعة و تطور الشخصيتين سواء تورا أو ناجارى كان ممتاز فى الحلقة
🙂
مشاعر أساكو اتقدمت بشكل رائع و وداعها لأوشيو كان مؤثر بس أكثر جزئية حبيتها كانت مقابلة أوشيو لأمه
المقابلة اتقدمت بشكل ممتاز ، مشهد صدمة أوشيو لما شاف الوضع اللى أمه كانت عايشة فيه كان مؤلم فعلا
و مشاهد عجزه عن الكلام قصادها أو لما حاول يشيل التراب عنها كانت روعة و من أجمل مشاهد العمل
للأسف ده حصل فى الوقت اللى المشاكل ابتدت تظهر فيه سواء بين قوات البشر أو اليوكاى و الوضع ابتدى يتدهور من كل الجهات
قوات البشر وقعت فى فخ هاكومين، اليوكاى اختلفوا مع بعض ، الحاجز ابتدى يضعف و كل ده بيصب فى مصلحة هاكومين
الحالة وصلت لأسوء درجة فى الحلقة الأخيرة ، هاكومين اتحرر و ابتدى ينشر الرعب مرة تانية ، طريقة تقديم مشاهد هاكومين كانت ممتازة و قدرت تعبر عن مدى الدمار اللى ممكن يسببه بشكل رائع مع عجز تام من قوات البشر و اليوكاى و أخيرا انهيار أوشيو
😱
الحقيقة انهيار أوشيو كان منطقى فعلا بعد كل الظروف و الأحداث اللى مر بيها و حبيت إن العمل خد الإتجاه ده و ماقدمش أوشيو كشخصية مثالية مابتتأثرش بالصعوبات اللى بتحصلها
الوضع فى نهاية الحلقة كان تعريف لليأس ، و السؤال يبقى إزاى هايتم التعامل مع وضع بالسوء ده ؟
