حساب محذوف
Hardcore Gamer
بسم الله الرحمن الرحيم
< الموضوع طويل>
المنتدي vs تويتر vs فيس بوك
علشان أوضح مزايا المنتديات لازم أبدا فى الاول بالكلام عن البدائل وايه اللى شايفه وحش فيهم علشان توضح الصورة< الموضوع طويل>
المنتدي vs تويتر vs فيس بوك
هبدأ ب تويتر لاني شايفه أبعدهم وانه مش مكان مناسب لتجمع انما افضل وملائم اكتر انه يبقي علاقة من طرف واحد يعنى شخص مع متابعين ليه يعنى سواء الطرف دا كان مصدر إخباري او شخص مشهور و سواء كانت شهرته جاية خارج المنصة سواء كان إعلامي ناقد يوتيوبر الخ أو جايه من المنصة نفسها بس هنا لازم يكون صانع محتوي يعنى مثلا حد عنده حساب بيغطي أخبار الألعاب او تسريبات او ما شابه يعني يكون مختص فى حاجة معينة فاللي هو لو حد عايز يشتهر هناك لازم اللى هو يقدم محتوي ما بشكل دائم
انما الأشخاص العادية اللى مش عايزه تقدم محتوي فدا مش المكان المناسب اللى هتشوف فيه تعليقاتهم وهو مصمم مش لكدا اصلا ف هو أشبه باليوتيوب بس الوسيلة فيه هي النص بدل الفيديو انما مش منافس او بديل للمنتديات.
شايف المشاركة في تويتر عبارة عن كأن واحد واقف فى وسط ميدان كبير فيه ناس كتير جدا بنفس تفاصيل ردود الفعل اللى ممكن تحصل . تويتر المكان المناسب لمعرفة الاخبار ومتابعة المشاهير وصناع المحتوي .
خليني انتقل بعدها للأماكن اللى تحتوي علي نظام مخصص للتجمعات اكتر وهمثلهم في فيس بوك و قليلا من الكلام هيبقي على ريديت
لسبب ما معرفهوش حتى الان الشعب السعودي مش بيستخدم الفيس بشكل كبير على عكس الشعب المصري او المغربي يعنى مش فاكر اني شفت اى جروب سعودي او أشخاص فى جروبات عربية تانية على عكس المغرب طبعا أو سوريا أو دول زى العراق و الاردن وغيره من الدول العربية يعني الهجرة من عليه كانت مبكرة جدا بالنسبة للشعب السعودي معرفش ليه ؟ حاجة غير متوقعة.. اما بالنسبة لريديت فالعرب كلهم وجودهم عليه قليل والموجودين فيه هيبقوا في ال subreddits الأجنبية ومعرفش أي أماكن عربية حلوة فيه اصلا.
خلينا نتكلم شوية عن النظام دا اللى هو تجمع مغلق يحتوي على أشخاص يجمعم اهتمام معين لو جمعت كل منصات التواصل المشابهة و سألت نفسي ايه الميزة *المباشرة* اللى موجودة فى المنتديات عن الجروبات فى الفيس او عن ال subreddits فى reddit او أي مكان مشابه الإجابة هتكون
انه هنا فى تخصيص وتنظيم وإمكانية تعديل افضل بكتير حاجة زى ان المنتديات متقسمة لصفحات مش حاجة *سايبة *على بعضها زى الفيس دى نظمت أمور كتير جدا سواء تنظيم النقاش بقي أفضل بمراحل او اني اقلب بين الصفحات فمثلا بقي أسهل بكتير ارجع اشوف المواضيع اللى كانت موجودة فى فترة معينة على عكس الفيس اللى لو غبت 10 ايام اصبح الموضوع صعب جدا اني اشوف اللى فات انما هنا الموضوع منظم اكتر سواء بين المواضيع وبعضها او الموضوع الواحد يعني دا كله يسبب ان المنتدي عبارة عن صفحات تقدر تقلب فيها.
