الناس اللي تلعب وقت الدوامات أعطوني هذه القدرة (موضوع حصري للموظفين)

[abdullah-kh]

من العنوان أنك ترجع من الدوام 4 العصر وتحصل طاقة ووقت لتلعب مع الالتزامات الثانية فأنت انسان سوبر، الشئ ما يكفي أن الالعاب اليوم ما تحترم وقتك؛ الألعاب الكبيرة أقلها 40 ساعة لعب لتخلص منها، فالوضع صاير انهاك من شغل بعدها تروح لشغل ثاني (لعبة)، فانهاك فوق انهاك = ذهنيًا وجسديًا بايباي. هذه الفترة حاولت أخذ الجيمنج بجدية لكنه كثير مكلف الشئ ما ينفع معي بدوام الاسبوع، الويكند وقت الراحة الوحيد وتقدر تأخذ شوط فيه، على أيام الجامعة تقدر تتلاعب بوقتك لأنك أنت تحدد جدولك لكن الدوام فيه خط طويل صارم وكل يوم ما تعرف لأي درجة يتغير معاك وللحق هذه النقطة نسبية وتختلف من عمل لعمل لكن لسى الوقت الطويل بالمكتب مجهد ذهنيًا وجسديًا وبعد هذا تقدر تحصل طاقة لعب فذا بجد شئ يحسد عليه

 

[Veeto]

لازم نعرف برنامجك اليوم علشان نجاوب
انا حاليا معدل اللعب العام ساعتين باليوم .. او ثلاث
غالبا تكون بعد العشاء وقبل النوم

الويك اند الصبح .. ومبدئي .. لعبة وحدة بس العبها
اخلصها تخليص كامل .. واذا مستمتع فيها ابحث عن البلاتينيوم وبعدها انتقل للعبه ثانية

 

[abdullah-kh]

لازم نعرف برنامجك اليوم علشان نجاوب
انا حاليا معدل اللعب العام ساعتين باليوم .. او ثلاث
غالبا تكون بعد العشاء وقبل النوم

الويك اند الصبح .. ومبدئي .. لعبة وحدة بس العبها
اخلصها تخليص كامل .. واذا مستمتع فيها ابحث عن البلاتينيوم وبعدها انتقل للعبه ثانية

هو مقصدي أرجع من الدوام مجهد كثير صعب أقدر ألعب بسهولة وإذا لعبت أفقد التركيز لأن ذهني مش بحاله

 

[Omni-Doom]

ارجع بعد الدوام خذ لك دش ينعشك ، بعدين روح على جهازك و اضغط زر التشغيل (نقطة مهمة) ، روح اختار اللعبة اللي تبغاها و العب ، Profit.

P.S. ينصح بالشاهي لضعاف القلوب.

 

[abdullah-kh]

ارجع بعد الدوام خذ لك دش ينعشك ، بعدين روح على جهازك و اضغط زر التشغيل (نقطة مهمة) ، روح اختار اللعبة اللي تبغاها و العب ، Profit.

P.S. ينصح بالشاهي لضعاف القلوب.

 

[AzureFlame]

ماكو حل مع الأسف. يمكن إذا غيرت دوامك ورحت لدوام ما يستنزف كل هالطاقة الجسدية والذهنية منك.

 

[Veeto]

هو مقصدي أرجع من الدوام مجهد كثير صعب أقدر ألعب بسهولة وإذا لعبت أفقد التركيز لأن ذهني مش بحاله

مهربي من ضغوط العمل والحياة هي الالعاب .. فاذا ما كانت تؤدي هالدور كنسلها

العاب فروم سوفتوير الوحيدة اللي تتعب نفسيتي من جذي اذا جننوني اتركهم

 

[AzureFlame]

عبدالله انت متأكد هالتعب بسبب دوامك؟ ترا يمكن it's all in the mind (&). شوف نفسك حتى النوم والأكل يأثر على كل شيء. والله يعينك :/ .

 

[Omni-Doom]

جرب تلعب عالمحمول بس أتوقع ما يستهويك.

أوه صح انت تلعب على البي سي حاليا ؟ اذا ايه ايش نوع الكرسي اللي تستخدمه ؟ ترا يفرق


أيضا الجنرات تفرق ، الألعاب الاستراتيجية كويسة بنص الأسبوع للي شغله يستلزم مجهود جسدي و ألعاب الاكشن الحركية للي شغله أغلبه مكتبي و يستنزف مجهود ذهني.



