استفسار عن برنامج ارامكو للابتعاث

[person-x]

السنة انتهت تقريبا وما بقى كثير ويبدا التقديم على الجامعات
عندي كم استفسار عن برنامج ارامكو للابتعاث:
1- الي اعرفه ان ارامكو تعطي الطلاب المقبولين في البرنامج سنة اعداد مكثفة وفي نهايتها يقدم الطلاب على عدد من الجامعات الي تحددها الشركة .. الي استغربت منه ان mit كان من ضمن الجامعات ، والي سمعته عنهم ان القبول صعب جدا ويتطلب معايير استثنائية وانجازات على المستوى الشخصي ، فهل فعلا الكلام هذا صحيح ولا فيه مبالغة ؟ لاني ما حصلت متطلبات في موقعهم غير درجة معينة في التوفل والسات فقط ، واذا لا فهل احد يعرف طلاب قبلهم المعهد؟ وهل الخريجين من المعهد لهم اولويات ومزايا معينة في التوظيف (هنا في السعودية)؟

2- لو افترضنا اني لسبب من الاسباب قررت بعد نهاية السنة التحضيرية ترك البرنامج ، فهل يترتب عليه اي اجراء ؟ دفع رسوم مثلا او حرمان من الدراسة في جامعات معينة ؟

3- رايكم في برنامج سابك مقارنة بارامكو او لو حصل لي ادرس في البترول مثلا فهل افضلها على ارامكو ؟

 

[iPeace]

١- نعم صحيح، mit يتوقعون منك تجيب درجة عالية في التوفل (١٠٠+) ودرجة كاملة في السات في قسم الرياضيات، وهالشي مش مستحيل بس صعب. الأهم في القبول عندهم هو الessays، لازم تبين لهم ان مش طالب افرج وتتكلم عن شخصيتك وعدة امور تثير اهتمامهم فيك، بس بما انك طالب انترناشونال فرصتك في القبول اكبر من الامريكان، وهالشي في اغلب جامعات امريكا لان رسوم الدراسة حقتك اغلى وهم يبون الكامبوس يكون فيه تنوع في الاعراق، او هذا اللي لاحظته. في دفعتنا ٢٠١٠-٢٠١١ طالب واحد بس انقبل وعلى ما اعتقد انه كان طالب ارامكو الوحيد هناك من ٥ سنوات. ما ادري عن المزايا والله، بس اكيد بتفيدك اذا تبي تكمل ماستر.

٢- المفروض انهم يخلونك تدفع كل المكافات اللي انصرفت عليك، بس معانا ناس انطردت ولا دفعوهم شي.

٣- ما اقدر افيدك، بس البرنامجين ممتازين ويضمنون لك وظيفة. ارامكو ممكن تبعثك داخلي حتى بعد بداية البرنامج بس شروطهم شوي صعبة، مثلا اذا انت اللي قايم بأهلك وما تقدر تطلع برا.

 

[Royal Spark]

المختصر المفيد:
الدراسة في أرامكو أو سابك أفضل(و الأولى مقدمة لأن فرصة قبولك أعلى)+إذا تم قبولك في برنامج أرامكو تقدر تقدم على جامعة الملك فهد.
الإم آي تي:مع إحترامي هي مجرد ضجة فقط لا غير، ولا توجد شروط تعجيزية+طلاب كاوست يتم إرسالهم هناك عشان الدراسة بشكل عادي.
بالعربي أن تدرس في أي جامعة في أمريكا ما بتفرق عندك خصوصا إن وظيفتك بتكون جاهزة بعد التخرج في أرامكو أو سابك.
ترك البرنامج=ما أعرف إذا فيه لكن ما أعتقد فيه غرامة+أنت لما تدخل واحد من برامج الإبتعاث(سابك أو أرامكو)لا يوجد سبب يدفعك أن تتركهم.
أرامكو تطلب إختبار قبول(تحصيلي خاص بها)
بعتمد على:
70% :لغة إنجليزية، وما تشبه لا من قريب ولا من بعيد الترهات(إعذرني على الكلمة)التي قد درستها في المدرسة.
30% :رياضيات، شبيه جدا بالقياس، مع بعض الأساسيات من دراستك الثانوية.
القبول:
أرامكو:نسبة مواد علمية فقط(بدون المواد الأدبية من النحو و مواد الدين و لا ننسى الأدب)تكون فوق 90% +تتم المفاضلة الأعلى فالأعلى.
البترول:مركبة تحصيليه فوق 87(ما في أي سنة كانت أعلى من كذا)50% تحصيلي 30% قياس 20% مدرسة.(و كانت في عدة محاولات لإسقاط المدرسة من الإعتبار و لكنها بائت بالفشل).
سابك:62 طالب من أفضل من تقدم للبرنامج. ما معناه:لا توجد نسبة محددة.
أتمنى أفدتك و لو قليلا.

 

[D.K]

زي ما قالوا الشباب، MIT كونت اسم وضجة في نفس الوقت، فإذا كنت مهتم بالعلوم التطبيقية فوجهتك الأولى بتكون Caltech لكن حط بالك إن القبول فيها أصعب من MIT. والطلاب الـInternational دائماً فرصهم أقل من الأمريكين، لكن يحطوا معايير أقل للطلاب الأجانب.

 

[person-x]

يعطيكم العافية شباب ، ما قصرتم

 

[squall leonhart]

باعطيك نصيحه بما انه عندي اخوي قرب يتخرج من من هندسة كهربائية من ارامكو و واحد لسى خلص السنه التحظيره من سابك و انقبل في تخصص هندسة معادن و انا نفسي انقبلت بارامكو بس سحبت عليهم و دخلت طب .. برنامج ارامكو اكثر تنظيما و افضل خبره .. اول شي السنه التحظيره الي هنا بتكون اعداد لك انك تبعد عن اهلك و لكن لسى بتكون قربب .. + بتخلص كل الاختبارات اللازمه باقل من سنه .. و ما تروح امريكا الا و انت مقبول خلاص ..

سابك .. تروح امريكا بسنة و نص تحظير مالها مكان من الاعراب .. و ما يخلوك تقدم الا بعد ما تخلصها .. اخوي كان بجامعه في نيويروك و بعدها نقلوه بجامعه في نيو جيرسي لان ادارة سابك اختلفت مع الجامعه .. و الان هو انقبل بجامعه ثالثه يعني تنقل بين 3 جامعات باقل من سنه و نص و ذا شي سلبي جدا ..

بالاخير كل شي يعتمد على التخصص الي تبغاه و فين متوفر هل هو في ارامكو و لا سابك

 

[slifer dragon]

1- يب أرامكو تعطيك سنة كاملة تدريب وتعليم إنجليش ورياضيات ومواد داخلة بتخصصك. بالنسبة لإم آي تي فقبولها مثل ما سمعت صعب جداً! أنا بنفس دفعة iPeace وما إنقبل غير طالب واحد ما شاء الله عليه. بس ما أنصحك تروح هناك.. أشوف ستانفورد أفضل. بس هو على العموم يعتمد على تخصصك. بالنسبة لخريجين إم آي تي, أتوقع الإسم يعني شيء على شهادتهم وأكيد بيكون فرق.

2- نفس الكلام, المفروض تدفع كل الرواتب وزيادة عليها الكتب وغيرها. بس ما أتوقع يجبرونك. بس أتوقع لو تركتهم ما لك أمل ترجع تتوظف بالشركة.

3- أقول لك أرامكو. ما جربت سابك لكن سمعته أقل بكثير من برنامج أرامكو.