كل الجروبات على الفيس متكتفة بالشكل والمميزات اللى موجودة فقط ولا يمكن التعديل فيها يعنى هى محصورة في الإطار المحدد فقط انما المنتديات لا. يقدر يبقي فيها اضافات او تعديلات مختلفة من المجتمع نفسه والقائمين عليه مش بتكلم عن واجهة المنتدى انما حاجة زى التفاعل نفسه فهنا هتلاقي منتدى مش عامل انه يبقي فى تفاعل خالص وفى منتدى عامل فقط انك تحط اعجبك او متحطش فقط او زى المنتدى هنا فى تنوع اكتر او منتديات اخري ممكن تضيف like,dislike و هكذا من إمكانية التعديل ولو حتى تعديلات مش كبيرة فهو الموضوع فى حرية اكبر
مثلا حاجة زى top viewed last month/ year اللى على الريديت ممكن تتعمل هنا عادي ( وهى بالفعل موجودة هنا بس عايز تعديل اكتر يعني لازم يبقي فى خيار يشيل المواضيع الرسمية) ودى تقدر تبقي إضافة للمنتدي بحيث لو انا غبت شهر مثلا أقدر اشوف ايه اكتر مواضيع حصل فيها تفاعل بسهولة على عكس الفيس حاجة زى دى مش موجودة فخلاص انا كصاحب جروب مقدرش اعمل حاجة مع انها كانت هتبقي إضافة جيدة خاصة لو مكان فيه مواضيع كتير يعني انا اصلا فى اى subreddit جديد بخشه اول حاجة بعملها هى انى اشوف الأكثر تفاعلا خلال الشهر/ العام الماضي قبل ما انضم ليه.
نقطة اخري بخصوص التنظيم وهى في اى منتدى هتلاقي كتابة اى تعليق او موضوع تقدر تتنظم بشكل أفضل فمثلا حاجة زى القدرة على عمل spoiler او تغيير لون النص او تكبيره دى حاجات مش موجودة في الفيس وأغلب المنصات فالفكرة اللي بتكلم فيها هى انه مكان منظم اكتر فيه إمكانية تعديل اكتر و دا بيتيح مميزات كتير سواء أساسية او ثانوية.
كلامي اللى فوق كله كان خاص بالبناء نفسه الخاص بالمنتديات ولكن دا بالنسبالي الحاجة المباشرة ولكن في حاجات كتير نتجت من ان المنتديات حاجة قديمة ومن العدد القليل من الناس اللى فيها و يعني دا خلي اغلب اللى فى المنتدى هما يا ناس قديمة فى الهواية او ناس عندها معرفة كبيرة فيها على عكس مثلا الفيس ممكن تلاقي جروب 50 ألف ولكن هتلاقي جزء كبير ميعرفش هو داخل ليه اصلا وجزء كبير من اللى معلوماتهم قليلة جدا يعنى كتير من المواضيع اللى كنت بشوفها كانت مشاكل وأسئلة في منها اللى افضل رد ليه هو انت دورت على جوجل الاول؟ ولكن النقاشات الحلوة فعلا دى كانت هى الاقل بكتير على عكس هنا اللى هو الحد الأدنى من المعرفة والمعلومات عن الهواية لأغلب الاعضاء عالي فدا خلي النقاشات اعلي بكتير يعني دا مكان متخصص بالناس اللى عارفه كتير فى المجال دا مش معني كدا ان مفيش معلومات غلط او حاجات بسيطة حتي مش مفهومة لان رغم كدا فى فالمقابل نقاشات قوية جدا . ( بيعجبني ان غالبا اكتر ناس بتحش فى المنتدي هما الأكثر مشاركة فيه & )
الميزة التانية هى نتجت من العدد القليل وهى ان اغلب الاعضاء عارفين بعض يعني مثلا على الفيس ف الادمنز واللى بيتفاعلوا بشكل يومي هيبقي معروفين شوية ولكن هنا ولو هتكلم عن نفسي فمش بس الإدارة والاعضاء اللى بيشاركوا يوميا انما أغلب الاعضاء عارفهم مش بتكلم ان المعرفة عبارة عن انى ابعت لحد رسالة خاصة وان حد يبعتلي انما اللى هو الموضوع دا انا عارف مين هيشارك فيه موضوع عن سيجا مستني مشاركة س موضوع عن ص مستني تعليق من ناس معينة عارف تفكير الشخص ص هيروح ازي وهكذا يعني هنا بعيدا عني متأكد أن اغلب الاعضاء عارفين بعض بشكل قوي ودى حاجات نتجت من اللى العدد القليل
وكذلك في حاجة تانية ودا مجرد اعتقاد هي ان أصبح فى تقبل اكبر و أصعب أنك تعمل بلوك لشخص معين و بقت فى اضيق الحدود اللى هو لو حد تعدي على حد مثلا ( بعيدا عن انك لو عملت كذا بلوك مش هتلاقي أعضاء &) ولكن فى مجتمع صغير زى دا لازم*تتقبل* أغلبه لانه متشارك مع بعضه بشكل أكبر لان مثلا أنت هتعملي بلوك طب ما انا اللى هنقل موضوع س هتشوفه ازي؟ ولا هفتح موضوع رسمي للعبة جديدة وأغلب الاعضاء هيتكلموا فيه ولا هرد فى موضوع بنقل تغريدة تخص الموضوع فالباقي هيكمل الموضوع من خلالها فاللى هو أنت من الأشخاص اللى بتعمل بلوك بشكل كتير بقي صعب تعمل دا هنا انما هتتقبل الأعضاء بشكل أكبر حتى لو مش بتحبهم على عكس تويتر مثلا.
