hits counter

خويي -الله يصلحه- صار يشرب! وش اسوي معه؟!

الحالة
مغلق و غير مفتوح للمزيد من الردود.

T u R k I

True Gamer
ماتوقعت اني راح افتح الموضوع بالمنتدى, لكن بما ان فيه اعضاء هنا يعجبني تفكيرهم ويعجبني اسلوبهم قررت افتحه.. والمتبعثين ممكن واجهوا هالشي ولهم بالموضوع

الزبدة السالفة هذه لها حول شهر او اكثر شوي.. وهذا شخص عزيز علي واعرفه من زمان "من الابتدائي" ودايم حنا سوى ومع بعض.. الرجال كان عاقل لكنه بدأ يخرب بالسنوات الاخيرة

قالي انه بيروح للبحرين وانا قلت اكيد وراه شي لكن ماجاء في بالي انه بيشرب.. هو الآن راح مرتين وقالي عن السالفة بعدما راح للمرة الثانية والمصيبه انه يفكر يروح مرة ثالثة بعد

المهم لما رجع من السفرة دق علي بالجوال وقام يسولف لي عن السفرة إلين قالي انه يشرب! انا توقعته يستهبل شي! لكن طلع يتكلم جد والغريب اني ماانصدمت او تفاجئت

انا تمالكت نفسي وماعصبت لأني ابغاه يصارحني ويقولي كل شي.. قالي انه ماياخذ كمية كبيرة لدرجة انها تخليه يسكر, وانه فكر بالشرب قبل مايسافر بكم يوم.. سألته علمت احد؟ قال لا. قلت ليه تقولي؟ قال لأني ادري انك ماراح تعلم وانه مايبي بخبي علي شي

اقسم بالله نزل من عيني كثيييير.. انا مستحيل افضحه عند فلان وعلان واقولهم علموني وش اسوي معه! لذلك فتحت الموضوع هنا.. لحسن الحظ انه مايدخل المنتدى لكن المشكلة انه يدري عن المنتدى ويدري اني اشارك فيه

الرجال قبل لا يشرب هو يدخن وله حول سنتين.. انا ولله الحمد ماأدخن ومااطيق اقعد جمبه وهو يدخن ونصحته يتركه بالبداية ومافيه فايده.. بس بالأخير التدخين عادة صحة سيئة والواحد بيضر نفسه وبس لكن ماهو شي عظيم زي الشرب!!

الفترة ذي ساحبين على بعض ماعاد ابي اتصل واسولف معه.. احياناً يكلمني ويقول يمكن اجي وبعدين ينشغل ويسحب! ومرات شوية كلمته عشان اقابله لأن الكلام بالتلفون ماراح ينفع, والقصد هنا اني ابي اقابله وانصحه ويعلمني عن الموضوع اكثر لكن مااظن النصح بيفيد او يغير شي والهداية من الله سبحانه

انا والله مااعرف وشلون بتصرف معاه وابي نصايحكم.. مستحيل ارجع اكلمه وكأنه ماسوى شي :\
 
التعديل الأخير:

Eye

السوسة
احيي فيك رغبتك في نصحه وقناعتك ان الهداية من الله ، والحمدلله أن فيه ناس مثلك عاقلين ، يغاروون على معارفهم من السوء

أولا في كل مشكلة -ايا كانت من اي نوع- فيه سبب ، يعني توجه الانسان هذا للشرب من اي وجهة، نزوة والا تأثير والا يجد متعة في ذا الشئ والا مشاكل
هذا أول شئ تسويه ، أنك تفهم السبب اللي يخليه يتوجه لشئ بغيض مثل الشرب عشان تعرف تدخل له

ثانيا تقابل معه في مكان وخل نفسك عادي تكلموا في مواضيع عادية ، حتى يوصل الموضوع للشرب ، بين له أخطار الشرب الصحية والإجتماعية والأخلاقية والدينية
بين له أهمية العقل ، وأن إذا تأثر بشئ صعب يرجع عنه ، وإذا نزل مستواه صعب يرجع ، يعني لو نزل ذكائه بصعوبة شديدة جدا يستعيده
بين له سوء إذهاب العقل من وجهة أخلاقية ، وأن الله كرمنا بالعقل ، وذهاب العقل حيوانية