و إذا مرة مافيك حيل ، عندك أفلام سوني......

 

[abdullah-kh]

أوه صح انت تلعب على البي سي حاليا ؟ اذا ايه ايش نوع الكرسي اللي تستخدمه ؟ ترا يفرق

الكرسي قديم صراحة وإذا أعطيك صورة تقربية هو كذا:

ليش فيه نوعية تنصح بها؟

 

[Omni-Doom]

الكرسي قديم صراحة وإذا أعطيك صورة تقربية هو كذا:

ليش فيه نوعية تنصح بها؟

للأمانة أنصح بكنبة صغيرة (فرد واحد) للراحة التامة ، اذا مافيه مجال (مساحة الغرفة ما تسمح) حاول تجيب أي كرسي مكتبي يكون مليان و مريح لك (جربهم بالمحل) و يفضل يكون جلد إلا اذا انت ما تحب الشيء ذا.

 

[AzureFlame]

الكرسي قديم صراحة وإذا أعطيك صورة تقربية هو كذا:

ليش فيه نوعية تنصح بها؟

خلك نفسي اجلس على الأرض. بتتكسر بس تحس الدم يتحرك على الاقل + Nostalgia (&). وابتعد كل البعد عن الMouse والKeyboard.

 

[sogeking]

صعب جداً تلقى وقت وخاصة للألعاب الطويلة.

أنا أخذت اجازة اسبوع عشان إلدن رينج وحطيت فيها 100 ساعة وما خلصتها ويوم رجعت للدوام قل عدد ساعات اللعب بشكل واضح و صرت أسحب على الإستكشاف وأمشي مع القصة ومالي خلق أفكر يعني معد أقرأ الإيكوبمينت اللي اخذها وما أعدل على البيلد حقي زي قبل, والحين بعد تقريباً 9 أيام دوام توني اوصل 130 ساعة (يعني 30 ساعة بس زاد بوقت لعبي خلال أسبوعين دوام تقريباً) هذا وأنا مضحي بأشياء كثير عشان احصل هالوقت زي النادي مثلاً غير إني سحبت على هورايزن, يا زين أيام الجامعة بس

يبيلها ماجستير قريب الظاهر عشان نحصل وقت خاصة قبل لا تنزل بريث اوف ذا وايلد 2

 

[Cloud_no_sora]

اني اصلا يخلص دوامي بالاربعة العصر ومع الشوارع التعيسة والزحمة احيانا كثيرة ارجع بعد الـ5 ... مثل ما قال عبدو دوش وبعدها اروح للجهاز واحاول كل يوم العب اقل شي ساعتين ومثل ما قال فيتو هي الشي الوحيد الي ينسيني مشاكل الحياه لذا كان لازم اتاقلم مع اسلوب هذه الحياه
حتى بالايام الي اطلع بيها مع الشباب مثلا احاول اقل شي العب نص ساعة قبل او بعد الطلعة

 

[abdullah-kh]

اني اصلا يخلص دوامي بالاربعة العصر ومع الشوارع التعيسة والزحمة احيانا كثيرة ارجع بعد الـ5 ..

ايه والله نسيت هذه النقطة أحيانا مع الزحمة أوصل 6 والطريق لحاله بعد الدوام متعب لأن محد يسوق زين وقتها xD فتحتاج تركيز فيه ^^.

 

[Gavroche]

@Veeto

كيف وضع اللعب اذاعندك اطفال ؟

دائما افكر بأن تكوين العائلة راح ينسيني شيء اسمه فيديو جيمز، مسؤوليات تزيد ولازم وقتك يروح اغلبة للعمل ورعاية الاطفال

 

[خشبة]

اعاني من نفس المشكلة.

دوامي من ٩ الى ٦ وكثير اطلع ٦:٣٠، ثم اوصل البيت (او الاستراحة ) على ٧-٧:٣٠ ، واذا رجعت واستقريت شوي، مالك خلق تسوي اي شي وتحس انك مشتت وكل اللي تبيه تريح على الجوال، الويكند هو المتنفس الوحيد لممارسة الهوايات.

