الموضوع الرسمي Starfield | قد بين النجوم حاملًا آمال البشرية

[Othmane]

خلصت اللعبة من فترة بعد 120 ساعة...

مدري من وين أبدا الصراحة وادري اني ناسي اشياء كثير بس راح الخص تجربتي قدر المسطاع.

بالنسبة للقصة الرئيسية كانت مفاجأة لي بصراحة، رغم تواضع بعض مهامها الى انهم قدمو قصة محترمة وتخليك فضولي طول الوقت عشان تكملها، خاصة في الجزء الاخير.

جيمبلاي اللعبة ممتاز لا غبار عليه وما يخليك تمل ابدا منه، الاسلحة كثيرة ومتنوعة جدا وشجرة المهارات معقدة قليلا بس بالمجمل كانت مفيدة في التقدم.

مهام الفصائل كانت متوازنة، احداث وقصص جيدة جدا ومهام ملحمية! - فصيل ريوجين يخليك تعيش حياة الشركات الرأسمالية حرفيًا - ومهام فصيل كريمسون فليت و UC المشتركة كانت من افضل لحظاتي في اللعبة - ومهام فصيل UC وكأنك دخلت فيلم رعب! عجبني هذا التنوع.

الاستكشاف في اللعبة كان عادي وغير مشجع خاصة في المدن الكبيرة إلا لاجل تحصيل لوت جيد. يذكر اني ما واجهت مشكلة مع التوليد التلقائي للأحداث في الكواكب، حصلت شي متكرر واحد بس طوال فترتي في اللعب!

قتال السفن الفضائية كان ممتع جدا وقضيت فترة طويلة في بناء السفن وتطويرهم، المشكلة ما تحصل سفن الاعداء حتى تقاتل ضدهم اغلب الوقت...

حسنا... نروح للاشياء السلبية والي اشوفها اثرت على تجربتي! والي هي اللعبة ما تخليك تندمج مع عالمها ابدا، تحس نفسك دخيل او مفصول عن العالم... ادري كلامي غريب بس راح احاول اشرح.

مثلا لما تتجول في نيو اتلانتس تحس npcs مجرد صور متحركة فارغة ومحطوطين كذا بس! تطلع لهم سلاح ما يعطونك اي رد فعل، تكون لابس بدلة القراصنة ولا حد يعترض! طوال اللعبة تفاعلك محصور بين عدة شخصيات ومناطق.

واكثر شي ازعجني هو "حرق" يوم تزوجت اندريجا ما تغير ولا شي في حوارات الشخصيات والطامة يوم ماتت ولا حد منشن انها زوجتي اصلا! حتى شخصيتي نفسها يعطوه خيارات حوارية انها Friend بس! متزوج بالسر ولا وش؟ هذي أشياء المفروض تتأقلم معاها اي لعبة اربيجي بس وش نقول...

اللعبة كانت ممتازة في اشياء كثير ومحبطة في كم من جانب... لو اقيمها بعطيها 8 لا اكثر ولا اقل ولولا القصة الرائعة وبعض مهام الفصائل كانت بتكون اقل.

 

[Othmane]

في شي عجيب قاعد يصير مع New Game+ في ستارفيلد والناس الحين بدت تكتشفه!

محتوى مخفي: حرق شامل للعبة

مثل ما نعرف، اللعبة تبنت فكرة Multi universes ومع كل تختيمة راح تروح لعالم موازي آخر، و راح تحصل العالم وشخصياته الرئيسية تغيرت!

لحد الحين شفت ثلاث او أربع تغييرات عجيبة، مثل الشخصيات الرئيسية كلها ميتة، تحصل نفسك "البشرية" قبل ما تنظم للكونستليشن وتخليه من أعضاء طاقمك، تحصل والتر سترود ماسك كونستليشن بنفسه ومعاه قوة عسكرية, وذي الاخير... الاعضاء كلهم أطفال.

 

[MH MD]

في شي عجيب قاعد يصير مع New Game+ في ستارفيلد والناس الحين بدت تكتشفه!

محتوى مخفي: حرق شامل للعبة

مثل ما نعرف، اللعبة تبنت فكرة Multi universes ومع كل تختيمة راح تروح لعالم موازي آخر، و راح تحصل العالم وشخصياته الرئيسية تغيرت!