ثالثا حاول أنك دائما تبين له أنك متضايق من ذا الشئ كثير ، وحاول تعطيه صور ذهنية عن لو عرف أحد أقربائه أو أخوياه أو اهله إيش راح يصير عله يرتدع

الله يصلحنا ويصلحه ويهدينا سواء السبيل
 

Jonas

True Gamer
لا تشغل نفسك في خصوصيات الناس فوق اللزوم ، هو بالغ و عاقل اعتقد خلاص حيلتك انك تدعي له وبس
 

persona

True Gamer
صاحبك يبي احد يسمعله ، عنده مشاعر سلبية من داخل بس ويفرغها بهالخرابيط.
 

SilentxS3ud

Hardcore Gamer
السلام عليكم

اولاً أحيي فيك حرصك وخوفك على من تحب، ولولا إهتمامك فيه كان ما نزلت الموضوع. ماشاء الله عليك قليل اللي زيك في هالوقت. ترك التناصح بين الناس سبب لنزل العذاب عليهم، قال صلى الله عليه وسلم: ( والذي نفسي بيده، لتأمرنَّ بالمعروف، ولتنهونَّ عن المنكر، أو ليوشكنَّ الله أن يبعث عليكم عقابًا من عنده، ثم لتدعنَّه فلا يستجيب لكم ) رواه أحمد.

رأيي في الموضوع إنك تتبع حديث الرسول صلى الله وعليه وسلم اللي يقول فيه: (من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان ) رواه مسلم.

لأن خويك رجل عاقل بالغ يقدر يميز بين الصح والغلط، وإذا هو صار يشرب فجأة إتبع هالأسلوب معه وإذا ما نفع، خيره بين عشرتكم أو الشراب لأنه وضاح إنها مهمة لإثنينكم من طريقة كلامك. والله أعلم.
 

Karim le BOSS

True Gamer
مستحيل صديقك يصلي و يشرب ...... بعد ما تترك شيء تترك اشياء بعدها !!

لازم تكلمه وجه لوجه و تقله اترك الشرب ..و ابدا قله سلبيات الشرب .. و عواقبها الصحيه و الشرعيه .... اذا صديقك عاقل و فاهم فراح يترك باذن الله
 

Century Wizard

Become Human
شوف , لا تسحب ع الآدمي و تتركه على هذي الحال ابداً

الشباب قالو الكلام اللي ابغى اقوله , استعمل كل الطرق معاه عشان يوقف حتى لو انزعج منك , وقف بوجهه و امنعه هذا اخوك قبل ما يكون صديقك
هو بدأ بالتدخين و بعدها سفرات و الآن شرب و بكره رح يجيب الطامَّة
 

Sultan/X

Banned
يوم شفت العنوان كنت بقلك اسحب عليه وطنشه لكن يوم شفتك كاتب خويي من الابدائيه فا اللومك لو طنشته لا تسمع كلام احد وتنصحه ترا والله خذها مني ماارح ينفع معاه النصح الشرب مثل السعاده ماتقدر تتركها عشان كذا اتخذ معاه اشياء مغيره مثل بلغ ابوه او واحد من اهله يوقفه عند حده هو تلاقيه ماخذ الوضع سيابه ومعتبره شي عادي شف هي مو مخدرات مايقدر يتركها تاكد من الشي ذا
ولا يجي يقول خلاص انا ادمنت ضروري تعلم احد لو انشالله الهيئه لا تخاف ولا تأنب ضميرك لنك سويت الشي ذا من دافع الحب لو تكرته صدقني راح يروح لـ اكثر من كذا انا اعرف ناس دخان بعدين شراب بعدين بنات بعدين مخدرات فا انصحه وحاول فيه قدر المستطاع اذا مانفع تعال بلقوه معه
 

Eng.sultan

Hardcore Gamer
جزاك الله خبر اخوي تركي على اهتمامك بصديقك وهذي هيا الصداقة (الصديق وقت الضيق ) وهو الان في مشكلة

قبل كل شي الشباب ماشاء الله ماقصروا ولا عندي زود الا ان اقلك

اتبع معاه السياسة القوه ماتنفع في هالحالات بما انو صاحبك من الأبتدائية اكيد تعرف اهلة عز المعرفة شوف من اهلة واحد يكون صبور ويكتم السر وماينفعل ويغضب ويكبر المشكلة
وحاول تحل المشكلة معاه ومن راي يمنع من السفر عشان كذا لازم احد من اهلة يكون معاك ويمنعه .