لو شبهت تويتر بميدان كبير وازى انه الشخص اللى بيقدم حاجة هتبقي حواليه دائرة أكبر والمشهور كذلك
فالمنتدي زى مجلس استراحة بتتجمع فيه ناس قليلة او مقهي او ما شابه فيه عدد أقل ولكن بمعرفة اكبر فاللى هو حتى لو فى أشخاص مش بتتناقش معاها أكثر ولكن انت بتشوفها كتير جدا فأصبح فى معرفة اكتر وكمان من المميزات أن مش فارقة لو دي اول مشاركة ليك ولا لا فهي توصل للأشخاص الصح
فمثلا لسا مخلص لعبة من 2014 زى دراجون ايج وعندك حاجات كتير تقلها وهتكتب تعليق أو موضوع كامل فانت كلامك هيوصل فعلا لأكثر ناس مهتمة حتى لو دا كان اول مشاركة على عكس تويتر مثلا لازم الاول يبقي عندك متابعين مهتمين باللى هتقوله انما هنا لا تعليقك بيوصل بشكل اسرع للناس المستهدفة
اعتقد ان بعض الاعضاء شايفه أن تويتر افضل واللى هو ما كلنا نتابع بعض على تويتر وخلاص & هو تويتر افضل فعلا فى حكاية ان ممكن تعليق ما او موضوع ما يبقي عنده الإمكانية انه يوصل لعدد كبير جدا من الناس ولكن التجربة ككل وانه ازى المنتدى منظم اكتر وانه فى إدارة وانه هنا التعليق بيوصل بشكل مناسب اكتر للناس اللى مهتمة بيه يعني كلامي اللى فوق مش بس على المنتدي دا انما كتير من الكلام ينطبق على منتديات تانية حتى الحاجات صغيرة البعيدة تماما فمثلا ممكن تلاقي منتدى خاص بالدش والستالايت فيه عدد صغير من الناس بس على مستوي من المعرفة عالي و اللى هتجنيه من مجتمع صغير زى دا كبير جدا فى المجال دا حاجة زى دى مكنتش هتلاقيها دا على تويتر مثلا.
بالنسبالي المنتديات هى التجربة الأفضل وشايف انها مفروض تبقي حاجة موجودة اكتر وانه يبقي فى منتديات مشهورة اكتر فى مجالات وهوايات مختلفة وتبقي بشكل جديد يناسب الوقت الحالي.