 

[Veeto]

@Veeto

كيف وضع اللعب اذاعندك اطفال ؟

دائما افكر بأن تكوين العائلة راح ينسيني شيء اسمه فيديو جيمز، مسؤوليات تزيد ولازم وقتك يروح اغلبة للعمل ورعاية الاطفال

يعتمد على اعمار الاطفال .. عموما وقتي المفضل بعد العشاء وقبل النوم .. الاطفال بهالوقت بدؤوا مرحلة التعب وقرب النوم
واذا كانوا في المدرسة .. هالوقت يكونوا في مرحلة الواجبات او تجهيز لليوم الثاني

وقتك بيقل بطبيعه الحال .. بس اذا تبي .. تقدر

 

[Veeto]

اعاني من نفس المشكلة.

دوامي من ٩ الى ٦ وكثير اطلع ٦:٣٠، ثم اوصل البيت (او الاستراحة ) على ٧-٧:٣٠ ، واذا رجعت واستقريت شوي، مالك خلق تسوي اي شي وتحس انك مشتت وكل اللي تبيه تريح على الجوال، الويكند هو المتنفس الوحيد لممارسة الهوايات.

لو انا مكانك .. بقعد الصبح من 6 الى 8 او 8 ونص وقت مناسب للعب

 

[bits]

من الآخر كذا اذا دوامك مكتبي وكامل من ٨ و ٩ ل ٥ ومتزوج وعندك عيال فرصتك الوحيدة انك تخلي زوجتك تشتغل وتقعد انت في البيت.

 

[Gavroche]

اتوقع ببساطة اذا عندك شغف بالهواية راح تلقى وقت ومكان علشان تسويها

الله المستعان شكلي باخذ سويتش علشان عنصر المحمول واقضي وقتي فيه (&)

 

[Big Basha]

تكون منشغل طول الوقت و ولا يمديك تريح كل بعد فترة؟ و مكان شغلك في مرمى نظر شخص يشرف عليك؟ إذا لأ خذ معاك سويتش و سماعات. في طريقتين للعب على الأقل:

١) و انت جالس بدل ما تطقطق على الجوال تستغل الوقت في اللعب. حط السماعة على إذن واحدة بس عشان تسمع إذا أحد جايك و محد يفاجئك.
٢) أو ممكن تخبي السويتش في السيارة، تسوي نفسك بتطلع تسجر بس تروح تلعب شوي

طبعا ما تنفع مع الألعاب الي يحتاج لها جو و اندماج بس الألعاب الي تأخذها طقطقة و ما تمانع تلعبها على تقطع

 

[Ria]

موظف وتبي تلعب؟ ركز بالانتاج واترك الألعاب للأطفال يا البالغ.


هو بكل جدية يعتمد حسب جدول يومك لكن لو كنت تمارس نشاطك بدون تنظيم مجرد أنك تروح وترجع من الدوام للبيت ثم ما يكون لك وقت تسويه لشيء ودك فيه (وقت الراحة من فعل ولا شيء مثلاً) فهذي مشكلة حتى بنسبة لطلاب الجامعات لمن وقتك كامل يروح لشيء أو اثنين هذي مشكلة بتنظيم جدول نشاطك اليومي.


مثل ما اللعب والراحة لهم وقت حتى مسؤولياتك لها وقت لا تبدي شغله على حساب راحتك ولا مسؤولياتك على حساب لعبك.

 

[venom_snake]

اتوقع يعتمد على الشخصيه. بعض الناس الأماكن المليئة بالناس مثل الدوام يسحب طاقته النفسية فبعد الدوام تحصله تعبان ومرهق عقليا. وبعض الناس بالعكس يستمد طاقته من الأماكن المزدحمة فتجد مستوى طاقته ما تغير. أفضل حل هو القيلوله من نص الى ساعه. ممكن تسوي re-set لهالمشكله.

 

[Netero]

ماني موظف، طالب جامعي، لكن برضه أحس مافي وقت ابدا، مشكلة الجامعة مو بالدوام بقد كمية الاساينمينتس/ مشاريع/كويزات/اختبارات اللي تجيني، فوقتي فالبيت وبرا البيت كله مكرس للجامعة، فرصتي الوحيدة للعب هي الأيام القليلة اللي أكون فاضي فيها وعندي اليوم كامل.