تعجبني غيرتك استمر وادعمها بالدين قليل مثلك في هالزمن الله يوفقنا واياك ومن يقراء
 

أوكازو

True Gamer
مستحيل صديقك يصلي و يشرب ...... بعد ما تترك شيء تترك اشياء بعدها !!

لازم تكلمه وجه لوجه و تقله اترك الشرب ..و ابدا قله سلبيات الشرب .. و عواقبها الصحيه و الشرعيه .... اذا صديقك عاقل و فاهم فراح يترك باذن الله
لا مب مستحيل!
أعرف ناس وااااااجد يصلون و صلاتهم من احسن ما يكون و مع ذلك يشربون!
لا يجب الخلط بين الأشياء، الصلاة من أركان الإسلام الخمسة، الشراب معصية من الكبائر
وجود المعصية لا ينفي وجوب ثوابت الدين!

+ بالنسبة لصاحب الموضوع، لا تشغل نفسك بالرجل
طالما إن الله ابتلاه فادع الله انه يهديه
بمجتمعنا إجمالاً ضخمت أشياء فوق حجمها مثل الشراب و التدخين و خلافه
ما احد ينكر إنها أشياء سيئة و ما هي حميدة
لكن الإنسان له رب يحاسبه، و ما ينبغي علينا إننا نحاسبه بأنفسنا فوق حساب الله عز و جل!
الشرع وضع حدود للأشياء هذي، إن اكتشف نظاماً وجب الحد عليه، و إلا حساب الله عز و جل ألزم له!
 
الله يهديه ويصلحه انت انصحه و حاول فيه واذا سمع النصيحه خير وبركه واذا قام يتردد ولا شي اتركه وانا أخيك هذي مع احترامي لك صحبه سيئه وابعد عنه
 

Game Time

Banned
الله يهدي صديقك آمين

مهما يكون عزيز عليك ابعد عنه لأنه مهما تنصحه ما راح يترك الخمرة ولا تحاول ان تخبر احد من اهله لأنه هيحط الحق عليك ويمكن يئذيك او احد من اهلك لأنك ما تضمن يكون سكران ولا صاحي
 
التعديل الأخير:

Wild Fox

True Gamer
لا مب مستحيل!
أعرف ناس وااااااجد يصلون و صلاتهم من احسن ما يكون و مع ذلك يشربون!
لا يجب الخلط بين الأشياء، الصلاة من أركان الإسلام الخمسة، الشراب معصية من الكبائر
وجود المعصية لا ينفي وجوب ثوابت الدين!

+ بالنسبة لصاحب الموضوع، لا تشغل نفسك بالرجل
طالما إن الله ابتلاه فادع الله انه يهديه
بمجتمعنا إجمالاً ضخمت أشياء فوق حجمها مثل الشراب و التدخين و خلافه
ما احد ينكر إنها أشياء سيئة و ما هي حميدة
لكن الإنسان له رب يحاسبه، و ما ينبغي علينا إننا نحاسبه بأنفسنا فوق حساب الله عز و جل!
الشرع وضع حدود للأشياء هذي، إن اكتشف نظاماً وجب الحد عليه، و إلا حساب الله عز و جل ألزم له!

هاه؟ الخمر ضخم فوق حجمه ؟ أم الخبائث ضخمت فوق حجمها ؟ انا اشوفها اندرريتد و لازم يضخموها كمان و كمان !
في مجتمعاتنا الكل يتكلم عن المحذور الشرعي للخمر "و هو الاهم" ، لكن محد يتكلم عن الاضرار الثانيه نفسيه\ماده\صحيه\ اوحتى على المجتمع.
لا تشغل نفسك في خصوصيات الناس فوق اللزوم ، هو بالغ و عاقل اعتقد خلاص حيلتك انك تدعي له وبس
+1
انصحه و هذا شغلك و هو بالغ و عاقل و يعرف مصلحته .
 

