عليكم السلام ورحمة الله وبركاته.
موضوع جميل ! بدخل في الموضوع على طول ، ببساطة عشان توصل لوزن معيّن ، لازم تحط لك هدف معيّن وتبدأ في انك تحاول توصل له ، مهما كان ايش هو هدفك.
يعني مثلاً ، حط لك هدف إنك تنزل 10 كيلو ، هذا راح يكون هدفك - سواء الأساسي أو المبدئي - وبعدها تبدأ مشوار تحقيقه ، قسّم هدفك الأساسي لعدة اهداف عشان تعطي نفسك حقها وقت تحقق تقدّم.
لازم تتحكم بالأكل اللي قاعد تاكله انت عن طريق دايت. و المقصود بالدايت هنا مو انك تاكل ربع خبزه وزيتونه ، كل مافي الأمر نظام غذائي يسهّل لك التحكم بوزنك وجسمك و صحتك ، ضروري انك ما تخربط بالأكل وتاكل أكل متنوع ومفيد.
التخفيف في الاكل بشكل عشوائي مثل فطور خفيف وغداء ثقيل والخ ، إلى جانب انك تاكل أي شيء و كل شيء و عادي مثلاً يكون عشاك فاست فود .. هالشيء ما يصلح.
لازم تحط في بالك إنك لازم تراقب الكالوريز اللي تستهلكها في اليوم الواحد ، على حسب وزنك وطولك تقدر تحدد عدد الكالوريز اللي المفروض تستهلكها يومياً.
مثلاً ، خلينا نقول إن طولك 180 سم ووزنك 100 كيلو ، و الجهد اللي تبذله قليل و حركتك نوعا ما خفيفة. فتقريباً الكالوريز اللي تحتاجها في اليوم هي في حدود 3000 كالوري.
الـ 3000 كالوري هذي هي حاجة جسمك اليومية من الطاقة. عشان تنقص وزنك ، لازم توفّر لجسمك عدد أقل من عدد احتياجك بحوالي 500 إلى 1000 كالوري - يعتمد على الجهد اللي تبذله وحاجتك للطاقة - ، هالشيء يخلي الجسم يبحث عن الطاقة من الدهون اللي متخزنة في جسمك.
هذا هو الكونسبت الأساسي في هالدايت ، اللي في الأخير بيصير أسلوب حياة أساساً. توفّر لجسمك كالوريز أقل ، جسمك يكسر الدهون اللي فيه ويقل وزنك بمعدل 0.5 كيلو إلى 2 كيلو أسبوعياً. ( ممكن في بداية الدايت أول اسبوع تنزل 5 كيلو مرة وحده ).
طبعاً لازم نحط في بالنا إن أي دايت سليم المفروض ان الرياضة تكون ملازمة له ، الرياضة مهمة جداً. الكالوريز اللي انت قاعد تقللها يومياً ضروري تساهم الرياضة في حرقها. وإلا بعد فترة قليلة راح يبدأ الجسم يكسر في العضلات وهو يدوّر عن الطاقة.
هالشيء راح يقلل من عملية الميتوبلازم ( حرق الكالوريز ) مستقبلاً ، واللي ينعكس بسوء على جسمك و يبدأ ما ينقص وزنك بنفس الكفاءة السابقة وراح يقل العضل عندك.
فإذا إنت انسان كسول وما تبي تمارس رياضة وتبغى تنقص وزنك بدون رياضة فـ لا تقلل في الكالوريز بشكل كبير ، مجرد 300-500 كالوري كافية. وبنفس الوقت لا تمارس مجهود أكبر على جسمك وتوفّر له كالوريز أقل !
ممارسة الرياضة مهمة ، راح توصلك للنتيجة اللي تبيها إلى جانب راح تنعم بـ نشاط كبير و صحتك راح تتحسن وتصير إنسان ثاني تماماً.
نرجع للأكل ، بالنسبة للأكل فحط في بالك إن كميات قليلة متوزعة على مدار اليوم افضل من كمية كبيرة على مرتين مثلاً.
اللي أفضّله صراحة هو 5 وجبات في اليوم ، 3 وجبات رئيسية و 2 سناكز ، وأهم وجبه فيهم هي الأولى .. وجبة الفطور.
مثلاً ، فطورك الساعة 8 الصباح ، الدوام متعب ؟ خذ لك سناك بعدها على الساعة 11 ، تغدّى الساعة 2:30 ، جات الساعة 5 وتحس بالجوع ؟ خذلك تصبيرة ، 7:30 عشاك جاهز ، الساعة 10 السرير يناديك.
أيوا السرير يناديك ، النوم عامل مهم في الدايت وعشان تبدأ حياة صحية وسليمة ، خصوصاً لو كنت تمارس رياضة. حاول تنام يومياً 6-8 ساعات ، ولا تنام العصر ، وإذا نومة العصر ضرورية ، خليها نص ساعة - ساعة.
+ الماء ، لازم تشرب موية كثير. راح تصفي جسمك من كيلو أو إثنين أملاح على الأقل. 5-8 كاسات موية يومياً لـ صحة أفضل. حاول تخلي مثلاً 4 كاسات موية أساسية قبل وجباتك بنص ساعة مثلاً ، تساعد في إنك تكتفي بوجبتك وما تحس بالجوع.
نجي للمهم ، كيف أعرف كم عدد السعرات الغذائية في وجبه معينة ؟ في الغالب الاكل اللي نشتريه يكون مكتوب عليه كم عدد الكالوريز الموجودة ( خبز توست - كورن فليكس - علبة تونة - جبن / لبنة - علبة فول - عصير ليمون المراعي .. الخ ).
وبعض الأحيان يكون صعب علينا نحدد لانه مو مكتوبه هالمعلومات ( نادر ) ، إلى جانب مثلاً كيف اعرف كم عدد السعرات في حبة بيض أو حبة تفاح ، او حتى في الأكل اللي يطبخونه في البيت ؟
هنا الأمر يحتاج وقت وتعوّد ، راح تبحث انت عن عدد الكالوريز الموجودة في الغذاء الفلاني بنفسك ، وراح تعرف بنفسك بعدها كيف تقيس على الوجبات الثانية وتحدد كم الكالوريز اللي فيها ، لكن الامر محتاج شوي وقت وتعوّد.
خلي هالموقع صديقك :
http://www.myfitnesspal.com/
سجل لك عضوية ، حط عمرك و وزنك وباقي المتطلبات ، كون صريح مع نفسك وفعلاً حط معلومات صحيحة لوجباتك اليومية واستهلاكك للماء. الرياضات اللي مارستها والأوقات وعدد السعرات اللي حرقتها.
وقتها راح تراقب نفسك أكثر وراح يصير عندك تحكم بنفسك بشكل ما تتصوره. فوق إن يكون عندك عزيمة انك توصل لهدفك من الأساس ، راح تنبني إرادة قوية بعد ما تشوف قد إيش انت تتحكم بكل شيء وان الأمر اسهل من ما كنت تتوقع.
أتمنى يفيدوك الشباب ويستفيدون أيضاً ، بالتوفيق إن شاء الله ، راح توصلون.
::