لحد الحين شفت ثلاث او أربع تغييرات عجيبة، مثل الشخصيات الرئيسية كلها ميتة، تحصل نفسك "البشرية" قبل ما تنظم للكونستليشن وتخليه من أعضاء طاقمك، تحصل والتر سترود ماسك كونستليشن بنفسه ومعاه قوة عسكرية, وذي الاخير... الاعضاء كلهم أطفال.

في حاجة رهيبة جدا اكتشفوها من كم يوم بس تتطلب انك توصل نيو جيم بلس رقم ٣٣

محتوى مخفي

بتشوف شخصيتك نفسها بعالم ثاني! وبتمثيل صوتي! وتقدر تضمها لطاقمك برضو!

 

[abdullah-kh]

 

[Valtr]

لعبتها 50 ساعة وقت نزلت وتشبعت منها وتركتها ورجعت لها قبل كم يوم وكملتها إلى تقريبًا 100 ساعة وحاولت أخلص أكبر قدر ممكن من محتوى اللعبة وأعتقد خلصت كل المهام الجانبية المهمة أو الكبيره. محتوى اللعبة كبير وأنا أشوف من وجهة نظري أن أهم شيء في العاب بثيزدا هي المحتوى الجانبي أكثر من الرئيسي والي يخلص المحتوى الجانبي وما يلعب القصة الرئيسية هو كأنه شاف المستوى الحقيقي للعبة أكثر من الي خلص القصة الرئيسية فقط. عاد المهام كثيره ومتنوعه وبعضها بأفكار ممتازه وتنضم لجماعات وحاجات مثل كذا لكن ياخي في تفاوت كبير في مستوى المهام حتى لو كانت الفكرة كويسه وبعض المهام أصلا مفروض ما تكون موجودة. المطور نسى أن اللعبة عباره عن أنظمة شمسية وكواكب لأن مو معقولة تعطيني مهمة أودي رسالة أو أجيب صندوق من مجموعة شمسية مختلفة. ليت الفكرة تكون تافهه لكن التطبيق يكون ممتع أو يصير شيء مفاجئ، لا أنت جد راح تسافر لكوكب ثاني وتلاقي صندوق مرمي عند النفايات وتاخذه وتوديه لصاحب المهمة وخلاص. حتى القوى الخارقة الي تحصل عليها عباره أنك تنزل على كوكب وتدخل مبنى وتطارد نور غريب وتقعد تسوي نفس الشيء بالضبط حرفيا في كل مره تروح تاخذ قوة من كوكب.

أسوء شيء في محتوى اللعبة قصصيا أن وقت تخلص من كل المهام الرئيسية والجانبية بمختلف أنواعها تجلس تفكر إذا كان في شخصية أو حدث رهيب علق في ذاكرتك، والصدق على لعبة ضخمة مثلها الأشياء الكويسه قصصيا قليلة جدا وكلعبة RPG غربية فشلوا كثير في هذا الجانب. أعرف أن بثيزدا أصلا فاشلين قصصيا لكن على الأقل في العابهم السابقة كان لها جو و مرات حاجات غبية تضحك وبشكل عام تتعلق بعوالمهم بشكل أكبر خصوصا أنها أصغر ومعتنين بها بشكل أكبر. و حتى لو كانوا فاشلين هذا مو عذر أنك ما تطور نفسك واللعبة بعد كانت تسوق للمحتوى القصصي وللمرافقين والي هم سطحيين ولا أندمجت معهم. اللعبة حتى كانت تسوق أنك تقدر تعيش جو صياد جوائز وتطارد ناس مطلوبين وفي النهاية اللعبة بكبرها مافيها غير نوعين من صيد ناس مطلوبين؛ وحده تدمر مركبة في الفضاء ووحده تروح لقاعدة على كوكب وتقتل الي فيها، والمهام هذي تاخذهم من جهاز يعطيك مهام لا نهائية، بمعنى ثاني مهام الصيد هذي عشوائية من الكمبيوتر بجودة هابطة ما تسوى.