إحساس

True Gamer
أخوي تركي .. الناس تختلف إجمالاً .. وأنا ماني عارف خويّك بصراحة علشان أعطيك النصيحة الزينة

لكن عموماً .. الشخص دايماً عنده حدود معيّنة مايقدر يتعداها .. هذي الحدود إذا وصلها يقف عندها تماماً .. لإنه إذا أكمل أكثر من اللازم يمكن يسبب هالشي ضرر عليه

أكيد أنك تعرف حكمة " الصديق وقت الضيق " عندنا .. دااايماً يا تركي لما يكون عندك صديق وفي وتعرفه من زماااان هذا الصديق راح يثق فيك ثقة كبيرة .. وراح يعلمك أشياء ماراح يعلمها لأحد ثاني .. وببساطة تأثيرك عليه يا تركي أكبر من تأثير أي شخص آخر

فلذلك .. أنت حاول معاه .. لا تستحي من الكلام أبداً وقوله اللي بخاطرك .. حاول تهدده بصداقتك له وقوله لولا صداقته معاك لكان ماكلمته من الأساس .. وصدقني .. مافيه حياء بقولة الحق .. وفي أحيان كثيرة لما يكون الحق ظاهر قدام الناس خصوصاً من الناس اللي يحبونهم هذولي الناس يتعدلون إلى الأحسن لإنهم خايفين على هذي العلاقة ومايبغون يخسرونها

لاتستهين بصداقتكم .. حاول تجعلها السلاح اللي بصالحك واللي إن شاء الله بتستخدمها للتأثير عليه إلى الأفضل .. إدع له بالهداية والصلاح بكل ليلة وربي ماراح يخيّب ظنك إن شاء الله

لكن .. فيه بعض الناس اللي مهما إستخدمت من الطرق ماراح تنفع فيه أبداً .. هذولي وصلو إلى فئة أخرى مختلفة .. إذا وصلو إلى هذي الدرجة فأنصحك أنك توقف هنا .. صحيح أنه أحياناً الأمر مؤلم لكن .. أنت إنسان وراك مستقبل .. تبغى تبني مستقبلك بالطريقة الصحيحة وتبغى تعبد ربك وتكون راضي بحياتك اللي عشتها .. فلذلك .. لا تتعلق وتتأثر بمجرّد صديق تغيّر وأصبح إنسان سيء .. عش حياتك وإستانس وأكملها مثل ماهي .. وهو الله يعينه على حياته اللي بيتعب فيها
 

Unknown

Fake Gamer
انا من الناس اعتبر الامور الشخصيه خط احمر صراحه كل واحد يسوي الي يبي بما انه بالغ عاقل

عموما بحالتك اشوف انك تنصحه مره وتعلن رأيك بالي يعمله .. اخذ النصيحه كان بها غير كذا خلك
طبيعي .. اذا بتكثر نصايح بالطالعه والنازله ممكن تأثر بعلاقتكم الا اذ انت تبي تنهيها لهذا السبب !


قالي انه بيروح للبحرين وانا قلت اكيد وراه شي لكن ماجاء في بالي انه بيشرب
الشكوك غالبا تكون لشي سيئ .. وش كنت تفكر فيه اجل :laugh::
 

Veeto

True Gamer
قالي انه بيروح للبحرين وانا قلت اكيد وراه شي لكن ماجاء في بالي انه بيشرب

:laugh:: يا هالجسر اللي سوا بلاوي في الخليج .. تخربت سمعة بلدنا :laugh::

الشكوك غالبا تكون لشي سيئ .. وش كنت تفكر فيه اجل

خخخخخخخخخخخخ .. السياحة النظيفة :laugh::
 

Fatani Heart

مكجول سعيد ولا محنك مكتئب
شيء غريب حقاً. ذكرتني بقِصة مشابه لشخص ما الله يصلحه.