 

[ABUALI]

أنا أسوأ واحد ممكن يحط رأي في هذا الموضوع
لكن مع الدوام أحصل وقت ألعب... مو كل يوم ولكن في بعض الأيام ولساعات محدودة، ٣ كحد أقصى.
الدوام من ٨ لأربع وبالشارع حط ساعة قبل وعقب، يعني ١٠ ساعات، هذا غير اذا فتحت اللابتوب في البيت وقعدت اطقطق على الأكسل... ومع هذا أحصل وقت ألعب ولو نص ساعة.

أظن أني من الشياب اللي تعودت على هذا، غالب الأوقات بما أن أسرتي تتكون من أطفال وزوجة يحتاجون اهتمام كبير... مراعاة الأطفال والتعاون على شغل البيت صار جزء لا يتجزء من أموري اليومية... فإذا خلص اليوم في الغالب أتفرغ لهوايتي، عاد نامو الجهال لو ما نامو الساعة ٩ بالليل يكون وقت اللي أنفس فيه عن نفسي وأوقات يكون مع الجهال مع زوجتي مع البي سي... في شطحات أوصل أوقات فيديو جيمز للساعة ٢ منتصف الليل ويكون الدوام يوم ثاني بنصف الطاقة التشغيلية
معدل اللعب عندي قل بشكل كبير ولكني لا زلت أستمتع بالقليل... مو لازم ألعب كل شي، جاد اوف وار للحين ما خلصتها وأنا مبدي فيها من قبل شهر تقريبا... وأتنقل من بين لعبة وأخرى. ممكن اذا كبرو الصغار يتوفر عندي وقت أكثر ولكن الموجود الآن بالنسبة للفيديو جيمز نحمد الله عليه.

 

[النسر الأسود]

بداية الموضوع يعتمد على الالتزامات والنشاطات خارج الدوام. شخص عازب المفروض عنده على الأقل ساعتين باليوم للألعاب حتى لو كان موظف. غير ذلك لازم تسأل المتزوجين ويلي عندهم أولاد!

بالنسبة للحافز، فشخصيا بالنسبة لي هو اللعبة نفسها. اذا في لعبة مستمتع فيها بشكل كبير فدائما ألقى وقت ألعب فيها، والعكس صحيح.

 

[retha]

أشوف حلّك الوحيد هو التقاعد.

 

[Bill Cober]

معدل اللعب عندي قل بشكل كبير ولكني لا زلت أستمتع بالقليل... مو لازم ألعب كل شي

أنا أيضا صرت أعمل هذا الشئ وطبعا أكثر يوم ألعب فيه هو الجمعة لأنه day off

 

[Fatani Heart]

أنا دوامي 8 ساعات أيضاً

لكن بتكلم عن عدة مفاهيم وأغلب عدم تمكنك من اللعب

1. الشغف للألعاب قل.
يعني من كلامك بالموضوع ذاكر كلمتين وانت توصف لعبك. "انهاك وشغل ثاني" و" أخذ الجيمنج بجدية لكنه كثير مكلف"
الألعاب ما صارت تعتبر مجرد هواية تقضي وقت ممتع فيها وتنسيك أشغالك وترّوح فيها عن نفسك من أتعاب الوظيفة بل صار عبئ آخر زائد بالنسبة لك.
وهنا اقول لك خذ استراحة طويلة من الألعاب وابحث عن متنفس ثاني, لأنه مهما حاولت بتتعب نفسيتك زيادة لأنك بتغصب على فعل شيء فكرته الأساسية هي المتعة والترفيه.
هو ليش نشوف ناس شغفهم لما بيروحوا عن نفسهم نشوفهم يلفلفوا في الشوارع بالسيارة حتى وقت الزحمة وممكن ليلة خميس بعد دواماتهم! لأنه ببساطة حتى لو طاقتهم صفر هذا الشيء يبسطهم ويجدد من روحهم ولا يستهلك من طاقتهم زي ما نشوفه نحن في كُره السواقة.
نفس الشيء أنا من الطلاب اللي كنت اكره حصة البدنية (انهاك وجهد) وفي طلاب غيري يعشق الحصة والكورة وهو متنفسه وقت الدوام وحتى في نفس اليوم عادي بعد المدرسة يلعب كورة من العصر لين الليل.