الاقتراحات
عايز أقول إن مجهود يشكر من المسؤولين عن المنتدي انهم لسا سايبين المنتدي وكمان انه شكله جيد مش زى بعض المنتديات اللى تحس انها متغيرتش من لما اتعلمت ومش بس الشكل انما التنظيم كمان يعني فى بعض المنتديات اللى هو كأنها فولدرات فاضية داخل فولدرات داخل فولدرات انما هنا متقسم ببساطة ل3 اقسام فقط ومفيش الحاجة لتقسيم أقسام داخلية كتير مشتتة حاليا.لو سألتني ايه اكتر حاجة عايزها للمنتدي فمش هقول حاجات كنت عايزها لما كنت موجود سواء حتى حاجات بسيطة زى مثلا ان صفحة ما الجديد تبقي فيها الإمكانية علي اخفاء مواضيع الأنمي او حاجات مهمة اكتر زى إمكانية اني أمسح تعليق فى موضوع مقفول&
ولا هقعد أفكر فى افكار جديدة سواء مميزات او مواضيع تتعمل انما هقول حاجة واحدة فقط و عارف انها خارج مسؤولية إدارة المنتدى بس لانها حاجة مهمة فعلا وهى اني عايز المنتدى يبقي فيه أعضاء أكتر رغم اللى قلته على العدد الصغير فوق لكن لو عدد الاعضاء زادوا مرتين تلاتة هيبقي نفس الكلام ينطبق والمجتمع محدود لسا . يعنى من ناحية باين قلة عدد الاعضاء الجدد ( عن نفسي مش ملاحظ اى عضو جديد نشط مسجل خلال السنادي ؟) و من ناحية تانية خسارة بعض الاعضاء اللى كانوا ناشطين جدا فالمنتدى لازم يلاقي طريقة تجذب أعضاء جدد .
هل حد عنده اى اقتراح يساعد فى حل حاجة زى كدا؟
بالنسبالي اللى يساعد فى كدا معتقدش الإدارة العليا للمنتدي توافق عنه لأنه غير ضروري ليهم و هي الدعاية للمنتدي في الموقع وفي تويتر ولو مرة كل سنة
انا فاهم انهم كانوا في المنتدى بشكل نشط زمان ففاهمين ان الناس شايفين المنتديات حاجة من الماضي ولكن انا متأكد ان فى ناس تانية متعرفش اصلا ان فى منتدي للموقع وانه مختلف عن تعليقات الموقع يعنى لو شفت الأعضاء الموجودين هنا فالاغلب يا اللى هما كبار فاللى هو عاصروا زمن المنتديات لما كانت مشهورة فاللى هو ياما اصلا كانوا فى المنتدى دا او كانوا فى غيره بس لما قل نشاطه دور على منتدي زيه نشط او اللى هما دخلوا بالحظ سواء عن طريق انهم يفتحوا كل صفحة فى الموقع & او بأي طريقة اخري ولكن مشفتش ولا مرة *تقريبا* حاجة فى الصفحة الرئيسية او تويتر تعرفني أن في منتدي ؟ دا غير ان في جيل اصلا ميعرفش يعني ايه منتديات : )
وعن نفسي فى الاول كان تخيلي انه المنتدي هيبقي زى تعليقات الموقع بس اوحش كمان فاللى هو حاجة كارثية ولكن لما قلبت فيه الموضوع اتضح الوضع ( اللى عايز يذكر مثال على اضرار الحرية المطلقة للإنسان عنده مثال تعليقات الموقع و المنتدي مثال حلو&)
ومش لازم اللى هو تغريدة على تويتر ( انضموا لنا على المنتدى) لا دا مش تعريف للمنتدي لو الموضوع بايدي هروج للمنتدي ببعض مقالته يعني إدارة المنتدى لو لقت موضوع قوي تقترحه على الإدارة الاعلي يعني مثلا موضوع ولا اتنين فى السنة تتواصل مع الإدارة الاعلي وينزل فى الموقع وقبل اسم الموضوع يتكتب [من المنتدي] ويتحط لينك على تويتر كذلك يعنى تبقي على الاقل تعريف للي ميعرفش ان فى منتدي اصلا يعنى لو انا شخص فقط بتابع ترو جيمنج من خلال تويتر معتقدش انى هعرف ان فى منتدي اصلا لولا بالطريقة اللى فوق دى؟ يعنى لما اكون مهتم جدا بسلسلة re واشوف مقال قوي جدا بيشرح تاريخ السلسلة وفيه معلومات كتير احتمال اشوف المنتدى دا واشارك فيه
ودا كمان اثراء للموقع بإضافة بعض المواضيع القوية اللى هنا يعنى موضوع ولا اتنين فى السنة مثلا بس انا فاهم انهم فى غنى تماما عن الموضوع دا كله ولكن صعب ان يكون فى اقتراحات أخري بخصوص المسألة دى