لك خيارين يا تركي بحطهم لك:
1- تِنصحه وتِتمسك بيه لين ما يحلها ربك:
أولاً شيء مُمتاز، ما دام صاحبك "مُعترف" لك بذا الشيء ومخبّيه عن البقية...
فأكيد "مُقر" أنه الّي بيسويه خطأ، وما اعترف لك إلا لأنه واثق فيك ويبغى مساعدتك وأحد يسمع له.
قبل ما يكون للتفاخر فقط -أظن- لأنه ذا السبب الوحيد ومافي سبب ثاني عشان يخبرك بيه.
"ليس عيباً أن تُخطِئ لأنك بشر، لكن الخطأ إصرارك عليه وعدم اعترافك به"

فلا تِسحَب عليه زي ما قالوا بعض الشباب، خصوصاً في ذي الأوقات المُحرجة والصعبة.
وصدقني اسوأ شعور أنك تدّعي بأنك لا تهتم بيه، وهو حقاً كل الّي شاغل بالك وتفكيرك. حتتعب.
ومع فتحك لذا الموضوع فأكيد بتفكر فيه كثير ومهموم بسببه.

مِن كلامك حسيت صاحبك "مُتردد" ما بين أنه يخسرك بسبب ذا الشيء -لذلك يتحاشى مقابلتك- وما بين أنه يترُك الرفاهيه الّي هو فيه.
"الصديق هو الشخص الذي يؤمن بك عندما تَشُك بنفسك"

بحُط أفكاري/اقتراحاتي على شكل نقاط، خذ ليعجبك وتقدر عليه واترك الباقي:
- حاول تِخبره أنك مُحتفظ بنظرتك له، وما زالت سليمة وما حتتغير أبداً بسبب ذا الشيء التافه.
وأنه حتى بسببها ما تِمنعك عن رؤية الجانب الجميل منه. "في النهاية الذكريات السيئة تتلاشى، وتبقى الجميلة"

- مرات تأتي الآيات في مواضع نحتاجها ولها تأثير في القلب، إما مُسلّيه، مُعزّية، مُحذّرة، مُذكرة ومُثبته. فانصحك تستعِن بيها قدر الإمكان.

- "لا قيمة لِمشاعرك ما لم تُعبر عنها" قول له الّي في قلبك، وخليه يدخل يشوف الموضوع حتى.
بيّن له لأي مدى أنت خائف عليه ومُقدِّره وعزيز عليك.

- حاول التركيز/الانتباه على التفاصيل وترجع للّي قبل ما صار ذا الشيء -قبل السفرية الأولى-
لأن بعض المشاكل "الكبيرة" سببها خلل "بسيط" في شيء معين، إذا بدأت من هناك امكن تِجد الحل في سبب اتجاهه للشراب.

- احرص على حُسن انتقاء كلماتك قدّامه، أوكي يا تركي رح تِجد صعوبة في البداية وصاحبك بيُسيء تفسيرها وفهمك...
بس أنت حاول تتمالك أعصابك قدامه قدر الإمكان، وحاول معاه كل مره من جديد بجلسات متفرقة. حبه، حبه. خطوة، بخطوة.
لأنك ما تدري إذا تفلّت معاه من أول مقابلة إيش بيصير بعدها امكن ما تتقابلوا من جديد.

- لا تخلّي أسلوب "إذا ما تقبلّتني زي ما أنا، فاطلع من حياتي وما بشوفك بعد الآن" يزعزع عزيمتك وإصرارك.

- ثِق بأنك إن فعلت النصيحة من أجل الله ولو القليل، سيرضيك الله بالكثير.

- خذ المسألة بإيجابية وبأن الأزمة ذي بتخليك تِتعرف على صديقك أكثر.

- ابدأها من بدري ولا تأجلها، لأن كلما أجلّتها أكثر كلما بيصير فيه تفكُك وسوء تواصل أكثر.
الفترة ذي الّي ساحبين فيها على بعض امكن بتكون أسوء فترة لما تتذكرها وممكن تندم عليها.
أنت روح واجهه بنفسك وابدأها، تلاقيه بيحط حجج لأن ما حاب يحتك فيك.