أسوء حاجة في اللعبة هي شاشات التحميل والكواكب الفاضية والمكرره الي راح تشوف منها الكثير والكثير. بسبب كل هذا إحساس السفر والمغامرة والترحال بين الكواكب معدوم وحاجة رخيصة تزعل /:
تخيل معي أنك في مستعمره على المريخ وتبغى تروح لمدينة على كوكب مختلف في مجموعة شمسية مختلفة، كذا بيكون الوضع:
تطلع من المستعمره --> شاشة تحميل --> تركب سفينتك --> شاشة تحميل --> تضغط زر الإقلاع --> مشهد سينمائي مع شاشة تحميل --> أنت الآن خارج الكوكب وتحدد على المجموعة الي تبغى تروح لها عن طريق الخريطة --> مشهد سينمائي مع شاشة تحميل --> أنت الآن خارج غلاف الكوكب الي تبغاه ولازم تحدد على المدينة الي تبغى تنزل عندها --> شاشة تحميل مع مشهد هبوطك على الكوكب --> تطلع من المركبة --> شاشة تحميل

ممكن تختصر بعض الخطوات في حال أستكشفت المكان من قبل أو ما رحت سفينتك وحاولت تعيش جو. مختصر الكلام هذا أنك ما تقود مركبتك بشكل طبيعي، مافي أنك تبدأ تقلع من الكوكب وترفع العجلات أو القواعد الي تنزلها وقت تهبط وتبدأ تطير وتطلع من غلاف الجو وتبدا تسافر للكوكب الي تبغاه وتمر بكواكب ثانية وأحداث مختلفة وتوصل للكوكب الي تبغاه وتدخل الغلاف الجوي وتحاول تلاقي مكان كويس للهبوط وتنتبه أنك ما تدمر سفينتك وتنزل العجلات وتبدأ تنزل من المركبة وتعيش جو الرحلة، لا الرحلة هنا هي شاشات التحميل، بضغطة زر مع شاشة سوداء وتلاقي نفسك خارج الكوكب وبضغط زر أخرى مع شاشة سوداء ثانية تلاقي نفسك في كوكب مختلف.

أنا أستمتعت بإستكشاف القرى والمدن ولها جو ممتع ومتنوع بغض النظر عن تفاوت مستوى المهام والأشياء المثيره، لكن الكواكب ممله ونزلت على تقريباً 100 كوكب وكثير منهم كان يشبه بعض وبنفس الوقت بعضهم كانوا مميزين ولهم جو حلو خلاني أتمنى لو أستغلوهم لأن الكواكب المتشابهه والغير متشابهه يتشاركون شيء واحد وهو أن مافي شيء يستاهل الإستكشاف. كل الي بتلاقيه مبنى حق بحوث أو تصنيع وكلهم يعطونك مهام مكرره على كل الكواكب يطلبون منك تجيب عينة أو أن في مجموعة قراصنة عندهم معسكر قريب أو أن واحد منهم مجروح في كهف ولازم أعالجه. حتى في المسار الرئيسي للقصة تدخل معسكر أعداء موجود نفسه مليون واحد في مليون كوكب مختلف. الوضع مع الوقت صار فقط أنزل على الكوكب وأتفرج في البيئة والمخلوقات لكم دقيقة وأمشي لأن مافي شيء ثاني يستاهل وحتى وقت كوكب يكون مختلف عن غيره، كتضاريس تقدر تشوف أنه يشبه كثير كواكب لكن اللعبة تغير الأشجار والمعادن ولون العشب.

ذكرت بإن إستكشاف القرى والمدن كان ممتع، لكن ماني مصدق أني بقولها بس التفاعل والجو الحي الي موجود في العابهم السابقة مو موجود هنا. الNPC ما يعطون ردة فعل حتى لو تطلع سلاحك وتطلق في الجو، وما عندهم جدول زمني وتشوفهم يروحون ينامون في بيوتهم لأن في الغالب ما عندهم بيت أصلا. في ابوليفين اللعبة الي نزلت قبل 19 سنة كان ممكن تشوف صاحب المحل يقفل محله ويروح بيته ينام وتقدر تسرق المفتاح وتفتح المحل وتسرق مثل ما تبغى، أو في سكايرم تسوي حاجة مزعجة ويجونك الحراس يكلمونك أو حتى تمشي فوق طاولة وتطرح الأكل والصحون وتشوفهم يعصبون عليك. كل هذا مو موجود هنا. بتسرق شيء من محل أول مكتب شخص وتنتظره يروح؟ راح يبقى قاعد قدامك مهما طال الزمن.

يانق وينلي النسخة الرخيصة.