2. مشاغل الحياة والأوليات.
أصبحت أكثر من قبل وطبيعي كل ما كبر الشخص كثرت مسؤولياته.
وتلاقي نفسك وأنت تلعب طول الوقت مشتت لأن في نفسك في ذاك الصوت اللي يقول "أحسن أخلص أو اعمل الحاجة الفلانية أفضل"
الفكرة في جعل الهواية والتسلية نفسها تتزاحم مع "الأوليات" عندنا بدون العقلية ذي مستحيل بنستمتع بالهواية.
هي فيها صعوبة في جعل الهواية أولية لكن في حلين.
تعيد ترتيب أولياتك وأكيد بتشوف تضحيات وأنت تعملها وبتصير انتاجيتك في الحياة أبطئ.
تقلل من مشاغلك (إذا لك القدرة في التحكم في ذا الشيء) وتخفف عن نفسك جسدياً وذهنياً.

3. مفهوم الطاقة والـexpanding وقيد تكلمت عنه في موضوع Eloo

نحن البشر عندنا طاقات هائلة لكن لازم نغصب نفسنا بالظروف عشان نطلعها.
أنا ما استهين بمشكلتك وطبيعة عملك بالمقارنة لكن أنا في مرحلة ما في حياتي كنت حرفيا اطلع الساعة ٨ الصبح دوام الجامعة واخلص ٤ أحيانا (يتخللها بريكات طويلة والجامعة بعيدة عن المنزل فلا يمكنني الرجوع) ومن الجامعة لأحد المول دوامي يبدأ من ٤ ونص العصر ل١١ ونص الليل اقعد في زحمة زبائن المول، استمر ذا الروتين سنتين بالتمام، حياتي كانت كلها ما فيها هدوء أو قعدة لنفسي كلها من ازعاج الجامعة لازعاج الزبائن للنوم ساعة ١٢ وتنعاد الدائرة كل يوم.
ما كان في وقت لنفسي أو لأهلي أو للتسلية أو الاجتماع مع زملاء الدراسة أو الاقارب. حتى دراسة الكويزات وحل الواجبات كنت اعملها أحيانا في المول أو اسهر الليل.
المغزى من قصتي نحن عندنا طاقة كامنة ووقت لكن ما نعرفه الا اذا مرينا بظروف صعبة، نستصعب نعمل ونبدأ الأشياء (ممكن بسيطة) بحجة التعب (طبعا اذا التعب والارهاق حاجة صحية أو نفسية هذا موضوع آخر)
أنت حاولي تضغطي على نفسك وتحطي مهمة وحدة فقط في اليوم، فقط مهمة وحدة.
يوم الأحد مثلا امارس لعب الفيديو جيم، الاثنين متابعة فيلم كان نفسك تتابعيه من زمان، الخميس مقابلة الناس، الجمعة ترتيب أمور المنزل. وهكذا. وطبعا الشيء/المهمة الواحدة هذي لازم تغصبي نفسك فيها لين تصير روتين وما تقولي تعبانه وتتكاسلي، صح هو في الأخير مجرد ترفيه ومو من الأوليات انك تفعليها لكن أنت تحتاجي تغصبيه ليزيد كمية الطاقة لديك في يومك زي ال expanding ولا يكون العمل فقط هو اللي يستخرج الطاقة من جسمك ويتهيئ لك في عقلك انه طاقتك كلها فرغتك من العمل. بالتوفيق لك.

4. نوع اللعبة نفسها
بعض الألعاب نفسها ثقيلة على النفس.
حتى لو شايف أنك مستمتع بيها. فكرة النظر لعدد ساعات انهاءها وانتظار متى تخلصها هذا بحد ذاتها مشكلة.

5. كبر العمر
نظرتك للحياة و"اللعب واللهو" اختلفت ببساطة.

بالنسبة للبيئة والجلسة ما انصحك تكلف على نفسك بالشراء والتجهيز زي ما جهزت الـPC وحسيت أنه بيغير شيء وبتأخذ اللعب بجدية.
إذا ما ضبطت العقلية ورؤيتك الداخلية, الأشياء الخارجية ما بتغير شيء.