- صح الهداية من الله زي ما قلت "بس" مع فعل الأسباب يا تركي ومو تركه!

- لا تخلّي صاحبك على الأقل بعد ما يرجع لرشده يفكر "أنك بعته في أول فرصة، وأنك جحدته" تحمّله وأوقف معاه ولو قليل. وخليه يضع ثقته فيك.

- حاول دائماً تمسك نفسك في فتح موضوع المشكلة كل مره...
برضه ما تِظهر له أنك مُتضايق من ذا الشيء كثير إلا لو شفته وقتها يتكلم عنها أو وقت ما يفكر فيها.
لأنه ذا بيساعده أنه يسأم من تكرارك للكلام وامكن يصل للتمادي والعناد فقط منه.

- لا تتشدد في المشكلة وبرضه لا تتساهل معاه وأي فرصة مناسبة افتحها معه. برضه لا تحاول تراضيه حاول تماشيه فقط.

- تذكر أنه لازال فيه خير في صاحبك مهما كانت المصيبة الّي سواها. اعتبرها مجرد هفوات وتقلبات وليست نهاية العالم.

- لا تظهر له أنك داخل في أشياء ما تخصك. لأنه ذي المشكلة تخصكم الاثنين.
عموماً لا تجرب كل الحلول دفعة وحده، ممكن ينزعج منك وما يتقبلها. لأنه في ناس ما تحب تحس بالضعف وأنها بحاجة للمساعدة.

- سياسة القوة في ذي الأمور الحساسة بتزيد الأمر تعقيداً.

- أروع مافي السجود الدعاء ^^ ادعو له بالشفاء والهداية والرحمة.

أخيراً أبداً لا تستسلم وتقول أنها بتكون مضيعه للوقت والجهد، كلما حاولت كلما قربت لقلب الشخص أكثر وأكثر...
وبيحس فيك من جهة ثانية. إلا إذا بالغ في انغماسه!
==========

2- تنصحه بعدها تخبر أحد معارفه الّي له شأن وخبره وبعدها تتركه:
إذا مرّه الوضع تأزم يا تركي وخلاص ما في أمل أنه يتغير "معاك" والنقاش معه بيزيد علاقتكم سوءاً فالأفضل تتركه...
لأنه أحياناً الانسان يوصل لمراحل متقدمة من العمى، يصير يدور عن أصل المشكلة وما يعرف أنه هو بذاته المشكلة و أصلها...
التهرب من مواجهة الحقيقة ما حتفيده.

- اتركه مع إخبارك لأحد غيرك خبير/قريب عن المشكلة، كده أنت سويت كل لعليك.
- اللامبالاة والتجاهل رد قاسي أحياناً.
- بيّن له أنك حتكون سعيد بدونه وحتكون أسعد بوجوده.
- لا تربط نفسك بأحد، وتجعله كُل همك وتنسى نفسك وسعادتك.
- خروج بعض الناس من حياتك "رحمة من الله" ما حتدرِكها إلا مع الوقت.
- لا تلهث خلف إنسان لا يُفكر فيك وفي علاقتكم.
- لا تقِف كثير على ذكريات ماضيكم.
- الحمدلله على أروع النعم، نعمة النسيان.
- لا تكره نفسك لعدم استطاعتك في مساعدته.

الحياة أحياناً تتطلب أننا نكون شُجعان/جريئين في مثل ذي المواقف، وكل واحد يقرّر ويختار مصيره فيها بدون تراجع أو تشكيك ولو كانت النهاية مؤلمة.
الضعيف دائماً يتعب أكثر ويكسب أقل. فشوف الّي يناسب مصلحتك ومصلحته.
==========

PS: ياليل على بعض الردود للّي ردت بـ"لا تشغل بالك واترك الرجال لحاله"
ولا الّي تحط "افتراضات" من راسها للناس أنها ما حتتغير، وخلاص أنها خربانه، وما تِصلُح للصحبة ورح تتجه للأسوء لوول..~
ولا الّي حُبهم في "تخريب علاقات مالهم أي دخل فيها"

ترى الرجال يبغى مُساعده عشان تِصلح أموره مع صديقه. مو عشان تعدلوا له تفكيره -التخريب هذا يسمى نميمة قبل ما يسمى غيبة-
تركي برضه عاقل وفاهم ويعرف متى يترك الرجال، ويعرف صاحبه أكثر منكم لو في أمل بيده يغيره ولا لآ.