صح ما تقدر تقلع بالمركبة وتسافر بشكل طبيعي لكن يمديك تمشي في نطاق صغير في الفضاء وتقاتل سفن ثانية أو تشوف محطة مهجورة (حاجة مكرره) ويمكن تصادف كم حدث مثل واحد يطلب أغراض عشان يصلح سفينته(إيضا مكرره). المشكلة هنا أن سالفة أنك ما تقدر تسافر بين الكواكب يعني أن كل هذا يجيك جاهز قدامك، بمجرد شاشة التحميل تخلص راح تشوف أي واحده من الي أنا ذكرته والشيء هذا حد الإستكشاف حتى في الفضاء.
وحده من المهام حرب بين طرفين حول كوكب واحد، تعتقد أنها حاجة ملحمية وتعيش جو أسطورة أبطال المجرة مثلا؟ لا، تقاتل كم سفينة بطريقة مشابهة جدا لمليون معركة عشوائية قبلها وبعدين تسافر لمكان المعركة الثانية (شاشة تحميل) وتسوي نفس الشيء تقريبًا أربع مرات مع أن المعارك هذي كلها تدور حول كوكب واحد لكن تقدر تشوف كيف شاشات التحميل قتلت كثير من أجواء اللعبة في كثير حاجات.

نظام التعديل على السفينة ما تعمقت فيه أو بنيت سفينة من الصفر لكن أستمتعت فيه وقت كنت أغير أسلحتي وأرقيها وأستبدل المفاعل والأشياء الي تسمح لي أسافر لأماكن أبعد. تمنيت لو في تخصيص أكبر لداخلية المركبات لكن يوم أفكر فيها أكثر، مالها قيمة إذا أني أقضي وقت مع شاشة التحميل أكثر من السفينة نفسها والمرافقين الي معك ما يدخلونك جو ولا يحببونك في محتوى اللعبة قصصيا وحتى مع أن في نظام أن بعض أفعالك تعجبهم لكن ما تقدر تستفيد من الحاجات هذي بشكل حقيقي مثل أنك تدعوهم لبيتك أو شيء زي كذا و هم اصلا مملين ما يستاهلون أنك تتعمق بقصتهم و على طاري البيت؛ حتى مع أنك تقدر تشتري بيت وتزبطه من الداخل لكن خيارات الأثاث وغيرها قليلة وما تسوى التعب.
هذا كله يذكرني بأن اللعبة ما تستغل فكرة التصنيع والتطوير مع أن هذا الشيء يمكن يكون إدماني ويعطيك شعور التقدم وأنك تنجز وتصير أقوى وعاد حاولت أطور سلاح لكن المتطلبات كانت معادن مختلفة من كواكب مختلفة ولا في رابط بينهم وكل هذا عشان زيادة ضرر ما تستاهل فبطلت لأنها ما تسوى التعب كله واحتمال تلاقي سلاح أقوى من الي معك وبفارق وقت تتقدم في المحتوى الرئيسي أو الجانبي فيعني ليش أضيع وقتي؟

ستارفيلد
- خاتمة -

في سلبيات وأشياء ثانية مزعجة ما ذكرتها وحتى لو كانت أصغر من الي ذكرتهم إلا أنهم لهم أثر، وبنفس الوقت في حاجات كويسه ما ذكرتها. أعرف أن أغلب كلامي سلبي لكن لا تلوموني لأن مو هذي اللعبة الطموحة الي كنت أنتظرها. ستارفيلد أنتظرها من سنين وسبب مهم لشرائي للأكس بوكس وأتفاجئ بأنهم مخبصين في كثير حاجات. هل اللعبة مخيبة؟ نعم. هل كان ممكن تكون أفضل؟ نعم وبكثير. هل اللعبة سيئة؟ لا أبدًا ولا كيف العب 100 ساعة على لعبة سيئة؟ يوم أرجع أقرء كل كلامي أقول هذا كاره للعبة لكن الصدق أستمتعت في كثير لحظات، بس بنفس الوقت اللعبة فيها عيوب كثيره وكبيره مدري كيف طلعت منهم ويستاهلون الجلد عليها. ختامًا لكل هذا؛ أتمنى أكون جد عبرت بشكل كويس عن رأيي عن اللعبة وأتمنى بثيزدا يرجعون لمجدهم مع سلسلة TES.​

 

[retha]

ياه يا حماسي لها الي راح.
بنتظر تكتمل التحسينات الجوهرية ثم أشتريها.

 

[Othmane]

التوسعة الأولى جاية الخريف القادم...
وتحديث اسبوع الجاي راح يضيف اوضاع دقة جديدة على كونسول... يمكن نشوف 40-60 اطار.

ايضا خرائط للمدن.. : )