إذا ذا يُسمى "خصوصيات" ولازم ما نِتدخل فيها، أجل نِتدخل في إيش إن شاء الله؟!
ومتى يجي وقت النصيحة والأمر بالمعروف والنهي عن المنكر؟! ولا تبغوا تمشوا على الجملة العقمية "اتركو الخلق للخالق؟"

ومُشكلة الّي يقولوا الرجال عاقل وبالغ وفاهم... لو هو عاقل وفاهم من جد كان ما اتجه للشراب...
حِلوه ذي، ترانا كلنا بشر ونغلط في الأخير، مهما كان عمرك ولو شايب على وشك الموت بتكون عندك أغلاط ولابد من شخص ينصحه وبيتغير إن شاء الله.

مو كُل الناس كلما تِكبر بتعقل، في ناس كلما كبرت تِنهبل زيادة. وتحتاج أحد يوجهها.
وبالله عليكم حاولوا دائماً أن "تنتقدوا الأفعال لا الأشخاص" عشان نبتعد عن العنصرية والشخصنة.

هذا الّي اكرهه من "كلام الناس" تتدخل في أشياء مالها دخل فيها وتنسى الموضوع الأساسي...
عموماً دخّله من أذنك اليمين وطلّعه من الأذن الثانية. لا تخلي كلامهم يأثر فيك.

وأيوة متعود اسمع كلام/أحكام سيئة عني هنا. بس ما دمت امشي مستقيم فعادي. :) ~
==========

عجبتني يا تركي لِطَرحك ذا الموضوع واهتمامك وخوفك وحرصك على صاحبك 3>~
وتذكر (من جديد) هناك أصدقاء تحمد الله ومن كُل قلبك لأنه منحك أمثالهم ولتواجدهم في ذي الحياة...
فلا تنفعل وتغضب منهم وتقطعهم بسبب مُشكلة وحده فقط، وأحياناً تكون المشكلة في مزاجك أنت وليس بهم.
ما حتخسر حاجة إذا اعطيت المزيد من الفرص.

والله يعينك ويسعدك، موَفق.
ومُتأسف على الرد الطويل، إن شاء الله تطلع بفائدة منها بس >.> ..~
تحياتي :D..~
 

Brewmaster

True Gamer
بصراحة لا تسمع من اللي يقولك اتركه وما عليك منه اصلا ايش فايدة الصداقة اللي بينك وبينه؟ هو ما علمك الا انك اعز انسان يعرفه وان انت ما وقفت معه من يوقف معه,قبل كل شيء لا تحاول تتقص منه بشيء ولازم تتفهمه وتعرف ليش هو يسوي كذا,وتفكه من الناس اللي يشرب معهم,شيء أخير لا تزعله او تضايقه بكثر او تحسسه انك أحسنه لكذا انت تنصحه لأن هذا بيزيد الطين بله,والله يكون معك ويهديه :)
 

"a7mad"

True Gamer
الخمر ممكن يؤدي حياة صديقك في خطر ! انصحه و حاول معاه بجد و لاتتركه ابدا كل ما قابلته تكلم معه و لاتنسى تغير شوي على انك زعلت منه .. و اتوقع راح يفهم
 

"a7mad"

True Gamer
بصراحة لا تسمع من اللي يقولك اتركه وما عليك منه اصلا ايش فايدة الصداقة اللي بينك وبينه؟ هو ما علمك الا انك اعز انسان يعرفه وان انت ما وقفت معه من يوقف معه,قبل كل شيء لا تحاول تتقص منه بشيء ولازم تتفهمه وتعرف ليش هو يسوي كذا,وتفكه من الناس اللي يشرب معهم,شيء أخير لا تزعله او تضايقه بكثر او تحسسه انك أحسنه لكذا انت تنصحه لأن هذا بيزيد الطين بله,والله يكون معك ويهديه :)

قبل ما ادخل توقعت فيه رد بيكون زي ردك .. طبعا انا ماكملت ردك بعد "بصراحة لا تسمع من اللي يقولك اتركه وما عليك منه اصلا ايش فايدة الصداقة اللي بينك وبينه؟" .. قرار خاطئ !

الصداقة شئ كبير .. و اي احد يكون زي اخوك و احسن بالحلام تتركة .. لو كان عندك صديق عزيز عليك بالاحلام تفكر زي هالتفكير
 

Brewmaster

True Gamer
قبل ما ادخل توقعت فيه رد بيكون زي ردك .. طبعا انا ماكملت ردك بعد "بصراحة لا تسمع من اللي يقولك اتركه وما عليك منه اصلا ايش فايدة الصداقة اللي بينك وبينه؟" .. قرار خاطئ !

الصداقة شئ كبير .. و اي احد يكون زي اخوك و احسن بالحلام تتركة .. لو كان عندك صديق عزيز عليك بالاحلام تفكر زي هالتفكير

انت فاهم ردي ولا لا؟ >.>
 

Al Pacino

True Gamer
عمومًا الموضوع كله يعتمد على خويك نفسه .. هل هو " وده " يترك بس مايقدر ولا عاجبه الوضع ومقتنع بالمضار والآثام الي بتتراكم عليه؟
اذا من النوع الأول هذا راح يفيد فيه النصح لو ضغطت عليه ولو أن الطريقة التقليدية (الأضرار الصحية، الأضرار الدينية) ماصارت تفيد مع الغالبية الي طايحين بأشياء مشابهه
بس أنت سو الي تقدر عليه وبرّ ذمتك قدام الله. لكن اذا الرجال عاجبه الوضع وماله نيه يترك بتتعب معه كثير .. بس بالنهاية سو الي يخليك "راضـي" عن نفسك مستقبلًا والباقي على الله.

أو
.
.
.

بلّغ الهيئة عنه ويشوفون شغلهم :D
 

Karim le BOSS

True Gamer
الهيئه خليها اخر حل اذا فشلت محاولاتك كلامك !
 

Al Pacino

True Gamer
^

ترا انا رميتها أستهبال >.>" لا نتشعب بموضوع الهيئة عشان مانطلع من الموضوع.
 

Vorg Zangief

True Gamer
انصحه لو رفض
لا تصاحبه علشان ما يجرك معاه
 

Unknown

Fake Gamer
فيه ردود مبالغ فيها .. يعلم اهله وبلغ الهيئه !! :laugh::
 

Naserano

True Gamer
إنسان بالغ عاقل؟ هو الزمن هذا ترك للناس عقل أساساً!؟

تركي، حديث الرسول واضح وضوح الشمس في يوم مشمس (من رأى منكم منكرا فليغيره بيده، فإن لم يستطع فبلسانه، فإن لم يستطع فبقلبه، وذلك أضعف الإيمان).. الخيار الأول راح استبعده بحكم العلاقة اللي بينكم, حاول معه في الخيار الثاني ولا تتهاون ابداً. ابداً لا تسكت عنه وحاول تهدده بأشياء تعز عليه مثل الصحبة اللي بينكم (ما اكذب عليك، أنا سبق وسويتها مع واحد من اخوياي طاح في أشياء أعظم من الشرب والحمدلله الحين مهتدي وهاديه الله).

طبعاً اذا جيت تكلمه لازم تبدأ معه بأسلوب. تهجمك عليه من البداية راح يزرع فكرة "العناد" في راسه! ومثل ما قلت لك، لا. تسكت. عنه. ابداً. بس بأسلوب!


اذا قدّر الله وما سمع لك. فما لك الا الخيار الثالث. وقتها فعلاً يكون حسابه وهدايته عند الله. طبعاً لو تبي نصيحتي لا تقطع علاقتك معه حتى لو اصر على المنكر. خلها من بعيد لبعيد على الأقل، خوفي تقطعها ويطيح في مصايب أعظم وأدهى.
 
الحالة
مغلق و غير مفتوح للمزيد من الردود.
أعلى